Aso Ɛkae Bɔ Yasũa Ne?

Ɛwɛnelɛ Waen bɔ ɔwale afoɛ he ne, ato wɔ boase akenga nu anaa? Sɛ ahora ayɛ sɔ a, yede sɛɛ yeɛ ɛkɔye edwirɛ hemɔ noa ɔ?

Sɛ Bible ne kã kyɛ “ɛ́mɔma ɛmɔ adwene nu foforɛyɛlɛ ne ɔsakyera ɛmɔ,” anaa ɛmɔsesã ɛmɔ adwene a, okyire sɛɛ? (Rom. 12:2)

Bɔ sɔ dwirɛ ne kyire yeɛ ole kyɛ, odikyɛ yɛnea subaen bɔ ɔwɔ yɛnwo ne, na sɛ yenwu kyɛ odikyɛ yɛyɛ nzakrayɛɛ bie a, yayɛ ye ndɛ. Sɛ yɛyɛ sɔ a, ɛhẽne kɔboka yɛ maa yɛkɔfa Yehowa mmraa yɛkɔbɔ yɛ bra.—w23.01-TW, kr. 8-9.

Sɛ yɛ́kã nningyein bɔ osisi wɔ ewiase nanwo dwirɛ a, nzu yeɛ odikyɛ yɛmaa ɔtena y’adwene nu ɔ?

Bible ngɔmhyɛ ahoroɛ bɔ ɔba nu ɛnnɛ ne, yele bɔ yeti yeɛ odikyɛ yɛmaa yenwo hia yɛ paa ɔ. Nakoso kyɛ ahãa yɛkɔbɔ yetianu yekohyirehyire ngɔmhyɛ ahoroɛ bɔ ɔte sɔ nanu ne, odikyɛ yɛfa yɛ ngyirekyiremuɛ ne yegyina nwomaa ahoroɛ bɔ Yehowa ahyehyɛdeɛ ne ayɛ naso. Sɛ yɛyɛ sɔ a, ɔkɔboka maa bɛbɔ bɛwɔ asafo nanu ne konya adwene kõ. (1 Kor. 1:10)—w23.02-TW, kr. 16.

Yesu asubɔ ne, ɔte sorongõ wɔ bɛbɔ beli yesĩ nanwo. Nzuati ɔ?

Sɛ yɛbaabɔ asu a, yedimoa yɛbɔ mbaeɛ yɛhyɛ Yehowa bɔ kyɛ yɛkɔyɛ bɔ okuro ɔ. Nakoso Yesu de, né yenwo nhia kyɛ ɔkɔyɛ sɔ, ofikyɛ maen bɔ bɛwole Yesu bɛtole nu ne, né balimoa bahyɛ Yehowa bɔ kyɛ bɛkɔyɛ bɔ okuro ɔ. Afei koso, né bɔne ne mvomsoɛ biala nne Yesu nwo. Yeti né yenwo nhia kyɛ okonu yenwo wɔ ye bɔne nwo kora ne wabɔ asu.—w23.03-TW, kr. 5.

Yɛkɔyɛ sɛɛ né yamaa mmeni foforɛ koso ahora ama mmuayɛɛ wɔ asafo nhyiamu bo?

Nikyee kõ bɔ yɛkɔhora yɛkɔyɛ yeɛ ole kyɛ yɛkɔmaa yɛ mmuayɛɛ ne kɔyɛ tikaapẽ. Sɛ yɛyɛ sɔ a, ɔkɔboka aliemaamɔ bɔ baha ne maa bɛ koso bekonya mmerɛ ne bie bɛkɔfa bɛkɔma mmuayɛɛ. Afei koso sɛ yɛma mmuayɛɛ a, ɔnzɛkyɛ yɛkã edwirɛ bɔ ɔwɔ ngyekyɛmuɛ bɔ yadwu so nanu ne mukoraati, kyɛbɔ ɔkɔyɛ a aliemaamɔ bɔ baha ne koso, bekonya bie bɛkɔhã ɔ.—w23.04-TW, kr. 23.

“Atẽe Krongron” bɔ Yesaya 35:8 kã yenwo dwirɛ ne, né ogyi berɛ ma nzu?

Wɔ Yudafoɛ nemɔ aberɛ so ne, né sɔ “Atẽe krongron” ne gyi berɛ ma atẽe bɔ né Yudafoɛ nemɔ kɔpɛ kofi Babilɔn bɛkɔhɔ bekuro ne. Yede, ɛnnɛ koso, sɔ atẽe ne gyi berɛ ma nzu? Afoɛ pẽe kora yeɛ 1919 ba ne, Yehowa bokale mmenia biemɔ maa benwuni nahorɛ ne. Sɔ mmenia hemɔ yɛle adwuma serɛ bɛfa besiesiele “Atẽe Krongron” naso. Bɔ bɛyɛle ne bie yeɛ ole kyɛ, behyirele Bible nabo bɛhɔle dwudwolɛ pẽe nu kyɛbɔ ɔkɔyɛ a, mmenia konya bie kɔkenga ɔ. Afei koso, bɛprentele Bible ne pẽe. Mmenia bɔ bɛdɔ Yehowa ne, bahɔso bafa “Atẽe krongron” naso kyɛbɔ ɔkɔyɛ a, ɔkɔboka bɛ maa bɛkɔsõ ye kyɛbɔ okuro ɔ. Sɛ bɛkɔso bɛyɛ sɔ a, ɔkɔmaa bekonya yenwo atẽe bɛkɔtena Paradise.—w23.05, kr. 15-19.

Mmrasua nyɔ benimɔ yeɛ Anyandera yeti 9 ne kã bɛnwo dwirɛ ɔ?

Mmrasua nyɔ bɔ Anyandera nwomaa ne kã bɛnwo dwirɛ ne, kõ yeɛ ole “brasua kwaseaa” ne, na bɛbɔ betie ye ne, ‘ɔfa bɛ kɔ ewue nu.’ Bɔ ɔtɔ so nyɔ ne, yeɛ ole “brasua bɔ ɔse nworɛ” ne. Bɛbɔ betie sɔ brasua ne, ɔfa bɛ fa “ndeaseɛ atẽe” so, na ɛhẽne kɔmaa bekonya ngõa. (Any. 9:​1, 6, 13, 18)w23.06, kr. 22-24.

Mmerɛ bɔ né Nyameɛ ne Lɔto dwudwo ne, nzu yeɛ Nyameɛ yɛle bɔ okyire kyɛ ɔbrɛ yenwo ase, na ɔte edwirɛ bo ɔ?

Yehowa nate ye abɔfo nemɔ aso hãhyirele teneneeniɛ Lɔto kyɛ, ɔnwati hɔ bokaa naso dɔ, ofikyɛ bɛbaasɛkye Sodom kuro ne. Nakoso, mmerɛ bɔ Lɔto srɛle Yehowa kyɛ ɔma ɔnwati hɔ kuro bie bɔ bɛfrɛ ye Soa bɔ opingyé berɛ nanu ne, Yehowa tiele Lɔto, na ɔmaa ɔhɔle berɛ.—w23.07, kr. 21.

Sɛ ɛte brasua na ehũ nea ponografi a, nzu yeɛ ɛkɔhora kɔyɛ ɔ?

Ɔnzɛkyɛ ɛbɔ wɔnwo somoɛ. Na mmom, odikyɛ ɛyere wɔnwo sũa Yehowa nwo nikyee na wamaa ahora apingyé ye. Afei koso, mmrasua biemɔ bɔ né bɛfa ɔhaw ahoroɛ nu bɔ bɛnwo dwirɛ wɔ Bible nanu ne, ɛkɔhora kɔkenga bɛnwo dwirɛ na adwenedwene yenwo. Sɛ ɛyɛ sɔ a, ɔkɔkyekye wɔ wora. Ebiekũ koso, intanɛt so nekaa biemɔ bɔ sɛ ehũ kɔ a, ɔkɔmaa ɔkɔɔnea ponografi ne, ɛkɔhora kɔboka ye maa ɔkɔhwẽ yenwo kofi yenwo.—w23.08, kr. 14-17.

Sɛɛ yele ndeaseɛ a, sɛɛ yeɛ ɔkɔboka yɛ maa yekonya aboterɛ mmerɛ bɔ ebie abisa yɛ gyidie nwo dwirɛ bie ne?

Sɛ ebie bisa yɛ edwirɛ bie bɔ ɔfa Bible nanwo a, odikyɛ yenwu kyɛ ɔte yenwo atẽe bɔ ɔkɔmaa yekonwu bɔ ɔwɔ sona ne tianu, na wamaa yahora yaboka ye. Afei koso, odikyɛ yenya sona nanwo aboterɛ mmerɛ bɔ yɛma ye mmuayɛɛ ne.—w23.09, kr. 17.

Maria maa ebiemɔ bokale maa onyane anwoserɛ. Nzu yeɛ yesũa yefi nu ɔ?

Mmerɛ bɔ Maria nwuni kyɛ ye yeɛ ɔkɔwo Mɛsaya ne, ɔmaa ebiemɔ bokale ye, na ɛhẽne maa onyane anwoserɛ. Ebie yeɛ ole kyɛ, abɔfo Gabriel ne Elisabɛte fale tworɔnzɛm nanu dwirɛ biemɔ hyɛle ye ngunaen. Yɛkoso, yeliemamɔ Kristofoɛ kɔhora kɔboka yɛ maa yekonya anwoserɛ.—w23.10, kr. 15.

Sɛ yɛbɔ mbaeɛ a, sɛɛ yeɛ Yehowa kɔhora kɔma yenwo mmuayɛɛ ɔ?

Yehowa ahyɛ bɔ kyɛ okotie yɛ mbaeɛ. Nakoso, ɔnea nningyein biemɔ kora né wama yɛ mbaeɛ nanwo mmuayɛɛ. (Yer. 29:12) Sɛ yɛ nu biala bɔ mbaeɛ a, ɔsono atẽe bɔ Yehowa fa so ma ebiala deɛ nwo mmuayɛɛ ɔ. Nakoso, odikyɛ yenya gyidie kyɛ ɔkɔboka yɛ mmerɛ biala.—w23.11, kr. 21-22.

Romanfoɛ 5:2 kã “anyelasoɛ” nwo dwirɛ. Yede, nzuati yeɛ anyelasoɛ nwo dwirɛ sa wɔ ngyekyɛmuɛ 4 nanu ɔ?

Sɛ yɛkã ahennie nanwo nzɛmba ne yekyire ebie a, ɔmaa sona ne nya anyelasoɛ kyɛ ɔkɔhora kɔtena ase daa wɔ Paradise. Nakoso, sɛ ɔhaw bie to sɔ sona ne, na omia yenye gyina nu a, ɔmaa Nyameɛ dé ye to nu. Sɛ ɔba sɔ a, ɔmaa anyelasoɛ bɔ ole ye nanu yɛ se.—w23.12, kr. 12-13.