Wara ngia na yâ Tënë ti Nzapa

ZO SO “ngia ti lo ayeke na yâ Ndia ti L’Eternel”, nzerengo tele ti lo ayeke mingi. Mara ti zo tongaso ayeke diko Tënë ti Nzapa ‘na gbe ti go bï na lâ.’ (Ps. 1:1, 2). Mo yeke wara mara ti ngia so? Tongana nyen mo lingbi ti kono ngia so Tënë ti Nzapa ayeke ga na ni na mo?

Tongana Jéhovah asala tënë, mä lo

Diko gi atënë ni pëpe. Bâ na li ti mo ye so mo yeke diko. Tara ti mä go ti azo so a fa peko ti tënë ti ala. Na ngoi so mo yeke diko akozo chapitre ti Bible, mä Jéhovah mveni na ngoi so lo yeke fa oko na oko ye so lo sala ti leke sese si alingbi na zo. Mä lo tongana lo tene na Molenge ti lo, Wakode ni, so ngoi alingbi awe ti leke akozo zo ti mitele. Bâ na li ti mo ye so asi: Adam na Eve ake yanga, Nzapa afâ ngbanga na ndo ti ala nga, na pekoni, lo tomba ala na yâ Paradis (Genèse, chap. 1-3). Zia bê ti mo apika tongana mo diko so mbeni go alondo na yayu na afa Jésus Christ tongana Molenge ti Nzapa so Lo ndoye lo mingi, lo so Nzapa atokua ti mû fini ti lo teti azo kue (Mat. 3:16, 17). Tara ti bâ ye so bazengele Jean asala tongana lo mä Jéhovah atene: “Bâ, Mbi sala si ye kue aga fini.” (Apoc. 21:5). Tâ tënë, ti diko Tënë ti Nzapa tongaso anzere mingi!

Ngbâ lakue ti diko Bible, na mo yeke hinga ande Jéhovah tongana mbeni zo so ayeke kota mingi na so apika bê. Fade mo yeke bâ so mo ye mingi ti ga ndulu na Lo so andoye e na so asala ye na e na be-nzoni. Lo yeke zo so ayeke mû maboko na e, tongana e ngbâ ti gi ti sala ye so bê ti lo aye na tâ be-ti-molenge. Lo yeke nga zo so ayeke fa na e tongana nyen ti wara nzoni na yâ aye kue so e sala.​—Jos. 1:8; Ps. 8:2; Es. 41:10.

Tongana e mû ngoi mingi ti diko Bible, e yeke hinga nzoni ahon ti kozo ye so Nzapa aye na mbage ti e, na a yeke sala si tele ti e anzere mingi nga. Me nzerengo tele ni angbâ gi ge pëpe. Tongana ye so mo diko amû na mo maboko so alingbi ti leke akpale ti mo na ndara, fade mo yeke sala tënë tongana wasungo psaume so atene: “Tënë ti Témoin [“ti dango bê”, NW ] ti Mo ayeke ye ti kpene, tongaso âme ti mbi abata tënë ni.” (Ps. 119:129). Mo nga kue mo yeke wara ngia ande tongana mo manda na lege ti Mbeti ti Nzapa akpengba-ndia so amû maboko na mo ti sala si atënë ti li ti mo nga na anzara ti bê ti mo ague oko na ye so Nzapa ahunda.​—Es. 55:8, 9.

Bible afa na e nzoni salango ye so abata e yongoro na ye ti sioni. Lo fa na e nga mbilimbili lege ti hon dä. Na ngoi so e yeke diko ni, e yeke bâ so Jéhovah ayeke mbeni Babâ so ahinga akpale wa ayeke si ande tongana e zia si anzara ti mitele so ayeke sioni ahon ndo ti e. Lo ye pëpe si e bâ pasi ndali ti asioni ye so ayeke ga ande na peko ti kengo na mbana andia ti lo, so ayeke nzoni ahon atanga ni kue, na ndo nzoni salango ye. Lê ti lo ayeke na ndo ti e, na lo ye si e mû lege so ayeke nzoni ahon atanga ni na yâ fini. Dikongo Tënë ti lo ayeke mû maboko na e ti ne mingi ahon ti kozo deba nzoni so e yeke na ni ti wara Jéhovah tongana Nzapa nga Babâ ti e ti yayu.

Diko Bible lâ oko oko

Na ndo zo so adiko Tënë ti Nzapa lâ oko oko, wasungo psaume atene: “Ye kue so zo so asala aga nzoni.” (Ps. 1:3). Biani, e yeke mbilimbili-kue pëpe, e yeke na yâ sioni sese ti Satan nga Zabolo ayeke sala kue ti mene e. Me atâa so kue, dikongo Tënë ti Nzapa lakue nga mungo peko ti aye so ayeke na yâ ni ayeke mû ande lege na e ti sala si aye kue so andu songo ti e na Jéhovah aga nzoni.

Teti so sese ti laso ayeke sala ngangu na ndo e, gbungo li na ndo abibe ti Wasalango ye, même gi teti apendere kete ngoi lâ oko oko, alingbi ti kpengba e. A kanga ambeni ita lani ndali ti mabe ti ala. Ala wara gi ambeni versê so a fa pekoni na yâ ambeti-sango. Ala fâ mbage ti kugbe so aversê ni ayeke na ndo ni, ala bata aversê ni na li nga ala gbu li dä. Jéhovah ahiri deba nzoni na ndo angangu so ala sala, teti so ala sala lani ye alingbi na ye so dutingo ti ala amû lege na ala ti sala ti manda Tënë ti Nzapa (Mat. 5:3). Me liberté ti mingi ti e ahon ti ala. Zia e tene pëpe so gi dikongo hio mbeni versê oko lâ na lâ ayeke sala ande mbeni ye ti kpene na ndo e. Ye oko, e yeke wara ande adeba nzoni tongana e leke yâ ti aye so e zia na kozo ndo, si e diko mbeni mbage ti Bible lâ oko oko, e gbu li dä na e sala kusala na ni na yâ fini ti e.

Ti tâ tënë ni, atâa e leke aye ti e nzoni tongana nyen, yâ ni alingbi ti buba. Tongana a si tongaso, e zia na kozo ndo aye so ayeke biani kota. Na tapande, e lingbi pëpe ti ke na bê ti e mveni ti nyon ngu lango oko wala use. Tongaso, atâa ye wa asi na yâ fini ti e ti lâ oko oko, a yeke nzoni e mû ngoi ti dë bê ti e na angu ti tâ tënë.​—Kus. 17:11.

Diko Tënë ti Nzapa kue

Mo mveni mo diko Bible kue awe? Ambeni abâ so dikongo Genèse ti si na Apocalypse ayeke ye ti karango zo. Ni la, azo mingi so aye lani ti diko Bible kue ato nda ni na dikongo kozoni Mbeti ti Nzapa so aChrétien asû na yanga ti Grec. Ngbanga ti nyen? Peut-être ngbanga ti so ala bâ hio tongana nyen abuku ti Bible so andu ala, azo so ayeke gi ti mû peko ti Christ. Wala peut-être na lê ti ala Mbeti ti Nzapa so aChrétien asû na yanga ti Grec ayeke mingi pëpe ti diko ni; a yeke gi kete mbage ti Bible. Me tongana ala hunzi dikongo abuku 27 so awe, ala kiri na abuku 39 ti Mbeti ti Nzapa so a sû na yanga ti Hébreu. Ala to nda ti diko ni na ti wara ngia dä. Ti si na hunzingo Mbeti ti Nzapa so a sala na yanga ti Hébreu, andâ dikongo Bible lakue aga mbeni ye ti tele ti ala awe. Na tongaso ala gue na li ni ti diko Mbeti ti Nzapa so aChrétien asû na yanga ti Grec ti fani use ni, na ala kaï lâ oko pëpe ti diko ni. Zia mo nga kue mo sala si dikongo Tënë ti Nzapa lâ oko oko aga ye so mo yeke ngbâ ti sala na tanga ti fini ti mo kue.

Mbeni zo na yâ sewa ti mo wala kongregation ti mo alingbi ti diko mbeti pëpe? Ngbanga ti nyen mo hunda pëpe na zo tongaso ti diko na lo Bible lakue? Fade mo yeke wara nzoni dä. Zo ni nga kue ayeke wara nzoni dä na ngoi so lo yeke gbu li na ndo ye so lo mä, na lo sala kusala na ni na yâ fini ti lo.​—Apoc. 1:3.

Na pekoni, peut-être mo ye ti sala ambeni ye nde so andu dikongo Bible ti mo lakue. Ambeni ti aye so alingbi ti sala si mo bâ na nene ni mingi ahon ti kozo tongana nyen ambage nde nde ti Bible atingbi tele. Tongana Bible ti mo ayeke tokua mo na yâ ambeni versê nde, ye so alingbi ti fa na mo anzene nzene tënë ti ambaï ni nga ambeni tënë so ague oko na ni. Ye so alingbi ti mû maboko na mo ti hinga aye wa asala si a sû apsaume nde nde, nga ambeti so abazengele ti Jésus Christ asala. Étude perspicace des Écritures ayeke fa aye mingi na ndo azo, ando nga alengo so a sala tënë ni na Bible. Atableau agboto lê na ndo gango tâ tënë ti aprophétie ti Bible, a fa agbia na aprophète wa aduti na fini na oko ngoi. A fa nga alango wa aye ti lingbi na aye so Bible asala tënë ni.

Na ngoi so mo yeke gbu li na ndo ye so mo manda, mo yeke hinga ande ngbanga ti nyen ambeni ye amaï na popo ti azo ti Nzapa. Fade mo yeke hinga nga ngbanga ti nyen Jéhovah asala ye na azo ti lo tongana ti so lo sala lani. Mo yeke manda ande tongana nyen Jéhovah abâ akusala ti angorogbia, ti azo mingi nga ti zo oko oko. Fade ye so asala si mo hinga atënë ti li ti Jéhovah nzoni mingi ahon ti kozo.

Mbaï ti Bible ayeke nzere ande na mo mingi tongana mo bâ na li ndo so aye ni asi dä. Akarte ti akodoro so Bible asala tënë ni afa mara ti ndo ni, nga kilomètre oke ayeke na popo ti ala. Na tapande, amolenge ti Israël afâ Ngu Bengba peut-être na mbage wa? Sese ti Zendo akono lani tongana nyen? Jésus atambela lani kilomètre oke na ngoi ti kusala ti lo na sese? Paul abâ aye wa na ngoi ti atambela ti lo ti missionnaire? Akarte nga na aye so a fa na ndo akodoro ni asala si ye so mo yeke diko aga tâ ye na lê ti mo. Mo lingbi ti wara akarte ti akodoro so Bible asala tënë ni na ndo wa? Ambeni ayeke na yâ Les Saintes Écritures​—Traduction du monde nouveau. A wara akarte ni ndulu na 70 na yâ ambage use kue ti Étude perspicace. Na hunzingo ti kozo mbage ni, a fa molongo ti alembeti so a lingbi ti wara akarte dä. Ti wara ambeni karte ni, bâ Index des publications de la Société Watch Tower. Tongana mo yeke na ambeti so pëpe, sala kusala na akarte so ayeke na yâ Tour ti Ba Ndo ti mû maboko na mo na yâ dikongo Bible ti mo.

Na yâ Mbeti ti Nzapa so a sû na yanga ti Hébreu, Gbia David agonda Jéhovah: “O Nzapa, bibe ti Mo ayeke ye ti nzoni mingi na lê ti mbi! Wungo ti ala ayeke mingi mingi.” (Ps. 139:17). Na yâ Mbeti ti Nzapa so aChrétien asû na yanga ti Grec, bazengele Paul asepela Jéhovah teti so “Lo su na bê ti e ti mû lumière ti hingango gloire ti Nzapa so ayeke na lê ti Jésus Christ.” (2 aCor. 4:6). Angu mingi akangbi popo ti ngoi ti David na ti Paul; me, ala use kue awara ngia na yâ Tënë ti Nzapa. Mo kue mo lingbi ti wara ngia tongaso tongana mo mû ngoi ti diko aye kue so Jéhovah amû na mo na yâ Bible so a sû na gbe ti yingo ti lo.