Kiringo na ndo ti tënë ti fa nene ti ye

NZONI fango ye andu kiringo na ndo ti tënë. Tongana mo zo mo kiri mingi na ndo ti mbeni kota tënë, azo so ayeke mä ni ayeke dabe ti ala na ni hio. Tongana mo kiri mo fa tënë ni na mbeni lege so ayeke nde kete, ala lingbi même ti gbu nda ni nzoni mingi.

Tongana azo so ayeke mä mo adabe ti ala pëpe na ye so mo tene, atënë ti mo ayeke sala ye ande pëpe na ndo ye so ala mä na bê dä wala na ndo lege so ala yeke duti na fini. Me ala yeke ngbâ ande peut-être ti bi bê na atënë so mo fa nene ni mbilimbili.

Jéhovah, Kota Wafango ye na e, azia na e tapande ni na yâ lege so lo yeke kiri fani mingi na ndo ti aye. Lo mû lani aKomandema Bale-oko na mara ti Israël. Na lege ti a-ange so asala tënë na iri ti lo, lo sala si mara ni amä akomandema so na Hoto ti Sinaï. Na pekoni, lo sû ni na ndo ti tableau na lo mû ni na Moïse (Ex. 20:1-17; 31:18; Deut. 5:22). Tongana ti so Jéhovah afa, Moïse akiri atene peko ti akomandema so na mara ni kozo ti tene ala lï na Sese ti Zendo, nga na lege ti yingo vulu, Moïse asû ni na mbeti, tongana ti so a wara ni na Deutéronome 5:6-21. Na popo ti akomandema so a mû na Israël, a yeke wara lani ye so a hunda na ala ti ndoye Jéhovah na ti sala na lo na bê ti ala kue, na âme ti ala kue nga na ngangu ti ala kue. A sala nga tënë ti komandema so fani mingi (Deut. 6:5; 10:12; 11:13; 30:6). Ngbanga ti nyen? Ngbanga ti so, tongana ti so Jésus atene lani, a yeke “kota komandema na komandema ti kozoni.” (Mat. 22:34-38). Na lege ti prophète Jérémie, Jéhovah adabe ti azo ti Juda na ndo nene ti mä yanga ti lo na yâ aye kue so lo komande ala. Lo dabe ti ala tongaso ahon fani 20 (Jér. 7:23; 11:4; 12:17; 19:15). Nga na lege ti Ezéchiel, Nzapa atene fani 60 na ndo ni so fade amara ayeke “hinga [Lo] yeke L’Eternel.”​—Ezéch. 6:10; 38:23.

Na yâ ti tondo ti kusala ti Jésus, e bâ nga tongana nyen lo kiri na ndo ti tënë nzoni mingi. Na tapande, e yeke na aÉvangile osio, so oko oko asala tënë ti akota ye so a wara ni na yâ ti mbeni Évangile ni oko wala ahon so, me so a bâ aye ni na mbeni lê nde kete. Na yâ fango ye ti lo mveni, Jésus afa a-oko kota tënë fani mingi, me na alege nde nde (Marc 9:34-37; 10:35-45; Jean 13:2-17). Nga, na ngoi so lo yeke na Hoto ti Oliviers lango kete kozo na kuâ ti lo, Jésus akiri na ndo ti tënë fani mingi ti fa kota ti wango so, lo tene: “I bata, teti i hinga lâ ti gango ti Seigneur ti i pëpe.”​—Mat. 24:42; 25:13.

Na fango tënë. Tongana mo yeke fa tënë na azo, ye so mo yeke ku ayeke ti tene ala dabe ti ala ande na ye so mo tene. Tongana mo kiri na ndo ti tënë nzoni, ye so alingbi ti mû maboko na mo ti si na ye so.

Fani mingi, na ngoi so mo yeke sala lisoro na ndo mbeni tënë, ti kiri na ndo ni ayeke mû ande maboko na mo ti zia tënë so ngangu na yâ ti li ti mbeni zo. Tongaso, na pekoni so mo diko mbeni versê awe, mo lingbi ti gboto lê na ndo nene ti versê ni na lege so mo fa mbeni kota mbage ni nga mo hunda tënë so: ‘Mo bâ tongana nyen a leke yâ ti atënë ti versê ni?’

Mo lingbi nga ti sala kusala nzoni mingi na andangba tënë na yâ ti lisoro. Na tapande, mo lingbi peut-être ti tene: “Ngbongboro tënë na yâ lisoro ti e so mbi ye si mo dabe ti mo na ni ande ayeke. . . ” Na tene gi pekoni. A lingbi ti duti mara ti ye tongaso: “Ye so Nzapa aleke ti sala ayeke ti tene a gbian sese ti ga mbeni paradis. Ye so ayeke ga ande biani tâ tënë.” Wala: “Bible afa polele so e yeke na lâ ti nda ni ti aye ti ngoi ti laso. Tongana e ye ti sö kuâ na nda ni, a lingbi e hinga ye so Nzapa ahunda na e.” Wala a lingbi ti duti: “Tongana ti so e bâ ni awe, Bible amû wango so alingbi na ndo lege ti luti na gbele akpale ti sewa.” Na yâ ti ambeni ye, mo lingbi peut-être gi ti kiri na ndo ti mbeni versê ti Bible so mo fa pekoni kozo awe tongana ngbongboro tënë so a lingbi zo ni adabe ti lo na ni. Biani, ti sala ye so nzoni, a lingbi mo gbu li na ndo ni kozo.

Tongana mo yeke kiri ti bâ azo, so andu nga azo so mo yeke manda Bible na ala, ti kiri na ndo ti tënë ti mo alingbi ti ndu ahundango tënë ti dango bê.

Tongana a yeke ngangu na zo ni ti gbu nda ti mbeni wango ti Bible wala ti sala ye alingbi na ni, a lingbi peut-être mo sigigi na tënë ni na mbeni ngoi nde. Sala kue ti sala tënë na ndo ni na alege nde nde. Lisoro ni ahunda nga pëpe ti yo mingi, me a lingbi a wa wamandango ye ni ti ngbâ lakue ti bi bê na tënë ni. Dabe mo so Jésus asala kusala na mara ti kiringo na ndo ti tënë tongaso ti mû maboko na adisciple ti lo ti hon ndo ti nzara ti duti na kozo ndo.​—Mat. 18:1-6; 20:20-28; Luc 22:24-27.

Tongana mo yeke mû diskur. Tongana mo yeke mû diskur wala mo yeke sala devoir na ndo ti estrade, ye so mo yeke gi ayeke pëpe gi ti fa asango. Mo ye ti tene azo so ayeke mä mo agbu nda ni, adabe ti ala na ni na asala ye alingbi na ni. Ti si na ye so, kiri na ndo ti tënë nzoni.

Ye oko, tongana mo yeke kiri na ndo ti angbongboro tënë ni ahon ndo ni, lê ti azo so ayeke mä mo alingbi ti hon na ndo ti mbeni ye nde. Soro nzoni atënë so a lingbi mo gboto lê na ndo ni. Mingi ni a yeke atënë so ayeke na gunda ti devoir ti mo, me ala lingbi ti ndu ambeni tënë nde so ayeke duti ande na ngele ngangu, mbilimbili na lê ti azo so ayeke mä mo.

Ti kiri na ndo ti tënë nzoni, a yeke nzoni mo zia na molongo angbongboro tënë ti mo na yâ akozo tënë ti mo. Sala ye so na lege ti andulu tënë so afa hio tongaso ye so mo yeke sala tënë na ndo ni ande. Sala ni nga na lege ti ahundango tënë wala na lege ti andulu tapande so afa akpale so a lingbi a leke ni. Mo lingbi ti fa wungo ti angbongboro tënë so ayeke dä, na diko ala na molongo. Na pekoni sala tënë na ndo ngbongboro tënë oko oko na yâ kota mbage ti devoir ti mo. Mo lingbi ti fa nene ti aye na yâ kota mbage ti devoir ti mo na lege so mo kiri mo fa ngbongboro tënë oko oko kozo ti gue na mbeni nde. Wala mo lingbi ti sala tongaso na lege so mo sala kusala na mbeni tapande so a wara na yâ ni salango ye alingbi na ngbongboro tënë ni. Mo lingbi ti kiri ti gboto lê na ndo angbongboro tënë ti mo tongana na yâ atënë ti nda ni mo kiri mo fa ni, mo haka popo ti aye so akpa tele pëpe, mo kiri tënë na ahundango tënë wala mo fa hio yorö ti akpale so a fa kozoni awe.

Nde na aye so ayeke na yâ ti paragraphe so ahon, mbeni wamungo diskur ti kode ayeke bâ nzoni azo so ayeke mä lo. Tongana a yeke ngangu na ambeni zo ti gbu nda ti ambeni tënë, lo yeke hinga ni. Tongana a yeke mbeni kpengba tënë, lo yeke kiri na ndo ni. Ye oko, tongana lo sala kusala na a-oko tënë, lo lingbi ti sala ye so pëpe. Ambeni kode nde ti fango ye ayeke dä. A yeke nzoni lo sala ye alingbi na aye so asi. Lo lingbi peut-être ti zia na yâ ti devoir ti lo ambeni ye na ndo ni. Tongana mo manda ti sala ye alingbi na bezoin ti azo so ayeke mä mo na lege so, ye so ayeke sala ande ngangu kusala ti tene mo ga mbeni nzoni wafango ye.