Kupereka Umboni Mwacinyindiro mu Pisa Pyamalonda
1. Thangwi yanji nee tisafunika kufewa manungo khala tisaona kuti kupereka umboni m’mbuto zamalonda kukhala kwakugopesa?
1 Kodi musaona kupereka umboni m’mbuto zamalonda kukhala kwakugopesa? Khala ndi tenepa lekani kufewa manungo, ngakhale mpostolo Paulu wakuti akhali m’mwazi mphangwa wacipapo na wakukhonda gopa, ‘apaswa cipapo’ toera kumwaza mphangwa. (1 Ates. 2:2) Tinadzadinga pinentso pingasi pyakudziwika na kupereka maonero akuphata basa toera kukunda pinentso pyenepi.
2. Thangwi yanji nee tisafunika kugopa kudzudzumisa anyabasa?
2 Kudzudzumisa Anyabasa Kunadzaacitisa Kukhala Akuipirwa? M’mbuto zizinji zamalonda, anyabasa asadikhira kuphedza anthu onsene anaafendedzera, natenepa iwo asadikhira kudzudzumiswa. Nakuti anadzakuonani ninga nyakugula malonda awo, kazinji kene iwo anadzapangiza citsalakano. Mungabvala mwadidi, mbamupangiza citsalakano na uxamwali, munadzakulumiza anthu toera kupangiza matsalakaniro acilemedzo.
3. Tinacalira tani kucitisa anyakugula kuipirwa?
3 Ndinadzapereka Umboni Pakati pa Anyakugula Azinji? Pingakwanisika, sankhulani ndzidzi wakuti anyakugulisa nee aphatika kakamwe na basa, makamaka pa ndzidzi unafungula iwo maloja peno nsika. Mbatidzati kufendedzera nyakuonera anyabasa dikhirani mpaka pa ndzidzi wakuti ali ekhene. Citani maperekero anu aumboni kukhala acigwagwa kakamwe.
4. Tisafunika kulonganji pakuphata basa m’mbuto zamalonda?
4 Ndisafunika Kulonganji? Longani na nyakuonera anyabasa khala pana anyabasa azinji. Munakwanisa kulonga: “Ndi kwakunentsa kugumana anyamalonda panyumba, natenepa tikucedza na imwe pa mbuto yanu ya basa. Ndisadziwa kuti mukuphata basa, mbwenye ndisafuna kulonga mwacigwagwa.” Toera tikhonde kuoniwa ninga anyakugulisa, mphyadidi kukhonda kulonga masasanyiro a cakupereka, basi ene angatibvundza kuti basa yathu isaphedzwa tani. Pisanyindira ntundu wa malonda, panango munakwanisa kuphemba nyakuonera anyabasa toera kulonga mwacigwagwa na anyabasa. Bwerezerani maperekero anu aumboni kwa iwo. Khala nyabasa aphatika na basa, cepesani maperekero anu aumboni na mpaseni katsamba. Khala nee pinakwanisika kulonga na anyabasa, panango anakutawirisani kusiya mabukhu pa mbuto inapuma iwo peno pa mbuto inango.
5. Ndi mathangwi api alipo toera kupereka umboni mwacinyindiro m’mbuto zamalonda?
5 Yezu na Paulu amwaza mphangwa mwacinyindiro kwa anthu mu zimbuto zawo zamalonda. Imwe munakwanisambo kucita pyenepi. (Mat. 4:18-21; 9:9; Mach. 17:17) Phembani ciphedzo ca Yahova toera mukhale na ntima wakupfulika pontho wacipapo. (Mach. 4:29) Mu pisa pyamalonda kazinji kene musagumanika anthu, mphapo thangwi yanji nkhabe kuyesera kupereka umboni m’mbuto zamalonda?