KUTAWIRWA KWA MIBVUNDZO YA BHIBHLYA

Kodi Dziko Yapantsi Iri Na Cifuniro?

Dziko yapantsi ndi yakuthema toera kukhala na umaso. Iyo iri na madzi akukwana akuti ndi akufunika mu umaso. Kupendama, kuzungulira kunacita dziko, pyonsene ndi pyakufunika toera kuti madzi a mabara akhonde kuuma na mphepo, peno akhonde kuwira. Pontho, thambo ya muya wa dziko (atmosfera terrestre) pabodzi na mphambvu ya muya wa dziko (campo magnético da terra) isatsidzikiza dziko ku mphambvu ya dzuwa yakuti ndi yakugopswa. Pyakudzumisambo ndi pyakuti pinyama pisafuna miti, miti isafunambo pinyama toera kukhala maso. Natenepa, anthu azinji afika pakudzindikira kuti dziko yapantsi yacitwa na cifuniro.​—Lerini Izaiya 45:18.

Mbwenye panango imwe munasaka kudziwa: ‘Kodi nyatwa na uipi pisacita khundu ya cifuniro ceneci?’​—Lerini Deuteronomyo 32:4, 5.

Kodi Cifuniro Ca Dziko Yapantsi Cinadzakwanirisika?

Dziko yapantsi yacitwa toera kukhala mudzi wakutsandzayisa kwa anthu akulemedzana unango na ndzace, mbafuna Nciti wawo. Natenepa, umaso wa anthu uli na cifuniro cikulu kakamwe kupiringana wa pinyama peno miti. Ife tinakwanisa kubvesesa kuti mbani Nciti wathu, kudziwa na kusangizira ufuni wace na ulungami wace.​—Lerini Koelete 12:13; Mikeya 6:8.

Nciti wathu anakwanisa kucita pyonsene pidatonga iye kucita. Natenepa, tinakwanisa kukhala na cinyindiro cakuti iye anadzamalisa uipi na nyatwa, mbacitisa dziko yapantsi kukhala mudzi waungwiro na wakutsandzayisa kwa anthu.​—Lerini Masalmo 37:11, 29; Izaiya 55:11.

Toera kudziwa pizinji, onani nsolo 3 wa bukhu iyi, Kodi Mwandimomwene Bhibhlya Isapfundzisanji?, yakubuluswa na Mboni za Yahova

Isagumanikambo mu site www.jw.org