Kuthimizira Maluso Athu Mu Utumiki—Kupangiza Citsalakano
Thangwi Yanji Mphyakufunika: Yezu akhaona anthu ninga akusiyana, iye akhapangiza citsalakano caufuni kwa iwo. Mwacitsandzo, pa ndzidzi unango, mwakukhonda penula Yezu adzindikira kudzudzumika kwa mamuna wakukhonda kubva, natenepa pikhafuna iye kumuwangisa, Yezu acita pyenepi pakhundu, kutali pang’ono na mwinji wa anthu. (Marko 7:31-35) Yezu apangiza citsalakano kwa anyakupfundzace mu kudzindikira kufewa kwawo, mbakhonda kuapasa mphangwa zizinji. (Jwau 16:12) Ngakhale kuti iye ali kudzulu, Yezu asapangiza citsalakano cace kwa anthu. (2 Tim. 4:17) Ninga atowereri a Kristu, tisafunika kutowezera citsandzo cace. (1 Ped. 2:21; 1 Jwau 3:16, 18) Kusiyapo pyenepi, tinakwanisa kupembera kakamwe mu utumiki wathu tingapangiza citsalakano kwa anaciro nyumba mbatibandza mwai wawo, cifuno cawo na pire pinaadzudzumisa. Mwakukhonda penula, iwo anakhala na cifuno kakamwe cakubvesera angadzindikira kuti nee tabwera basi ene kudzasiya mabukhu; mbwenye tiri na citsalakano kwa iwo.