Pitirizani Na Kudikhira Yahova
1 Izaiya alemba kuti: ‘Yahova ndi Mulungu wa kutonga miseru. Anyakutsanzaya ndi ale anapitiriza na kundikhira.’ (Iza. 30:18b, Tradução do Novo Mundo) Ziripo mbiri zizinji za Biblya zinalonga pya kutonga miseru kwa Mulungu kwa anyamalwa ace na kupulumusa anzakazi ace akukhulupirika. Kodi mbiri zenezi zisapfunzisanji alambiri a Yahova lero? Kodi tisafunika kucitanji cincino kuti tikhale akukhunganyika towera kufika kwa ‘ntsiku ikulu yakugopswa ya Mbuya’? (Yoele 3:4, 5 [2:31, 32, NM]) Nsonkhano wathu wa Gawo unafuna kudza wakuti “Kupulumuswa Kuli Cifupi!” unadzatikulumiza kunyerezera mabvunzo anewa na kudinga makhaliro athu. Iwo unadzatiphedza kupitiriza na kudikhira Yahova.
2 Kodi mwacita masasanyiro towera muphindule na ntsiku zonsene zitatu za nsonkhano wa gawo? Mwacitsanzo, kodi mwaphemba nzungu wanu kuti akutawiriseni kugumanika pa nsonkhano wa gawo? Lekani dikhira kutawiriswa mokhonda phemba. Phemberani thangwi ya pyenepi. Buluka penepo, phembani. (Neh. 2:4, 5) M’njira ibodzibodzi, mbatilekeni kudembuka kucita masasanyiro akumalisa ninga kusaka miotokala ya kuenda nayo, pakugona na pinthu pinango pyakufunika. Makhunganyikiro anewa adidi asapangiza kuti tisakomerwa kakamwe na meza yauzimu ya Yahova. Akulu ampingo asafunika kudziwa ale anafuna ciphedzo m’masasanyiro awo towera agumanike pa nsonkhano wa gawo, makamaka anyakukalamba a pa mpingo.—Agal. 6:10.
3 Makhaliro Adidi Asalemedza Mulungu: Munagumanyikana ife m’umwinji ukulu m’misonkhano ya gawo, makhaliro athu adidi asapereka umboni kwa anthu a m’cisa. Kodi pyenepi pisaphembanji kwa ife? Munagumanika ife m’hotel, m’restaurante na m’mbuto zinango za malonda m’cisa ca nsonkhano wa gawo, ale onsene anafuna ceza na ife asafunika akhale akukomerwa na makhaliro athu Acikristu, ninga kupirira, kupfulika, kudzitonga na nzeru zakulungama [‘kulinganira,’ NM]. (Agal. 5:22, 23, MZ; Afil. 4:5) Ife tonsene tisafunika kupangiza ntundu wakufuna wakuti ‘hunanyadzika [peno hunacita pinthu mokhonda thema] tayu, hunasaka pinthu pyawo basi tayu, hunasiribzwa tayu.’ Ngakhale paoneke nyatwa peno pinenso, ife tisafunika kucita ‘pyonsene towera kusimba Mulungu.’—1 Akor. 10:31; 13:5.
4 Mudamala nsonkhano unango wa gawo, ntsogoleri wa hotel akomerwa kakamwe na makhaliro pabodzi na maonekero a aphale na atsikana pakati pathu mbafika pa kulonga kuti ‘nzidzi onsene akhafuna kutambira Mboni za Yahova ninga alendo m’hotel mwace.’ Pisakomeresa tani pyenepi! Pyenepi pisapangiza kuti imwe anyakubala musapfunzisa na musaonera ananu. Si kwanzeru tayu kwa anyakubala kusiya anawo m’kwartu ya hotel mokhonda kuaonera. Nzidzi onsene anapiana asafunika kuonerwa mwadidi. (Mis.. 29:15) Makhaliro awo adidi mbasimbe Yahova na kukomeresa ntima wace!—Mis. 27:11.
5 Mabvaliro Na Makhunganyikiro Akulinganira: Mbodzi na mbodzi wa ife angakwanise kucita khundu yace towera paoneke makhaliro adidi pa nsonkhano wa gawo m’kucalira mabvaliro na makhunganyikiro akuti asamala m’kupita kwa nzidzi, nguwo zakukhonda kwana na zakukhonda thema. Pyenepi pisaphatambo basa munacita ife ulendo wa kuenda na kubwerera ku nzinda wa nsonkhano wa gawo, munaphedza ife kukhunganya mbuto ya nsonkhano unoyu na munabvesera ife nkhani. Ninga anzakazi a Mulungu, ife tisaikha dzina na mbiri ya Yahova pa mbuto yakutoma, tayu pyakusankhula peno ukhali wathu wadidi. Misolo ya mabanja iri na kupitawirira kwa kuyang’ana khala nzidzi onsene maonekero a piwalo pya banja yawo asapangiza kulinganira na nzeru yadidi.—1 Tim. 2:9.
6 Mphyakufunikambo kukhala na maonekero akulemedzeka m’nzidzi wa kupuma m’hotel, m’maloja na m’restaurante. Mphyadidi kubvala nguwo zinabvala ife pa nsonkhano munaenda ife kadya kunja pakumala kwa makhundu a nsonkhano wa gawo. Kubvala makaraxa athu a nsonkhano wa gawo kusatipasa miyai ya kupereka umboni mwantsusukano.—2 Akor. 6:3, 4.
7 Izaiya alongeratu: ‘Yahova anadzapitiriza na kudikhira towera kukuphedzani, natenepa iye anadzalamuka towera kukupangizani ntsisi.’ (Iza. 30:18a, NM) Kupereka takhuta kwa Yahova thangwi ya ntsisi na udidi wace okhonda kutithema kusafunika kutikulumiza kumulemedza kubulukira ku makhaliro na maonekero athu munagumanyikana ife pa misonkhano yathu ya gawo. Nsonkhano unoyu wa Gawo wakuti “Kupulumuswa Kuli Cifupi!” mbukuze Mulungu wathu na kutiphedza kupitiriza na kundikhira!
[Study Questions]
1. Kodi ndi upi nsolo wa nsonkhano wa gawo, na thangwi yanji ndi wakuthema?
2. Kodi tinapangiza tani kuti tisakomerwa na nsonkhano wathu wa gawo?
3. Kodi ndi makhaliro api anafunika kupangizwa na anthu a Yahova m’cisa ca nsonkhano wa gawo?
4. Kodi anyakubala anakwanisa tani kuphedza anawo kukhala na makhaliro anasimba Yahova?
5. Kodi tinakwanisa tani kusimba Yahova na mabvaliro pabodzi na makhunganyikiro athu?
6. Thangwi yanji tisafunika kukhala na maonekero mabodzi ene akulemedzeka m’nzidzi wakupuma ninga ale anapangiza ife pa kubvesera nkhani?
7. Kodi tinacita tani khundu m’kuphedza kuti nsonkhano wa gawo ukhale wakutsanzayisa na wandondondo? (Onani “Pikumbuso Pya Nsonkhano Wa Gawo.”)
Pikumbuso Pya Nsonkhano Wa Gawo
◼ Midzidzi Ya Nsonkhano: M’ntsiku zonsene zitatu nsonkhano unadzatoma m’nzidzi 8:30 wa kumacibese. Misuwo inadzafungulwa m’nzidzi 7:00 wa kumacibese. M’mphindi zakucepa nsonkhano mbudzati toma, muimiriri wa ndima anadzakhala pa platifomu na nyimbo zamalimba za Umambo mbiziimbwa. Ifembo tonsene tisafunika tikhale m’mipando mwathu m’nzidzi unoyu towera nsonkhano utome m’njira yakulemedzeka. Ncixanu nsonkhano unadzamala pa nzidzi 4:15 wa kumaulo, Nsabudu unadzamala pa nzidzi wa 4:05 wa kumaulo, na Ndimingu unadzamala pa nzidzi 3:10 wa kumaulo.
◼ Pakuikha Miotokala: Pa mbuto zonsene za misonkhano ya gawo zinatawiriswa ife kutonga pakuikha miotokala, ale akuti ali na miotokala yawo anadzaiikha mokhonda lipa mwakubverana na nzidzi unafika iwo. Makaraxa a nsonkhano wa gawo anadzaphatisirwa ninga cidzindikiro ca ale anafuna kuikha miotokala yawo. Nakuti kazinji kene mbuto za kuikha miotokala ndi za kucepa, khala m’motokala mwanu muna mbuto mungakwanise kubverana na anango ali na miotokala towera muphatisire motokala ubodzi ene mbuto mwakuti munthu mbodzi peno awiri basi aphatisire motokala wawo.
◼ Kukoya Mbuto Zakukhala: Mbuto zingakwanise kukoyerwa basi ene ale anaenda na imwe m’motokala ubodzi ene peno ale anakhala na imwe pa nyumba ibodzi ene.
◼ Cakudya Camasikati: Taphata mwendo bweresani cakudya canu camasikati towera mukhonde kusiya mbuto ya nsonkhano wa gawo towera kuenda kasaka cakudya m’nzidzi wa kupuma. Mungakwanise kuphatisira sestu ing’ono yakuti munakwanisa kuikoya pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru na pyakumwa pyakuledzeresa pa mbuto ya nsonkhano wa gawo.
◼ Pyakupereka: Kobiri izinji isabvungiwa m’kucita masasanyiro a nsonkhano wa gawo. Tingakwanise kupangiza kupereka kwathu takhuta m’kucita pyakupereka pyathu pyaufulu ku Nyumba yathu ya Umambo peno ku nsonkhano wa gawo towera kuphedza basa ya dziko yonsene yapantsi. Cheque zonsene zinaperekwa pa nsonkhano wa gawo zisafunika kulembwa m’dzina ya “Associação das Testemunhas de Jeová de Moçambique.”
◼ Ngobzi Na Utenda Wa Mwanzidzidzi: Munthu angadwala pa mbuto ya nsonkhano wa gawo, taphata mwendo bvunzani kalindi anagumanika paduzi, kuti akadziwise mwakucimbiza departamentu ya Ukonzi Wakutoma na ineyi inadzaphemba anthu anadziwa pya ukonzi anagumanika pa nsonkhano wa gawo kuti akadinge na kuphedza nyakudwala.
◼ Kukwata Mafala: Nee ntundu ubodzi wa magravador peno pyakukwata mafala usafunika kuphatanizwa pa pyakugaluza mafala peno pa masasanyiro a magesi. Pyakukwata mafala pingakwanise kuphatisirwa basi ene m’njira yokhonda dodomesa anango.
◼ Kukhoma Mafoto: Mungafuna kukhoma mafoto nkati mwa nzidzi wakubvesera nkhani, taphata mwendo lekani phatisira kucetuma.
◼ Bip Na Mitokodzi Ya M’manja: Ineyi isafunika kuthoweswa towera ikhonde dodomesa anango.
◼ Formulariu Queira Visitar: Phatisirani formulariu yakuti Queira Visitar (S-43) towera kudziwisa onsene adapangiza kukomerwa thangwi ya umboni wantsusukano udapereka ife nkati mwa nsonkhano wa gawo. Amwazi mphangwa asafunika kuenda ku nsonkhano na formulariu ibodzi peno mawiri akuti Queira Visitar. Maformulariu akulembwa angakwanise kuperekwa kwa mulembi wa mpingo wanu pa kubwerera ku mpingo.—Onani Nosso Ministério do Reino wa Fevereiro de 2005, tsa. 6.
◼ Masasanyiro A Mbuto Zakugona: Pasacitwa mabasa mazinji towera nsonkhano wa gawo ufambe mwadidi. Basa ibodzi ndi kucita masasanyiro towera kusakira abale mbuto yakugona. Mwandimomwene, ntsiku za nsonkhano wa gawo mbizisati kufika, Departamentu Ya Masasanyiro A Mbuto Zakugona isatoma phata basa towera kucita masasanyiro a kutsalakana onsene anaphemba pakugona. Masasanyiro anewa asathimizira kutsanzaya kwa kukhala pabodzi ninga Akristu.
Mbwenye, kudziwa kuti pinthu pyonsene pisafunika pifambe ‘mwakuthema pontho mwakundendemera’ pabodzi na kuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo m’nyumba za abale asafunika kukomerwa na pire pinapaswa iwo pabodzi na kubverana m’pinthu pinaphembwa kwa iwo. Pontho, citani pyonsene towera musiye kwartu yakucena ntsiku zonsene mbumusati kuenda ku nsonkhano wa gawo na mbumusati kupangana towera kubwerera kunyumba. Kukhala mulendo pa nyumba ya mbale nkhabe malisa kupitawirira kwathu kwa kusaka pyakudya pyathu pyene na motokala wa kuenda nawo ku nsonkhano wa gawo. Natenepa, munthu mbodzi na mbodzi asafunika kucita masasanyiro ace m’pyenepi. Kubverana na kubvesesa kwanu m’pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizwa. Pyenepi pisacitisa kuti pinthu pyonsene pifambe ‘mwakuthema pontho mwakundondomera.’ Midida ibodzi ene isaphatisirwa kwa ale anafikira pa mbuto ya nsonkhano wa gawo. Iwo asafunika kubverana na akalindi towera kusiya mbuto ya nsonkhano wa gawo yakucena ntsiku zonsene.—1 Akor. 14:40, CC.