‘Pinafuna Mulungu Mbapicitwe’
1. Ndi upi nsolo wa programu ya ntsiku ya nsonkhano wakupambulika wa caka ca basa ca 2012, thangwi yanji ndi pyakuthema kudinga nsolo unoyu?
1 Ife tacitwa thangwi ya kufuna kwa Yahova. (Apok. 4:11) Natenepa, pinanentsa kukwanirisa cifuniro cakukhala kwathu maso tingakhonda kupfundza na kucita cifuno ca Mulungu. Nee ndi pyakukhonda nentsa ninga munaonekera ipyo, thangwi tisafunika kuthimbana na cipendamiro cankati cakucita ‘pire pinasirira manungo’ peno kucita “pya ajentiu [anthu a dziko, Tradução do Novo Mundo].” (Aef. 2:3; 1 Ped. 4:3; 2 Ped. 2:10) Mwakusowa ciphedzo ca Yahova, mbatidakhala pangozwi ya ‘kumangwa na misampha ya [Dyabo] mbaticitisa pinafuna iye.’ (2 Tim. 2:26) Programu ya ntsiku ya nsonkhano wathu wakupambulika wa caka ca basa ca 2012 inadzatiphedza toera kuphata basa mwakubverana na phembo yacitatu idatipfundzisa Yezu toera kuphembera. (Mat. 6:9, 10) Nsolo wa nsonkhano ndi wakuti ‘Pinafuna Mulungu Mbapicitwe.’
2. Ndi mibvundzo ipi inafuna kudzatawirwa nkati mwa programu ya nsonkhano?
2 Mibvundzo Inafuna Kudzatawirwa: Munabvesera imwe programu ya nsonkhano, sakani kutawira mibvundzo iyi: Ndi cinthu cipi cinango cinafunika ife kucita kusiyapo kubvesera Mafala a Mulungu? Tinakwanisa tani kudzindikira pinafuna Mulungu kwa ife? Thangwi yanji tisafunika kukhala akufunisisa kuphedza anthu a mitundu yonsene? Tinagumana tani umaso wakutsandzayisa? Aphale na atsikana, musafunika kupangizanji kuna Yahova? Ndi maphindu api anafuna kutambirwa thangwi yakucita pinafuna Mulungu? Thangwi yanji mwakucimbiza ndi kwakufunika kuwangisira na kuwangisa anango?
3. Tinaphindula tani mwakukwana na programu ya ntsiku ya nsonkhano wakupambulika?
3 Citani pyonsene toera kugumanika, pontho bveserani mwacidikhodikho programu ya nsonkhano. Muimiriri wakubuluka ku Beteli peno muyang’aniri wakufamba-famba panango anadzagumanikambo pa nsonkhano ninga nyakucita nkhani wamulendo. Mbidzati kutoma peno pakumala kwa programu, khalani wakusudzuka toera kucedza na iye peno na nkazace, khala ndi nyakumanga banja. Mungabwerera kunyumba lekani kukhala ‘nyakubva wakuduwala pyonsene,’ mbwenye bwerezerani programu ya nsonkhano ninga banja, pontho cedzani kuti munacita tani pinthu mwakubverana na cifuno ca Mulungu.—Tgo. 1:25.
4. Thangwi yanji ndi pyakufunika kuti kucita cifuno ca Mulungu kukhale pa mbuto yakutoma mu umaso wathu?
4 Mwakukhonda dembuka, ale anacita pifuno pyawo na ale anakhonda kungonjera toera kucita cifuno ca Yahova anadzafudzwa. (1 Jwau 2:17) Mwandimomwene, tisapereka takhuta nakuti Yahova asakhunganya mphangwa izi mu ndzidzi wakuthema toera kutiphedza kuti kucita cifuno ca Mulungu kukhale pa mbuto yakutoma mu umaso wathu!