Njira Za Maperekero Aumboni

Toera Kutomesa Mapfundziro a Bhibhlya pa Sabudu Yakutoma mu Nthanda ya Nyenzi

“Anthu a madziko akusiyana-siyana na apikhulupiro pyakusiyana-siyana asaphembera ntsiku zonsene. Musanyerezera kuti Mulungu asabvesera na asatawira maphembero onsene?” Dikhirani ntawiro. Buluka penepo, pasani mwanaciro nyumba A Sentinela ya 1.° de Setembro, dingani pabodzi mphangwa zinagumanika pantsi pa nsolo ung’ono wakutoma pa tsamba 16, pontho lerini lemba ibodzi mwa malemba anagumanika mu ndima. Perekani marevista, pontho citani masasanyiro akubwerera toera kudinga ntawiro wa mbvundzo unatowerera.

Sentinela 1.° de Setembro

Pangizani munthu tsamba yakutoma ya revista, buluka penepo bvundzani: “Munatawira tani mbvundzo uyu? [Dikhirani ntawiro.] Onani pinalonga Bhibhlya. [Lerini 1 Jwau 5:19.] Mwakubverana na lemba iyi, ‘demonyo,’ peno Dyabo, asatonga dziko yapantsi. Mbwenye pyenepi pisacitisa kuoneka mibvundzo inango. Dyabo abuluka kupi? Iye ndi munthu wandimomwene? Mpaka lini Mulungu anamulekerera kutonga dziko? Revista iyi isapangiza pinalonga Bhibhlya.”

Despertai! ya Setembro

Anthu azinji lero asathabuka na nyatwa za kobiri. Thangwi yanji musaona kukhala kwakunentsa kugumana kobiri? [Dikhirani ntawiro.] Bhibhlya iri na uphungu wandzeru wakuti waphedza anthu azinji kuphatisira mwadidi kobiri yawo. [Lerini lemba ibodzi mwa malemba anagumanika pa matsamba 8-9.] Revista iyi isapereka maonero akuphata basa kwa ale anathimbana na mangawa.”