Kugawira Micemerero ya Cikumbuso Kutomera pa Ntsiku 2 ya Nthanda ya Bwinja

1. Tinadzagawira lini micemerero ya Cikumbuso caka cino, pontho kampanya ineyi ya pa caka ndi yakufunika tani?

¹ Kutomera pa ntsiku 2 mpaka ntsiku 17 ya nthanda ya Bwinja, tinadzagawira micemerero ya cakucitika cikulu kakamwe ca pa caka—Cikumbuso ca kufa kwa Kristu. Mu pyaka pya nduli, anthu azinji adapangiza cifuno atawira ncemerero wa kampanya ineyi ya pa caka. Mwacitsanzo, pa ntsiku ya Cikumbuso, nkazi m’bodzi amenyera ntokodzi ofesi ya filiali mbalonga: “Ndamala kwene kufika panyumba, mbwenye ndagumana ncemerero pantsi pa nsuwo wanga. Ndisafuna ndiende, mbwenye nee ndisadziwa mwadidi ndzidzi wa cakucitika ceneci.” M’bale afokotoza kuti iye anakwanisa kugumana mphangwa zinalonga pyenepi pa ncemerero. Nkazi unoyu amalisa mafalace mbalonga tenepa, “ndinenda ku cikumbuso canu masiku ano!”

2. Kodi tinalonganji pakugawira ncemerero?

² Tinadzagawira Tani: Nakuti tiri na ndzidzi wakucepa toera kuphata basa mu cisa cathu consene, ndi pyadidi kakamwe kukhonda longa pinthu pizinji pa kugawira micemerero. Tisafunika kulonga: “Muli tani. Tisafuna kupasa banja yanu ncemerero uyu wa cakucitika cakufunika kakamwe cinacitwa pa caka, cakuti cinadzacitwa mu dziko yonsene yapantsi n’Dimingu ntsiku 17 ya nthanda ya Bwinja. [Perekani ncemerero kuna mwanaciro nyumba.] Ntsiku ineyi ndi ntsiku ya kufa kwa Yezu. Kunadzacitwa nkhani ya m’Bhibhlya yakukhonda kulipa. Nkhani ineyi inadzafokotoza kuti tinaphindula tani kubulukira ku ciomboli ca Kristu. Ncemerero uyu usapangiza mbuto na ndzidzi unafuna kudzacitwa nsonkhano unoyu mu cisa cathu.”

3. Kodi tinakwanisa tani kucemera anthu azinji kakamwe?

³ Khala mpingo uli na cisa cikulu kakamwe, akulu a mpingo angakwanise kukutawirisani kuti musiye micemerero pa zinyumba zinakhonda kugumanika anthu pa mbuto yakukhonda kuoneka na anthu. Onesesanimbo toera kucemera anacitira imwe maulendo akubwereza, acibale anu, anzanu a ku basa, anzanu a kuxikola, na anango anadziwa imwe. Pakugawira micemerero pa kumala kwa sumana, gawiranimbo marevista mu ndzidzi onsene wakuthema. Kodi munakwanisa kutumikira ninga mpainiya wakuphedza nkati mwa nthanda ya Bwinja na kucita khundu mwakukwana pa kampanya ineyi yakutsanzayisa?

4. Thangwi yanji tisafuna kuti anthu adapangiza cifuno agumanike pa Cikumbuso?

⁴ Ndi umboni wa mphambvu tani unafuna kutambira ale anafuna kudzagumanika pa cikumbuso! Iwo anadzabva ufuni ukulu wa Yahova mu kupereka kwace ciomboli. (Jwau 3:16) Iwo anadzapfunza kuti Umambo wa Mulungu unadzaphindulisa tani anthu onsene. (Luka 22:29) Iwo anadzawangiswa kuti alonge na akalindi toera aphembe pfunziro ya Bhibhlya toera kupfunza pizinji. Tiri kuphembera kuti anthu azinji a mitima yadidi anadzatawira kampanya ineyi na mbagumanika pabodzi na ife pa Cikumbuso!