Lekani Kuikha Madire Kwa Imwe—Mbamunyerezera Kuti Nkhabe Kwanisa
1. Thangwi yanji anango asalangalira kugawira pfundziro ya Bhibhlya?
1 Kodi musacalira kugawira pfundziro ya Bhibhlya thangwi nee muli na cinyindiro cakuti muli na luso yakucitisa pfundziro yakuphindulisa? M’midzidzi inango atumiki akukhulupirika a mu pyaka pya nduli, ninga Mose na Yeremiya, apibva ninga nee akhali akuthema toera kukwanirisa mabasa awo. (Eks. 3:10, 11; 4:10; Yer. 1:4-6) Mwandimomwene, anthu azinji asakhalambo na mabvero ninga anewa. Tinakwanisa tani kukunda mabvero anewa?
2. Thangwi yanji nee tisafunika kukomerwa basi ene na kucita basa yakumwaza mphangwa nyumba na nyumba mbatisiya kuti anango acite basa yakucitisa pfundziro ya Bhibhlya?
2 Tisafunika kukumbukira kuti Yahova cipo asatiphemba toera kucita cinthu cakuti nee tinakwanisa kucicita. (Sal. 103:14) Natenepa, basa idapaswa ife toera ‘kucita anyakupfundza,’ ‘kuapfundzisa’ ndi basa yakuti tinakwanisa kuicita mwakukwana. (Mat. 28:19, 20, Mphangwa Zadidi.) Nee ndi mwai wakuti Yahova aupereka basi ene kwa anthu aluso kakamwe, peno akucenjera kakamwe pakati pathu. (1 Akor. 1:26, 27) Natenepa, nee tisafunika kukomerwa basi ene na kucita basa yakumwaza mphangwa nyumba na nyumba.
3. Kodi Yahova asaticitisa tani kuti tikhale akuthema toera kutsalakana basa yakucitisa pfundziro ya Bhibhlya?
3 Yahova Asaticitisa Kukhala Akuthema: Kuthema kwathu toera kucita anyakupfundza kusabuluka kwa Yahova. (2 Akor. 3:5) Kubulukira mu gulu yace, Yahova asatipfundzisa undimomwene wa Bhibhlya wakuti anthu azinji a dziko ino ngakhale ndi akupfundza kakamwe nkhabe kuudziwa. (1 Akor. 2:7, 8) Yahova akoya pipfundziso pyakulembwa pya Mpfundzisi Wankulu, Yezu, toera ife tinsangizire, pontho Yahova asatipfundzisa ndzidzi onsene kubulukira m’mpingo. Mwakuthimizira, Yahova asatipasa mphangwa zinafuna ife toera kupfundzisa anthu Bhibhlya. Iye asatipasa mafaramentu, ninga bukhu Biblya Isapfunzisanji, yakuti isapfundzisa undimomwene mu njira yakutowezeka, pontho mwakukhonda nentsa kuubvesesa. Kucitisa pfundziro ya Bhibhlya kunakhala kwakukhonda nentsa kakamwe kupiringana munanyerezera ife.
4. Thangwi yanji tiri na cinyindiro cakuti Yahova anadzatiphedza?
4 Mose na Yeremiya akwanirisa mabasa awo na ciphedzo ca Yahova. (Eks. 4:11, 12; Yer. 1:7, 8) Tinakwanisambo kuphemba Yahova toera kutiphedza. Kusiyapo pyenepi, tingacitisa pfundziro ya Bhibhlya tiri kupfundzisa munthu undimomwene wa Yahova, pyenepi ndi pyakukomeresa pa maso pace. (1 Jwau 3:22) Natenepa, citani kukhala cifuno canu kucita khundu m’basa yakucitisa pfundziro ya Bhibhlya, basa yakutsandzayisa na yakuphindulisa kakamwe ya utumiki wathu.