“Khalani Na Ntendere Na Anthu Onsene”
1. Ndi uphungu upi wa m’Bhibhlya wakuti tisafunika kuuphatisira tingagumana mwanaciro nyumba wakuti aipirwa?
1 Atumiki a Yahova ndi anthu akufuna ntendere, pontho utumiki wathu ndi wantendere. (Iza. 52:7) Mbwenye m’midzidzi inango, tisagumana anthu akuti ali akuipirwa thangwi tafika panyumba pawo. Ninji pinafuna kutiphedza toera kukhala antendere m’makhaliro ninga anewa?—Arom. 12:18.
2. Thangwi yanji ndi kwakufunika kakamwe kwa ife kukhala aluso?
2 Khalani Aluso: Ngakhale kuti anango asalonga mwakuipirwa thangwi nkhabe funa undimomwene, mbwenye anango nee asaipirwa thangwi ya mphangwa zathu. Panango taafikira pa ndzidzi wakukhonda thema. Panango mwanaciro nyumba aipirwa thangwi ya nyatwa zace zene. Ngakhale kuti ndi mphangwa zadidi zidancitisa kukhala wakuipirwa, tisafunika kukumbukira kuti iye atawira mu njira ineyi thangwi anyengererwa. (2 Akor. 4:4) Kukhala aluso kunadzatiphedza toera kupitiriza kukhala akupfulika, mbitidzindikira kuti iye nee aipirwa thangwi ya ife.—Mis. 19:11.
3. Tinapangiza tani cilemedzo kwa mwanaciro nyumba?
3 Pangizani Cilemedzo: Anthu azinji mu cisa ali na maonero akuwanga thangwi ya pikhulupiro pyawo. (2 Akor. 10:4) Iwo ali na udidi wakusankhula kubvesera peno kukhonda bvesera pinalonga ife. Cipo tisafunika kupwaza pinakhulupira mwanaciro nyumba, peno kupangiza kuti tisadziwa kakamwe Bhibhlya kupiringana iye. Tingaphembwa toera kubuluka panyumba pace, mwacilemedzo tisafunika kubvera.
4. Kodi pisabvekanji kulonga mwakusimba?
4 Longani Mwakusimba: Ngakhale kuti anthu asalonga mwakutikana, ntawiro wathu usafunika kukhala wadidi na wakusimba. (Akol. 4:6; 1 Ped. 2:23) Mbuto mwakupokanya maonero ace, tisafunika kusaka cinthu cakuti iye na ife tisacitawira. Mwacilemedzo, panango tinakwanisa kusaka kudziwa mathangwi anacitisa mwanaciro nyumba kukakamira maonero ace. Toera kucalira kumuipirisa pontho, m’midzidzi inango mphyadidi kukhonda pitiriza na makani.—Mis. 9:7; 17:14.
5. Kodi ndi maphindu api asagumanika mu utumiki tingakhala anthu antendere?
5 Tingakhala anthu antendere, mwanaciro nyumba panango anadzakumbukira macitiro athu, pontho anadzabvesera pa ndzidzi unango unafuna iye kumwazirwa mphangwa na munthu unango. (Arom. 12:20) Ngakhale kuti asapitiriza kupangiza makhaliro akuipirwa, panango ntsogolo anadzakhala m’bale wathu. (Agal. 1:13, 14) Mwakukhonda tsalakana khala iye nkhabe pangiza cifuno ku undimomwene, ife tinadzapasa mbiri Yahova na kubalikisa mapfundzisiro athu tingapitiriza kukhala anthu akuphata ntima na akupangiza ntendere.—2 Akor. 6:3.