MIBVUNDZO INACITWA NA ANYAKULERI

Tinacitanji toera kuphedza abale na alongo anathimbana na utenda wakukhonda kufuna kubva khwema ya perfume na pinango?

▪ Anthu akuti asanentseka angabva khwema ya perfume ali kuthimbana na nyatwa yakunentsa. Mwandimomwene, iwo nee anakwanisa kucalira kubva khwema ya perfume ndzidzi onsene pakucedza na anthu anakhonda kudziwana na iwo. Natenepa, anango asabvundza khala mbapidakwanisika kuti abale na alongo acalire kuphatisira perfume na mafuta anango akununkhira pa kuenda ku misonkhano Yacikristu, misonkhano ya cisa na ya gawo.

Mwandimomwene, nee Nkristu m’bodzi mbadafuna kucitisa cakhomo kuti munthu anagumanika pa misonkhano Yacikristu anentseke. Tonsene tisafuna ciwangiso cinatambira ife pa misonkhano yathu. (Aheb. 10:24, 25) Ngakhale tenepo, ale akuti asanentseka kakamwe angabva khwema ya perfume munjira yakuti inaacimwanisa kugumanika pa misonkhano, asafunika kudinga pyenepi na akulu a mpingo. Maseze kukhazikisa mitemo thangwi ya kuphatisira perfume kwa ale anagumanika pa misonkhano nee ndi kwakuthema pontho nkhabe kubverana na Bhibhlya, akulu a mpingo anakwanisa kupereka pitsogolero toera kuphedza abale na alongo m’mpingo toera kubvesesa pya nyatwa zinathimbana na anango. Mwakubverana na makhaliro, akulu a mpingo anakwanisa kusankhula kudinga mphangwa zidabuluswa kale m’mabukhu athu pa makhundu a pyakufuna pyapampingo pa Nsonkhano wa Basa, peno kucita cidziwiso munjira yakuthema thangwi ya nyatwa ineyi.a Mbwenye akulu a mpingo nee asafunika kucita pidziwiso pyenepi ndzidzi onsene. Pa misonkhano yathu, ndzidzi onsene panadzagumanika anthu apswa na alendo akuti nee asadziwa pya nyatwa ineyi, pontho ife tisafuna kuti anthu anewa akhale akusudzuka. Nee munthu m’bodzi asafunika kucitiswa kunentseka thangwi yakuphatisira perfume mwakukhonda piringana midida.

Khala pa mpingo iripo nyatwa ineyi, mwakubverana na makhaliro, akulu anakwanisa kucita masasanyiro kwa ale anathimbana na utenda unoyu toera akhale pa mbuto yawo okhene mu Nyumba ya Umambo. Mwacitsandzo, panango anakwanisa kukhala mu sala inango ya Nyumba ya Umambo yakuti yaligarwi na mitcini yakugaluza mafala toera akwanise kubvesera misonkhano. Khala njira ineyi nkhabe kuphata basa, pontho anango asapitiriza kuthabuka kakamwe, mpingo unakwanisa kugravari misonkhano toera kuphedza anthu anewa, peno kuphatisira ntokodzi toera kubvesera misonkhano kubulukira kunyumba kwawo, ninga pinacitirwa ale akuti nkhabe kwanisa kubuluka panyumba.

Mu pyaka pyacincino, Utumiki Wathu Wa Umambo usawangisa abale na alongo toera kudinga mwadidi pyenepi pa kugumanika pa misonkhano ya gawo. Nakuti misonkhano mizinji ya gawo isacitirwa m’mbuto zakufungwa mbizikhala na maventoinya peno mitcini ya ar condicionados, anyakubvesera asaphembwa toera kucalira kuphatisira maperfume akununkhira kakamwe m’misonkhano ineyi. Abale na alongo asaphembwa toera kupangiza citsalakano cakupambulika kakamwe pa misonkhano ya gawo, thangwi m’mbuto zenezi nkhabe kudzagumanika mbuto toera kuphedza ale anathimbana na nyatwa ya khwema ya perfume. Mbwenye pitsogolero pyenepi nee pikhabveka kuti pisafunika kuphatisirwa ninga ntemo pa misonkhano ya mpingo, pontho nee pisafunika kuoniwa munjira ineyi.

Mu ndzidzi unakhala ife m’makhaliro ano apinthu, ife tonsene tisaona nyatwa thangwi yakusowa kwathu ungwiro. Tisapereka takhuta kakamwe anango angawangisira toera kululupisa nyatwa zathu! Pyenepi pisaphemba kuwangisira kwathu toera kucalira kuphatisira perfume peno mafuta anango akununkhira toera abale na alongo athu akhonde kunentseka pa kugumanika pa misonkhano Yacikristu. Mbwenye ufuni unatikulumiza toera kucita pyenepi na ntima onsene.

Kodi mabukhu akudziko asalongambo kuti Ponsyo Pilato akhalipodi?

▪ Ponsyo Pilato asadziwika na ale analeri Bhibhlya thangwi ya pidacita iye pakutongwa kwa Yezu na kuphiwa kwace. (Mat. 27:1, 2, 24-26) Mbwenye dzina yace isagumanikambo kakamwe m’mabukhu acincino analonga pya mbiri yakale. Mwakubverana na bukhu ya Dicionário Bíblico Anchor, mabukhu akudziko analonga pya iye ndi “mazinji, pontho asalonga pinthu pizinji kupiringana atongi onsene Aciroma a ku Yuda.”

Dzina ya Pilato isagumanika mwakubwereza-bwereza m’mabukhu adalembwa na Josefo analonga pya mbiri ya Ayuda. Iye alemba mbiri za pinthu pitatu pinalonga pya nyatwa idathimbana na Pilato mu ndzidzi ukhatonga iye dziko ya Yudeya. Mbiri yacinai yathimizirwa na nyambiri Waciyuda anacemerwa Filo. Nyakulemba Waciroma anacemerwa Tácito adalemba pya mbiri ya utongi Waciroma, apangiza kuti Ponsyo Pilato atawirisa kuphiwa kwa Yezu nkati mwa utongi wa Tiberyo.

Mu caka 1961, anyakupfundza mbiri ya anthu mu kudinga pyakusala m’madembe, pikhafufudza iwo madembe a thando Yaciroma yakucitira pisango ku Sezareya mu dziko ya Israele, agumana mwala udaphatisirwa papswa udalembwa dzina ya Pilato munjira yakuoneka mwadidi mu Cilatini. Cithundzithundzi ca mwala uyu cisapangiza phindi idagomoka, mbwenye pisalongwa kuti kale pakhadalembwa tenepa: “Tiberyo (uyu) Ponsyo Pilato, Ntongi wa nzinda wa Yudeya, akhadaimangira alungu akulemedzeka.” Nyumba inalongwa panango ndi templo ikhadamangwa toera kupasa mbiri Tiberyo, Ntongi Waciroma.

Kodi m’mwazi mphangwa wacikazi asafunika kuphimbira nsolo khala asafuna kucitisa pfundziro ya Bhibhlya pamaso pa m’mwazi mphangwa wacimuna?

▪ Nsolo wakuti “Perguntas dos Leitores” udabuluswa mu A Sentinela ya 15 de Julho de 2002, walonga kuti mulongo asafunika kuphimbira nsolo pakucitisa pfu­ndziro ya Bhibhlya pamaso pa m’mwazi mphangwa wacimuna, mwakukhonda tsalakana khala ndi wakubatizwa peno nkhabe. Kudinga mwakuthimizirika pya nkhani ineyi kusapangiza kuti kusasanyira citsogolero ceneci ndi kwakuthema.

Khala m’mwazi mphangwa wacimuna anaperekera mulongo mu ndzidzi unacitisa iye pfundziro yakukhazikiswa ndi wakubatizwa, mwandimomwene, mulo­ngo asafunika kuphimbira nsolo. Munjira ineyi, iye asapangiza cilemedzo ku masasanyiro a Yahova a utsogoleri m’mpingo Wacikristu, thangwi mu ndzidzi unoyu, mulongo akucita basa yakuti ikhafunika kucitwa na m’bale. (1 Akor. 11:​5, 6, 10) Munjira inango, mulongo anakwanisa kuphemba m’bale anamperekera toera acitise pfundziro khala iye ndi wakuthema, pontho khala ali dzololo toera kucita pyenepi.

Kusiyapo pyenepi, khala mulongo akuperekerwa na m’mwazi mphangwa wacimuna wakukhonda batizwa toera kucitisa pfundziro ya Bhibhlya wakuti nee si mamunace, iye nee asakulumizwa na Bhibhlya toera kuphimbira nsolo. Ngakhale tenepo, cikumbuntima ca alongo anango panango cinaakulumiza toera kuphimbira nsolo m’makhaliro anewa.

[Cidzindikiro capantsi]