Kae Kyɛ Ɛkɔbɔ Mbaeɛ Kɔma Mmeni Foforɛ

1. Nzu yeɛ ɔmaa yenwu ye kyɛ yɛ mbaeɛ nwo hia Yehowa paa ɔ?

MBAEƐ te yenwo atee pirikua paa bɔ Yehowa afa ama yɛ ɔ. Wɔde ma yɛnea bɔ yeti yeɛ yɛkã sɔ ɔ: Wafa adwuma biemɔ wawurawura abɔfo nemɔ sa. (Edw. 91:11) Yeɛ Ɔwa Yesu koso, wafa adwuma titire biemɔ wawura ye sa. (Mat. 28:18) Yede yɛ mbaeɛ koso ɛ, wafa wawura ebie sa kyɛ otie anaa? Daabi, ɛhene de, ye bɔbɔ yeɛ otie ɔ. Ofikyɛ Bible ne kã kyɛ ɔte ebie bɔ ‘otie mbaeɛ’ ɔ.—Edw. 65:2.

2. Nzu yeɛ ɔmaa yenwu kyɛ né Pɔɔlo bɔ mbaeɛ ma mmeni foforɛ ɔ?

² Yɛkɔhora yɛkɔfa yɛ haw yɛkɔto Yehowa nyunu mmerɛ biala, nakoso odikyɛ yɛkae kyɛ yɛkɔbɔ bie yɛkɔma mmeni foforɛ koso. Sɔ yeɛ somafoɛ Pɔɔlo yɛle ɔ. Ɛfesofoɛ nemɔ sɔa, ɔhane ye wɔ krataa bɔ ɔhworɔ ɔɔmane bɛ nanu kyɛ: ‘Daa mekaye ɛmɔ wɔ me mbaeɛ nu.’ (Ɛfe. 1:16) Pɔɔlo sa bɔle mbaeɛ mane ebiemɔ koso. Timoteo sɔa ɔhahyirele ye kyɛ: ‘Mefa asennaa mema Nyameɛ, na daa biala mekaye wɔ wɔ me mbaeɛ nu eyia ne kɔngɔen.’ (2 Tim. 1:3) Ne Pɔɔlo bɔbɔ le ye haw bɔ ɔbɔ yenwo mbaeɛ ɔ. (2 Kor. 11:23; 12:​7, 8) Nakoso ne osa bɔ bie ma mmeni foforɛ.

3. Nzuati yeɛ annea a, yɛ wora kofi kyɛ yɛkɔbɔ mbaeɛ yɛkɔma mmeni foforɛ ɔ?

³ Odwu mmerɛ bie a, ɛyɛ a ne yɛ wora afi kyɛ yɛkɔbɔ mbaeɛ yɛkɔma mmeni foforɛ. Nzuati ɔ? Aliemaa brasua bie bɔ bɛfrɛ ye Sabrinaa hyirele bɔ ɔmaa ɔkora ba ye sɔ ɔ. Ɔhane kyɛ: “Ɛnnɛ sona lle yenwo alagye. Afei ɔhaw bɔ ogua yɛso ne sone, yeti sɛ yannea yé a, yɛ ngome yɛ haw nala yeɛ yɛkɔbɔ yenwo mbaeɛ ɔ.” Wɔ koso ɛyɛ a ɛhe bie to wɔ anaa? Sɛ sɔ a, yede adesua he kɔboka wɔ. Ɔkɔmaa yekonwu (1) bɔ yeti yeɛ yenwo hia kyɛ yɛbɔ mbaeɛ yɛma mmeni foforɛ, ɔne (2) atee bɔ yɛkɔfa so yɛkɔyɛ sɔ ɔ.

NZUATI YEƐ ODIKYƐ YƐBƆ MBAEƐ YƐMA MMENI FOFORƐ Ɔ?

4-5. Sɛ yɛbɔ mbaeɛ yɛma mmeni foforɛ a, nzuati yeɛ ‘ole tumi paa’ ɔ? (Yakobo 5:16)

⁴ Mbaeɛ bɔ yɛbɔ yɛma mmeni foforɛ ne, ‘ole tumi paa.’ (Kenga Yakobo 5:16.) Sɛ yɛbɔ mbaeɛ yɛma mmeni foforɛ a, aso nikyee pá bie kora fi nu ba anaa? Yóo, ɔkora ba ye sɔ. Sɔ yeɛ Yesu yɛle ɔ. Ne ɔse kyɛ somafoɛ Petro kɔye ye kɔma, yeti ɔhane kyɛ: “Mabɔ mbaeɛ mama wɔ, kyɛbɔ wɔ gyidie ngɔtɔ ase ɔ.” (Luka 22:32) Pɔɔlo koso ne ɔse kyɛ sɛ bɛbɔ mbaeɛ bɛma ebie a, ɔboka paa. Yeti mmerɛ bɔ bɛhyele ye bɛtole nu wɔ Rome bɔ ne ɔyɛlle bɔne biala ne, ɔhworɔle krataa ɔɔmane Filemɔn kyɛ: “Me nye la so kyɛ, ɔnate ɛmɔ mbaeɛ so ngonya atee ngɔwa ɛmɔ berɛ.” (Flm. 22) Amba-ne-amba koso, bɛyele Pɔɔlo na onyane atee ɔɔtoale ye asɛnga adwuma naso.

⁵ Nakoso, bɔ yɛkã ye ngyire kyɛ sɛ yɛbɔ mbaeɛ yɛma ebie a, odikyɛ atee biala so Yehowa yɛ bɔ yabisa ne. Bɔ ɔte yeɛ ole kyɛ, sɛ ye asomvoɛ bɔ mbaeɛ a, otie. Na sɛ onwu ye kyɛ odikyɛ ɔyɛ b’abisadeɛ ne ma bɛ a, ɔyɛ ye sɔ. Sɛ yenwu ye sɔ a, ɔkɔmaa yɛkɔfa y’abisadeɛ yɛkɔto Yehowa nyunu, na yanya gyidie kyɛ okoli yenwo dwumaa kɔma yɛ.—Edw. 37:5; 2 Kor. 1:11.

6. Sɛ yɛbɔ mbaeɛ yɛma mmeni foforɛ a, nzuati yeɛ ɔboka paa ɔ? (1 Petro 3:8)

⁶ Sɛ yɛbɔ mbaeɛ yɛma mmeni foforɛ a, ɔmaa ‘yenya tema yɛma bɛ.’ (Kenga 1 Petro 3:8.) Ebie bɔ ole tema ne, nna ɔhaw bɔ ebie fanu ne ngome yeɛ onwu ye ɔ. Na mmom ɔyɛ nikyeebie fa boka sona ne. (Mak. 1:​40, 41) Asafo nu panyi bie bɔ bɛfrɛ ye Michael hane kyɛ: “Ɔwɔ nu sɛ mebɔ mbaeɛ mema mmeni foforɛ a, bennwu ye. Nakoso ɛhene maa mebate bɔ bɛfa nu nabo, na ɔmaa menya ɔdɔ ne obuo pirikua paa mema bɛ.” Richard koso te asafo nu panyi, na ɔhane mvasoɛ foforɛ bɔ ɔwɔ so kyɛ yɛkɔbɔ mbaeɛ yɛkɔma mmeni foforɛ ɔ. Ɔhane kyɛ: “Sɛ yɛbɔ mbaeɛ yɛma ebie a, ɔmaa ɔnyɛ se kyɛ yɛkɔyɛ nikyeebie yɛkɔfa yɛkɔboka sona ne ɔ.” Ɔfa bokale so kyɛ: “Sɛ yɛyɛ sɔ a, ne waayɛ kyɛ mbaeɛ bɔ yabɔ yama ye ne, yɛma Yehowa fa yɛ so ma sona ne mmuayɛɛ.”

7. Sɛ yɛbɔ mbaeɛ yɛma mmeni foforɛ a, ɔmaa yɛmva y’adwene yɛnzie yɛ ngome yɛ haw so, nzuati ɔ? (Filipifoɛ 2:​3, 4) (Nea foto ne koso.)

⁷ Sɛ yɛbɔ mbaeɛ yɛma mmeni foforɛ a, ɔmaa yɛmva y’adwene yɛnzie yɛ ngome yɛ haw so. (Kenga Filipifoɛ 2:​3, 4.) Ewiase bɔ yɛte nu ne, ɔnate kyɛ Abɔnzam yeɛ odi so nati ɔmaa yenu biala fa ɔhaw nu. (1 Yoh. 5:19; Nye. 12:12) Sɛ yɛtaa yɛbɔ mbaeɛ yɛma mmeni foforɛ a, ɔmaa yɛkae kyɛ ‘amaneɛnwunɛ komapɛ nala yeɛ yeliemamɔ bɔ bɛwɔ ewiase amukoraati ne bɛfa nu ɔ.’ (1 Pet. 5:9) Katherine te ateepakyelɛniɛ, na ɔhane kyɛ: “Sɛ mebɔ mbaeɛ mema mmeni foforɛ a, ɔkae me kyɛ nna me ngome yeɛ mefa ɔhaw nu ɔ. Ɛhene boka me maa memva m’adwene mengɔ me haw naso pee.”

YENWO HIA KYƐ YƐBƆ MBAEƐ YƐMA BƐ

8. Nwamɔ yeɛ yɛkɔhora yɛkɔbɔ mbaeɛ yɛkɔma bɛ ɔ?

⁸ Nwamɔ yeɛ yɛkɔhora yɛkɔbɔ mbaeɛ yɛkɔma bɛ ɔ? Yɛkɔhora yɛkɔbɔ mbaeɛ yɛkɔma bɛbɔ anwonyerɛ ha bɛ, mmrandeɛ ne ndaluwa bɔ bɛ mmango sukuufoɛ goro bɛnwo, anaa bɛhyɛ bɛ kyɛ bɛyɛ nningyein bɔ ɔttemaye, ɔne bɛbɔ ɔnate kyɛ bayɛ mbanyi nati benwu amaneɛ ne. Afei yeliemamɔ pee nala koso wɔ berɛ a, b’abusuafoɛ anaa awaen ne tane bɛnye. (Mat. 10:​18, 36; Aso. 12:5) Ebiemɔ koso ɔnate ngondii bɔ ɔkɔso wɔ nekaa bɔ bɛwɔ nati banwati bafi b’awuro. Yeɛ ebiemɔ wora atorɛngyɛm amaa bɛnwo ahyere bɛ paa. Ɔwɔ nu ebiaa yɛnze sɔ aliemaa hemɔ de, nakoso sɛ yɛbɔ mbaeɛ yɛma bɛ a, okyire kyɛ yɛfa Yesu dwirɛ bɔ yenwa, “ɛmɔhurohuro ɛmɔ nwo dwirɛ” ne yɛyɛ adwuma.—Yoh. 13:34.

9. Bɛbɔ beli nningyein nyunu wɔ asafo nanu ne, nzuati yeɛ odikyɛ yɛbɔ mbaeɛ yɛma bɛne bɛyemɔ ɔ?

⁹ Bɛbɔ beli nningyein nyunu wɔ asafo nanu ne koso, yɛkɔhora yɛkɔbɔ mbaeɛ yɛkɔma bɛ. Benu biemɔ yeɛ ole, Akwangyerɛ Kue ne, ɔne b’abokafoɛ, Bɛtɛl Kɔmatii nanufoɛ, aliemaamɔ bɔ bɛlela nyumaa ahoroɛ noa wɔ Bɛtɛl, manzini soneafoɛ mɔ, asafo nu mbanyi ɔne asafo nu asomvoɛ. Sɔ aliemaa hemɔ anu pee nala wɔ berɛ a, ɔhaw bɔ ɔla bɛ so ne ɔtte ba, nakoso bɛfa bɛnwo bɛbɔ afɔleɛ bɛma yɛ. (2 Kor. 12:15) Mark te manzini soneafoɛ, na ɔhane kyɛ: “M’awofoɛ ayɛ mbanyi na anwonyerɛ koso ha bɛ. Ɔwɔ nu kyɛ nniema brasua ne ohũ wɔ berɛ bɔ bɛnea bɛ ɔ, nakoso, ɛyɛ a ne ɔha me paa kyɛ maali dede bɔ me bɔbɔ mengora menyɛ nningyein biemɔ me mmoka bɛ ɔ.” Sɔ aliemaa hemɔ bɔ bɛyɛ adwuma serɛ bɛma yɛ ne, ebiaa nna ɔhaw bɔ bɛfa nu namu yeɛ yɛse ɔ. Sɛ sɔ po a, odikyɛ yɛkae bɛ wɔ yɛ mbaeɛ nu. (1 Tɛs. 5:​12, 13) Bɛyemɔ koso, sɛ bɛnne nu a, ahaa bɛhumɔ ngɔhora ngɔyɛ adwuma bɔ owura bɛsa ne. Yeti bɛ koso odikyɛ yɛbɔ mbaeɛ yɛma bɛ.

10-11. Sɛ yɛbɔ mbaeɛ yɛma yeliemamɔ mukoraati a, aso Yehowa nye gye yenwo anaa? Kyirekyire nu.

¹⁰ Kyɛbɔ yalimoa yanwu ye ne, yɛtaa yɛbɔ mbaeɛ yɛma aliemaa biemɔ. Yeti yɛkora yɛsrɛ Yehowa kyɛ ɔboka yeliemamɔ bɔ bahye bɛ bagua nu, anaa ɔkyekye bɛbɔ b’adofomɔ awu ne wora. Nakoso ɛkɔnea ne, ne ɔtte sona pɔtee bie ti yeɛ yɛbɔ sɔ mbaeɛ ne ɔ. Donald te asafo nu panyi, na ɔhane kyɛ: “Aliemaamɔ bɔ bɛfa ɔhaw nu ne, bɛsone paa. Yeti sɛ yɛbɔ mbaeɛ a yɛmmobɔ bɛ dumaa ngokongoko, na mmom ɛyɛ a yɛbɔ yɛma bɛ mukoraati.”

¹¹ Aso ɛyɛ a Yehowa nye gye sɔ mbaeɛ nanwo anaa? Yóo! Bɔ ɔte yeɛ ole kyɛ yɛnhyɛda yɛnze ɔhaw pɔtee bɔ aliemaa biala fa nu ɔ. Yeti sɛ yɛbɔ mbaeɛ yɛma yeliemamɔ mukoraati a, ɔte ye atee so. (Yoh. 17:20; Ɛfe. 6:18) Afei koso sɛ yɛyɛ sɔ a, okyire kyɛ ‘yekuro aliɛmaa mɔ mukoraati dwirɛ.’—1 Pet. 2:17.

BƆ ƆKƆBOKA YƐ MAA YƐKƆBƆ MBAEƐ YƐKƆMA EBIE Ɔ

12. Sɛ yɛfa yɛnye yɛto ase a, sɛɛ yeɛ ɔkɔboka yɛ mmerɛ bɔ yɛbɔ mbaeɛ ne?

¹² Fa wɔnye to ase. Sɛ aliemaamɔ mukoraati bɔ yɛkɔbɔ mbaeɛ yɛkɔma bɛ ne la ahameɛ a, yɛkɔhora yɛkɔbɔ ebiemɔ dumaa ngokongoko wɔ yɛ mbaeɛ nu. Aso aliemaa bie wɔ w’asafo nu bɔ anwonyerɛ bie ha ye anaa? Abrandeɛ anaa taluwa bie koso ɔnate kyɛ bɛbɔ ɔne bɛ sukuu ne hyɛ ye kyɛ ɔyɛ nningyein bɔ ɔttemaye nati, ye abanu abu anaa? Anaa ɛse aliemaa bie bɔ ye ngome ɔyere yenwo kyɛ ɔkɔtete ɔwa wɔ “Awurade ndeteyɛɛ ne foɛtulɛ nu” ɔ? (Ɛfe. 6:4) Sɛ yɛfa yɛnye yɛto ase a, ɔkɔmaa yekonya tema yɛkɔma yeliemamɔ, na ɛhene kɔmaa yɛnye kɔgye yenwo paa kyɛ yɛkɔbɔ mbaeɛ yɛkɔma bɛ.b—Rom. 12:15.

13. Aliemaamɔ bɔ yɛnze bɛ ne, yɛkɔyɛ sɛɛ ne yabɔ mbaeɛ yama bɛ?

¹³ Bɔ aliemaamɔ dumaa wɔ wɔ́ mbaeɛ nu. Bɛbɔ yɛnze bɛ ne po, yɛkɔhora yɛkɔbɔ bɛ dumaa wɔ yɛ mbaeɛ nu. Ebie yeɛ ole aliemaa biemɔ bɔ bɛla prizin wɔ Crimea, Eritrea, Russia, ɔne Singapore ne. Sɛ ɛkɔ jw.org so a, ekonwu aliemaamɔ bɔ bɛla prizin ne dumaa wɔ berɛ.c Brian te manzini soneafoɛ na ɔhane kyɛ: “Manwu ye kyɛ sɛ metworɔ aliemaa bie bɔ ɔla prizin ne dumaa, na mebɔ maa ofite menoa a, ɔmaa mekora mekae ye dumaa ne, na mebɔ mbaeɛ mema ye.”

14-15. Nzu yeɛ ɔkɔboka yɛ maa yɛkɔhã nikyee pɔtee nwo dwirɛ wɔ yɛ mbaeɛ nu ɔ?

¹⁴ Kã nikyee pɔtee nwo dwirɛ. Michael bɔ yalimoa yahã yenwo dwirɛ ne hane kyɛ: “Aliemaamɔ bɔ bɛla prizin ne, sɛ mekenga bɛnwo dwirɛ wɔ jw.org so a, ɛyɛ a mebisa menwo kyɛ sɛ me yeɛ bahye me bato nu sɔ a, ahaa ngɔyɛ menwo sɛ? Ahaa meye nwo adwenedwene ngome po kohũ me. Ofikyɛ sɛ mekɔda prizin a, ɔkɔyɛ se kyɛ ngɔmaa yesa kɔhã bɔ ohia ɔ, kyɛbɔ meyɛ mema ye kesaalae ne. Sɛ medwene edwirɛ nanwo sɔ a, ɔmaa sɛ mebɔ mbaeɛ mema aliemaamɔ bɔ bɛgya braa bɔ bɛla prizin ne a, menwu bɔ ngɔhã ɔ.”—Heb. 13:3.

¹⁵ Bɔ yeliemamɔ bɔ bɛla prizin ne fa nu kyẽa biala ne, sɛ yɛdwenedwene yenwo a, ɔkɔmaa yekonwu nikyee foforɛ bɔ yɛkɔhora yɛkɔhã yenwo dwirɛ wɔ yɛ mbaeɛ nu ɔ. Bɛbɔ bɛnea prisafoɛ nemɔ so ne sɔa, yɛkɔhora yɛkɔbɔ mbaeɛ kyɛ nnɛmaa bɛyɛ yeliemamɔ basabasa. Afei koso, yɛkɔhora yɛkɔbɔ mbaeɛ kyɛ bɛbɔ tumi wura bɛsa nu ne, bɛma yeliemamɔ fanwondie ma bɛsõ Yehowa. (1 Tim. 2:​1, 2) Aliema bɔ bahye ye bato nu ne, yɛkɔhora yɛkɔbɔ mbaeɛ yɛkɔma bɛbɔ ne ɔne bɛ wɔ asafo nu ne, kyɛbɔ ɔkɔyɛ a nahorɛ bɔ odi ne, ɔkɔhyɛ bɛ ngunaen ɔ. Afei koso yɛkɔhora yɛkɔbɔ mbaeɛ kyɛ bɛbɔ ɔne bɛ la prizin berɛ ne, bɛma subaen pá bɔ yeliema ne da yali ne, ɔyɛ bɛ nyemene ma betie nzɛmba ne. (1 Pet. 2:12) Bɔ yasusu yenwo ne, ɔkɔhora kɔboka yɛ paa mmerɛ bɔ yɛbɔ mbaeɛ yɛma aliemaamɔ bɔ bɛ koso bɛfa ɔhaw foforɛ bie nu ne. Yeti sɛ yɛfa yɛnye yɛto ase, yɛbɔ aliemaamɔ dumaa, ná yɛkã nikyee pɔtee nwo dwirɛ wɔ yɛ mbaeɛ nu a, okyire kyɛ ‘yekuro yɛnwo dwirɛ ma ɔbo so’.—1 Tɛs. 3:12.

BƆ ODIKYƐ YƐKAE MMERƐ BƆ YƐBƆ MBAEƐ NE

16. Sɛ yɛbɔ mbaeɛ a, nzu yeɛ odikyɛ yɛkae ɔ? (Mateo 6:8)

¹⁶ Kyɛbɔ yalimoa yanwu ye ne, sɛ yɛbɔ mbaeɛ yɛma mmeni foforɛ a, ebiaa ɔkɔmaa tebea bie bɔ bɛwɔ nu ne kɔsesã. Nakoso ɛmɔma yɛkae sɔ dwirɛ he: Sɛ yɛ́bɔ mbaeɛ a, ongyire kyɛ yekyire Yehowa bɔ ɔyɛ ɔ. Anaa onwunni bɔ ɔkɔso ne, yeti yɛ yeɛ yɛkwaabɔ ye amaneɛ ɔ. Yɛ bɔ yɛsõ Yehowa ne mukoraati, koraka yɛkɔfa y’abisadeɛ yɛkɔto ye nyunu ne, ne ɔse bɔ yehia ne dada. (Kenga Mateo 6:8.) Sɛ sɔ a, yede nzuati yeɛ odikyɛ yɛha yɛnwo yɛbɔ mbaeɛ yɛma mmeni foforɛ ɔ? Bɔ yahã yenwo dwirɛ wɔ adesua he anu ne la ahameɛ a, yɛyɛ sɔ a okyire kyɛ yɛdwene mmenia nwo. Osa koso kyire kyɛ yesuesua ɔdɔ bɔ Yehowa le ye ne bie, na sɛ onwu ye sɔ a, ɔmaa yenye gye paa.

17-18. Mvandoho beni yeɛ ɔmaa yenwu ye kyɛ yenwo hia kyɛ yɛbɔ mbaeɛ yɛma yeliemamɔ ɔ?

¹⁷ Sɛ yɛbɔ mbaeɛ yɛma yeliemamɔ na sɛ bɛ haw ne amvi bɛso po a, ongyire kyɛ yafɛ yagua mbaen. Na mmom sɔ nikyee bɔ yayɛ ne kyire kyɛ yekuro bɛ dwirɛ, na Yehowa koso nye gye yenwo. Wɔde ma yɛnea sɔ mvandoho he. Fa ye kyɛ baba bie le mmaa nyɔ; abɛmaa yeɛ abayaa. Abɛmaa ne nde apɔ, yeti oliema brasua ne hɔle ye baba berɛ ɔɔhahyirele ye kyɛ: “Daa mepa wɔ kyerɛ nniema ne afokyɛ paa, yeti boka ye.” Ɔwɔ nu, baba ne kuro ɔwa brienzua ne dwirɛ yeti ɔfokyɛle ne, ogu so ɔnea ye. Nakoso sɔ dwirɛ bɔ ɔwa brasua ne hane ne, ɔkɔmaa yenye kɔgye paa ofikyɛ okonwu ye kyɛ sãa akwalaa ne dwene oliema nanwo.

¹⁸ Sɔ ala yeɛ Yehowa pena kyɛ yɛyɛ ɔ. Ɔpena kyɛ yɛdwene yeliemamɔ nwo na yɛbɔ mbaeɛ yama bɛ. Yɛyɛ sɔ a, ne yɛma Yehowa nwu ye kyɛ yeliemamɔ haw te yɛ haw, na ye koso ye wora ngofi bɔ yayɛ ne lle. (2 Tɛs. 1:3; Heb. 6:10) Afei koso kyɛbɔ yanwu ye ne, sɛ yɛbɔ mbaeɛ yɛma yeliemamɔ a, nikyee pa bie kora fi nu ba. Yeti nnɛmɔmaa yɛ wora fi ye lle kyɛ yɛkɔbɔ mbaeɛ yɛkɔma yɛnwo ɔ.