Munapereka Tani Uphungu Wadidi Kuna Anango?

1. Mbani anafunika kupereka uphungu, pontho thangwi yanji?

KODI imwe musakomerwa kupasa uphungu anango? Kuna anango nee ndi pyakunentsa kucita pyenepi. Mbwenye anango asagopa, pontho nee asakhala akusudzuka toera kucita pyenepi. Ngakhale tenepo, ife tonsene tisafunika kupereka uphungu. Thangwi yanji? Thangwi Yezu alonga kuti atowereri ace mbadadziwika thangwi yakufunana. (Juw. 13:35) Njira ibodzi yakupangiza ufuni unoyu ndi kupereka uphungu kuna abale na alongo athu pingakhala pyakufunika. Bhibhlya isalonga kuti tingapereka uphungu na “ntima onsene” tinakwanisa kutomesa “uxamwali wadidi.”—Mis. 27:9.

2. Akulu a mpingo asafunika kucitanji, pontho thangwi yanji? (Onani bokosi ya nsolo wakuti “Uphungu pa Misonkhano ya Pakati pa Sumana.”)

² Makamaka akulu a mpingo asafunika kudziwa kupereka uphungu wadidi. Yahova na Yezu apasa amuna anewa basa yakutsalakana mpingo. (1 Ped. 5:2, 3) Cibodzi mwa pinthu pinacita akulu a mpingo toera kupereka uphungu ndi kucita nkhani pa misonkhano. Iwo asafunikambo kupereka uphungu kuna m’bodzi na m’bodzi mu mpingo na kuphedza ale adasiya kutumikira Yahova toera abwerere mu mpingo. Mphapo akulu a mpingo na ife tonsene, tinapereka tani uphungu wadidi?

3. (a) Tinakwanisa tani kupereka uphungu wadidi? (Izaiya 9:6; onanimbo bokosi ya nsolo wakuti “Towezerani Yezu Pakupereka Uphungu.”) (b) Tinapfundzanji mu nsolo uno?

³ Tinakwanisa kupereka uphungu wadidi tingapfundza na anthu analongwa m’Bhibhlya, makamaka na Yezu. Iye asacemerwambo “Phungu Wadidi Kakamwe.” (Lerini Izaiya 9:6.) Mu nsolo uno tinapfundza kuti tinapereka tani uphungu khala munthu auphemba, pontho tinapereka tani uphungu khala munthu nee auphemba. Tinapfundzambo kuti thangwi yanji ndi pyakufunika kupereka uphungu pa ndzidzi wakuthema na munjira yadidi.

TINAPEREKA TANI UPHUNGU KHALA MUNTHU AUPHEMBA?

4-5. Munthu angatiphemba uphungu, tisafunika kubvundzikanji? Perekani citsandzo.

⁴ Tisafunika kucitanji pakutoma munthu angatiphemba uphungu? Panango tinatsandzaya thangwi yakudziwa kuti munthu unoyu asatinyindira mbatitomeratu kumpasa uphungu. Mbwenye pakutoma tisafunika kubvundzika: ‘Kodi ndine wakuthema toera kupereka uphungu thangwi ya pyenepi?’ Midzidzi inango, njira yadidi kakamwe yakuphedza munthu nee ndi kumpasa uphungu, mbwenye ndi kumpangiza munthu wakuthema toera kumpasa uphungu.

⁵ Nyerezerani kuti xamwali wanu wa ponda ndipondembo adzindikira kuti ali kuduwala. Buluka penepo iye atoma kusaka ukondzi mbakuphembani toera mumphedze kusankhula. Panango imwe musadziwa ukondzi wa utenda unoyu kupiringana anango, mbwenye imwe nee mwapfundza pya ukondzi. Khala ndi tenepo, njira yadidi kakamwe yakuphedza xamwali wanu ndi kumpangiza munthu adapfundza pya ukondzi toera am’phedze.

6. Tisafunika kucitanji mbatidzati kupereka uphungu?

⁶ Maseze munyerezere kuti muli na uphungu wadidi, panango musafunika kudikhira pang’ono mbamudzati kupereka uphungu. Thangwi yanji? Thangwi bukhu ya Misangani 15:28 isalonga: ‘Munthu wakulungama asanyerezera mwadidi mbadzati kutawira.’ Mphapo ndiye tani munganyerezera kuti musadziwa kale ntawiro? Ngakhale tenepo, ndi pyadidi kufufudza, kucita phembero na kunyerezera mwadidi pinafuna imwe kulonga. Mungacita pyenepi munakhala na cinyindiro cakuti pinafuna imwe kulonga pisabverana na pinafuna Yahova. Onani pidacitikira mprofeta Natani.

7. Tisapfundzanji na pidacitikira mprofeta Natani?

⁷ Mambo Dhavidhi apanga mprofeta Natani kuti iye akhafuna kumangira Yahova templo. Mwakukhonda dembuka, Natani alonga kuti ceneci cikhali cisankhulo cadidi. Mbwenye pakutoma iye akhafunika kubvundza Yahova. Thangwi yanji? Thangwi Yahova nee akhafuna kuti Dhavidhi amange templo. (1 Kro. 17:1-4) Pyenepi pisapangiza kuti munthu angatiphemba uphungu, ndi pyandzeru ‘kudembuka kulonga.’—Tiya. 1:19.

8. Ndi thangwi ipi inango iri na ife toera kucita mphole-mphole mbatidzati kupereka uphungu?

⁸ Nyerezerani thangwi inango iri na ife toera kucita mphole-mphole mbatidzati kupasa munthu uphungu. Tingapasa munthu uphungu wakuphonyeka, panango ife tinakhala na mulando iye angacitikirwa na pinthu pyakuipa. Mwakukhonda penula, tiri na mathangwi adidi akunyerezera mwadidi mbatidzati kupereka uphungu.

TINAPEREKA TANI UPHUNGU KHALA MUNTHU NEE AUPHEMBA?

9. Akulu a mpingo asafunika kukhala na cinyindiro cipi mbadzati kupereka uphungu? (Agalata 6:1)

⁹ Midzidzi inango, akulu a mpingo asafunika kupereka uphungu kuna m’bale peno mulongo wakuti “atoma kufamba munjira yakuipa.” (Lerini Agalata 6:1.) Munthu panango anacita pisankhulo pyakuipa pyakuti mukupita kwa ndzidzi pinancitisa kucita madawo. Natenepa, cifuno ca akulu a mpingo ndi kuphedza munthu unoyu toera apitirize kutumikira Yahova mbatambira umaso wakwenda na kwenda ntsogolo. (Tiya. 5:19, 20) Mbwenye toera akulu a mpingo apereke uphungu wadidi asafunika kukhala na cinyindiro cakuti munthu unoyu ali kufambadi munjira yakuipa. Khala munthu acita cisankhulo cakusiyana na cikhafuna ife kucita, nee pisabveka kuti iye ali kutsukwalisa Yahova. (Aroma 14:1-4) Mphapo akulu a mpingo anacitanji angakhala na cinyindiro cakuti m’bale peno mulongo ali kufambadi munjira yakuipa, pontho asafunika kupaswa uphungu?

10-12. Akulu a mpingo asafunika kucitanji pakupereka uphungu kuna munthu wakuti nee auphemba? Perekani citsandzo. (Onanimbo mafoto.)

¹⁰ Panango pinanentsa kuna akulu a mpingo kupereka uphungu kuna munthu wakuti nee auphemba. Thangwi yanji? Mpostolo Paulu alonga kuti panango munthu nee anadzindikira kuti asafunika kupaswa uphungu. Natenepa cinthu cakutoma cakuti akulu a mpingo asafunika kucicita ndi kukhunganya munthu toera atambire uphungu.

¹¹ Kupereka uphungu kuna munthu wakuti nee auphemba kwalandana na kulima munda wa mataka akuuma. Mbadzati kubzwala, nyakulima asafunika kutipula munda onsene toera mataka akhale akufewa. Buluka penepo, asabzwala mbeu mbaithirira toera ikule mwadidi. Munjira ibodzi ene, nkulu wa mpingo mbadzati kupereka uphungu kuna munthu wakuti nee auphemba, asafunika kumphedza toera atawire uphungu mwakukhonda nentsa. Mwacitsandzo, nkulu wa mpingo asadikhira ndzidzi wakuthema, asapanga m’bale unoyu kuti asanfuna kakamwe mbalonga kuti asafuna kucedza naye. Munthu anapereka uphungu angadziwika kuti ndi waufuni, pinakhala pyakukhonda nentsa kuna anango toera kutawira uphungu wace.

¹² Mu ndzidzi unacedza iwo, nkulu wa mpingo anakwanisa kuphedza munthu toera kutawira uphungu mwakukhonda nentsa angampanga kuti tonsene tisacita madodo, pontho midzidzi inango tisafunika kupaswa uphungu. (Aroma 3:23) Nkulu wa mpingo asalonga mwakukhurudzika, mwacilemedzo, pontho asaphatisira Bhibhlya toera kumpanga cinthu cidacita m’bale unoyu cinapangiza kuti ali kufamba munjira yakuipa. Buluka penepo, m’bale unoyu angadzindikira pinthu pyakuipa pidacita iye, nkulu wa mpingo anafokotoza munjira yakukhonda nentsa kubvesesa pinthu pinafunika iye kucita toera acinje. Pakumalisa, nkulu wa mpingo asansimba thangwi ya pinthu pyadidi pinacita iye toera atawire uphungu.—Tiya. 5:15.

13. Akulu a mpingo anakhala tani na cinyindiro cakuti munthu anapasa iwo uphungu aubvesesa mwadidi?

¹³ Midzidzi inango, pinthu pinalonga munthu anapereka uphungu pisakhala pyakusiyana na pinabvesesa ule anaupaswa. Akulu a mpingo asafunika kucitanji toera kucalira pyenepi? Iwo anakwanisa kucita mibvundzo munjira yadidi toera kuona khala munthu anapasa iwo uphungu abvesesa uphungu na pinthu pinafunika iye kucita toera kuuphatisira.—Ekle. 12:11

PEREKANI UPHUNGU PA NDZIDZI WAKUTHEMA NA MUNJIRA YADIDI

14. Thangwi yanji nee tisafunika kupereka uphungu mu ndzidzi wakuti tiri wakuipirwa?

¹⁴ Ife tonsene ndife akusowa ungwiro. Na thangwi ineyi midzidzi inango tinalonga peno kucita pinthu pyakuti pinatsukwalisa anango. (Akol. 3:13) Bhibhlya isalonga kuti midzidzi inango tinaipirwa peno kutsukwalisa anango. (Aef. 4:26) Mbwenye nee tisafunika kupereka uphungu tingakhala akuipirwa. Thangwi yanji? Thangwi “ukali wa munthu nkhabe kubweresa ulungami wa Mulungu.” (Tiya. 1:20) Tingapereka uphungu mu ndzidzi wakuti tiri wakuipirwa, tinatekeresa pinthu. Pyenepi nee pisabveka kuti tisafunika kukhala akumatama mbatikhonda kulonga mabvero athu kuna munthu adatitsukwalisa. Mbwenye tinakwanisa kulonga mwadidi kakamwe mu ndzidzi wakuti tiri wakukhurudzika. Ife tinakwanisa kupfundza na pinthu pidacita Eliyu, thangwi iye apereka uphungu wadidi kuna Yobe.

15. Tisapfundzanji na pinthu pidacita Eliyu? (Onanimbo foto.)

¹⁵ Mu ntsiku zizinji Yobe akhatawira axamwali ace thangwi ya pinthu pikhampambizira iwo. Eliyu akhabvesera pinthu pikhalonga Yobe. Iye abvera ntsisi Yobe. Mbwenye Yobe akhayesera kupangiza kuti iye nee acita pinthu pyakuipa mbalonga uthambi thangwi ya Yahova. Na thangwi ineyi, Eliyu aipirwa kakamwe. Ngakhale tenepo, Eliyu adikhira ndzidzi wadidi mbalonga mwakukhurudzika na mwacilemedzo mu ndzidzi ukhapereka iye uphungu kuna Yobe. (Yobe 32:2; 33:1-7) Pidacita Eliyu pisatipfundzisa cinthu cakufunika kakamwe: Ndzidzi wakuthema toera kupereka uphungu ndi tingakhala akukhurudzika, pontho njira yadidi ndi kupereka uphungu mwacilemedzo na mwaufuni.—Ekle. 3:1, 7.

PITIRIZANI KUPEREKA NA KUTAWIRA UPHUNGU

16. Lemba ya Masalmo 32:8 isatipfundzisanji?

¹⁶ Yahova alonga: “Ndinakuonera toera ukhale wakutsidzikizika, mbandikupasa uphungu.” (Lerini Masalmo 32:8.) Pyenepi pisapangiza kuti ndzidzi onsene Yahova asatiphedza. Iye asatipasa uphungu, pontho asatiphedza toera kuuphatisira. Ife tisafunikambo kucita pyenepi. Imwe mungakhala na mwai wakupereka uphungu, towezerani Yahova. Munthu adapasa imwe uphungu angafuna ciphedzo toera acite pisankhulo pyadidi, pitirizani kumphedza.

17. Thangwi yanji ndi pyadidi kukhala na akulu a mpingo anaphatisira Bhibhlya toera kutipasa uphungu wadidi? (Izaiya 32:1, 2)

¹⁷ Mu ntsiku zino tisafunika kakamwe kupereka na kutambira uphungu wadidi. (2 Tim. 3:1) Akulu a mpingo anaphatisira Bhibhlya toera kupereka uphungu wadidi ndi “ninga mikulo ya madzi mu dziko yakusowa madzi.” (Lerini Izaiya 32:1, 2.) Ife tisakomerwa kakamwe xamwali wathu angatipasa uphungu unafuna ife. Mafalace asakhala ninga “masau a ouro mu mbale ya parata.” (Mis. 25:11) Natenepa tendeni tithimizire udziwisi wathu toera tikwanise kupereka na kutambira uphungu wadidi.