Atumiki a Yahova ‘Asakhonda Pyakuipa’

“Munthu onsene wakulonga dzina ya Yahova aleke pyakuipa pyonsene.”​—2 TIM. 2:19, Tradução do Novo Mundo.

MUNATAWIRA TANI?

Ndi pinthu pipi pyakuti pinakwanisa kutomesa “kuketesana kwakusowa ndzeru”? Tinakwanisa tani kucalira pyenepi? 

Tinakwanisa tani ‘kukhonda pyakuipa’ pakuthimbana na uxamwali wakuipa?

Tinapangiza tani kutonga kwathu na ntima onsene ‘pakukhonda pyakuipa’?

1. Ndi cinthu cipi cakufunika kakamwe mu ulambiri wathu?

M’MADZIKO mazinji, dzina ya Yahova isalembwa m’mbuto zapakweca peno m’mbuto zinakoyiwa pinthu pyakale. Khala mwaona dzina ineyi m’mbuto ninga zenezi, mwakukhonda penula imwe mwakomerwa kakamwe. Kusiyapo pyenepi, dzina ya Mulungu ndi yakufunika kakamwe mu ulambiri wathu​—ife ndife Mboni za Yahova! Pa dziko yonsene, nkhabe nsoka unango unaphatisira dzina ya Mulungu ninga ife. Mbwenye kucemerwa na dzina ya Mulungu kusaphataniza pizinji. Ninga Mboni za Yahova, tisadziwa kuti tisafunika kucita pinthu munjira yakuti inabweresa mbiri kuna iye.

2. Nakuti tisacemerwa na dzina ya Yahova, tisafunika kucitanji?

² Kucemerwa na dzina ya Mulungu nee pisabveka kukhala na uxamwali na Yahova. Tisafunika kukhala maso mwakubverana na midida yace. Na thangwi ineyi, Bhibhlya isatikumbusa kuti atumiki a Yahova asafunika ‘kucalira pyakuipa.’ (Sal. 34:14) Mpostolo Paulu apangiza pakweca n’dida unoyu mudalemba iye kuti: “Munthu onsene wakulonga dzina ya Yahova aleke pyakuipa pyonsene.” (Lerini 2 Timoti 2:19, NM.) Ninga Mboni zace, mwandimomwene tisadziwika thangwi yakulonga dzina ya Yahova. Mphapo, tinakhonda tani pinthu pyakuipa?

‘KUTHAUKA’ PINTHU PYAKUIPA

3, 4. Ndi lemba ipi yakuti anango nee asaibvesesa mwadidi, thangwi yanji?

³ Pa 2 Timoti 2:19 Paulu alonga “pidamangwa na Mulungu.” Penepa palembwa pidzindikiro piwiri. Cakutoma cisalonga kuti, “Yahova asadziwa anthu ace,” mafala anewa abuluswa pa Numero 16:5. (Onani nsolo udamala.) Cidzindikiro caciwiri cisalonga kuti: “Munthu onsene wakulonga dzina ya Yahova aleke pyakuipa pyonsene.” Anango nee asabvesesa mwadidi mafala anewa. Thangwi yanji?

⁴ Mafala a Paulu asapangiza kuti akhadalembwa kale m’Malemba Acihebere. Mbwenye nkhabe lemba inabverana na mafala a Paulu. Mphapo, mpostolo Paulu akhafuna kubvekesanji mudalonga iye kuti: “Munthu onsene wakulonga dzina ya Yahova aleke pyakuipa pyonsene”? Mbadzati kulonga mafala anewa, Paulu aphatisira mafala a lemba ya Numero kapitulu 16 inalonga pya kupandukira kwa Kore. Kodi mafala a cidzindikiro caciwiri asabveranambo na kupandukira kweneku?

5-7. Ndi cakucitika cipi ca mu ntsiku za Mose cinatiphedza kubvesesa mafala a Paulu adalembwa pa 2 Timoti 2:19? (Onani cithundzithundzi cakutoma.)

⁵ Bhibhlya isalonga kuti Datani na Abironi, ana a Elyabu, aphatana na Kore ninga atsogoleri toera kupandukira Mose na Aroni. (Num. 16:1-5) Iwo apangiza pakweca kusowa kwawo cilemedzo kuna Mose, mbakhonda utsogoleri wace udapaswa iye na Mulungu. Anyakupanduka anewa apitiriza kukhala pakati pa mbumba ya Yahova, mbaikha pangozwi makhaliro auzimu a anthu akukhulupirika. Pidafika ntsiku toera Yahova apangize kusiyana pakati pa alambiri akukhulupirika na anyakupanduka, iye apereka ntemo wakubveka mwadidi.

⁶ Bhibhlya isalonga: Yahova “alonga tenepa kuna Mose: ‘Longa kuna nsoka mbuapanga tenepa: “Thaukani panyumba ya Kore na ya Datani na ya Abironi!”’ Mose alamuka mbaenda kuna Datani na Abironi, mbatowererwa na akulu a Israele. Iye alonga mbati: ‘Ndaphata miyendo, thaukani pa misuwo ya nyumba za anyakudawisa anewo, lekani kukhuya pinthu pyawo, gopa munadzafa thangwi ya kudawa kwawo.’ Mwakucimbiza, iwo athauka panyumba ya Kore, Datani na Abironi.” (Num. 16:23-27) Buluka penepo, Yahova apha anyakupanduka onsene. Mbwenye anyakukhulupirika adathauka pa pinthu pyakuipa apulumuswa.

⁷ Yahova asaona pya muntima! Iye asadziwa kukhulupirika kwa anthu ace. Ngakhale tenepo, anyakukhulupirika asafunika kucita cisankhulo cakufunika, mbapambulika pakati pa anthu akuipa. Natenepa, pisaoneka kuti Paulu akhakumbuka mafala a pa Numero 16:5, 23-27 mudalemba iye kuti: “Munthu onsene wakulonga dzina ya Yahova aleke pyakuipa pyonsene.” Pyenepi mbapidabverana na mafala a Paulu akuti: “Yahova asadziwa anthu ace.”​—2 Tim. 2:19.

‘PAMBULIKA PA MAFALA AKUKETESANA KWAKUSOWA NDZERU’

8. Thangwi yanji kuphatisira dzina ya Yahova peno kucita khundu ya mpingo Wacikristu si pyonsene pinaphembwa tayu?

⁸ Mudalonga iye pinthu pidacitika mu ntsiku za Mose, Paulu akhakumbusa Timoti kuti akhafunika kuwangisira toera kutsidzikiza uxamwali wace na Yahova. Kucita khundu ya mpingo Wacikristu si pyonsene pikhaphembwa tayu, sawasawa na kucemerwa na dzina ya Yahova si pyonsene tayu pikhaphembwa mu ntsiku za Mose. Atumiki onsene akukhulupirika asafunika “kukhonda pinthu pyakuipa.” Pyenepi pikhabvekanji kuna Timoti? Kodi atumiki a Yahova a lero anapfundzanji kubulukira mu uphungu wakupumirwa wa Paulu?

9. Kodi ‘mafala akuketesana kwakusowa ndzeru’ akhuya tani mpingo Wacikristu mu pyaka dzana yakutoma?

⁹ Mafala a Mulungu asapereka uphungu unalonga pinthu pyakuipa pyakuti Akristu asafunika kupikhonda peno kupicalira. Mwacitsandzo, m’mavesi anango a 2 Timoti 2:19, tisagumana mafala awa adalonga Paulu kuna Timoti: ‘Leka kuketesana’ thangwi ya mafala, pontho, ‘pambulika pa mafala akuketesana kwakusowa ndzeru.’ (Lerini 2 Timoti 2:14, 16, 23.) Anthu anango m’mpingo akhamwaza pipfundziso pya anyakupanduka. Pontho, pisaoneka kuti anango akhabweresa maonero akuphonyeka. Ngakhale kuti maonero anewa nee akhaphonyana kakamwe na Bhibhlya, mbwenye akhacitisa anthu kugawana. Makani anewa akhamalisira na kuketesana thangwi ya mafala, mbaikha pangozwi makhaliro auzimu. Na thangwi ineyi, Paulu agomezera kuti Timoti akhafunika ‘kupambulika pa mafala akuketesana kwakusowa ndzeru.’

10. Tisafunika kucitanji tingagumanikana na anyakupanduka?

¹⁰ Lero, kazinji kene atumiki a Yahova nee asathimbana na anyakupanduka m’mpingo. Ngakhale tenepo, tingagumana na pipfundziso pyakuphonyana na Bhibhlya, tisafunika kupicalira, mwakukhonda tsalakana kudabuluka ipyo. Si pyandzeru tayu kuketesana na anyakupanduka, mwakukhonda tsalakana khala tikucedza nawo nkhope na nkhope, kubulukira mu Interneti, kutawira matsamba awo, peno njira zinango zakupita nazo ncibverano. Ngakhale kuti cifuno cathu ndi kuaphedza, makani anewa mbadaphonyana na citsogolero ca Bhibhlya cidamala ife kudinga. Mbuto mwace, ninga atumiki a Yahova, tisakhonda, mbaticalira anyakupanduka munjira yonsene.

11. Ndi pinthu pipi pyakuti pinakwanisa kutomesa ‘kuketesana kwakusowa ndzeru’? Kodi akulu a mpingo anapereka tani citsandzo cadidi?

¹¹ Pana pinthu pinango pyakuti pinakwanisa kufudza ntendere m’mpingo. Mwacitsandzo, kuphonyana maonero thangwi ya ubalangazi kunakwanisa kutomesa ‘kuketesana kwakusowa ndzeru.’ Mwandimomwene, munthu angatoma kumwaza ubalangazi wakuti usaswa midida ya Yahova, akulu a mpingo nkhabe funika kutawirisa makhaliro anewa basi ene toera kucalira kuketesana. (Sal. 11:5; Aef. 5:3-5) Mbwenye akulu a mpingo asacita mpholemphole toera kucalira kuphatisira maonero awo. Mwakukhulupirika, iwo asatowezera uphungu wa Bhibhlya udaperekwa kwa ayang’aniri Acikristu: ‘Kumbizani nkumbi wa mabira a Mulungu, udapaswa imwe, . . . Lekani kuoneka ninga anyakutonga aukali akugopesa akristu andzanu; mbwenye mukhale atsogoleri akutowezerwa na nkumbi wanu.’​—1 Ped. 5:2, 3; lerini 2 Akorinto 1:24.

12, 13. (a) Kodi Mboni za Yahova zisaona tani pya kusankhula ubalangazi, ndi midida ipi ya Bhibhlya inaphatisira iwo? (b) Midida idadingwa mu ndima 12 isaphatisirwa tani m’makhundu akusiyana-siyana a umaso wa munthu paekha?

¹² Thangwi ya ubalangazi, gulu yathu nkhabe kudinga mafilimu, videos games, mabukhu, peno nyimbo toera kuona kuti ndi zipi zinafunika ife kucalira. Thangwi yanji? Bhibhlya isawangisa m’bodzi na m’bodzi toera kupfundzisa ‘luso yace yakunyerezera toera akwanise kudzindikira pyadidi na pyakuipa.’ (Aheb. 5:14) Bhibhlya isapereka midida yakukwana yakuti inakwanisa kutsogolera Nkristu pakucita cisankhulo ca ubalangazi. M’makhundu onsene a umaso wathu, tisafunika kukhala na cifuno ‘cakudzindikira pire pinakoma peno pyakutawirika pamaso pa Mbuya.’ (Aef. 5:10) Bhibhlya isapfundzisa kuti misolo ya banja iri na utongi wakuthema, natenepa, iwo anakwanisa kusankhula kukhonda tawirisa mitundu inango ya ubalangazi panyumba pawo.a​—1 Akor. 11:3; Aef. 6:1-4.

¹³ Midida ya Bhibhlya idadingwa mu ndima idamala, nee isaphatisirwa basi ene pakusankhula kwathu ubalangazi. Kuphonyana maonero thangwi ya mabvaliro na makhunganyikiro, ungumi na pyakudya, na pinthu pinango pinakhuya umaso wa munthu paekha pinakwanisambo kutomesa kuketesana. Ndimomwene kuti khala nkhabe n’dida wa Bhibhlya unaphataniza pyenepi, mwandzeru, atumiki a Yahova asacalira kuketesana thangwi ya pinthu pyenepi, thangwi Bhibhlya isalonga: “Mwanankati wa Mbuya akhonde kuketesana, mbwenye akhale wakubverana na anthu onsene.”​—2 Tim. 2:24.

CALIRANI UXAMWALI WAKUIPA!

14. Ndi nsangani upi udaphatisira Paulu toera kugomezera kuti tisafunika kucalira uxamwali wakuipa?

¹⁴ Ndi ipi njira inango yakuti ale ‘analonga dzina ya Yahova anakwanisa kukhonda pyakuipa’? Ndi kubulukira mu calira kucita uxamwali na anthu anacita pyakuipa. Pakumala kulonga “pinthu pidamangwa na Mulungu,” Paulu alonga pya “nyumba ikulu” yakuti nee iri na ‘pyombo pya ndalama na pya prata pyokha, mbwenye muna pinango pidacitwa na miti peno na mataka. Pinango pina mabasa a mbiri, pinango pina mabasa akunyozeka.’ (2 Tim. 2:20, 21) Buluka penepo, iye acenjeza Akristu toera ‘kukhonda’ peno kupambulika pakati pa pyombo pinaphatisirwa toera kucita “mabasa akunyozeka.”

15, 16. Tisapfundzanji kubulukira mu nsangani wa “nyumba ikulu”?

¹⁵ Kodi nsangani unoyu usabvekanji? Paulu alandanisa mpingo Wacikristu na “nyumba ikulu,” anthu a m’mpingo asalandaniswa na “pyombo” pya n’nyumba. N’nyumba, pyombo pinango pinakwanisa kuthaphuliswa na pinthu pyakugopswa, peno makhaliro akuti anaikha pangozwi ungumi. Mwanaciro nyumba nee anabvungaza pyombo pyenepi na pyombo pyadidi, ninga pire pinaphatisira iye toera kuphika pyakudya.

¹⁶ Munjira ibodzi ene, lero, atumiki a Mulungu asafunika kucalira kucita uxamwali na anthu a m’mpingo akuti asapitiriza kuswa midida ya Yahova. (Lerini 1 Akorinto 15:33.) Khala tisafunika kucita pyenepi na anthu a m’mpingo, ndiye tani kwa anthu akunja? Tisafunika ‘kucalira’ kucita uxamwali na anthu akunja kwa mpingo, akuti azinji a iwo ndi anthu ‘akufuna kobiri, akukhonda kubvera anyakubala, akukhonda kunyindirika, anyakupambizira, aukali, akukhonda kufuna pinthu pyadidi, anyakusandukira, na anyakufuna pinthu pya tsendzo mbuto mwakufuna Mulungu’!​—2 Tim. 3:1-5.

YAHOVA ASAPASA NKHOMBO KUKHULUPIRIKA KWATHU

17. Kodi Aisraele akukhulupirika apangiza tani kubvera kwawo na ntima onsene mudatonga iwo kuida pinthu pyakuipa?

¹⁷ Bhibhlya isalonga pakweca kutonga kudacita Aisraele mudapangwa iwo toera ‘Kuthauka panyumba ya Kore, Datani, na ya Abironi.’ Bhibhlya isalonga kuti “iwo athauka [mwakucimbiza.]” (Num. 16:24, 27) Iwo nee alangalira, peno kunyerezera kuti mbadacita pyenepi pa ndzidzi unango. Bhibhlya isapangizambo kuti iwo abvera na ntima wawo onsene. Iwo athauka [m’makhundu onsene.] Anyakukhulupirika nee akhafunika kuikhika pangozwi. Kubvera kwawo nee kukhali kwa mitima miwiri peno kwakugawika. Iwo asankhula kukhala kukhundu ya Yahova mu kuida pinthu pyakuipa. Kodi pyenepi pisatipfundzisanji?

18. Ndi cipi cifuniro ca mafala a Paulu mudalembera iye Timoti toera ‘kuthawa pinasirira aphale’?

¹⁸ Toera kutsidzikiza uxamwali wathu na Yahova, tisafunika kutonga kucita pinthu mwakucimbiza. Pyenepi pisabverana na mafala a Paulu mudacenjeza iye Timoti kuti: “Thawa pinasirira aphale [peno atsikana.]” (2 Tim. 2:22) Pa ndzidzi unoyu, panango Timoti akhadapiringana pyaka 30 pyakubalwa. Mbwenye, upswiru wa pifuno ‘pinasirira aphale na atsikana’ pisakhuyambo akulu. Pa kukhuyiwa na pifuno pyenepi, Timoti akhafunika ‘kupithawa.’ Munjira inango, Timoti akhafunika ‘kukhonda pinthu pyakuipa.’ Yezu apangiza pibodzi pyene mudalonga iye kuti: “Diso yako ingafuna kukupitisa m’madawo uikolole mbuiponya kutali.” (Mat. 18:9) Lero, Akristu anabvera uphungu unoyu, angathimbana na ngozwi zauzimu, asazikhonda mwakucimbiza, mwakukhonda kulangalira, peno kunyerezera kuti anacita pyenepi pa ndzidzi unango.

19. Kodi Akristu anango asapangiza tani kutonga kwawo toera kutsidzikiza uxamwali wawo na Yahova?

¹⁹ Anango mbadzati kukhala Mboni za Yahova akhathimbana na nsambo wa kumwa, acita okhene cisankhulo cawo toera kucalira pyakumwa munjira yonsene. Akristu anango asacalira mitundu inango ya ubalangazi, si kuti mitundu ineyi ndi yakuipa, mbwenye inakwanisa kulamusa kufewa kwawo. (Sal. 101:3) Mwacitsandzo, mbadzati kukhala Mboni ya Yahova, m’bale unango akhakomerwa na maphwando akhaphataniza mabviniro aulukwali. Mbwenye pidapfundza iye undimomwene, iye asiyiratu pya kubvina, ngakhale pa ndzidzi unagumanyikana Akristu, thangwi asagopa kulamusa pifuno pyakuipa pikhali na iye kale. Mwandimomwene Akristu nee asatongwa kuthunda pyakumwa pyakuledzeresa, kubvina, peno pinthu pinango pyakuti nee ndi pyakuipa. Mbwenye tonsene tisafunika kucita cisankhulo cakukwana toera kutsidzikiza uxamwali wathu na Yahova.

20. Maseze pisanentsa “kukhonda pyakuipa,” ninji cinatipasa cinyindiro na cibalangazo?

²⁰ Kucemerwa na dzina ya Mulungu kusaphataniza pizinji. Tisafunika “kukhonda pyakuipa” na ‘kuthauka pa pinthu pyakuipa.’ (Sal. 34:14) Mwandimomwene, kucita pyenepi ndzidzi onsene si cinthu cakukhonda nentsa tayu. Mbwenye mphyakuwangisa kakamwe kudziwa kuti ndzidzi onsene, Yahova anadzapitiriza kufuna “anthu ace” na ale anatowezera njira zace zakulungama.​—2 Tim. 2:19; lerini 2 Pya dziko ya Israele 16:9a, NM.

[Cidzindikiro capantsi]