ICIGWA CA 15

Kuvugana ubujijutsi

1 Abatesalonika 1:5

INCAMAKE: Niwerekane ko wajijutse yuko ivyo uriko uravuga ari ukuri be n’uko bihambaye.

Niwitegure neza. Nusubiremwo ikiganiro cawe gushika utahuye ivyiyumviro nyamukuru n’ukuntu Bibiliya ibishigikira. Nugerageze kubishikiriza mu majambo make kandi yoroshe. Niwibande ku kuntu bizofasha abakwumviriza. Nusenge usaba impwemu nyeranda.

Nuze urasubiramwo ikiganiro cawe n’ijwi ryumvikana kugira ivyiyumviro nyamukuru vyiyandike mu bwenge bwawe no kugira uzogishikirize neza.
Nukoreshe amajambo aserura ukujijuka. Nukoreshe amajambo yawe, aho gusubiramwo ivyanditse ku rupapuro. Nukoreshe imvugo yerekana ko udakekeranya ku vyo uriko uravuga.
Niwerekane ko wajijutse. Nukoreshe ijwi rikwiye. Nuze uraraba abakwumviriza nimba ata co bitwaye aho iwanyu.

Kuvugana ubujijutsi ntuvyitiranye no guhuruduka, kudakurwa kw’ijambo canke guhata abandi. Naho woba uriko uvugana ubujijutsi, ukwiye kubigira ku buryo abakwumviriza baguma bumva ko ubakunda.