NSOLO 61
Iwo Nee Alambira Dzimunthu
Mukupita kwa ndzidzi Mambo Nabhukodhonozore adzacita dzimunthu ikulu ya ouro pa mbuto ikhacemerwa Dhura. Iye acemeresa anthu akufunika kakamwe a ku Bhabhilonya kuphatanizambo Sadhrake, Mezaki na Abhedhinego. Mambo alonga: ‘Mungabva nyimbo, godamani toera kulambira dzimunthu iyi! Munthu anakhonda kugodamira dzimunthu anaponywa mu forno ya moto.’ Kodi Ahebheri atatu asiya kulambira Yahova mbalambira dzimunthu ineyi?
Mambo apanga anyakuimba toera alize pyakuimba napyo. Onsene agodama mbalambira dzimunthu, mbwenye Sadhrake, Mezaki na Abhedhinego akhonda. Amuna anango aona pyenepi mbaenda kapanga mambo: ‘Ahebheri atatu akhonda kulambira dzimunthu yanu.’ Nabhukodhonozore aacemeresa mbaapanga: ‘Ndinakupasani mwai unango toera mulambire dzimunthu. Mungakhonda, ndinakuponyani mu forno ya moto. Nkhabepo mulungu anakwanisa kukupulumusani m’manja mwanga.’ Ahebheri atatu atawira: ‘Nee tisafuna mwai unango. Mulungu wathu anatipulumusa. Ngakhale Mulungu akhonde kutipulumusa, dziwani kuti ife nee tinalambira dzimunthu yanu.’
Nabhukodhonozore aipirwa kakamwe mbapanga atumiki ace: ‘Gasani moto wa forno toera upise kakamwe kupiringana ntsiku zonsene!’ Buluka penepo, iye apanga anyankhondo ace: ‘Mangani amuna awa muaponye pa moto!’ Moto ukhapisa kakamwe mpaka anyankhondo adafika dhuzi afa mu ndzidzi ubodzi ene. Ahebheri atatu aponywa pakati pa moto. Mbwenye pidayang’ana Nabhukodhonozore, aona amuna anai mbakafamba pakati pa moto. Iye agopa kakamwe mbabvundzisa atumiki ace akunyindirika: ‘Kodi ife nee taponya amuna atatu pa moto? Ndikuona anai, pontho wacinai asaoneka ninga anju!’
Nabhukodhonozore afendedzera dhuzi mbaacemera: ‘Bulukani, imwe atumiki a Mulungu Wankulu Kakamwe!’ Anthu onsene adzumatirwa kakamwe pidaona iwo Sadhrake, Mezaki na Abhedhinego mbakabuluka pa moto nee kupya. Manungo awo, tsisi yawo na nguwo zawo nee zapya, pontho nee akhanunkha utci.
Nabhukodhonozore alonga: ‘Mulungu wa Sadhrake, Mezaki na Abhedhinego ndi Mulungu wamphambvu. Iye atuma anju wace toera kuapulumusa. Nkhabepo mulungu unango ninga wawo.’
Kodi imwe munakhala wakukhulupirika kuna Yahova mungayeserwa, ninga pidacita aphale atatu Acihebheri?
“Ndi Yahova Mulungu wako anafunika iwe kulambira, pontho ndiye basi anafunika iwe kutumikira.”—Mateu 4:10