Pasani Ntengo Mwai Wanu Wakuphata Basa Na Yahova!

“Ife ndife anyakuphedza a Mulungu”​—1 AKOR. 3:9

MUNATAWIRA TANI?

Ndi mwai upi wakuti atumiki a Yahova ali nawo ndzidzi onsene?

Ndi basa ipi yakuti tisafunika kuipasa ntengo kakamwe lero?

Ndi cidikhiro cipi ciri na ife thangwi ya tsogolo?

1. Kodi Yahova asabva tani thangwi ya basa yace? Pyenepi pisankulumiza toera kucitanji?

YAHOVA asakomerwa na basa inacita iye. (Sal. 135:6; Jwau 5:17) Iye asafunambo kuti aanju na anthu akomerwe na mabasa anacita iwo, natenepa, Yahova asaapasa basa yadidi na yakutsandzayisa. Mwacitsandzo, iye aphata basa pabodzi na Mwanace wautombo toera kucita pinthu pyonsene. (Lerini Akolose 1:15, 16.) Bhibhlya isatipanga kuti mbadzati kubwera pa dziko yapantsi, Yezu akhali na Mulungu kudzulu ninga ‘mesiri wace wa basa.’​—Mis. 8:30.

2. Ninji pinapangiza kuti ndzidzi onsene aanju asakhala na basa yakufunika na yakutsandzayisa?

² Kubulukira pa Genesi mpaka pa Apokalipse, Bhibhlya iri na pitsandzo pinapangiza kuti Yahova ndzidzi onsene asapasa basa aanju. Pidadawa Adhamu na Eva mbabuluswa mu Paradizu, Mulungu ‘aikha akerubi na masupada akuyetima, toera aonere njira yakuenda ku muti wa moyo.’ (Gen. 3:24) Lemba ya Apokalipse 22:6 isalonga kuti Yahova ‘atuma anju wace toera adziwise adzakazi ace pinthu pinafuna kucitika cincino.’

NDIYE TANIMBO ANTHU?

3. Kodi Yezu atowezera tani citsandzo ca Babace pikhakhala iye pa dziko yapantsi?

³ Pikhakhala iye pa dziko yapantsi, mwakukomerwa, Yezu acita basa idapaswa iye na Yahova. Mu kutowezera citsandzo ca Babace, Yezu apasa anyakupfundzace basa yakufunika kakamwe. Toera kupangiza pikhafuna iwo kudzakwanirisa, iye alonga: ‘Andedi, ndinakupangani, ule anandibvera anadzacitambo pinthu pinacita ine pano, ande anadzacitambo pinthu pikulu kupita ipi, thangwi ine ndinenda kuna Baba.’ (Jwau 14:12) Toera kupangiza kuti basa ineyi ikhafunika kucitwa mwakucimbiza, Yezu alonga: ‘Pisafunika kuti ndicite namasikati pinthu pya uyu adandituma, thangwi masiku angafika, nee munthu m’bodzi anakwanisa kucita cinthu.’—Jwau 9:4.

4-6. (a) Thangwi yanji tinakwanisa kupereka takhuta thangwi yakuti Nowa na Mose acita mabasa adapaswa iwo na Yahova? (b) Ndi pinthu pipi pinaphatanizwa m’mabasa onsene anapereka Mulungu kwa anthu?

⁴ Kale kakamwe Yezu mbadzati kubwera pa dziko yapantsi, Yahova apasa anthu basa yakutsandzayisa. Ngakhale kuti Adhamu na Eva nee akwanirisa basa idapaswa iwo, anango acita ninga mudapangirwa iwo na Mulungu. (Gen. 1:28) Nowa apaswa pitsogolero pyakuti mbadamanga tani bote toera kupulumuka pa Cigumula cikulu. Iye acita pyonsene pidapangwa iye na Yahova. Ife tiri maso lero thangwi iye atowezera pitsogolero pidapaswa iye!​—Gen. 6:14-16, 22; 2 Ped. 2:5.

⁵ Mose apaswa pitsogolero toera kumanga tabernakulu na kukhunganya basa ya unyantsembe, iye acita pyonsene pidapangwa iye. (Eks. 39:32; 40:12-16) Mpaka lero, ife tisaphindula thangwi yakukwanirisa kwace basa ineyi mwakukhulupirika. Munjira yanji? Mpostolo Paulu afokotoza kuti masasanyiro a Mwambo akhaphiphirisa ‘pinthu pyadidi pikhafuna kudzaoneka ntsogolo.’​—Aheb. 9:1-5, 9; 10:1.

⁶ Basa inapereka Mulungu kwa atumiki ace isasiyana mwakubverana na ndzidzi unakwanirisika cifuniro cace. Mbwenye basa inapaswa iwo, ndzidzi onsene isapasa mbiri Yahova na kuphindulisa anthu akukhulupirika. Pyenepi pisapangizika mu pinthu pidacita Yezu pikhakhala iye kudzulu, na pikhakhala iye pa dziko yapantsi. (Jwau 4:34; 17:4) Munjira ibodzi ene, basa inapaswa ife lero isapasa mbiri Yahova. (Mat. 5:16; lerini 1 Akorinto 15:58.) Thangwi yanji tinakwanisa kulonga tenepo?

KUPITIRIZA NA MAONERO AKULINGANIRA THANGWI YA MABASA ANAPASWA IFE

7, 8. (a) Fokotozani basa yakuti Akristu ali na mwai toera kuicita lero. (b) Tisafunika kuona tani pitsogolero pya Yahova?

⁷ Mwakukhonda penula, mphyakudzumisa kudziwa kuti Yahova asankhula anthu akusowa ungwiro toera kukhala na mwai wakutumikira ninga anyabasa andzace. (1 Akor. 3:9) Ale anaphembwa toera kumanga Nyumba za Misonkhano, Nyumba za Umambo, na maofesi a filiali asacita basa yakumanga ninga pidacita Nowa na Mose. Mwakukhonda tsalakana khala mukucita basa yakusasanyira Nyumba ya Umambo, peno muli kumanga ofesi yathu ikulu ya dziko yonsene ku nzinda wa Warwick, Nova York, pasani ntengo mwai wanu wakutumikira. (Onani cithundzithundzi cakutoma.) Ineyi ndi basa yakucena. Mbwenye Akristu azinji asaphembwa toera kucita basa yakumanga mwauzimu. Basa ineyi iri na cifuniro cibodzi cene​—kupasa mbiri Yahova na kuphindulisa anthu akubvera. (Mach. 13:47-49) Pitsogolero pyakuthema toera kukwanirisa basa ineyi pisaperekwa na gulu ya Mulungu. Midzidzi inango, pyenepi pisaphataniza kutambira basa ipswa.

⁸ Atumiki akukhulupirika a Yahova ndzidzi onsene asakomerwa kutowezera pitsogolero pya Mulungu. (Lerini Ahebere 13:7, 17.) Panango, pakutoma nee tinabvesesa mathangwi onsene toera kucita basa inapaswa ife munjira inaphembwa ife. Ngakhale tenepo, ife tisadziwa mwadidi maphindu akubvera macinjo onsene anaona Yahova kuti ndi akuthema kuacita.

9. Ndi citsandzo cipi cadidi cinapangiza akulu a mpingo?

⁹ Akulu a mpingo asapangiza kuti asafuna kakamwe kucita cifuno ca Yahova kubulukira munjira inatsogolera iwo mpingo. (2 Akor. 1:24; 1 Ates. 5:12, 13) Iwo asatawira kuphata basa mwakuwanga mbatowezera pitsogolero. Iwo asaphatisira njira zipswa zakumwaza mphangwa za Umambo wa Mulungu. Maseze anango asalangalira kucita masasanyiro toera kumwaza mphangwa mukuphatisira mitokodzi, na m’mbuto zapakweca, iwo asaona maphindu adidi thangwi yakuphatisira njira zenezi. Mwacitsandzo, apainiya anai ku Alemanya atonga kumwaza mphangwa m’mbuto zamalonda zakuti nee zikhamwazwa mphangwa. M’bale Michael alonga: “Nee tikhacita basa ineyi mu pyaka pizinji, natenepa tikhali akutsandzaya kakamwe. Yahova akhadziwa pyenepi, thangwi iye atipasa macibese akutsandzayisa kakamwe a basa. Tiri akutsandzaya kakamwe thangwi yakutowezera citsogolero cidaperekwa mu Utumiki Wathu Wa Umambo na kunyindira ciphedzo ca Yahova!” Kodi imwe muli dzololo toera kuyesera njira zipswa zakumwaza mphangwa mu cisa canu?

10. Ndi macinjo api a maphatiro a basa mu gulu adacitwa cincino?

¹⁰ Midzidzi inango, kusacitwa macinjo a maphatiro a basa mu gulu. Mu pyaka pyacincino, maofesi a filiali mangasi abvungazwa na anango. Macinjo anewa asaphemba kuti abale na alongo anatumikira m’mafiliali anewa acite macinjo, maseze iwo nkhabe kudziwa maphindu onsene akucita pyenepi. (Koel. 7:8) Mphyadidi kakamwe kuona anthu mbakaperekeka na ntima onsene toera kucita khundu mu kuthambaruka kwa mbumba ya Yahova!

11-13. Ndi pinentso pipi pidathimbana na anango thangwi ya macinjo a gulu?

¹¹ Tinakwanisa kupfundza pizinji kubulukira kwa abale na alongo adakhuyiwa na kubvungazwa kwa maofesi a filiali. Anango akhatumikira m’basa ya ndzidzi onsene ku Beteli ya dziko yawo mu pyaka pizinji. Banja ibodzi ikhatumikira ku Beteli ing’ono ku Amerika Central yaphembwa toera kuenda katumikira ku Beteli ikulu kakamwe ku Mexiko. M’bale Rogelio alonga: “Pikhali pyakunentsa kakamwe kusiya acibale na axamwali athu.” M’bale Juan wakuti aphembwa toera kuenda katumikira ku Mexiko alonga: “Pisakhala ninga ukubalwa kaciwiri; usafunika kucita uxamwali upswa. Pisaphemba kudzolowera misambo na njira yakunyerezera.”

¹² Abale na alongo ku Mabeteli a ku madziko a Europa adaphembwa toera kuenda ku Beteli ya Alemanya athimbana na pinentso pibodzi pyene. Munthu onsene anakomerwa kuona mapiri asatawira kuti pikhali pyakunentsa kwa ale adabuluka ku Suíça mbasiya makhaliro adidi a Alpina. Ale adabuluka ku Austria, pakutoma akhali na citsuwo ca Beteli yawo ing’ono.

¹³ Kwa ale adaenda katumikira ku dziko inango, pikhaphemba kudzolowera makwartu mapswa, kuphata basa na abale na alongo akuti nee akhadziwana nawo, kuphatanizambo kupfundza kucita ntundu unango wa basa. Pikhaphemba kudzolowera mpingo upswa, na kumwaza mphangwa mu cisa cipswa, panango mu cilongero cinango. Kucita macinjo anewa kukhali kwakunentsa. Mbwenye abale na alongo azinji anatumikira ku Beteli atawira pyenepi. Thangwi yanji?

14, 15. (a) Kodi azinji asapangiza tani kuti asapasa ntengo mwai wawo wakuphata basa na Yahova mwakukhonda tsalakana basa yawo? (b) Ndi munjira ipi iwo ndi citsandzo cadidi kwa ife?

¹⁴ Mulongo Grethel alonga: “Ndatawira ncemerero thangwi ineyi ikhali njira ibodzi yakupangiza kuna Yahova kuti ufuni wanga kwa iye ukhapiringana madire a dziko, nyumba, peno miyai yakutumikira.” Mulongo Dayska alonga: “Mudakumbukira ine kuti ncemerero unoyu wabuluka kuna Yahova, ndautawira na ntima onsene.” André na Gabriela asatawira pyenepi, iwo alonga: “Munjira ineyi, ife taona mwai wakuthimizirika toera kutumikira Yahova mu kuikha pakhundu pifuno pyathu. Ife tikhalonga tekhene, ‘Tingathimbana na mphepo ya macinjo a Yahova, mphyadidi kakamwe kucapa ng’ombo mbuto mwakumanga mipanda.’”

¹⁵ Thangwi ya kubvungazwa kwa mafiliali, abale na alongo anango asaphembwa toera kutumikira ninga apainiya. Ndi pyenepi pidacitika na abale na alongo azinji akhatumikira ku Beteli ya Dinamarka, Noruega, na Suécia akuti abvungazwa na Beteli ya ku Escandinávia. Mwa iwo, akhali Florian na Anja, iwo alonga: “Taona basa idapaswa ife ninga mwai wakutsandzayisa. Kwa ife, mphyakutsandzayisa kakamwe kuphatisirwa na Yahova, mwakukhonda tsalakana mbuto inatumikira ife. Tinakwanisa kulonga na ntima onsene kuti tiri na nkhombo zizinji!” Ngakhale kuti azinji a ife cipo anadzacita macinjo ninga anewa, ife tinakwanisa kusangizira nzimu wakuperekeka kwa abale na alongo anewa mu kuikha pifuno pya Umambo pa mbuto yakutoma. (Iza. 6:8) Ndzidzi onsene, Yahova asapasa nkhombo ale anapasa ntengo mwai wawo wakuphata basa na iye, mwakukhonda tsalakana mbuto inatumikira iwo.

PITIRIZANI KUKOMERWA NA MWAI WANU WAKUPHATA BASA NA YAHOVA!

16. (a) Kodi lemba ya Agalata 6:4 isatiphemba toera kucitanji? (b) Ndi mwai upi ukulu kakamwe wakuti munthu anakwanisa kukhala nawo?

¹⁶ Anthu akusowa ungwiro kazinji kene asakhala na cipendamiro ca kulandanisa pinacita iwo na anango, mbwenye Mafala a Mulungu asatipanga kuti tisafunika kuikha manyerezero athu ku pinthu pinakwanisa ife kucita. (Lerini Agalata 6:4, Tradução do Novo Mundo.) Si onsene tayu akuti anakwanisa kutumikira ninga akulu a mpingo, apainiya, amisionaryo peno kutumikira ku Beteli. Mwandimomwene, ineyi ndi miyai yadidi! Mbwenye nee tisafunika kuduwala kuti mwai ukulu kakamwe wakuti munthu onsene anakwanisa kukhala nawo ndi uli na ife tonsene​—kukhala anyakuphedza a Yahova m’basa yakumwaza mphangwa zadidi. Unoyu ndi mwai wakuti tisafunika kuupasa ntengo kakamwe!

17. Ndi makhaliro api akuti tinathimbana nawo mu dziko ino ya Sathani? Mphapo thangwi yanji nee tisafunika kufewa manungo?

¹⁷ Mu dziko ino ya Sathani, panango nee tinakwanisa kucita pyonsene pinafuna ife toera kutumikira Yahova. Panango tinathimbana na makhaliro akuti ife nkhabe kwanisa kuacinja, ninga kutsalakana banja, nyatwa ya ungumi, peno makhaliro anango. Mbwenye nee tisafunika kufewa manungo peno kupswipa ntima. Mwakukhonda tsalakana nyatwa zathu, ndzidzi onsene ife tinakwanisa kumwaza mphangwa za Umambo na kudziwisa dzina ya Yahova. Cinthu cakufunika kakamwe ndi cakuti imwe mukuphata basa na Yahova ninga munakwanisira imwe, na kucita phembero toera iye apase nkhombo abale anu akuti anakwanisa kucita pizinji kupiringana imwe. Kumbukani kuti munthu onsene anasimba dzina ya Yahova ndi wakufunika kakamwe pamaso pace!

18. Ninji pisafunika ife kuikha pakhundu, thangwi yanji?

¹⁸ Maseze ndife anthu akusowa ungwiro, Yahova asakomerwa kutiphatisira ninga anyakuphedza ace. Natenepa, tisafunika kupasa ntengo kakamwe mwai wathu wakuphata basa na Mulungu wathu mu ntsiku zino zakumalisa! Munjira ineyi, mphyadidi kuikha pakhundu pinthu pizinji pinafuna ife mu ndzidzi uno, mbatidziwa kuti mu dziko ipswa, Yahova anadzatipasa mwai wakukhala na ‘umaso wandimomwene’—umaso wakukhonda mala m’makhaliro akutsandzayisa na a ntendere.​—1 Tim. 6:18, 19.

19. Ndi tsogolo ipi yakutsandzayisa kakamwe idapikira Yahova kwa ife?

¹⁹ Mu ndzidzi wakuti tiri m’madire toera kupita mu dziko ipswa, nyerezerani pidalonga Mose kuna ana Aisraele pa ndzidzi wakuti akhali cifupi toera kupita mu Dziko Yakupikirwa: ‘Yahova Mulungu wako, anadzakupasa mpfuma yonsene, mbapasa nkhombo mabasa onsene a manja ako.’ (Deut. 30:9) Pakumala kwa nkhondo ya Harmagedoni, ale akuti asaphata basa mwakuwanga ninga anyakuphedza a Mulungu, anadzawina dziko idapikira iye kwa iwo. Buluka penepo, tinadzaikha manyerezero athu ku basa ipswa inafuna kudzapaswa ife​—kucitisa dziko yapantsi kukhala paradizu yakubalika!