Jéhovah alingbi biani na sepela
Fade a yeke sala matanga ti Kobe ti Seigneur na lango 16 ti avril
1 Bê ti e ayeke lakue gi na nduzu tongana e yeke ga ndulu na lango 16 ti avril ngu 2003. Na lakui ni so, fade e yeke sala matanga ti dango bê na kui ti Jésus, na bungbingo legeoko na awavorongo Jéhovah kutu mingi na ndo sese mobimba ti mû gonda na iri ti Jéhovah. Jéhovah alingbi tâ na sepela teti pendere ye so lo leke na lege ti sandaga ti kota ngele ti Christ. Na lege ni, fade lo yeke tuku adeba nzoni na ndo azo kue so amä yanga. E yeke bungbi, na bê kue, na wasungo psaume na dengo kongo: “L’Eternel ayeke kota, na a lingbi azo asepela Lo mingi”.—Ps. 145:3.
2 Ngoi ti Mémorial ayeke mbeni ngoi ti gbungo li na ndo nzoye ti Nzapa, na kuda ti kiringo singila na Jéhovah so ayeke na li ti e, lo so atokua “Molenge ti Lo ngengele oko na sese so, si e lingbi wara fini na lege ti Lo.” (1 Jean 4:9, 10). Na salango matanga ti Kobe ti Seigneur, na lege ti mango yanga, e yeke zia na ndo bê ti e tënë so: “L’Eternel asi na grâce, na Lo sala nzobe. . . . Na nzobe ti Lo ayeke kota mingi.” (Ps. 145:8). Biani, sandaga ti kota ngele ti Christ ayeke kota fä ti ndoye ti Jéhovah ahon atanga ni kue na mbage ti azo (Jean 3:16). Tongana e gbu li na ndo ndoye ti Nzapa, na tongana e bâ dutingo be-biani ti Jésus, a yeke pusu e ti sepela Jéhovah. Fade e yeke sepela lo teti lakue lakue ndali ti ndoye ti lo so asi singo, so lo fa na mungo na e lege ti wara fini ti lakue lakue.—Ps. 145:1, 2.
3 Mû maboko na ambeni zo ti sepela Jéhovah: Bê ti kiri singila teti matabisi so ahon atanga ni kue, ti sandaga ti kota ngele ti Christ, ayeke pusu e ti tisa ambeni zo ti bungbi na e ti sepela Jéhovah. Wasungo psaume asû lani na gbe ti yingo: “Fade ala sala tënë ti ye kue so adabe ala na kota nzobe ti Mo, na ala sala bia tënë ti mbilimbili ti Mo.” (Ps. 145:7). Gi na ngu so ahon, aTémoin ti Jéhovah na ndo sese kue amû, na bê kue, angbonga ahon ngbundangbu oko ti fa na tënë. Ye nyen asi na peko ti ngangu so ala sala? Yenga oko oko, mbeni wungo ti azo ahon azo 5 100 awara batême na fango na gigi mungo tele ti ala na Jéhovah. Na warango mbeni wungo ti azo 15 597 746 kue so aga na Mémorial, so na popo ni azo kutu 9 so ade ti to nda ti sepela Jéhovah tongana awafango nzo tënë pëpe, beku ayeke dä ti wara mbeni kota guengo na li! Teti e yeke awafango tënë ti Royaume, e yeke yekia matabisi ti e ti fango nzo tënë na e yeke sala si bê ti ambeni zo achangé aga na mbage ti Jéhovah, Molenge ti lo, nga na mbage ti Royaume.
4 Mbeni pendere lege ti wa ambeni zo ti yekia Jéhovah ayeke ti tisa ala ti bungbi na e na salango matanga ti Kobe ti Seigneur. Mo sala awe mbeni molongo ti iri ti azo kue so mo ye ti tisa ala, nga ambeni so a yeke nzoni a dabe ala na lango nga na ngbonga ni? Mo mû mbeni mbeti ti tisango ndo na ala kue so ayeke na yâ molongo ti iri so mo sû? Tongana a yeke tongaso pëpe, sala ni na bê kue na yâ ngoi so angbâ. Mû maboko na ala ti hinga nda ti matanga ni. Na ngoi ti matanga ni, duti ndulu ti bala azo so a hiri ala ti ga. Sala si ala bâ so e yeke na ngia ti wara ala na popo ti e, fa ala na ambeni ita, na gonda ala teti gango na matanga ni.
5 Guengo na Mémorial alingbi ti pusu afini zo ti gue na li ni na lege ti yingo. Mbeni wamandango Bible so angbâ ti bâ pasi na peko ti kpale ti li so lo wara lani, so asala si a yeke ngangu mingi na lo ti gue na ndo so azo aduti ka dä mingi, ague lani na Mémorial. Tongana a hunda na lo lani tongana nyen lo bâ ti lo bungbi ni, lo tene: “A yeke lani mbeni bï so ayeke nzoni-kue ahon atanga ni, na mbi yeke lani kâ.” Ngbele ye na peko ti ye so, lo to nda ti gue na abungbi.
6 Na peko ti Mémorial: Ye nyen alingbi ti sala ti mû maboko na azo so asala nzara ti tâ tënë ti ga azo ti sepelango Jéhovah? Fade a-ancien ayeke bi lê na ndo afini zo so aga na Mémorial na ti leke aye ti tene awafango tënë so alingbi asala vizite hio na ala na pekoni, ti kiri ti bâ apendere ye so ala manda na so ala bâ lani. Ambeni aye peut-être ti manda Bible. A yeke nzoni a tisa ala nga ti gue yenga oko oko na abungbi kue ti kongregation, teti so guengo lakue na abungbi alingbi ti kono hingango ye ti ala na ndo Bible.
7 A yeke leke aye ti mû maboko na ala kue so afa tënë nze na nze pëpe, nga aita so azia ti fa tënë, ti gue lakue na abungbi. Tongana a-ancien ahunda na mo ti mû maboko na mbeni ita so azia ti fa tënë ti kiri ti mû mbage na kusala ni, duti ndulu ti yeda. Fango na gigi mara ti bingo bê ti ndoye tongaso teti aita ti e ague legeoko na wango ti Paul: “Tongana e wara lege ni, a lingbi e sala ye ti nzoni na azo kue; na a hon kue, a lingbi e sala ye ti nzoni na aita ti e awamabe.”—aGal. 6:10.
8 Zia e kue e sala ngangu so ayeke nde ti gue na Mémorial na lango 16 ti avril. E yeke ye pëpe ti manke ngoi so ayeke nzoni-kue ahon atanga ni ti sepela Jéhovah. Biani, zia e sepela Jéhovah laso nga teti lakue lakue ndali ti akota kusala ti lo!—Ps. 145:21.