Boka Wɔ Bible Asuafoɛ Maa Beli Abrabɔ Tɛɛ So Ngunim

Mmenia bɔ b’abrabɔ nwo te ne ngome yeɛ bɛne Yehowa kɔhora kɔfa adamvoa bɔ enu yɛ se ɔ. (1Pe 1:14-16) Sɛ Bible asuafoɛ kora di abrabɔ tɛ́ so ngunim a, bɛkɔhora bekonya abusua bɔ anigye wɔ nu, akwahosaen pá, ná bahora batoto bɛ sikanzɛm yé.

Kyirekyire Yehowa abrabɔ gyinapɛen, bɔ yeti yeɛ ɔfa mane, ɔne mvasoɛ bɔ ɔwɔ so mmerɛ bɔ ebie fa bɔ ye bra nanu yé. Fa yɛ wɔ botaeɛ kyɛ ɛkɔboka wɔ Bible suaniɛ ne maa ɔkɔsesã kyɛbɔ osusu nningyein nwo ne, na ɔkɔmaa ɔkɔyɛ bɔ Yehowa kuro ɔ. (Ɛfe 4:22-24) Hyɛ bɛ ngunaen kyɛ ɔnate Yehowa mmokalɛ so ne, bɛkɔhora bɛkɔyakyi subaen tɛ́ bɔ yeɛ waha bɛ berɛ ne pó. (Flp 4:13) Kyire bɛ ma bɛserɛ Yehowa kyɛ ɔboka bɛ mmerɛ bɔ nikyeebie sɔ bɛ nea kyɛ bɛyɛ bɔne ne. Boka bɛ ma benwu tebea ahoroɛ bɔ ɔkɔhora kɔsɔ bɛ kɔnea maa bɛkɔyɛ bɔne ne, na bɛhwẽ bɛnwo befi yenwo. Hyɛ bɛ ngunaen má bɛfa nningyein pá besi nningyein bɔ ɔttemayé ne gyanu mmerɛ bɛgye bɛnye ne. Sɛ enwui kyɛ Yehowa aboka wɔ Bible suaniɛ maa wayɛ nzakraeɛ wɔ ye abrabɔ nu a, ɔmaa wɔnye gye.

NEA VIDIO NWO YƐKYERƐ BƆ YEƐ OLE, BOKA WƆ BIBLE ASUAFOƐ MAA BELI ABRABƆ TƐƐ SO NGUNIM, NA YE NZƐMMISA BƆ OLILI SO HEMƆ NOA:

• 

  Sɛɛ yeɛ asafo nu mbanyi nemɔ ne Neeta lale ye ali kyɛ belé Jade nu anwotɔsoɛ ɔ?

• 

  Mmokalɛ foforɛ beni yeɛ Neeta famane Jade ɔ?

• 

  Sɛɛ yeɛ Jade penane mmokalɛ fili Yehowa berɛ ɔ?