Kota kapa ti tisango ndo na Mémorial!
1. Nyen la awafango tënë ti Royaume na ndo ti sese kue ayeke bi tere ti ala dä ti sara ti londo na lango 21 ti mars? na ngbanga ti nyen?
1 Na jeudi, lango 9 ti avril ngu 2009, fade awakua ti Jéhovah ti sese mobimba ayeke bungbi ti gbu li na ndo ti kota fä ti ndoye ti Jéhovah na mbage ti azo ti sese kue (aRom. 5:6-8). E yeke ku kungo ti wara azo mingi na tere ti e na ngoi so e yeke dabe na kui ti Jésus. Ti londo na lango 21 ti mars, na ndo ti sese kue, fade a yeke kangbi mbeni mbeti ti tisango ndo na Mémorial.
2. Aye wa a lingbi e bata na li tongana e yeke mû mbeti ti tisango ndo ni na azo?
2 Aye ti bata na li: Sara kusala mingi na afoto, ahundango tënë, na aversê so a zia na ndo ti mbeti ni. Na tapande, mo lingbi ti sara tënë na ndo ti foto so ayeke na ndo ti mbeti ni, na mo tene: “Mbi ye ti tisa mo ti dabe na kui ti Jésus so e yeke sara ni na jeudi, lango 9 ti avril ngu 2009.” Na pekoni sara tënë na ndo ti li ti tënë ti mbeti ti tisango ndo ni nga na ahundango tënë so ayeke na gbe ni. Girisa pëpe ti tene na zo ni so lo lingbi nga ti tisa sewa ti lo nga na ambeni zo so bê ti lo aye.
3. Tongana nyen mo lingbi ti bâ peko ti mbeti ti tisango ndo so mo zia na azo?
3 Tongana territoire ti congrégation ti mo akono mingi, a-ancien alingbi ti tene na mo ti zia mbeti ti tisango ndo ni na ayanga-da so azo ni ayeke dä pëpe. Na asamedi nga na adimanche, mo lingbi ti zia apériodique na tere ti mbeti ti tisango ndo ni. Zia na gbele mo ti tisa avizite ti mo, azo so mo yeke manda Bible na ala, asewa, amba ti mo ti ekole na ti place ti kua, avoizin nga na ambeni zo so mo hinga ala. Na ngu so ahon, mbeni ita-wali atisa azo ti sewa ti lo 30, na pekoni lo kiri lo bâ ala ngoi na ngoi ti dabe ti ala na ndo ti nene ti bungbi ni. Bâ ngia so lo wara tongana azo 25 aga, na pekoni 4 popo ti ala ayeda ti manda Bible!
4. Nyen la a lingbi e leke fadeso? na ngbanga ti nyen?
4 Leke tere ti mo fadeso: Awafango tënë mingi ayeke wara lege ti kono yâ ti kusala ti ala ande na nze ti mars na avril. Tongana amolenge ti mo wala azo so mo manda Bible na ala ayeke gue na li ni nzoni, so ayeke tâ mbeni nzoni ngoi ti tene ala ga awafango tënë so ade ti wara batême pëpe. A yeke fadeso ngoi ti tene e leke tere ti e ti mû mbage mingi na kapa ti tisango azo ti ga ti dabe ti ala na alege use so Nzapa na Jésus afa na e kota ti ndoye ti ala.—Jean 3:16; 15:13.