YE TI MANDA 05
Bible ayeke mbeti so Nzapa atokua na e
Jéhovah amû na e mbeni pendere cadeau. A yeke Bible so na yâ ni mo yeke wara ambeti 66. Me mo lingbi ti hunda terê ti mo, mo tene: ‘Bible abâ gigi tongana nyen? Wa ni ayeke zo wa?’ Ti kiri tënë na ahunda so, zia e bâ tongana nyen la tënë ti Nzapa so ayeke na yâ ti Bible asi na e.
1. Tongana azo la asû Bible, ngbanga ti nyen la e tene Wa ni ayeke Nzapa?
Akoli 40 tongaso la asû lani Bible. A sû kozo mbeti ti Bible a sara ngu 3500 tongaso awe nga ndangba ni a sara ngu 1900 tongaso awe. Dutingo ti azo so asû ni ayeke lani nde nde. Atâa so kue, atënë kue ti yâ ti Bible amä terê. Ye so alingbi ti si tongana nyen? A yeke ndali ti so Nzapa la ayeke Wa ti Bible. (Diko 1 aThessalonicien 2:13.) Azo so asû Bible asû apensé ti ala wani ape. Me ala ‘sara tënë ti ye so alondo na Nzapa tongana yingo vulu afa lege ni na ala.’a (2 Pierre 1:21). Nzapa asara kua na yingo vulu ti lo ti fa na akoli so apensé ti lo ti tene ala sû ni.—2 Timothée 3:16.
2. Azo wa la alingbi ti bâ nzoni na lege ti Bible?
Azo ti “amara kue, akete mara kue, azo ti ayanga ti kodro kue nga na azo ti kodro kue” la alingbi ti bâ nzoni na lege ti nzoni tënë so ayeke na yâ ti Bible. (Diko Apocalypse 14:6.) Nzapa asara si a sigi na Bible na ayanga ti kodro mingi ahon tanga ti ambeti kue so a sû ni. Azo kue alingbi ti diko tënë ti Nzapa so ayeke na yâ ti Bible, atâa ndo wa la ala vivre dä wala yanga ti kodro wa la ala tene.
3. Tongana nyen la Jéhovah abata Bible si angbâ?
A sû lani Bible na ndö ti aye so ayeke ninga mingi ape, na tapande poro ti nyama nga na papyrus. Me akoli so aye Bible mingi asû peko ni nzoni fani mingi na peko ti terê na maboko. Atâa so azo so ayeke na ngangu mingi agi ti futi Bible biani biani, ambeni zo azia fini ti ala na lê ti kuâ ti bata ni. Jéhovah azia pëpe si mbeni zo wala mbeni ye akanga lege na lo ti sara tënë na e. Bible atene: “Tënë ti yanga ti Nzapa ti e ayeke ngbâ lakue.”—Ésaïe 40:8.
GI TI HINGA AYE MINGI
Gi ti hinga ye mingi na ndö ti lege so Nzapa asara kua na akoli ti sû Bible na gbe ti yingo ti lo, tongana nyen la lo bata ni nga tongana nyen la lo sara si azo awara ni.
4. Bible afa na e zo wa la ayeke Wa ti lo
Zia VIDÉO ni. Na pekoni diko 2 Timothée 3:16, na kiri tënë na ahunda so.
Tongana azo la asû Bible, ngbanga ti nyen la a iri ni Mbeti ti Nzapa?
Mo pensé so a yeke na lege ni ti yeda so Nzapa alingbi ti fa apensé ti lo na azo so asû Bible?
Mbeni secrétaire apeut ti sû mbeni lettre, me atënë ti yâ ni ayeke ti zo so ahunda na lo ti sû ni. Legeoko nga, azo la asû Bible, me atënë ti yâ ni ayeke ti Nzapa
5. Bible angbâ atâa so azo agi lani ti futi ni
Tongana Bible ayeke Mbeti ti Nzapa, e yeke ku ti tene lo bata ni. Na yâ ti angoi nde nde so ahon, akoli so ayeke na komandema agi ti futi Bible. Akota zo ti nzapa agi lani ti honde ni. Me azo mingi azia fini ti ala na lê ti kuâ ti bata Bible atâa so a kanga lege na ala nga a tene a yeke fâ ala. Ti hinga ye na ndö ti mbeni oko ti ala, zia VIDÉO ni, na pekoni kiri tënë na ahunda so:
So mo hinga so a sara gbâ ti aye ti bata Bible, a pusu mo ti diko ni? Ngbanga ti nyen?
Diko Psaume 119:97, na pekoni kiri tënë na hunda so:
Nyen la apusu azo mingi ti zia fini ti ala na lê ti kuâ ti kiri na peko ti Bible na ayanga ti kodro nga ti kangbi ni?
6. Bible ayeke ndali ti azo kue
A kiri na peko ti Bible na ayanga ti kodro mingi nga a kangbi ni mingi ahon tanga ti ambeti kue. Diko Kusala 10:34, 35, na pekoni kiri tënë na ahunda so:
Ngbanga ti nyen la Nzapa aye si a kiri na peko ti Bible na ayanga ti kodro mingi nga a kangbi ni mingi tongaso?
Nyen la anzere na mo na mbage ti Bible?
Mingi ti azo
na yâ ti dunia
ayeke na Bible na mbeni yanga ti kodro so ala mä yâ ni
A lingbi ti wara ni
kue wala mbage ni
na ayanga ti kodro ahon
3 000
5 000 000 000
Wungo ti aBible so a bâ so a sigi na ni,
wungo ni so ayeke mingi ahon ti tanga ti abuku kue
AMBENI ZO ATENE: “Bible ayeke mbeni ngbene mbeti so azo la asû ni.”
Mo tene ti mo nyen?
Aye wa la afa so Bible ayeke Mbeti ti Nzapa?
NA NDURU TËNË
Bible ayeke Mbeti ti Nzapa, na lo sara kue ti tene azo kue awara ni.
Dango bê
So e tene Nzapa asara kua na akoli ti sû Bible na gbe ti yingo ti lo, a ye ti tene nyen?
Nyen la apika bê ti mo mingi na ndö ti Bible so angbâ atâa a kanga lege na ni, so a kiri peko ni na ayanga ti kodro nga a kangbi ni?
So mo hinga so Nzapa asara kue ti sara tënë na mo, a sara mo tongana nyen?
GI NDA TI YE
Diko ye na ndö ti mbaï ti Bible. A komanse na angbene manuscrit ti si na aBible so ayeke dä laso.
“Bible asi na e tongana nyen?” (Zingo na lango!, novembre 2007)
Gi ti hinga aye ota so azo agi lani ti sara ti tene Bible aduti dä encore ape.
“Bible—Aye ti ngangu wa la asi na lo?” (Tour ti Ba Ndo N° 4 2016)
Bâ tongana nyen la azo azia fini ti ala na lê ti kuâ ti kiri na peko ti Bible na ayanga ti kodro.
A sara acopie ti Bible nga a kiri na peko ni na ayanga ti kodro fani mingi. Tongana nyen la mo peut ti hinga so tënë ti yâ ni achangé ape?
“Eskê a changé atënë ti yâ ti Bible wala a ba yâ ni?” (Article na ndö ti site)
a Tongana ti so a yeke fa ande na yâ ti ye ti manda 07, yingo vulu ayeke ngangu ti Nzapa.