Phatisirani Njira Yakuti Inaphata Basa

1. Tinapfundzanji kubulukira ku maperekero aumboni akusiyana-siyana a Akristu akutoma?

¹ Akristu akutoma amwaza mphangwa zadidi kwa anthu a makhaliro na a mauphemberi akusiyana-siyana. (Akol. 1:23) Ngakhale kuti mphangwa zikhali zibodzi zene—Umambo wa Mulungu—maperekero aumboni akhali akusiyana mwakubverana na makhaliro a anyakubvesera. Mwacitsandzo, mudalonga Pedro na Ayuda akuti akhalemedza kakamwe Malemba, iye atoma kulonga mu kuphatisira mafala a mprofeta Yoele. (Mach. 2:14-17) Mwakusiyana, onani njira idaphatisira Paulu toera kunyerezera mwacidikhodikho na Agrego mwakubverana na pidalembwa pa Machitiro 17:22-31. Lero, mu pisa pinango anthu asalemedza Malemba, natenepa, mwakukhonda kulangalira tinakwanisa kufungula Bhibhlya mu ndzidzi unaenda ife mu utumiki wa nyumba na nyumba. Mbwenye tisafunika kuphatisira ndzeru pakulonga na anthu akuti nkhabe kupangiza cifuno ku Bhibhlya peno ku uphemberi peno kwa ale akuti nee ali mu uphemberi Wacikristu.

2. Tinaphatisira tani mabukhu anafuna kugawirwa toera kuphedza ale anapangiza cifuno ku Bhibhlya na ale anakhonda pangiza cifuno?

² Phatisirani Mwadidi Mabukhu Anafuna Kugawirwa: Mabukhu anafuna kugawirwa mu caka cino ca basa anadzacinja pakupita nthanda ziwiri, makamaka kunadzagawirwa marevista, pimatsamba, na mabruxura. Ngakhale kuti kazinji kene anthu mu cisa cathu nee asapangiza cifuno ku Bhibhlya, tinakwanisa kupitiriza kulonga nawo mu kuphatisira nsolo wa marevista, pimatsamba, peno wa mabruxura, wakuti unakhala wakutundusa kwa iwo. Panango nee tinakwanisa kuleri Bhibhlya paulendo wakutoma peno kulonga pya lemba ya Bhibhlya, mbwenye khala munthu apangiza cifuno tinakwanisa kubwerera na cifuniro cakuphedza mwanaciro nyumba toera kukulisa cikhulupiro cace kuna Nciti na kuna Mafalace akupumirwa. Mu njira inango, tingamwaza mphangwa mu cisa cakuti anthu asalemedza Bhibhlya, tinakwanisa kuphatisira mabukhu, na maperekero aumboni akuti ndi akubverana na makhaliro anewa. Mwandimomwene, ndzidzi onsene tinakwanisa kugawira bukhu Biblya Isapfunzisanji peno mabruxura Bverani Mulungu peno Bverani Mulungu toera Mukhale Kwenda na Kwenda, mwakukhonda tsalakana bukhu inagawirwa pa nthanda. Cinthu cakufunika kakamwe ndi kuphatisira njira yakuti inacitisa anthu kupangiza cifuno kuna Yahova.

3. Ndi mu njira ipi mitima ya anthu mu cisa cathu ndi yakulandana na mataka?

³ Khunganyani Mataka: Ntima wa munthu ndi wakulandana kakamwe na mataka. (Luka 8:15) Mataka anango asaphemba kukhunganywa mwadidi mbidzati kumera na kukula mbeu ya undimomwene wa Bhibhlya. Amwazi mphangwa akupembera a pyaka dzana yakutoma abzwala m’mitundu yonsene ya mataka, pyenepi pyaabweresera kukomerwa na kutsandzaya. (Mach. 13:48, 52) Tinakwanisambo kukhala na kutsandzaya kubodzi kwene tingatsalakana njira ya maperekero athu aumboni.