‘Sasanyirani Njira ya Miyendo Yanu’ Toera Kuthambaruka

PIDABULUKA mbumba ya Mulungu ku Babilonya mu caka 537 M.N.W., Yahova atsalakana kakamwe ulendo wawo wa kuenda ku Yerusalemu. Iye aapanga: ‘Bulukani mbamusasanyira njira ale ali kubwera. Njira yeneyi inafuna kusasanyira imwe, ikhali nseu wadidi nee kuonekambo miyala.’ (Iza. 62:10) Nyerezerani kuti Ayuda anango akwanisa tani kucita pyenepi. Ale adatoma panango asasanya nseu, panango kudzadza na kuzereza madjenje na makolong’ondo. Kucita pyenepi mbakudaphedza abale awo akuti akhali nduli mwawo paulendo wawo wakubwerera ku dziko kwawo.

Tinakwanisa kuphatisira uphungu unoyu ninga citsandzo ca njira inatsogolera ku pifuno pyauzimu. Yahova asafuna kuti atumiki ace onsene afambe munjira yakuti nkhabe mipingizo. Mafalace asaticenjeza: “Sasanyira njira ya miyendo yako, natenepa, njira zako zinadzakhala zakulungama.” (Mis. 4:26, Tradução do Novo Mundo) Mwakukhonda tsalakana khala ndimwe mphale peno nkulu, munakwanisa kuphindula na udziwisi wa uphungu wa Mulungu.

SASANYIRANI NJIRA MU KUCITA PISANKHULO PYADIDI

Panango mwabva kale anthu mbakalonga mafala ninga awa kwa mphale peno ntsikana: ‘Mwana apumirwa uleʼ peno ‘Mwana anadzakhala munthu ule!ʼ Aphale na atsikana azinji ali na ungumi wadidi, kufewa nsolo, na cifuno cikulu toera kupembera. Mwakulinganira, Bhibhlya isalonga: “Aphale asagaya na mphambvu zawo, ankhalamba mbiri yawo ndi imbvi.” (Mis. 20:29) Mphale peno ntsikana anaphatisira maluso ace na mphambvu zace toera kutumikira Yahova, anakwanisa kukwanirisa pifuno pyauzimu na kugumana kutsandzaya kwandimomwene.

Ninga pinadziwa imwe, maluso a aphale na atsikana athu ndi akufunika kakamwe ku dziko. Mphale peno ntsikana wakuti ndi Mboni ya Yahova angapembera mwadidi kuxikola, phungu, mpfundzisi, peno axamwali akuxikola anankulumiza toera kusaka mapfundziro apadzulu ninga njira toera kupembera mu dziko ino. Panango, m’bale peno mulongo wakuti ali na luso ya kuthamanga anaona kuti akukulumizwa toera kusankhula basa ya mapika akuthamanga mu umaso wace. Mwathimbana kale na makhaliro ninga anewa, peno musadziwa munthu wakuti akuthimbana na mikakamizo ninga ineyi? Ninji cinafuna kuphedza Nkristu toera kucita cisankhulo candzeru?

Pipfundziso pya Bhibhlya pinakwanisa kuphedza munthu toera kukhunganyika toera kufamba munjira yadidi mu umaso. Lemba ya Koelete 12:1 isalonga: “Kumbuka Mulungu mbuchiri mphale.” Kodi imwe peno aphale na atsikana anadziwana na imwe, munakwanisa tani ‘kukumbukira Mulungu wanu?’

Nyerezerani pidacitikirwa na Erica anakhala Kumadokero a dzuwa kwa Afrika. Iye akhakomerwa na kumenya bola. Pa ndzidzi unoyu, Eric akhali na pyaka 15, iye asankhulwa toera kucita khundu ya nsoka wakumenya bola mu dziko yace. Pyenepi pisabveka kuti mbadzati kutoma, akhafunika kupfundziswa maluso makulu akumenya bola ku Europa, panango toera ineyi ikhale basa yace mu umaso wace onsene. Kodi uphungu wakuti ‘kumbuka Mulungu’ wankhuya tani? Kodi imwe pabodzi na axamwali anu, munaphindula tani na uphungu unoyu?

Mu pyaka pikhapfundza iye kuxikola, Eric atoma kupfundza Bhibhlya na Mboni za Yahova. Natenepa, iye atoma kupfundza kuti Mulungu anadzamalisa nyatwa za anthu kwenda na kwenda. Eric aona kuti akhafunika kuphatisira ndzidzi wace na mphambvu yace toera kucita cifuno ca Mulungu. Mwakubverana na udziwisi unoyu wakulinganira, Eric asankhula kukhonda kuwangisira toera kupita m’basa yakumenya bola mu umaso wace. Mbuto mwace, iye abatizwa mbapita patsogolo mwauzimu. Mukupita kwa ndzidzi, adzakhala ntumiki wakutumikira, buluka peno, adzacemerwa toera kugumanika pa Xikola Ya Bhibhlya Kwa Abale Akukhonda Kumanga Banja.

Mbadatowerera basa yakumenya bola, panango Eric mbadakhala na mbiri na upfumi. Mbwenye iye adzindikira undimomwene wa uphungu wa Bhibhlya: ‘Pinthu pya nyakupfuma ndi pinamuwangisa, iye asapiona ninga malinga akulapha.’ (Mis. 18:11) Inde, citsidzikizo cinakhala na nyakupfuma, mwandimomwene ntcapezi. Kusiyapo pyenepi, ale anawangisira toera kusaka upfumi kazinji kene, ‘asakhazikika okhene m’madzedze peno mu nyatwa zakukhonda lengeseka.’​—1 Tim. 6:9, 10.

Mwakutsandzayisa, aphale na atsikana azinji asagumana kutsandzaya na citsidzikizo cakukhonda mala kubulukira mu kupita m’basa ya ndzidzi onsene. Eric alonga: “Ndisacita khundu ya ‘nsoka’ ukulu kakamwe wa atumiki a Yahova a ndzidzi onsene. Unoyu ndi nsoka wadidi kakamwe kwa ine toera kucita khundu, pontho ndisapereka takhuta kuna Yahova thangwi yakundipangiza njira ibodzi basi toera kugumana kutsandzaya kwandimomwene na kupembera mu umaso.

Ndiye tanimbo kwa imwe? Mbuto mwa kukhazikisa pifuno pya kudziko, thangwi yanji nkhabe kukhazikisa mwadidi “njira zanu” pamaso pa Yahova mu kutumikira ninga mpainiya?

BULUSANI MIPINGIZO MUNJIRA YANU

Mu ndzidzi ukhaona iwo ofesi yathu ya ku Estados Unidos, banja ibodzi yaona kutsandzaya kunakhala na abale na alongo anatumikira Yahova ku Beteli ineyi. Mukupita kwa ndzidzi mulongo alemba: “Tadzolowera kakamwe kucita basa yathu ya ntsiku na ntsiku.” Banja ineyi yatonga kuti mbidasaka kukhala na ndzidzi wakunjipa na mphambvu toera kucita mabasa mazinji auzimu.

Mbwenye macinjo akhafuna kucitwa na banja ineyi akhaoneka ninga ndi akunentsa pang’ono. Mbwenye ntsiku inango, iwo anyerezera mwacidikhodikho Lemba ya ntsiku. Ikhali lemba ya Jwau 8:31, penepa tisaleri mafala a Yezu: ‘Imwe mungabvera mafala anga, ndimwe anyakupfundza anga kakamwe.’ Na mafala anewa m’manyerezero, iwo anyerezera: “Cinthu consene cinafuna ife kucita toera kululupisa umaso wathu ndi cakufunika.” Iwo agulisa nyumba yawo ikulu, abulusa pinthu pinango pikhaapingiza, mbaenda ku mpingo wakuti ukhafuna kakamwe ciphedzo. Cincino iwo akutumikira ninga apainiya, mbwenye iwo asaphedzambo basa yakumanga Nyumba za Umambo, na asaperekeka toera kuphedza pa misonkhano ya gawo. Kodi iwo asapibva tani? “Tisadzuma kakamwe kutsandzaya kuli na ife thangwi yakukhala na umaso wakululupa, na kucita pinthu pinatiwangisa gulu ya Yahova toera kucita.”

PITIRIZANI MUNJIRA YA KUTHAMBARUKA MWAUZIMU

Mambo Salomoni alemba: “Lang’ana patsogolo pako, uone basi udidi wa patsogolo.” (Mis. 4:25) Ninga nyakutekenya motokala wakuti asayang’ana kutsogolo, ife tisafunika kucalira pinthu pyakuti pinakwanisa kutipingiza mbatikhonda kupitiriza kusaka pifuno pyauzimu na kupikwanirisa.

Ndi pifuno pipi pyauzimu pyakuti munakwanisa kupikhazikisa na kupikwanirisa? Kupita m’basa ya ndzidzi onsene ndi cifuno cadidi kakamwe. Cinango ndi kutumikira pa mpingo wacifupi wakuti usafuna amwazi mphangwa aluso toera kuphedza kumwaza mphangwa mu cisa consene ca mpingo. Peno pana mpingo wakuti uli na amwazi mphangwa azinji aluso, mbwenye nkhabe akulu a mpingo azinji na atumiki akutumikira. Munakwanisa kuphedza mu njira zenezi? Thangwi yanji nkhabe kucedza na muyang’aniri wa cisa toera kuona khala munakwanisa kuphedza? Khala musafuna kuthimizira, munakwanisa kuphemba mphangwa za mipingo yakutali yakuti isafuna ciphedzo.b

Tendeni tibwerere pa makhaliro analongwa pa Izaiya 62:10. Panango, Ayuda anango aphata basa mwakuwanga kakamwe toera kucenesa na kuzereza njira yakuenda kudziko yawo yacibaliro, toera mbumba ya Mulungu ifike kukhaenda iyo. Khala mukuwangisira toera kukwanirisa pifuno pyauzimu m’basa ya Mulungu, lekani kubwerera nduli. Na ciphedzo ca Mulungu, imwe munakwanirisa pifuno pyenepi. Pitirizani kuphemba Yahova toera akupaseni udziwisi mu ndzidzi unasaka imwe kubulusa mipingizo patsogolo panu. Pa ndzidzi wakuthema, imwe munadzaona kuti iye asakuphedzani tani toera ‘kusasanyira njira ya miyendo yanu.’​—Mis. 4:26, NM.

[Pidzindikiro pyapantsi]