Jya ukora umurimo wo kubwiriza mu buryo bunonosoye—Umenya uko wasubiza nyir’inzu igihe yarakaye

Impamvu ari iby’ingenzi: Abantu benshi duhura na bo mu murimo wo kubwiriza usanga bafite ikinyabupfura. Icyakora, Yesu yari yarahanuye ko hari abantu bari kutwanga (Yoh 17:14). Ku bw’ibyo, igihe nyir’inzu aturakariye ntibyagombye kudutangaza. Iyo ibintu nk’ibyo bitubayeho, tuba tugomba kwitwara mu buryo bushimisha uwo duhagarariye, ari we Yehova (Rom 12:17-21; 1 Pet 3:15). Nitubigenza dutyo tuzatuma ibintu bitarushaho kuzamba. Nanone bizabera nyir’inzu n’abatwitegereza ubuhamya, ku buryo bashobora kuzatega amatwi abandi Bahamya ba Yehova bazaza kubabwiriza.—2 Kor 6:3.

Uko wabigenza:

Jya ukomeza gutuza kandi ugaragaze umwuka wa gicuti. Ibyo bishobora gucubya uburakari. Ntukumve ko nyir’inzu ari wowe arakariye (Umubw 7:9). Ashobora kuba yarakajwe n’ibibazo yifitiye cyangwa ukaba wamusuye mu gihe kidakwiriye. Nubwo yaba yarakajwe n’ubutumwa bwacu, akenshi biba byaratewe n’uko yigishijwe ibinyoma.—2 Kor 4:4.
Jya umusubiza mu bugwaneza kandi ufite ikinyabupfura (Imig 15:1). Ese waba umukanguye cyangwa umurogoye? Nubwo ubusanzwe atari ngombwa ko dusaba imbabazi ku bw’umurimo dukora, ugomba kwicisha bugufi ugasaba imbabazi kubera ko wamusuye mu gihe kidakwiriye. Ese yaba yaraturakariye bitewe n’ibintu yumvise batuvugaho? Niba ari uko bimeze, ushobora kumubwira uti “nsobanukiwe impamvu ibyo byakurakaje. Icyakora, ibyo watwumviseho si ukuri. Ese wakwemera ko mbigusobanurira?” Ese yaba atemera imwe mu myizerere yacu, urugero nko guca mu itorero abanyabyaha batihana cyangwa kudaterwa amaraso? Ushobora kumubwira uti “ndakumva rwose. Hari n’abandi bahangayikishwa n’ibyo bibazo. Ese nkwereke aho iyo nyigisho iboneka muri Bibiliya?”
Niba umuntu yarakaye cyane, byaba byiza uhise ugenda utiriwe ugira icyo umusubiza. Niba akubwiye ko atifuza ko Abahamya ba Yehova bazongera kumugarukira mu rugo, ushobora kumwizeza ko icyo cyifuzo cye kizubahirizwa.

Gerageza gukora ibi muri uku kwezi:

Muri gahunda y’iby’umwuka mu muryango muzitoze ibivugwa muri iyi ngingo.
Nimumara gutandukana na nyir’inzu warakaye, ujye ubaza uwo mwajyanye kubwiriza uko mwari kubigenza kugira ngo mumusubize neza.