Salango kua na micro

AITA ti e ti koli na ti wali Chrétien ayeke mû ngoi mingi nga ayeke sala ngangu ti ga na abungbi. Ti tene ala wara ye ti nzoni na lege ti ye so a yeke tene, a lingbi ala mä ni nzoni.

Na lâ ti Israël ti giriri, masini ti kono totongo ti go ti zo ayeke lani dä pëpe. Tongana Moïse asala tënë lani na mara ti Israël na Benyama ti Moab kozoni si ala lï na Sese ti Zendo, tongana nyen azo kutu mingi so ayeke mä lo alingbi lani ti mä tënë ni? Peut-être Moïse azia lani ambeni koli na yâ ti kando ni, so popo ti ala ayo na mba alingbi na ni. Tongana lo sala tënë, mbeni zo ni ayeke tene pekoni na amba ti lo so ayo na lo pëpe. (Deut. 1:1; 31:1) A ninga pëpe na pekoni so azo ti Israël ato nda ti mungo sese na mbage ti do ti Jourdain, Josué abungbi mara ni na gbele Hoto ti Guérizim, nga na Hoto ti Ebal, na azo ti mara ti Lévi aluti na popo ti ahoto use so. Kâ, azo ni kue amä na ayeda na adeba nzoni nga na adeba sioni so a fa na ala (Jos. 8:33-35). Peut-être na ngoi ni so nga, a sala kusala na azo tongana ti ngoi ti Moïse. Me ahoto ni so asala si go ti zo ague yongoro mingi amû maboko nga.

Angu 1 500 tongaso na pekoni, tongana “azo mingi mingi abungbi” na Ngu ti Galilée ti mä Jésus, lo gue na yâ ti mbeni kota ngö, lo gue a yo kete na yanga ti ngu na lo duti ti sala tënë na azo ni (Marc 4:1, 2). Ngbanga ti nyen Jésus aduti na yâ ti kota ngö si lo sala tënë? A yeke peut-être ngbanga ti so na ndo lê ti ngu so ayeke kpô go ti e azo ayeke toto pendere mingi.

Juska na kozo mbage ti angu so ato nda ni na ngu 1900, mingi ni, go ti wamungo diskur so ayeke toto kota nga nzoni si ayeke mû lege ti hinga wungo ti azo so alingbi ti mä ye so a tene. Ye oko, a to nda ni na peko ti ngu 1920, awakua ti Jéhovah alingbi lani ti wara ye ti nzoni na lege ti masini so ayeke kono totongo ti go ti zo na angoi ti akota bungbi.

Masini ti kono totongo ti go ti zo. Mara ti gbakuru tongaso alingbi ti kono mingi totongo ti go ti mbeni wamungo diskur, me go ti lo ni angbâ lakue ti toto pendere alingbi na ni. A hunda pëpe na zo ni ti gboto yâ ti akamba ti go ti lo ngangu, nga na azo so ayeke mä lo ti yôro mê ti ala si ala mä lo nzoni. Nde na so, ala lingbi ti dengi mê ti ala nzoni na tënë ni.

A-Témoin ti Jéhovah asala ye mingi ti zia si nzoni gbakuru ti kono totongo ti go ti zo aduti na akota bungbi ti ala. Nga, aDa ti Royaume mingi ayeke na gbakuru so ti kono totongo ti go ti azo so ayeke mû diskur, ayeke mû li ni na abungbi nga ayeke diko mbeti na ndo estrade. Ambeni kongregation ayeke na amicro so azo ayeke mû ni ti kiri na tënë na ngoi ti abungbi. Tongana kongregation ti mo ayeke na mara ti ye tongaso, manda ti sala kua na ni nzoni.

Ambeni kota ye ti mû pekoni. Ti sala kusala na gbakuru so nzoni, bata lakue aye so: (1) Mingi ni, a lingbi micro ayo na yanga ti mo centimètre 10 ti si na 15. Tongana micro ni ayeke ndulu mingi, yâ ti atënë ti mo alingbi ti sigigi nzoni pëpe. Tongana micro ni ayo mingi, go ti mo ayeke toto ande gi kete. (2) A lingbi micro ni aduti na gbele mo, pëpe na tele ti yanga ti mo. Tongana mo bi li ti mo na mbage ti koli wala ti wali, sala tënë gi tongana micro ni ayeke na lê ti mo. (3) Zia go ti mo atoto ahon totongo ti go ti mo na yâ lisoro ti lâ oko oko. Me a hunda na mo pëpe ti dekongo. Gbakuru ni ayeke mû go ti mo ti gue na ni na mbage ti zo so ayo mingi na popo ti azo ni. (4) Tongana mo ye ti sala go ti mo, wala mo ye ti tiko wala ti ngasi, sala kue ti pusu yanga ti mo yongoro na micro ni.

Tongana mo yeke mû mbeni diskur. Tongana mo ga ndulu na tele ti pupitre, mingi ni mbeni ita ayeke leke ande lutingo ti micro ni. Luti tongana ti so mo yeke sala ka, na zia lê ti mo na mbage ti azo so ayeke mä mo ande na ngoi so ita ni ayeke leke ni. Zia ambeti so mo sû ye dä na ndo pupitre ni, na bâ si micro ni akanga lê ti mo pëpe ti bâ ni.

Tongana mo to nda ti sala tënë, mä tongana nyen go ti mo ayeke toto na yâ ti haut-parleur. A toto mingi? Wala ambeni tënë ti mo ayeke toto mo bâ mo tene a yeke sungba sungbango? Peut-être a lingbi mo pusu kete na peko. Tongana mo yeke bi lê ti mo na ndo aye so mo sû na mbeti, girisa pëpe so a lingbi mo sala tënë wala mo diko ye gi tongana lê ti mo ayeke na mbage ti micro ni, wala na nduzu ahon ni kete, me pëpe na gbe ni.

Tongana mo yeke diko mbeti na ndo estrade. A yeke nzoni ti tene mo gbu Bible ti mo wala mbeni mbeti nde na nduzu si lê ti mo ayeke na mbage ti azo ni. Teti so micro ni ayeke bâ ndo ande na mbage ti mo, peut-être a lingbi mo dengi mbeti ni kete na mbage. So aye ti tene so a lingbi li ti mo aluti kete na mbeni mbage ti micro ni. Tongaso, tongana mo yeke diko ye ni, go ti mo ayeke gue tâ gi na yâ ti micro ni.

Mingi ti aita-koli so ayeke diko aparagraphe na Mandango Tour ti Ba Ndo ayeke luti na ayeke sala tënë na gbele micro so ayeke na keke ni. Lutingo tongaso amû lege na ala ti hu pupu nzoni mingi na ti diko mbeti ni na fango atënë ti bê nzoni mingi. Girisa pëpe so dikongo aparagraphe ayeke mbeni kota mbage ti bungbi. Nzoni so azo ni ayeke wara aga mingi ni na lege ti mango ye so a yeke diko.

Tongana mo yeke kiri tënë na ngoi ti bungbi. Tongana kongregation ti mo ayeke sala kusala na amicro ti tene azo akiri na tënë, dabe mo so a hunda lakue ti sala tënë polele na ti zia go ti mo atoto alingbi na ni. Tongana mo yeke kiri tënë, sala kue ti gbu mbeti ti mo wala Bible ti mo na maboko. Ye so ayeke mû ande lege na mo ti bâ ni nzoni na ngoi so mo yeke sala tënë na yâ ti micro ni.

Na yâ ti ambeni kongregation, a soro ambeni ita-koli ti mû micro na azo so a fa ala ti kiri tënë. Tongana a yeke tongaso na yâ ti kongregation ti mo, na tongana a mû mo ti kiri tënë, zia maboko ti mo angbâ na nduzu si ita so ayeke mû micro ni alingbi ti bâ ndo so mo duti dä ti gue na ni hio na mo. Tongana micro ni ayeke ti so a gbu na maboko gbungo, leke tele ti mo ti gbu ni. Ku micro ni ayeke na yanga ti mo awe si mo to nda ti sala tënë. Tongana mo hunzi awe, kiri na micro ni hio.

Tongana mo yeke sala démonstration. Ti sala kua na micro na yâ ti mbeni démonstration ahunda mbilimbili ti gbu li nzoni kozoni. Tongana a yeke na ndo ti mbeni keke, amaboko ti mo use kue ayeke duti ande senge ti gbu Bible nga na ambeni mbeti ti mo. Tongana micro ni ayeke ti gbu na maboko gbungo, mo yeke wara liberté mingi ti sala aye, me a lingbi peut-être mo mä tele na zo ti lisoro ni ti gbu ni. Tongaso amaboko ti mo ayeke duti ande senge ti gbu Bible ti mo. A lingbi mo na zo ti lisoro ti mo atara pekoni si lo hinga tongana nyen ti gbu ni nzoni. Dabe mo nga so tongana mo yeke na ndo ti estrade, a lingbi mo zia peko ti mo na azo ni pëpe, mbilimbili tongana mo yeke sala tënë.

Na yâ ti adémonstration ti Bungbi ti Kusala, azo so amû mbage dä alingbi ti duti mingi, na ala lingbi ti tambela na ndo ti estrade ni. Tongaso, a yeke hunda peut-être ti sala kua na amicro mingi. A lingbi amicro ni aduti dä kozoni wala a mû na azo ni na ngoi so ala yeke gue na ndo ti estrade. Ti sala si amicro aduti na mbilimbili place ti ala nga na tâ ngoi ni, a hunda ti leke ye kozoni si. Ti tara peko ti adémonstration kozoni ti sala ni ayeke mû lege ti fa na azo so amû mbage dä lege ti sala kua nzoni na amicro. Tongana a lingbi ti tara pekoni pëpe na ndo estrade, a yeke lege ti ndara ti tene azo ni agbu mbeni ndulu ye na maboko ti ala so akono tongana micro si ala tara peko ti gbungo ni nzoni. Na peko ti démonstration, a lingbi azo ni azia yeke amicro so a gbu na maboko gbungo. A yeke nzoni ala sala hange si akamba ti ambeni micro agbu gere ti ala pëpe na ngoi so ala yeke zia estrade ni.

Bingo lê ti e na ndo salango kua na amicro ague tâ oko mingi na mbeni oko ti akota ye so abungbi ti e ayeke gi mbilimbili: warango ye ti nzoni na lege ti mba na yâ lisoro so e yeke sala na ndo Tënë ti Nzapa (aHéb. 10:24, 25). Na mandango ti sala kua na amicro nzoni, e mveni e lingbi ti sala ye ti si na kota ye so.