Kodi Munadzatowezera Phinga Ya Yahova Na Ya Yezu Mu Ndzidzi Wa Cikumbuso?
1. Kodi Mboni za Yahova zisawangisira kucitanji mu ndzidzi wa Cikumbuso?
1 Yahova asakwanirisa cifuniro cace mwaphinga. Mukulonga pya nkhombo zinango za Umambo wa Mulungu, Izaiya 9:7, NM isalonga: “Yahova wa anyankhondo anadzacita pyenepi mwaphinga.” Mu njira ibodzi ene, mu utumiki wace pa dziko yapantsi, Mwana wa Mulungu apangiza phinga ikulu kakamwe thangwi ya ulambiri wandimomwene. (Jwau 2:13-17; 4:34) Pyaka pyonsene mu ndzidzi wa Cikumbuso, pikwi na pikwi pya amwazi mphangwa pa dziko yonsene yapantsi asawangisira kakamwe toera kutowezera phinga ya Yahova na ya Yezu mu kuthimizira mabasa awo mu utumiki. Kodi munadzakhalambo m’bodzi wa iwo?
2. Kodi phinga inadzatikulumiza kucitanji kutomera ntsiku 7 ya Murope?
2 Kampanya ya Cikumbuso: Kampanya ya Cikumbuso ya caka cino inadzatoma n’Sabudu, ntsiku 7 ya Murope. Citani masasanyiro cincino toera kukhala aphinga mu utumiki. Mipingo inadzakhala na basa izinji yakutsandzayisa munawangisira iwo kucemera anthu azinji a n’cisa cawo. Citani pinakwanisa imwe toera kucemera anyakupfundza anu a Bhibhlya, anyabasa andzanu, acibale, andzanu akuxikola, anthu anacitira imwe maulendo akubwereza mukuapasa ncemerero peno kuphatisira jw.org.
3. Tinathimizira tani utumiki wathu mu nthanda ya Murope na Bwinja?
3 Upainiya Wakuphedza: Phinga inadzatikulumizambo toera kuthimizira utumiki wathu. Mwakukhonda penula, azinji anadzakwanisa kutumikira ninga apainiya akuphedza mu nthanda ya Murope na Bwinja, thangwi tinadzakhala na ufulu wakusankhula kupereka maora 30. Nkati mwa kulambira kwanu kwa banja peno pfundziro ya munthu paekha, citani phembero toera kudinga kuti munacita tani pyenepi? (Mis. 15:22) Phinga yanu mu kampanya ineyi inadzakulumizambo anango toera kukhala aphinga. Mungacita masasanyiro toera kuthimizira utumiki wanu, munadzatowezera phinga ya Yezu.—Mko. 6:31-34.
4. Ndi nkhombo zipi zinabwera mukutowezera phinga ya Yahova na ya Yezu?
4 Kutowezera kwathu phinga ya Yahova na ya Yezu mu ndzidzi wa Cikumbuso kunadzabweresa nkhombo zizinji. Anthu azinji n’cisa anadzacitirwa umboni. Tinadzatsandzaya thangwi ya kutumikira Yahova na kupasa anango. (Mach. 20:35) Kupiringana pyonsene, tinadzakomeresa Mulungu wathu waphinga na Mwanace.