ADESUA 19

Aso Yehowa Adanzefoɛ Te Nahorɛ Kristofoɛ Anaa?

Bɔ Bɛprente Ɔ

Kyɛ Yehowa Adanzefoɛ ne, yedé yedi kyɛ yɛte nahorɛ Kristofoɛ. Nzuati ɔ? Susu bɔ yegyidie ahoroɛ gyi so, dumaa bɔ ɔmaa yɛyɛ sorongõ, ɔne ɔdɔ bɔ yele yɛma yɛnwo ne yenwo nanwo nea.

1. Nzu yeɛ Yehowa Adanzefoɛ gyidie ahoroɛ ne gyi so ɔ?

Yesu hãne kyɛ: “[Nyameɛpiri] dwirɛ te nahorɛ.” (Yohane 17:17) Tekyɛ Yesu ne, Yehowa Adanzefoɛ fa begyidie gyina Nyameɛpiri dwirɛ naso daa. Kyɛ nneasoɛ ne, susu yɛ sõen nanwo abakɔsɛm nwo nea. Wɔ afoɛ 1870 nu ne, Bible Asuafoɛ kue bie hyɛle yebo kyɛ bɛneanea Bible nanu yé. Bɛfale begyidie ne begyinane bɔ né Bible kã naso, ɔmva yenwo kyɛ né begyidie ne te sorongõ wɔ asɔre ahoroɛ ne deɛ nwo ne. Na afei, bɛhyɛle yebo kyɛ bɛkã Bible nanu nahorɛ bekyire afoforɛ.a

2. Nzuati yeɛ yɛfrɛ yɛnwo Yehowa Adanzefoɛ ɔ?

Yehowa frɛ ye asomvoɛ kyɛ ye adanzefoɛ ofikyɛ bɛkã yenwo nahorɛ dwirɛ. (Hebrifoɛ 11:4–12:1) Kyɛ nneasoɛ ne, wɔ tete mmerɛ nu ne, Nyameɛpiri hãhyirɛle ye mmenia kyɛ: “Ɛmɔ te m’adanzefoɛ.” (Kenga Aizaya 43:10.) Bɛfrɛ Yesu kyɛ “Danzeniɛ Nahorɛniɛ.” (Nyekyire 1:5) Ɛhe ti wɔ 1931 nu ne, yɛfale dumaa Yehowa Adanzefoɛ tole yɛnwo so. Ɔyɛ yɛ fɛ paa kyɛ yele sɔ dumaa ne ɔ.

3. Sɛɛ Yeɛ Yehowa Adanzefoɛ suesua ɔdɔ bɔ Yesu le ye ne ɔ?

Yesu lɔle ye asuafoɛ nemɔ alaa maa bɛɛyɛle kyɛ ye abusuafoɛ. (Kenga Marko 3:35.) Sɔ ala yeɛ Yehowa Adanzefoɛ bɔ bɛwɔ wiase mukoraati ne te abusua kõ ɔ. Ɛhe ti yeɛ yɛfrɛ yɛnwo aliemaa ne. (Filimɔn 1, 2) Yetie ahyɛdeɛ he koso: “Ɛmɔhuro aliemaamɔ mukoraati dwirɛ.” (1 Petro 2:17) Yehowa Adanzefoɛ da ɔdɔ he ali wɔ atẽe pẽe so, ebie yeɛ ole kyɛ sɛ beliema bie nwo kyere ye a, bɛboka ye.

SUA PẼE BOKASO

To wɔ boase susu Yehowa Adanzefoɛ abakɔsɛm nwo, na nea adanzeɛ ahoroɛ bɔ okyire kyɛ yɛte nahorɛ Kristofoɛ ɔ.

Collage: Yehowa Adanzefoɛ bɔ bɛkã nzɛmba. 1. Aliemaa brasua bie kyirekyire Bible bɔ wakenga nanu kyire maame bie. 2. Aliemaa bienzua bie kã Bible nanu nahorɛ dwirɛ kyire baba bie wɔ trɔg nwo. — Nahorɛ Kristofoɛ fa begyidie begyina Bible naso, na bɛkã nu dwirɛ bekyire afoforɛ

4. Yɛfa yegyidie yegyina Bible naso

Yehowa hã tole berɛ kyɛ, Bible nanu nahorɛ ne kɔla ali. Kenga Daniel 12:4, na susu nzɛmmisa he anwo:

Nzu yeɛ “okobu” Nyameɛpiri mmenia so, mmerɛ bɔ bɛneanea Bible nanu ne?

Nea kyɛbɔ Bible asuafoɛ bɔ Charles Russell bokaso ne suane Nyameɛpiri Dwirɛ ne ɔ. Bɔ VIDIO ne, na susu nzɛmmisa bɔ oliso he anwo.

VIDIO: Kyɛbɔ Besa Benwuni Bible Nu Nahorɛ Ne Ɔ (7:45)

Wɔ vidio nanu ne, sɛɛ yeɛ Charles Russell ne ye mangõ Bible Asuafoɛ bɔ bɛboka yeso ne suane Bible ne ɔ?

Ɛse?

Ɔtɔ mmerɛ bie a, yɛkora yɛyɛ nzakraeɛ wɔ yegyidie ahoroɛ bie nu. Nzuati ɔ? Kyɛbɔ eyia fité ngakãngakã ne, sɔ ala yeɛ Nyameɛpiri koso, ɔmaa yɛte Bible nabo ngakãngakã ɔ. (Kenga Anyandera 4:18.) Ɔwɔ nu kyɛ Bible ne sesãne de, nakoso sɛ ɔkɔba kyɛ yenya Bible nanu ndeaseɛ foforɛ a, yɛyɛ nzakraeɛ wɔ yegyidie ahoroɛ ne bie nu.

5. Yɛyɛ dumaa bɔ ɔla yɛso nanwo adwuma

Nzuati yeɛ yɛfale dumaa Yehowa Adanzefoɛ ɔ? Bɔ VIDIO ne, na afei susu nzɛmmisa bɔ oli so he anwo.

VIDIO: Dumaa Bɔ Ɔmaa Benwu Yɛ Ɔ (2:40)

Nzuati yeɛ dumaa Yehowa Adanzefoɛ ne fata ɔ?

Nzuati yeɛ Yehowa aye mmenia kyɛ ye adanzefoɛ ɔ? Ofikyɛ edwirɛ bɔ mmeni pẽe kã fa Yehowa nwo ne, ɔtte nahorɛ. Yeti sɔ mmenia nemɔ yeɛ bɛkɔmaa mmenia konwu nahorɛ bɔ ɔfa Yehowa nwo ɔ. Má yɛnea sɔ dwirɛ bɔ ɔtte nahorɛ nanu nyɔ.

Sõen biemɔ kyirekyire bɛ mmenia kyɛ, Nyameɛpiri pena kyɛ bɛfa ahoni so bɛsõ ye. Nakoso, kenga Levitikɔs 26:1, ná susu nzɛmmisa hemɔ nwo:

Nahorɛ beni yeɛ tworɔnzɛm he maa yenwu ye ɔ? Sɛɛ yeɛ Yehowa te ngã wɔ ahoni nwo ɔ?

Nyamesom mbanyi biemɔ kyirekyire kyɛ Yesu te Nyameɛpiri. Nakoso, kenga Yohane 20:17, na afei susu nzɛmmisa hemɔ nwo:

Nahorɛ bɔ ɔwɔ nu yeɛ ole sɛɛ? Yeti ɔte amba kyɛ Nyameɛpiri ne, ye ala yeɛ ole Yesu anaa?
Kyɛbɔ Yehowa asoma ye Adanzefoɛ kyɛ behyirehyire nahorɛ dwirɛ bɔ ɔfa ɔne Ɔwa nanwo ne, sɛɛ yeɛ ɔmaa ɛte ngã ɔ?

6. Yɛdodɔ yɛnwo

Bible ne fa Kristofoɛ toto nnipadua akwaa ahoroɛ nanwo. Kenga 1 Korintofoɛ 12:25, 26, na susu nzɛmmisa hemɔ nwo:

Sɛɛ yeɛ odikyɛ nahorɛ Kristofoɛ te ngã mmerɛ bɔ bɛ mangõ Kristofoɛ nwu amaneɛ ne?
Nzu yeɛ anwu afa ɔdɔ bɔ Yehowa Adanzefoɛ da ye ali kyire bɛnwo nanwo ɔ?

Sɛ edwirɛ bie to Yehowa Adanzefoɛ bɔ bɛwɔ ewiase ne bue bie a, beliemamɔ bɔ bɛwɔ ewiase mukoraati ne yɛndɛ boka bɛ. Sɛ ɛpena yenwo nneasoɛ kõ a, bɔ VIDIO Ne. na susu nzɛmmisa he anwo.

VIDIO: Hurricane Matthew Sɛkyele Haiti (5:29)

Mmokalɛ bɔ Yehowa Adanzefoɛ fama mmenia wɔ atorɛngyɛm mmerɛ nu ne, sɛɛ yeɛ ɔmaa yenwu kyɛ bɛdodɔ bɛnwo ɔ?

Yehowa Adanzefoɛ nyɔ bie boka maame bie ne ɔwa bɔ atorɛngyɛm ato bɛ ɔ. Bama bɛ kundu maa bafa bakyekye bɛnwo, na bama bɛ nzue bɔ bɛkɔnõ koso. — Nahorɛ Kristofoɛ da ɔdɔ ali kyire bɛbɔ bɛnwo ahyere bɛ ne

EBIEMƆ KÃ KYƐ: “Yehowa Adanzefoɛ te sõen foforɛ bie bɔ wawa ewiase ɔ.”

Mmerɛ beni yeɛ Yehowa hyɛle yebo frɛle ye asomvoɛ kyɛ ye adanzefoɛ ɔ?

YEMUABƆLƐ

Yehowa Adanzefoɛ te nahorɛ Kristofoɛ. Yɛte abusua bɔ yɛwɔ ewiase mukoraati, yɛfa yegyidie yegyina Bible naso, na yɛmaa mmenia nwu nahorɛ bɔ ɔfa Yehowa nwo ɔ.