LEGE TI HON NDÖ TI BIBE TI KENGO ZO

1 | Sara kangbi na popo ti azo ape

Fango ye ti Bible:

“Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—KUSALA 10:34, 35.

Tënë so aye ti tene nyen:

Jéhovaha Nzapa ayeke fâ ngbanga na li ti e ape ndali ti kodro ti e, mara ti e, couleur ti terê ti e, wala ngobo ti e. Me, lo yeke bâ gï apensé ti e nga na aye so apusu e ti sara ye. Bible atene nga so, “zo ayeke bâ gï ye so lê ti lo ayeke bâ, me Jéhovah abâ ye so ayeke na yâ ti bê ti zo.”—1 Samuel 16:7.

Ye so mo peut ti sara:

Atâa so e peut ti hinga ye so ayeke na yâ ti bê ti azo ape, e peut ti gi ti sara ye tongana Nzapa nga e sara kangbi na popo ti azo ape. Gi ti hinga zo oko oko ahon ti bâ ala na groupe. Tongana mo yeke na asioni pensé na ndö ti ambeni zo so peut-être mara ti ala wala kodro ti ala ayeke nde, sambela Nzapa ti tene lo aidé mo ti zi mara ti bibe ni so (Psaume 139:23, 24). Tongana mo hunda na Nzapa na bê ti mo kue ti aidé mo ti sara kangbi na popo ti azo ape, mo peut ti duti sûr so lo yeke mä sambela ti mo nga lo yeke aidé mo.—1 Pierre 3:12.

a Jéhovah ayeke iri ti Nzapa.—Psaume 83:18.

““Lâ oko mbi na mbeni munzu e duti place oko tongaso ape . . . Laso, mbi yeke na yâ ti sewa ti e ti aita so ayeke na yâ ti dunia kue.”—TITUS

Vrai ye so asi: TITUS

ahon ndö ti bibe ti kengo zo

Titus ayeke lani na yâ ti goupe ti ambeni bandit. Lo tene: “E yeke gue lani na ambeni place na yâ ti ville na ndo so azo vuko apeut ti si dä ape, ando tongana ahôtel nga na abar, gï ti tene e gi yanga na e tiri.” Titus atene so lo ke azo mingi na asara si lo yeke sara ye ti ngangu na azo, lo kiri lo tene: “Tongana mbi ke mbeni zo, lakue mbi la mbi yeke kozo zo so akomanse ti boxé zo ni.”

Titus akomanse ti changé na temps so aTémoin ti Jéhovah amanda Bible na lo. Na temps so lo diko Bible, a changé bango ndo ti lo kue. Mbilimbili ye so apusu lo ti gue na li ni ayeke zendo ti mbeni dunia ti kekereke so “kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—Apocalypse 21:3, 4.

Kozo ye so Titus asara ayeke so lo sara kue ti zia lege ti kengo azo. Lo tene: “A yeke lani ngangu mingi na mbi ti changé fason so mbi yeke pensé na ni nga na sarango ye ti mbi.” Me, ye so mbi manda na lege ti Kusala 10:34, 35 la a-aidé mbi, so a fa so Nzapa ayeke sara kangbi na popo ti azo ape.

Ye ti peko ni ayeke nyen? Titus atene: “Mbi ga ti hinga na bê ti mbi kue so aTémoin ti Jéhovah ayeke na yâ ti tâ bungbi ti vorongo Nzapa na temps so mbi bâ so ala yeke na ndoye na popo ti ala, atâa mara ti ala wala couleur ti terê ti ala ayeke so wa. Même kozo ti tene mbi wara lani batême ti ga mbeni Témoin ti Jéhovah, mbeni ita so ayeke munzu atisa mbi na yanga-da ti lo ti te mbeni ye. A yeke lani tongana bango-li. Lâ oko mbi na mbeni munzu e duti place oko tongaso ape na yanga-da ti lo ti te ye. Laso, mbi yeke na yâ ti sewa ti e ti aita so ayeke na yâ ti dunia kue.”