Kuthimbana na Mipingizo toera Kufuna Mulungu — BHIBHLIYOTEKA MU INTERNETI ya Torre de Vigia

NSOLO WA REVISTA | UTHAMBI UNACITISA ANTHU KUKHONDA KUFUNA MULUNGU

Kuthimbana na Mipingizo toera Kufuna Mulungu

‘Funa Yahova, Mulungu wako, na ntima wako onsene, na moyo wako onsene, na ndzeru zako zonsene. Anewa ndi matongero makulu na akutoma.’—Yezu Kristu, 33 N.W.a

Anthu anango asaona kukhala kwakunentsa kufuna Mulungu. Kwa iwo Mulungu asaoneka ninga wakukhonda kubveseseka, wakunentsa kunfendedzera, peno wakuipa. Dingani mafala anatowerera:

“Ndikhaphembera kuna Mulungu toera kundiphedza, mbwenye mu ndzidzi ubodzi ene, ndikhapibva kuti iye akhali kutali, na wakunentsa kakamwe kunfendedzera. Kwa ine, Mulungu akhali wakukhonda kuoneka, pontho wakusowa ntsisi.”—Marco, Italya.

“Ngakhale kuti ndikhafuna kakamwe kutumikira Mulungu, iye akhaoneka ninga ali kutali kakamwe. Ndikhanyerezera kuti iye akhali Mulungu wakunentsa wakuti basi ene asafuna kutitcinyusa. Nee ndikakhulupira kuti iye ndi wakukoma ntima.”—Rosa, Guatemala.

“Pikakhala ine mwana, ndikakhulupira kuti Mulungu akhasaka madodo athu, na cifuno ca kutitcinyusa ninga akuthema pyenepi. Mu kupita kwa ndzidzi, ndikhamuona ninga wakukhonda fendedzereka. Mulungu akhali ninga nkadamu wa atongi wakuti asatsalakana pinthu pya anthu anatsogolera iye, mbwenye, wakuti mwandimomwene nkhabe kuatsalakana mwadidi.”—Raymonde, Kanada.

Musanyerezeranji? Kodi Mulungu ndi wakusowa ufuni? Akristu asacita mbvundzo unoyu kutomera pyaka madzana ndulimu. Mwandimomwene, mu pyaka 500 mpaka cifupi na pyaka 1500 N.W., Akristu azinji aunthawatawa nee aphembera kuna Mulungu wamphambvu zonsene. Thangwi yanji? Anthu akhan’gopa kakamwe. Nyakulonga pyakucitika Will Durant apifokotoza tenepa: “Kodi mbipidakwanisika tani nyakudawa kucita phembero kuna Mulungu wakuipa kakamwe na wakukhonda fendedzereka?”

Kodi Mulungu akhaoniwa tani ninga “wakuipa kakamwe na wakukhonda fendedzereka?” Kodi mwandimomwene Bhibhlya isapfundzisanji thangwi ya Mulungu? Kodi kupfundza undimomwene unalonga pya Mulungu unakuphedzani tani toera kunfuna?

[Cidzindikiro capantsi]

a Mateo 22:37, 38.

[Mafoto pa tsamba 3]

[Mafala Anafokotoza Pithundzithundzi]