Kodi Pyonsene Ipi Pisafuna Longanji?

YEZU KRISTU alonga: “Kumala kwa pantsi pano [peno kwa makhaliro a pinthu]” mbukudadzindikirwa na nkhondo, kusoweka kwa pyakudya, muliri na piteketeke.—Mateyu 24:1-8; Luka 21:10, 11.

Kubulukira 1914 umaso usafudzwa na nkhondo pakati pa madziko na pakati pa misoka ya madzinza, kazinji kene thangwi ya kupipitisa kwa atsogoleri auphemberi nkati mwa ndale na kumwazika kwa upomokeri wa aterrorista unaoneka cincino.

Maseze pana kuthimizirika kwa kukolola kwa pyakudya, madzana a pikwi pya pikwi pya anthu pa dziko yonsene yapantsi ali pa nyatwa yakusowa kukulu kwa pyakudya. Pa caka, pikwi pya pikwi pya anthu pisafa thangwi ya kusowa kwa pyakudya.

Muliri, peno, kumwazika kwa utenda wakupasirana wakupha kakamwe, ndi khundu pontho ya cidzindikiro cidapaswa na Yezu. Pakumala Nkhondo Yakutoma ya Dziko Yonsene Yapantsi, nyampwanda apha anthu akupiringana 21.000.000. Mwakusiyana na miliri yakuti kalene yakhuya mbuto zingasi basi, iye akhuya madziko mazinji m’dziko yonsene yapantsi pabodzi na ntsuwa zakutali. SIDA cincino iri kupswaira dziko yonsene yapantsi, na miliri ninga cokolo, malariya, thanya na kolera iri kuenda kutsogolo m’madziko akuthumburuka.

Mwandimomwene, caka consene pana makhumi a pikwi a piteketeke pya mphambvu zakusiyana. Mwakukhonda tsalakana kukhalapo kwa mitcini na njira zadidi zakupasa malipoti a piteketeke na mphambvu zapyo, nzidzi onsene kusabveka mphangwa zapidengwa m’mbuto zinagumanika anthu azinji thangwi ya piteketeke.

Pontho Bibilya yalongeratu: “Kumbuka kuti pansiku zakumalisa kunadzakhala ndzidzi wakugoswa. Anthu anadzakhala akupifuna okha ene, akuikha mtima pakobiri, akugaya, akudungudza, akutikana, okhonda vera anyakuabala, okhonda pereka takhuta, pontho okhonda pembedza; iwo anadzakhala okhonda funa anzawo, okhonda kuva nsisi, atsweda, okhonda kuuphata mtima, aukali, pontho okhonda funa pyadidi; iwo anadzakhala anyakupereka anzawo kuna anyamalwawo, okhonda khala na mantha na pyakugoswa, akunyada pyakuwanga, akufuna pinthu pyakuatsanzayisa okha ene m’mbuto mwa kufuna Mulungu; podi kwene kuti iwo ambaoneka ninga anthu akupembedza, iwo ambakhonda mphamvu yache. Kuna anthu enewa ufunduke.”—2 Timoti 3:1-5, Chiverano Chachinchino.

Kodi imwe nkhabe tawira kuti tisakhala ‘m’ndzidzi wakugoswa’?

Kodi imwe musaona kuti anthu, m’njira yakupiringa ndida, asapifuna okhene, asaikha mitima yawo pakobiri, asatsogolerwa na kupikuza?

Kodi mbani anafuna khonda kuti dziko yadzala na anthu aumbirimi mbwenye akukhonda pereka takhuta, akukhonda kubva ntsisi, akukhonda khulupirika?

Kodi imwe musadziwa kuti kukhonda bvera anyakubala pabodzi na kukhonda funa anango kwakudzidzida pyathimizirika pikulu pene mbuto zingasi pa dziko yapantsi?

Nkhabepo cipenulo cakuti imwe musadziwa kuti ife tisakhala m’dziko yakudzala kakamwe na kufuna pinthu pyakutsanzayisa mbwenye yakusowa kufuna udidi. Bibilya isafokotoza tenepa makhaliro akuti mbadakhalapo “pansiku zakumalisa.”

Kodi kusafunika pinango towera kudzindikira nzidzi unakhalefe? Pontho Yezu alongeratu kuti nkati mwa nzidzi unoyu, mphangwa zadidi za Umambo wa Mulungu mbizidamwazwa m’dziko yonsene yapantsi. (Mateyu 24:14) Kodi piri kucitwa pyenepi?

A Sentinela, tsamba ya mphangwa yakubuluswa m’Bibilya yakucitirwa kudziwisa mphangwa zadidi za Umambo wa Yahova, iri kudindwa nzidzi onsene m’pilongero pizinji kupiringana matsamba anango a mphangwa.

Caka consene, Mboni za Yahova zisapereka midzidzi yakupiringana biliyau ibodzi m’kupereka okhene umboni wa pya Umambo wa Mulungu kwa anango.

Mabukhu anafokotoza Bibilya ali kubuluswa nzidzi uno na Mboni za Yahova m’pilongero cifupi na 400, ngakhale m’pilongero pyakulerwi na misoka ing’ono na yakutali ya anthu. Mboni za Yahova zafika ku madziko onsene na mphangwa zadidi; izo zamwazambo mphangwa m’ntsuwa na pisa pizinji pyakuti ndi ping’ono kakamwe m’maonero a ndale. M’madziko mazinji, izo zisatsogolera m’nzidzi onsene ndandanda wa mapfunziro a Bibilya.

Mwandimomwene, mphangwa zadidi za Umambo wa Mulungu ziri kumwazwa m’dziko yonsene yapantsi towera kupereka umboni, tayu kucinja dziko. Anthu konsene kwene akupaswa mwai wakupangiza khala iwo asatsalakana ule adacita kudzulu na dziko yapantsi peno khala anadzapangiza cilemedzo kwa miyambo yace na kupangiza kufuna anthu anango.—Luka 10:25-27; Chidziwiso 4:11.

Mwakukhonda dembuka, Umambo wa Mulungu unadzacenesa dziko yapantsi ku uipi onsene na kucita kuti iyo yonsene ikhale paradizu.—Luka 23:43.

[Bokosi pa tsamba 6]

Ntsiku Zakumalisa Zanji?

Si ntsiku zakumalisa za anthu tayu. Thangwi Bibilya isapasa cidikhiro ca umaso wa kwenda na kwenda kwa ale anacita cifuno ca Mulungu.—Juwau 3:16, 36; 1 Juwau 2:17.

Si ntsiku zakumalisa za dziko yapantsi tayu. Mafala a Mulungu asapikira kuti dziko yapantsi yakukhaliwa inadzakhalapo kwenda na kwenda.—Masalimo 37:29; 104:5; Yesaya 45:18.

Mbuto mwa pyenepi, izi ndi ntsiku zakumalisa za makhaliro awa apinthu auphanga na akusowa kufuna, na za ale anaphatisisa njira za makhaliro anewa.—Misanje 2:21, 22.

[Bokosi/Foto pa tsamba 7]

Kodi Bibilya Ndi Mafaladi A Mulungu?

Kazinji kene, aprofeta a Bibilya alemba: “Ipi ndipyo pidalonga Yahova.” (Yesaya 43:14; Yeremia 2:2) Ngakhale Yezu Kristu, Mwana wa Mulungu, agomezera kuti ‘pidalonga iye nee pikhali pyace tayu.’ (Juwau 14:10) Bibilya ene isalonga mwapakweca: “Pyonsene pidalembwa m’bukhu ya Mulungu, mphya Nzimu wache.”—2 Timoti 3:16.

Nkhabepo bukhu inango yakubuluswa m’pilongero pizinji—pyakupiringana 2.200, ninga pidalongwa na United Bible Societies. Nkhabepo bukhu inango yakugawirwa kakamwe—cincino na makopiya akupiringana mabiliyau manai. Kodi si pyenepi pinadikhira imwe ku mphangwa zakubuluka kwa Mulungu towera anthu onsene tayu?

Towera kuona mwakukwana pipangizo pyakuti Bibilya yapepeserwa na Mulungu, yang’anani bukhu A Bíblia—Palavra de Deus ou de Homem?, yakubuluswa na Mboni za Yahova.

Mukaleri Bibilya na kupereka takhuta thangwi yakuti ndi Mafaladi a Mulungu, imwe munadzaphindula kakamwe.

[Bokosi/Foto pa tsamba 8]

Kodi Umambo Wa Mulungu Ndi Ninji?

Ndi utongi wakupambulika udaikhwa na Mulungu wandimomwene, Yahova, Nciti wa kudzulu na dziko yapantsi.—Yeremia 10:10, 12.

Bibilya isapangiza Yezu Kristu ninga ule anapaswa na Mulungu mphambvu ineyi yakutonga. (Chidziwiso 11:15) Mukakhala iye pa dziko yapantsi, Yezu apangiza kuti m’nzidzi uneule akhali na mphambvu yakudzumatirisa yakubulukira kwa Mulungu—mphambvu idancitisa kutonga mphepo na bara, kuwangisa mitundu yonsene ya matenda, na kulamusambo akufa. (Mateyu 9:2-8; Marki 4:37-41; Juwau 11:11-44) Profesiya yakupepeserwa ya Bibilya yalongeratu kuti Mulungu mbadadzampasambo “utongi na ukulu na umambo, towera anthu onsene, misoka ya madziko na pilongero pintumikire.” (Danyeli 7:13, 14) Utongi unoyu usacemerwa Umambo wakudzulu; Yezu Kristu ali kutonga cincino kubulukira kudzulu.

[Mafoto pa tsamba 7]

Kumwaza mphangwa zadidi m’dziko yonsene yapantsi