Kampanya Yakudziwisa Cikumbuso Inatoma Ntsiku 17 Ya Murope

1. Ndi kampanya ipi inafuna kudzatoma pa ntsiku 17 ya Murope?

¹ Kucita Cikumbuso pyaka pyonsene kusaphedza kudziwisa kufa kwa Yezu. (1 Akor. 11:26) Na thangwi ineyi, tisafuna kuti anango agumanike pabodzi na ife toera kubva pya muoni waufuni wa ciomboli ca Yahova. (Jwau 3:16) Caka cino kampanya yathu toera kucemera anthu kuti abwere ku Cikumbuso inatoma n’Sabudu ntsiku 17 ya nthanda ya Murope. Kodi muli kudikhira toera kucita khundu mwakukwana?

2. Tinalonganji pakugawira ncemerero?

² Tinalonganji: Mphyadidi kukhala na maperekero aumboni acigwagwa. Tisafunika kulonga: “Muli tani. Tisafuna kupasa banja yanu ncemerero uyu wa cakucitika cakufunika kakamwe cinacitwa pyaka pyonsene, cakuti cinadzacitwa mu dziko yonsene yapantsi pa ntsiku 5 ya Bwinja. Kunadzacitwa nkhani ya m’Bhibhlya yakukhonda kulipa. Nkhani ineyi inadzafokotoza kuti kufa kwa Yezu kwakwanirisanji, pontho ninji pinacita iye cincino. Ncemerero uyu usapangiza mbuto na ndzidzi unafuna kudzacitwa nsonkhano unoyu mu cisa cathu.” Pakugawira ncemerero pakumala kwa sumana, pingakwanisika gawiranimbo marevista.

3. Tinakwanisa tani kucemera anthu azinji pingakwanisika?

³ Cemerani Anthu Azinji Pingakwanisika: Cifuno cathu ndi kucemera anthu azinji pingakwanisika. Onesesanimbo toera kucemera anyakupfundza anu a Bhibhlya, anacitira imwe maulendo akubwereza, acibale anu, andzanu akubasa, andzanu akuxikola, anyakuendekana na anango anadziwa imwe. Akulu a mpingo anadzapereka citsogolero cakuti munakwanisa tani kuphata basa cisa canu consene. Makampanya athu a caka na caka akucemera anthu ku Cikumbuso asabweresa maphindu. Caka cidamala, mudapita nkazi m’bodzi m’mbuto ikhacitirwa cikumbuso, kalindi aperekeka toera kumphedza kugumana m’mwazi mphangwa adancemera ku cikumbuso. Mbwenye nkazi unoyu alonga kuti nee akhadziwana na munthu m’bodzi mwenemo, basi ene iye atambira ncemerero na munthu unango wakuti akhacita basa ya nyumba na nyumba pa ntsiku ineyi namacibese.

4. Ndi mathangwi api alipo toera kucita khundu mwaphinga mu kampanya?

⁴ Panango munthu anadzagumanika pa Cikumbuso thangwi ya ncemerero udasiya imwe. Khala munthu atawira peno nkhabe, kuwangisira kwanu kunadzapitiriza kupereka umboni. Micemerero inafuna imwe kugawira inadzadziwisa kuti Yezu ali kutonga cincino ninga Mambo wamphambvu. Kucita kwanu khundu mwaphinga kunadzapangiza kuna anthu onsene a mu cisa canu, amwazi mphangwa andzanu, makamaka kuna Yahova—kuti imwe musapereka takhuta kakamwe thangwi ya muoni wa ciomboli.—Akol. 3:15.