Jya ukora umurimo wo kubwiriza mu buryo bunonosoye—Ubwiriza mu ifasi ikorerwamo imirimo y’ubucuruzi

Impamvu ari iby’ingenzi: Kubera ko abantu benshi bamara amasaha menshi mu kazi, uburyo bwiza bwo kubagezaho ubutumwa bw’Ubwami ni ukubabwiriza tubasanze aho bakorera. Kubwiriza mu mafasi akorerwamo imirimo y’ubucuruzi birashimisha kandi bigira icyo bigeraho, kuko buri gihe baba bahari kandi bakaba bagira ikinyabupfura, bitewe n’uko umuntu wese babonye baba batekereza ko ari umukiriya. Kugira ngo ababwiriza bagire icyo bageraho, bagomba kugira ubushishozi, bakambara neza kandi bakirimbisha uko bikwiriye (2 Kor 6:3). Ku bw’ibyo rero, umugenzuzi w’umurimo agomba kugenzura abyitondeye uko amafasi akorerwamo imirimo y’ubucuruzi abwirizwa, n’abayabwirizamo.

Uko wabigenza:

Jya utegura uburyo bwo gutangiza ikiganiro mu magambo make. Nidutwara igihe abacuruzi, ubutaha ntibazemera ko tuganira.
Jya uhitamo igihe gikwiriye, nta bakiriya benshi bahari, urugero wenda bagifungura.
Jya wihatira kuvugana n’umukoresha ku ncuro ya mbere. Jya ugira urugwiro kandi urangwe n’akanyamuneza. Ushobora kuvuga uti “twahisemo gusura by’akanya gato abantu aho bakorera kuko kubasanga imuhira bigoye.” Tangiza ikiganiro mu magambo make, umuhe inkuru y’Ubwami, igazeti cyangwa ikindi gitabo. Kugira ngo adakeka ko tugurisha ibitabo, ni byiza ko tudahingutsa ijambo “impano,” keretse atubajije aho amafaranga dukoresha ava.
Niba umukoresha ari umuntu mwiza, musabe ko wavugisha abandi bakozi by’akanya gato. Mu mazu y’ubucuruzi amwe n’amwe, hari ubwo byaba byiza ubajije niba wasiga ibitabo byo gusoma aho abakozi baruhukira.
Jya ugira ubushishozi kandi uhuze n’imimerere. Urugero, niba umukozi arimo avugana n’umukiriya cyangwa ahuze, jya utegereza kugeza aho ahugukiye, ubone kumuvugisha.

Gerageza gukora ibi muri uku kwezi:

Muri gahunda yanyu y’iby’umwuka mu muryango y’ubutaha, muzitoze uko mwatangiza ibiganiro mu gihe musabwe kubwiriza mu ifasi ikorerwamo imirimo y’ubucuruzi.