Towererani Kristu M’kukhala Akulemedzeka
1 Biblya isafokotoza Ntongi Wankulu Wakudzulu na Pantsi, Yahova, ninga wakubvala ukulu peno kulemedzeka. (Sal. 104:1) Nzidzi onsene Yezu akhalonga na akhacita pinthu m’njira yakulemedza Babace na masasanyiro a Babace. (Jwau 17:4) M’bodzi na m’bodzi wa ife anadzakhala na mwai wakusangizira Yezu na kupasa mbiri Yahova nkati mwa Misonkhano ya Gawo inafuna kudza yakuti “Towererani Kristu!”
1. Kodi nsolo wa nsonkhano wa caka cino usabverana tani na kukhala kwathu akulemedzeka?
2 Ulambiri Wakulemedzeka: Tingakwanise kulemedza Yahova m’kucita masasanyiro towera tigumanike pa phwando yauzimu idatikhunganyira iye. Kodi mwalonga na nzungu wanu wa pa basa na mwakhunganya pinthu pyanu towera mugumanike ntsiku zonsene za nsonkhano wa gawo, kuphataniza Ncixanu? Kodi mwacita masasanyiro akufika m’nzidzi wakuthema towera kusaka mbuto yakukhala na kucita khundu m’nyimbo na phembero yakutoma? Kodi mwacita masasanyiro a cakudya camasikati towera mudye pa mbuto ya nsonkhano wa gawo na abale anu? Munatiphemba muimiriri wa programu m’njira yadidi kuti tikhale pa mbuto zathu kumatomero a khundu ibodzi na ibodzi nyimbo zamalimba mbazisati toma, tisafunika mwakucimbiza kumalisa makani athu na kukhala pantsi towera tibvesere kutoma kwa programu.
2. Kodi kukhunganyika kwathu towera kugumanika ku makhundu onsene kusalemedza tani Yahova?
3 Kubvesera mwacidikhodikho programu kusalemedzambo Babathu wakudzulu. Pakumala kuona nsonkhano wa gawo wapacisa, nyakulemba mphangwa unango alonga kuti anyakuona mbadadzumatirwa na “makhaliro acitsanzo cadidi a ale akhagumanika penepo, m’nzidzi ukhatowezera iwo pikhalongwa mbakhonda cita dzumbi mbapangiza tenepa kuti asatsalakana pinthu pyauzimu.” Iye afokotozambo pya “cilengeso ca anapiana azinji . . . , onsene m’makhaliro akusiyana kakamwe peno ngakhale akudzudzumika m’kusaka mavesi m’Biblya Yakucena.” Munacitwa programu, si nzidzi tayu wakuceza mokhonda funika, kutumizirana mphangwa, kudya, peno kufamba-famba. Anapiana asafunika kukhala na anyakubala awo towera anyakubala akwanise kuaphedza kuphindula na programu. (Deut. 31:12; Mis. 29:15) Kuwangisira kweneku kusapangiza cilemedzo kwa anango na kusapangiza kupereka takhuta ku cakudya cauzimu cakupasa umaso cinaperekwa.
3. Kodi kubvesera mwacidikhodikho programu kusalemedza tani ulambiri wathu?
4 Maonekero Akulemedzeka: Azinji apereka takhuta ku pikumbuso pya nkhani yakuti “Tikhaleni Akulemedzeka Ninga Akristu M’midzidzi Yonsene,” ya nsonkhano wa gawo wa caka cidamala idagomezera kuti anzakazi a Mulungu asafunika kuwangisira kukhala akulemedzeka m’mabvaliro na makhunganyikiro awo. Caka cino tisafunikambo kutsalakana kakamwe ntsonga ineyi. Maonekero athu asapangiza mabvero athu kwa Yahova na ku mwai wathu wakukhala Mboni zace. Nzidzi onsene tisafunika kubvala ninga “akulemedza Mulungu.”—1 Tim. 2:9, 10.
4. Thangwi yanji tisafunika kukhala na maonekero akulemedzeka pa nsonkhano wa gawo?
5 Kodi tisafunika kukhala na maonekero akulemedzeka munabvesera ife basi programu? Kumbukani kuti azinji anadzationa mbitibvala makaraxa athu a nsonkhano wa gawo m’nzinda wa nsonkhano. Maonekero athu asafunika kuticitisa kukhala akusiyana na anthu anango onsene. Natenepa, ngakhale m’nzidzi wakupuma, ninga tikaenda kadya pakumala programu, tisafunika kubvala ninga atumiki akuthema akuti ali m’nzinda na cifuniro ca kubvesera nsonkhano Wacikristu na nkhabe funika kubvala nguwo ninga jeans, makabudula, peno makamizeti. Pinadzapereka umboni wanji pyenepi kwa anthu apacisa! Yahova asakomerwa m’nzidzi wakuti maonekero athu asapangiza ciimiriro cathu ninga atumiki.
5. Kodi tinakwanisa tani kukhala na maonekero akulemedzeka m’nzidzi wakupuma m’nzinda wa nsonkhano wa gawo?
6 Maphindu Akutsanzayisa: Kukhala akulemedzeka ninga Akristu pa misonkhano yathu kusatipasa miyai ya kupereka umboni wantsusukano na kusiya anyakutiona na maonero adidi. Kunkhomo kwa nsonkhano wathu unango, tsacikunda unango alonga: “Cipo tidzati ona anthu a makhaliro adidi kakamwe [ninga imwe]. Mulungu akhadikhira kuti ife tikhale ninga imwe.” Kukhala akulemedzeka kusapangiza cilemedzo na kufunana unango na nzace na kusacitisa kuti Yahova asimbwe. (1 Ped. 2:12) Kusapangiza kugopa kwathu kwaumulungu na kupereka kwathu takhuta ku mwai wakupfunziswa na Babathu. (Aheb. 12:28) Tendeni tiwangisire towera tikhale akulemedzeka munadikhira ife Nsonkhano wa Gawo wa caka cino wa nsolo wakuti “Towererani Kristu!”
6. Kodi ndi maphindu api adidi anabwera thangwi ya kukhala akulemedzeka ninga Akristu?