Mwezi gwa 1

Yezu afulûla n’oburhwali boshi entanya mbi n’obulyalya bw’amadîni gahali omu mango gage. Kwa lwiganyo, ayerekana obulyalya bw’Abafarizeyi lugenda okukalaba enfune kone ahali hw’okushibirira ababusi babo. (Mt. 15:1-11) Yezu arhayemeraga ebijiro birhashinganini by’abakulu b’amadîni byamuhanza okuderha okuli. Kandi Yezu akagifulûla n’obwalagale enyigirizo z’obunywesi z’amadîni. Arhaderhaga oku amadîni goshi gaba gayemerirwe na Nnâmahanga. Lubero n’oko, aderha oku bantu banji bakabire bali omu muhango mugali guhêsire ebwa bushereze, na bantu basungunu bo bakabire bali omu muhango mufunda guhêsire ebwa buzine. (Mt. 7:13, 14) Ayerekana oku bantu baguma na baguma bakabonekine nk’abali bakolera Nnâmahanga, cikone okubalabiriza kwanayerekana oku barhali bamukolera. Arhuhaniza ntya: “Mumanye [muyake] abalêbi b’obunywesi, abammujaho nka bana-buzi, n’obwo omu murhima gwabo bali biryanyi. Mwabamanyire oku bijiro byabo.”​—Mt. 7:15-20. w21.05 buk. 9 cif. 7-8

Ana aliherusire omu mwa Mulawi muguma wakagihamagalwa Elkana, analimuzigire bwenene. Cikone Elkana agwerhe owundi mukazi wakagihamagalwa Penina. Elkana alizigire Ana bwenene kulusha Penina; cikone, “Penina aligwerhe abana, ci Ana yehe arhalibagwerhe.” Enyanya z’oko, Penina akaha Ana ebinioko lyo “amuyirha burhe.” Ana akaciyumva kubi bwenene! “Akalaka n’okulakûla, akaleka okulya.” Ciru akaba ntyo ntaco ciyerekine oku Ana akagicihola enyanya z’ebyo Penina akagimujirira. Lubero n’oko, akashenga Yehova n’omurhima goshi analiyemire n’obwalagale oku Yehova amurhabala. (1 Sam. 1:2, 6, 7, 10) Bici olwiganyo lwa Ana lurhuyigirizize? Erhi muntu mulebe akalonza okuba luhali enyanya zirhu omu njira nguma erhi omu yindi, oshinganine okengere oku muli ako kanga hali ebi wakajira. Orhashinganini ocilekerere kuhika muhikire aha mwaja omu kamashigwe na muntu mulebe. Ahali h’okugalulira omuntu obubi oku bundi, ocihangane okujira omurhula haguma n’oyo muntu. (Rm. 12:17-21) Erhi akaba oyo muntu arhalonzizi okujira omurhula, wehe wanagendekera waba n’omurhula gw’ekandalala. w21.07 buk. 17 cif. 13-14

Irala ly’okuba na binji lyarhuma Yuda Iskarioti aba mulenzi nkununu. Arhali ntyo kw’aliyosire aha murhondêro. (Lk. 6:13, 16) Yezu acishogaga ye nka ntumwa yage. Yuda agwerhe obuhashe anali wakulangalirwa, co carhumaga bamuha omukolo gw’okubika enshoho bakagibikiramw’ensaranga. Yezu n’entumwa, bakagikolesa ezo nsaranga lyo bahikiriza amalagirire gabo g’omu mukolo gw’amahubiri. Rhwanaderha oku ezo nsaranga ko zali nka bula burhabale rhuhâna ene lugenda omukolo gw’omw’igulu lyoshi. Cikone mango maguma, Yuda arhondera azimba ciru akaba akagiyumva Yezu ali arhonda abantu ngasi mango okubiyerekire irala ly’okuba na binji. (Mk. 7:22, 23; Lk. 11:39) Irala lya Yuda ly’okuba na bintu binji lyarhondera okubonekana hisanzi hisungunu embere bayirhe Yezu. Yezu n’abanafunzi bage, na Mariya na Marta, bali balalike omu mwa Simoni mushomyo. Erhi bali oku cîbo, Mariya ayimuka abulagira okw’irhwe lya Yezu amavurha g’amalashi ga ngulo ndarhi bwenene. Yuda n’abandi banafunzi bagaya bwenene. Nkaba abandi banafunzi bakarhanya oku kwakabire kwinja bakolese ezo nsaranga zagulaga ago mavurha omu mukolo gw’amahubiri. Cikone arhali ntyo ko Yuda yehe akagirhanya. “Câli cishambo,” ananalilonzize azimbe oku nsaranga zâli omu nshoho.​—Yn. 12:2-6; Mt. 26:6-16; Lk. 22:3-6. w21.06 buk. 18 cif. 12-13

Ka hali amango obona ogwerhe mikolo minji yakujira na ntyo ociyumve oku orhakahashiyihikiriza yoshi? Akaba okola ociyumvirhe ntyo, wahugûkwa oku Paolo naye aciyumvagya. Akagirhanya bwenene oku malagirire, arhali ga cigamba ciguma cone, ci ga “bigamba byoshi.” (2 Kr. 11:23-28, NWT) K’oba olwazire endwala erhafuma na ntyo yakubulisize omwishingo? Paolo agwerhe “akababo omu mubiri,” nkaba yâli ndwala alilwazire, ananalilonzize ayifume. (2 Kr. 12:7-10) K’amagosa gawe ganahikire aha gakuvuna omurhima? Hali amango Paolo naye akagiciyumva ntyo. Acihamagire oku ali “mulume wa busha” bulya ngasi mango akajira okwage koshi ly’alwisa obuzamba bwage. (Rm. 7:21-24, NWT) Paolo agendekera ajira omukolo gwa Yehova, ciru akaba akagilwisa mazibu manji n’akanga k’okumuvuna omurhima. Bici byakagimuha emisi y’okujira ntyo? Ciru ankaba alimanyire oku arhali mwimana, agwerhe obuyemere omu ngombôlo. w21.04 buk. 22 cif. 7-8

Erhi Adamu mulume mwimana ajira ecaha, aheza obulyo bw’okulama ensiku n’amango, ciru n’abana bage barhakacibire nabo. Adamu arhakababalirwe kw’ebyo ajiraga. Yene wacishogaga okujira eco caha. Cikoki gurhi byakaberire abana bage? Barhaliho erhi Adamu ajira ecaha. (Rm. 5:12, 14) Ka hali ebyakacijijirwe lyo abo bana barhenga mw’obo buhane b’olufû bwalerhagwa n’eco caha ca bashakuluza wabo? Neci! Kasanzi kasungunu enyuma za Adamu okujira ecaha, Yehova arhôla emihigo okubiyerekire oku emiliyoni y’iburha lya Adamu yakarhenzibwemwo omu bujà bw’ecaha n’olufû. (Murh. 3:15) Kugerera engombôlo, rhwanaba n’obwîra bwa hofi-hofi haguma na Yehova ciru akaba rhurhali bimana. Kandi kugerera engombôlo, emikolo yoshi ya Ibilisi yayishihererekezibwa. (1 Yn. 3:8) Na kandi kugerera engombôlo, omuhigo Nnâmahanga agwerhe aha murhondero okubiyerekire igulu gwayishihikirizibwa. Igulu lyoshi lyayish’iba paradizo. w21.04 buk. 14 cif. 1; buk. 19 cif. 17

Ecigusho cinene c’abantu, balume n’abakazi, b’omu bihugo binji bakag’iderha ndimi nyinji ziri lubero, bàli oku ntimanano. Hali akantu k’okusomeza kajirikine olo lusiku. Cigusho ciguma c’Abayahudi bakagibonekana bantu ba ntya-ntya kone babà n’obuhashe bw’okuderha olulimi lw’akaburhano lw’abantu bali balambagirire! Ebi abo Bayahudi babwiraga abo bantu n’ebi Petro abwiraga abantu boshi byo byali bya kusomeza bwenene. Ebyo babwiragwa byalim’omwanzi guyerekine oku lyo bacunguka kuli kwa bulagirire babe n’obuyemere muli Yezu Kristu. Ogo mwanzi gwahika bwenene oku murhima gw’abo bantu. Abo bantu bahûmwa oku murhima bwenene, bahikira aha badosa ntya: “Kurhi rhukwanine rhujire?” Omu kushuza Petro, aderha ntya: “Ngasi muguma winyu abatizibwe.” (Ebj. 2:37, 38, Mashi Bible) Ebyabire enyuma z’aho byasomezanya bwenene. Olo lusiku bantu hofi 3 000 babatizibwa, babà banafunzi ba Kristu. Ogo gwali murhondero gw’omukolo munji gw’okujira abanafunzi Yezu ahâga abanafunzi bage oku bajire. Ogo mukolo gugendekire kuhika ene. w21.06 buk. 2 cif. 1-2

Nkaba rhuba rhulamire omu eneo ebamw’amazibu g’okurhondeza amafunzo. Bantu baguma baguma barhasimisibwa n’omwanzi gwirhu erhi ciru nkaba banakaguhagalika. Bici byakarhurhabala rhube n’entanya njinja omu eneo ya ntyo? Okengere oku mw’er’igulu libi rhulamiremo ene, akanga k’abantu kanahikira aha kashanja na balya barhakag’ishagalukira ebi rhwakag’ibayigiriza banahikira aha bahugûkwa amalagirire gabo g’ekiroho. (Mt. 5:3) Abakag’ilahira ebitabu birhu embere, bahikire aha bayemera ifunzo ly’Ebibliya. Na kandi rhumanyire oku Yehova ye Nn’emyaka (erhi Nnawabo w’ebisarulwa). (Mt. 9:38) Aba alonzize rhugendekere rhwarhwera n’okubômbêza, cikone yene ye meza emburho. Na kandi, rhwanahâbwa omurhima bwenene omu kukengera oku, ciru akaba nt’ifunzo ly’Ebibliya rhuli rhwalongoza mwa zino nsiku, Yehova anarhuhemba kugerera obushiru bwirhu ci arhali kugerera amafunzo rhuli rhwalongoza! w21.07 buk. 6 cif. 14

Yehova ahîre bene bantu obuhashe bw’okuburha abana, anabaha omukolo gw’okubayigiriza bazigire Yehova n’okumukolera. Ciru akaba bamalahika bagishirwe na Yehova, barhahâbagwa olo lukengwa. Omu kurhanya kuli oko, balya bali balera abana bashinganine bashagalukire olwo lukengwa bahâbirwe lw’okubalera. Ababusi bahâbirwe omuhako, mukolo gwabulagirire gw’okulera abana babo omu ‘kubahana bulya buhane burhenzire emwa Nyakasane [Yehova, NWT].’ (Ef. 6:4, Mashi Bible; Lush. 6:5-7) Ikubuliro lya Yehova lyarheganyize bikolanwa binji biyimangire oku Bibliya lyo lirhabala ababusi, kwa lwiganyo, ebicapo, amavideo, emiziki, n’ebindi biba oku Enternete. Kobinali, Larha wirhu w’omu mpingu n’Omugala banazigire emisole yirhu. (Lk. 18:15-17) Yehova anashagaluke bwenene, erhi ababusi bakamulangalira n’okujira okwabo koshi lyo bashibirira abana babo. N’abo babusi banahe abana babo obulyo b’okuyishiba cigabi c’omulala gwa Yehova ensiku n’amango! w21.08 buk. 5 cif. 9

Bantu baguma baguma banarhanye oku okuba n’obuyemere kuli kuyemera kantu kalebe buzira ebyakarhuma wakayemera. Cikone nk’oku Ebibliya edesire, obo burhali buyemere bw’okunali. Ohugûkwe oku obuyemere omu bintu birhabonekana, kwa lwiganyo nka Yehova, Yezu, n’Obwami bw’empingu, buba buyimangire oku bintu byakayemeza omuntu n’obwalagale. (Hb. 11:3) Muhamirizi muguma wa Yehova wasomire eby’esiyanse aderha n’obwalagale ntya: “Obuyemere bwirhu bujira ebi buba buyimangireko, rhurhalahira ebintu by’okuli esiyanse eyigiriza.” Rhwanacidosagya ntya: ‘Erhi akaba haba ebintu byakayemeza omuntu n’obwalagale oku haba Omulemi, bulya gurhi bantu banji baderha oku arhali Nnâmahanga ye walemaga obuzine?’ Baguma na baguma ba mulibo barhasagijira obusagasi lyo bacibonera bone ebintu byakabayemeza. Robert, okola oba Mahamirizi wa Yehova, adesire ntya: “Bulya barhayigiriza enyanya z’obulemi emasomo, oko kwakarhuma narhanya mpu eby’obulemi birhaba by’okuli. Erhi ngwerhe myaka 20 na kulusha, nayumva enderho nyinja z’omu Bibliya z’okunali na zakuyemeza ziyerekire obulemi.” w21.08 buk. 15 cif. 4-5

Rhwanaciyigiriza kantu kalebe okubiyerekire obwinja bwa Yehova omu kusoma Ebibliya n’omu kuyumvirhiza abandi bali baganirira emigisho babwine. Cikoki, rhwanahugûkwa bwinja obwinja bwa Yehova omu ‘kulabula’ rhwene kunganaci aba mwinja. Rhurhanye rhube erhi rhulonzize okujira mukolo mulebe gw’akasanzi koshi, cikoki lyo rhuhikira ogo muhigo, bihûnyire rhulame akalamo karhahûnyiri binji. Rhwasomire eciragane ca Yezu ciyerekine oku erhi rhwakashokoza Obwami, Yehova anarhuyushulira ebindi byoshi, cikoki, rhurhazagicibonera oku eco ciragane cahikirira kuli rhwe rhwene. (Mt. 6:33) Ciru akaba ntyo, enyanya z’obuyemere rhugwerhe muli eco ciragane ca Yezu, rhwanahikira aha rhwanyihya ebi rhwalikomire okugula, rhujire empindûlo ndebe okubiyerekire eprograme y’akasi kirhu n’okujira binji omu mukolo gw’amahubiri. Omu kujira ntyo, rhwanacibonera rhwene gurhi Yehova arhuyushulira ebi rhulagirireko. Muli eyo njira erhi rhuli ‘rhwalabula’ lyo rhubona oku Yehova aba mwinja. w21.08 buk. 26 cif. 2

Ka rhuli rhwabona amazibu gashushine n’ago ene? Neci. Bakulu banji b’amadîni bajira enkomêdu y’okuyegereza omu makanisa gabo abantu bagale, abalengerire bala igulu libona nka bo benge. Abo bakulu b’amadîni banajire ntyo ciru akaba olugenzi n’akalamo k’oyo muntu birhapatine n’amakanuni ga Nnâmahanga. Abo bakulu b’amadîni banashombe n’okugayaguza abakozi ba Yehova bulya olugenzi lwabo bohe luba lucîre na kandi bulya barhayemera bahêka nk’oku er’igulu lidwirhe. Nk’oku Paolo aderhaga, Nyamuzinda acîshozire hirya “bagayaguza.” (1 Kr. 1:26-29) Yehova yehe anabone abakozi bage bishwekerezi oku boshi bali ba bulagirire. Gurhi rhwakayakamwo akantu kakarhuma rhwasarhala? (Mt. 11:25, 26) Orhakagishumibwa n’oku igulu libona abakozi ba Nnâmahanga. Ohugûkwe oku bantu birhohye bone Yehova akolesa lyo bajira obulonza bwage. (Enna. 138:6) Na buzinda orhanye kw’ebi Yehova amakahikiriza omu kukolesa abantu igulu libona bahwinja erhi barhasomaga. w21.05 buk. 8 cif. 1; buk. 9 cif. 5-6

Entumwa Paulo yavuzire omunkwa oku burhabale ahabagwa. Bulya ali mwirhohye, ayemera oburhabale bwa bene wabo na bali babo. (Fl. 2:19-22) Mwe mukola bashosi, mwanayerekana oku muli ba kuvuga omunkwa lugenda emisole omu cigamba cinyu omu njira nyinji. Erhi bakalonza okukurhabala oku transporo, okuj’igula ebintu, erhi oku gandi malagirire g’omubiri, oyemere oburhabale bwabo n’omurhima goshi. Obone oburhabale bwa ntyo oku buli buzigire kurhenga emwa Yehova. Nkaba wanasomerwa n’obwira wakahikira aha wajira haguma nabo. Ensiku zoshi, ocihangane okurhabala bene winyu na bali binyu baciri misole bakule kiroho, onanakababwira kunganaci oshagalusire okubona bali bacihangana okujira mikolo minji omu cigamba. Na kandi, okacihiriraho akasanzi k’okubaganirira ebi wacibwinîre omu kalamo kawe. Erhi wakajira ntyo, wanayerekana oku ‘ovuzire [Yehova] omunkwa’ enyanya z’emisole akulwire omu cigamba.​—Kl. 3:15; Yn. 6:44; 1 Ts. 5:18. w21.09 buk. 11-12 cif. 12-13

Yehova anazigire bene wirhu na bali birhu. Cikone, ensiku zoshi kurhaba kulembu okuzigira bene wirhu na bali birhu b’omu mulala gw’ekiroho n’okubayeresa obuzigire. Kobinali, rhurhenzire omu nkomedu ziri lubero, rhwanakuliraga ahantu hali lubero. Kandi, rhweshi rhunajire amagosa gakagayisa abandi n’okubavuna omurhima. Ciru akaba ntyo, rhwanacihangana lyo rhuzibuhya obuzigire b’omulala gwirhu gw’ekiroho. Gurhi rhwakajiramwo ntyo? Omu kuyeresa bene wirhu na bali birhu obuzigire nk’oku Yehova ajira. (Ef. 5:1, 2; 1 Yn. 4:19) Omuntu w’olukogo analonze gurhi akarhabala n’okurhuliriza. Oku Yezu akagijirira abantu kwakagiyerekana oku Yehova anabashibirire. (Yn. 5:19) Mango maguma, erhi Yezu abona ehitu hy’abantu, “abayumviza obwonjo, bulya bali bangongôle kw’oluhu n’okukwebwa eyi n’eyi nka bibuzi birhagwerhi mungere.” (Mt. 9:36, NWT) Yezu arhayumvizagya abantu obwonjo kone, cikone ajira akandi kantu ly’abarhabala. Afumya abalwala anarhuliriza abali ‘bababire n’okuzidohirwa.’​—Mt. 11:28-30; 14:14. w21.09 buk. 22 cif. 10-11

Yehova asima okuyerekana olukogo. Entumwa Paolo yalongozibagwa n’iroho lya Nnâmahanga erhi eyandika oku Nyamuzinda aba “wa lukogo” lunji. Muli olo lwandiko, Paolo aganiriraga olukogo Nnâmahanga ayerekine omu kuha abakozi bage bashige amavurha barhal’ibimana obulangalire bw’okugendilama empingu. (Ef. 2:4-7) Cikone olukogo lwa Yehova luli lunji kurhaluka aho. Omuzihi w’olulanga Daudi, ayandika ntya: “Nyamubaho [Yehova, NWT] aba mwinja kuli boshi, nn’olukogo lwage luyerekera emikolo yage.” (Enna. 145:9, NWT) Bulya Yehova aba azigire abantu, anababere olukogo ngasi mango erhi akabona oku hali ecirumire c’okujira ntyo. Kulusha abandi bantu boshi, Yezu aba amanyire kungaci Yehova asima okuyerekana olukogo. Yehova n’Omugala bajijire myaka minji balamire haguma empingu kasanzi ka myaka minji bwenene embere Yezu arhacija hanw’igulu. (Mig. 8:30, 31) Omu njira nyinji Yezu acibwinire kunganaci Ishe ayereka bene bantu barhali bimana olukogo. (Enna. 78:37-42) Omu nyigirizo zage, Yezu akagisegeza kanji-kanji obo borhere bwinja bw’Ishe. w21.10 buk. 8-9 cif. 4-5

Yehova yenene ashuza er’isala n’izu linene lyarhengaga empingu, erhi alaganya oku akuza izino lyage. Yezu akuzize izino ly’Ishe kugerera omukolo gwage gw’amahubiri. (Yn. 17:26) Co cirhumire biyumvikine okubona Abakristu b’okuli banakashagalukira okukolesa izino lya Nnâmahanga n’okulimanyisa abandi bantu. Omu myaka igana mirhanzi K.K.K., kasanzi kasungu enyuma z’okurhondeza ecigamba c’Ecikristu, Yehova, ‘acishoga omu bapagani [bantu b’amashanja, NWT] omurhwe gw’okukombêra Izino lyage.’ (Ebj. 15:14) Abo Bakristu b’omu myaka igana mirhanzi bal’ishagalukire okukolesa izino lya Nnâmahanga n’okulimanyisa abandi bantu. Bakolesize izino lya Nnâmahanga omu mukolo gw’amahubiri n’erhi bayandika Ebibliya. Bayerekine n’obwalagale oku luli lubaga luhamagirwe okw’izino lya Nnâmahanga. (Ebj. 2:14, 21) Ko n’oko ene nalyo, Abahamirizi ba Yehovah luli lubaga luhamagirwe okw’izino lya Yehova. w21.10 buk. 20-21 cif. 8-10

Obuzigire bwishwekerezi bwa Nnâmahanga buli bw’ensiku n’amango. Eci cigabi c’obulagirire c’obuzigire bwishwekerezi ciganirirwe kali 26 omu Ennanga 136. Omu mulongo gwa burhanzi, rhusomiremo ntya: “Muvuge Yehova omunkwa, bulyala aba mwinja; obuzigire bwage bwishwekerezi buli bw’ensiku n’amango.” (Enna. 136:1, NWT) Omu mulongo gwa 2 kuhika 26, ekorasi edesire ntya: “Bulya obuzigire bwishwekerezi bwage buli bw’ensiku n’amango.” Omu kusoma olo lulanga, rhwanasomerwa bwenene n’enjira nyinji Yehova ayerekamwo abakozi bage obuzigire bwishwekerezi buzira kuleka. Ekorasi edesire: “Bulya obuzigire bwage bwishwekerezi buli bw’ensiku n’amango,” erhuyemezize n’obwalagale oku obuzigire Nnâmahanga ayeresa abakozi bage burhankahwa. Oko kurhuhire omurhima bwenene okumanya oku Yehova arhakaleka okuzigira abakozi bage! Lubero n’oko, aba acishwekerire kuli bala bamukolera arhakanabalekerera, ci bwenene omu kasanzi k’amazibu. Okumanya oku Yehova arhakarhulekerera ciru n’ehitya kunarhuhe omwishingo n’emisi rhulagirireko lyo rhulwisa amazibu rhulimo na ntyo rhugendekere rhwalambagira omu njira ehêsire ebwa buzine.​—Enna. 31:7. w21.11 buk. 4 cif. 9-10

Ka hali amango ociyumva kubi erhi orhanya lugenda ebintu byajirikana biri embere zirhu, kwa lwiganyo nk’okusherezibwa kw’idîni ly’obunywesi, Gogi w’omu cihugo ca Magogi okurhera abakozi ba Nnâmahanga n’ivita lya Armagedoni? K’onahikire aha wacidosa ntya: ‘Amango ebintu by’okuyobohya byanahike, ka nanabe n’obuhashe bw’okubigeramwo n’obwishwekerezi?’ Erhi akaba ojira entanya za ntyo, enderho Yezu aderhaga ziri omu lwandiko lw’olusiku lw’ene, zanakurhabala bwenene. Yezu abwira abanafunzi bage ntya: “Mumanye murhahangalalaga emirhima. Muyemere Nnâmahanga.” Obuyemere busêzire bwayishikurhabala okulembera ebyo byayisha. Rhwanaseza obuyemere bwirhu buhashilembera amazibu gayisha omu kulola gurhi rhulwisa amarhungulo rhurhimanana nago muli gano mango. Kandi rhwanaciyigiriza omu njira zihi rhushinganine rhuseze obuyemere bwirhu. Ngasi mango erhi rhulembera amarhangulo, obuyemere bwirhu bunasêre. Oko kwanarhurhabala rhulembere amarhangulo g’amango gayisha. w21.11 buk. 20 cif. 1-2

Entumwa Paolo yaha Timoteyo omurhima oku ahikirize bwinja omukolo gwage, n’er’ihano liyerekire Abakristu boshi. (2 Tm. 4:5) Binahûne babe n’oburhwali. Kwa lwiganyo, orhanye oku biyerekire bene wirhu balamire omu bihugo omukolo gwirhu guhanzibwemo. Abantu ba Yehova bali balwisa mazibu manji ene gakabavuna omurhima. Kwa lwiganyo, bene wirhu banji bali bageza nsa nyinji omu mikolo yabo lyo bahikiriza amalagirire g’emilala yabo. Bajira irala ly’okujira binji omu mukolo gw’amahubiri, cikone erhi bahika oku buzinda b’omugobe banayumve barhamire bwenene. Abandi endwala n’obushosi birhacibayemerera bajira binji omu mukolo gw’amahubiri, ciru na baguma mulibo barhacirhenga aha mwababwe. Ciru rhwakaba rhuli omu kanga kahi, Yehova anarhuha emisi rhulagirireko lyo rhulwisa amazibu girhu, na ntyo rhugendekere rhwamukolera nk’oku rhwakanahasha lugenda akanga rhulimo. w21.05 buk. 20 cif. 1-3

Mango maguma na maguma abirhu banafunzi, abirhu banyakazi, bene wirhu b’omu mulala barhali Bahamirizi ba Yehova, n’abandi bantu banarhuseza oku rhuje omu mikolo epingine n’oku Yehova alonza rhumuharamye. Erhi bajira ntyo, hali omuhigo g’obulagirire rhushinganine rhurhôle. Olole akanuni k’obulagirire kali omu lwandiko lwa Bene-Levi 19:19, kalimo ecigabi cidesire ntya: “Orhanahîraga wayambala omwambalo gwajiragwa na nusi [nyuzi] ibirhi zirhali za bûko buguma.” Er’irhegeko lyakagirhabala okuhiraho olubero egarhi k’aba Israheli n’abantu b’agandi mashanja gali bazungulusire. Ene, rhurhakalahira okuyambala emishangi erimo ekoto, epoliestere n’ebindi n’ebindi. Cikone rhunayake okujira ebintu biri nk’eby’abantu baba bayemire n’okujira ebijiro bipingine n’enyigirizo z’Ebibliya. Kobinali, rhujira obuzigire bw’akaburhano oku bantu b’omu mulala gwirhu, rhunaba rhuzigire abalungu birhu. Cikone, okubiyerekire ebintu by’obulagirire by’omu kalamo, rhwe nka bakozi ba Yehova rhuba babidu okuba lubero n’abandi bantu. Oko kuli kwa bulagirire erhi akaba rhuli rhwajira okwirhu koshi lyo rhuba batagatifu.​—2 Kr. 6:14-16; 1 Pt. 4:3, 4. w21.12 buk. 5 cif. 14; buk. 6 cif. 16

Byanahashikana okubona eyo njira. Yezu adesire ntya: “Mukasêra oku binwa byani, mwaba baganda bani b’okunali; mwamanya okuli, n’okuli kwammurhenza omu buja.” (Yn. 8:31, 32) Oli wakuvugwa omunkwa okubona orhashimbaga nk’oku bantu banji bali bajira; cikone walonza okuli. Warhondera okuyiga Akanwa ka Nnâmahanga ly’oyiga ebi arhuhûnyire rhujire, wanayumvirhiza enyigirizo za Yezu. Wayiga oku Nnâmahanga alonzize rhuleke enyigirizo z’idîni ly’obunywesi n’oku rhuleke okukajira amadinye g’ensiku nkulu z’ecipagani. Kandi wayizire oku okujira ebi Yehova alonzize rhujire n’okuleka enkomêdu arhaba ayemire nkaba kwanaba nka kuzibu. (Mt. 10:34-36) Nkaba kurhali kulembu kuli we okujira empindûlo zishinganine. Cikone, wacihangana bulya ozigire Sho w’omu mpingu. Kobinali akushagalukire!​—Mig. 27:11. w21.12 buk. 22 cif. 3; buk. 23 cif. 5

Musa luli lwiganyo lwinja lw’omuntu wayemire okuhanûlwa enyuma z’okujira amagosa mazibu. Mango maguma agaya bwenene n’oko kwarhuma arhaha Yehova irenge. Enyanya z’oko, Musa aheza olukengwa lw’okuja omu Cihugo c’Amalaganyo. (Mib. 20:1-13) Erhi Musa ayerekana oku avunisire omurhima enyanya z’ogo muhigo, Yehova amubwira ntya: “Orhacimbwiraga olwo!” (Lush. 3:23-27) Musa arhagayaga. Lubero n’oko, ayemera omuhigo gwa Yehova, na Yehova agendekera amukolesa omu kulongoza aba Israheli. (Lush. 4:1) Musa ali lwiganyo lwinja rhushinganine rhuyige lugenda okuyemera amahano. Musa ayerekana oku ayemire ihano lya Yehova omu kugendekera abêra mwishwekerezi ciru n’enyuma z’okuheza olukengwa lw’obulagirire. Rhunayunguke bwenene erhi rhuyiga olwiganyo abalume bishwekerezi bali aka Ayubu na Musa balesire. (Mig. 4:11-13) Bene wirhu na bali birhu banji bajijire ntyo. w22.02 buk. 11 cif. 9-10

Omu mwaka gwa 32 K.K.K., Lazaro mwîra wa Yezu alwala bwenene na buzinda afâ. (Yn. 11:3, 14) Lazaro agwerhe bali babo babirhi, Mariya na Marta, na Yezu al’izigire ogo mulala bwenene. Erhi Marta ayumva oku Yezu ayishire, alibirha ajimulingira omu njira. Orhanye cifufu cinganaci agwerhe erhi aderha ntya: “Ocibâga hano, mushinja wani arhankafîre.” (Yn. 11:21, 32, 33) Yezu alakaga erhi abona gurhi Mariya na Marta bali burhe enyanya z’okufîrwa na mushinja wabo. Akaba wafîrirwe n’omuzigirwa wawe, Yehova anahugûkwe oku ociyumva. Yezu aba “nshusho” y’Ishe. (Hb. 1:3) Erhi Yezu alaka, ayerekana entanya z’Ishe. (Yn. 14:9) Erhi akaba oli walembera amalumwa g’okufîrwa n’omuzigirwa wawe, wanayemera n’obwalagale oku Yehova arhahugûsirwe amalumwa oli wayumva gone cikone naye ali aciyumva kubi. Alonzize okubuka omurhima gwawe guvunisire.​—Enna. 34:18; 147:3. w22.01 buk. 15-16 cif. 5-7

Wanayunguka bwenene erhi wakaciha akasanzi k’okuganiza Yehova, okumuyumvirhiza, n’okurhanya okubimuyerekire. Burhangiriza, wanakarhôla emihigo minja. Ebibliya erhubwizire n’obwalagale oku “okômerana n’ow’obumanye naye anabe wundi.” (Mig. 13:20, Mashi Bible) Bwa kabirhi, wanaba mwalimu mwinja. Nka rhuli rhwayigiriza muntu mulebe Ebibliya, omuhigo gwirhu g’obulagirire kuba kurhabala omwanafunzi wirhu ayegere Yehova. Oku rhugendekera rhwaganiza Larha wirhu w’omu mpingu, ko n’obuzigire bwirhu kuli ye buyushuka ko rhwakanashinganana okuyigiriza omwanafunzi wirhu lyo naye amuzigira. Ko n’oko ko byali kuli Yezu. Akagikolesa enderho nyinja na za buzigire omu kuganira lugenda Ishe n’oko kwarhumire abanafunzi bage bishwekerezi nabo bazigira Yehova. (Yn. 17:25, 26) Bwa kasharhu, obuyemere bwawe bwanasêra bwenene. Orhanye gurhi biba erhi oshenga Nnâmahanga oku akulongoze, akurhulirize erhi akurhabale. Ngasi mango erhi Yehova ashuza kuli ago masala obuyemere bwawe bunasêre.​—1 Yn. 5:15. w22.01 buk. 30 cif. 15-17

Yehova arhuhûnyire oku rhuyake entanya n’enkomêdu mbi, bulya aba arhuzigire bwenene anaba alonzize rhushagalukire akalamo. (Iz. 48:17, 18) Aba amanyire oku abarhajira okwabo koshi lyo balwisa irala libi, banacilerhere amazibu, n’okugalerhera abandi. Erhi rhucilerhera amazibu n’okugalerhera abandi, anaciyumve kubi. Oku murhondero, bîra birhu baguma na baguma n’abantu b’omu mulala gwirhu banarhushekera amango rhuli rhwalonza okujira empindûlo omu bumuntu bwirhu. (1 Pt. 4:3, 4) Nkaba banarhubwira oku rhugwerhe oluhuma lw’okujira ebi rhulonzize n’oku rhurhashinganini rhuleke abandi bakarhubwira ebi rhwajira. Cikone, abalahira amakanuni ga Yehova barhajira luhuma. Kobinali, banabe bali baleka igulu lya Shetani libabumbe. (Rm. 12:1, 2) Rhweshi rhushinganine rhurhôle omuhigo: Erhi rhwagendekera rhwabêrana obumuntu bwirhu bwa mîra bubumbwa n’ecaha n’igulu lya Shetani, erhi rhwaleka Yehova arhubumbemo omuntu mwinja rhushinganine rhube ene.​—Iz. 64:8. w22.03 buk. 3 cif. 6-7

Okurhanya oku Kanwa ka Nnâmahanga kwanarhurhabala rhube n’entanya nyinja ciru ankaba rhuli omu kanga kahi. Olabe gurhi Ebibliya yarhabire mwali wirhu muguma wafîragwa n’iba. Mugula muguma amuhanûla oku anakasoma ecitabu ca Ayubu lyo cimuyigiriza masomo manji. Erhi ali acisoma, arhonderha okuderha Ayubu kubi, okubiyerekire entanya zirhashinganini agwerhe. Erhi aba ali arhanya omu bwenge bwage kw’ebi ali asoma, akabwira Ayubu ntya: “Ayubu! Oleke okuba n’ezo ntanya zirhashinganini lugenda amazibu gawe!” Cikone ahikira aha ahugûkwa oku entanya zage kozaliyosire nk’eza Ayubu. Oko kwamurhabala akubûla entanya zage na kandi kwamuha emisi y’okulembera amazibu gw’okufîrwa n’iba. Eyindi njira Yehova akolesa ly’aha Abakristu emisi, eba kugerera abirhu Bakristu. Paolo aderha oku akagicifinja okubona bene wabo na bali babo b’ekiroho lyo ‘babona oku bakahânana omurhima.’​—Rm. 1:11, 12. w21.05 buk. 22 cif. 10-11; buk. 24 cif. 12

Abaisraheli ba mîra bal’ibwizirwe ntya: “Kasharhu omu mwaka, ngasi bûko mulume onali emwawe, ayishiciyerekana omu masu ga Nyamubaho, Nyamuzinda wawe, halya hantu Nyakasane [Yehova, NWT] anacishozire.” (Lush. 16:16) Bakag’isiga enyumpa zabo n’amashwa gabo buzira muntu w’okubilanga. Cikone Yehova al’ibalaganyize ntya: “Ntaye ciru n’omuguma waderhe mpu ayagalwa n’ecihugo cawe amango warherema, ogendilola obusu bwa Nyakasane [Yehova, NWT], Nyamuzinda wawe.” (Lub. 34:24) Bulya Abaisraheli bal’ilangalire Yehova loshi-loshi, bakagija kw’ago madinye ga ngasi mwaka. Oko kwakagibalerhera bunguke bunji, kwa lwiganyo, bakag’ihugûkwa bwinja Irhegeko lya Nnâmahanga, bakag’irhanya oku bwinja bwage, n’okushagalukira okuba haguma n’ababo bemezi. Na nirhu rhunabe n’obunguke bwa ntyo erhi rhuleka bintu bilebe lyo rhuja oku ntimanano z’Ecikristu. Orhanye gurhi Yehova ashagaluka erhi rhuja oku ntimanano rhwanarheganyize amashuzo mofofi na ga kuyubaka. w22.03 buk. 21 cif. 9

Yehova akagikomereza Yezu oku mukolo gw’okuba Mudahwa Mukulu akahabirwe enyuma z’aho. Yezu abwine kunganaci biba bizibu okurhumikira Nnâmahanga amango omuntu ali omu malibuko. Amalumwa ageragamwo gamushumya ahune oburhabale “omu kuyama bwenene n’omu kurhoza emirenge.” Kobinali amazibu n’amalumwa Yezu ageziremo, garhumire ahugûkwa bwinja amalagirire girhu, ‘anahash’irhurhabala,’ amango rhuli “omu malibuko.” Rhuvuzire Yehova omunkwa bwenene okubona acishozire oyo Mudahwa Mukulu ‘wakarhuyumviza olukogo lw’obuzamba bwirhu’! (Hb. 2:17; 4:14-16; 5:7-10) Yehova alekaga Omugala alibuke ntyo, ly’ashuza okw’idoso ly’obulagirire: Ka byanahashikana omuntu abêre mwishwekerezi kuli Nnâmahanga ciru akaba ali omu marhangulo? Shetani yehe alahire! Adesire oku bene bantu banakolere Nnâmahanga bulya abahire ecituliro n’oku barhakabêra bishwekerezi kuli Yehova. (Ayu. 1:9-11; 2:4, 5) Yezu abêra mwishwekerezi ciru akaba ago marhangulo na ntyo ayerekana oku Shetani ali munywesi. w21.04 buk. 17 cif. 7-8

Embere omwanafunzi w’Ebibliya abatizibwe, ashinganine akakolesa omu kalamo kage ebi Ebibliya eyigiriza. Erhi omwanafunzi wirhu akarhondera okukolesa ebi ali aciyigiriza, anaba nka “muntu muguma mwenge” Yezu aganiriraga wayubakiraga enyumpa yage oku lwala (ibuye). (Mt. 7:24, 25, Mashi Bible; Lk. 6:47, 48) Orhabale omwanafunzi wawe ajire empindûlo omu kalamo kage. (Mk. 10:17-22) Yezu alimanyire oku kwakabire kuzibu olya mulume mugale aguze ebirugu byage byoshi. (Mk. 10:23) Cikone, Yezu abwira oyo mulume oku ajire eyo mpindûlo erhali nyi omu kalamo kage. Bulya gurhi amubwiraga ntyo? Bulya Yezu alimuzigire. Hali amango rhubula kuha omwanafunzi omurhima gw’okukolesa ebi ali ayiga bulya rhunarhanye mpu arhacihikira amango akajira empindûlo zishinganine. (Kl. 3:9, 10) Cikoki, erhi wakaganira duba-duba n’obwalagale okubiyerekire empindûlo omwanafunzi akwanine ajire, ko n’omwanafunzi akarhondera ajira ezo mpindûlo duba-duba. Erhi wakakajira enganîro za ntyo haguma naye, oko kwanamuyereka oku oba omushibirire.​—Enna. 141:5; Mig. 27:17. w21.06 buk. 2 cif. 3, buk. 3 cif. 5

Entumwa Petro aganirire olwiganyo lwinja Yezu ayerekine lw’okulembera amalibuko; cikone hali ezindi njira nyinji rhwakayigamwo olwiganyo lwage. (1 Pt. 2:18-25) Kobinali, akalamo ka Yezu koshi, kw’okuderha, ngasi kantu adesire na ngasi kantu ajijire, luli lwiganyo arhulekire oku rhushimbe. Ka byanahashikana kobinali rhuli bene bantu barhali bimana, rhushimbe olwiganyo lwa Yezu? Neci, byanahashikana. Okengere oku Petro arhubwizire oku ‘rhushimbe enshando [za Yezu]’​​—cikone arhadesire oku rhujire ntyo n’obwimana. Erhi rhwakajira okwirhu koshi lyo rhushimba enshando za Yezu ciru akaba rhurhali bimana, rhwanahikiriza ezi nderho entumwa Yowane aderhaga: ‘Mube n’olugendo luli nk’olugendo [Yezu] âli agwerhe.’ (1 Yn. 2:6) Okushimba enshando za Yezu kwanarhurhabala rhuyegerere Yehova. Bici birhumire rhwaderha ntyo? Yezu ahânyire olwiganyo lwinja bwenene lw’oku omuntu akalama akalamo kashagalwire Nnâmahanga. (Yn. 8:29) Co cirhumire, erhi rhwakakulikira enshando za Yezu rhwanashagalusa Yehova. Kandi, rhwanayemera n’obwalagale oku Larha wirhu w’omu mpingu anayegerere balya boshi bajira okwabo koshi lyo babà bîra bage.​—Yk. 4:8. w21.04 buk. 3 cif. 4-6

Yehova anabone amorhere girhu minja; anabone obuhashe bwirhu, ananalonze rhube bîra bage. Erhi rhwakabêra bishwekerezi kuli ye, rhwanaba bira bage emyaka n’emyaka! (Yn. 6:44) Erhi rhwakayemera n’obwalagale oku Yehova aba arhuzigire n’oku anarhurhabale, oko kwanarhuma rhwamukolera n’omurhima goshi ciru akaba rhuli omu mzibu. Lubero n’oko, erhi rhwakaba n’akarhinda oku Nnâmahanga arharhushibirira, ‘obuzibu bwirhu bunali ntabwo.’ (Mig. 24:10) Na kandi, erhi rhwakavunika omurhima n’okurhondera kwarhanya oku Nnâmahanga arharhuzigira, rhurhakaciba n’obuhashe b’okuhagalika emirhego ya Shetani. (Ef. 6:16) Bene wirhu baguma baguma bishwekerezi ba muli gano mango girhu bakola babà bazamba omu kiroho enyanya z’akarhinda. Gurhigi rhwakajira erhi rhwakarhondera rhwarhanya ntyo? Rhushinganine rhuhagalike ezo ntanya ho n’aho! Ohûne Yehova akurhabale okule ezo “ntanya z’okulibuza” omu bwenge bwawe na ntyo ‘omurhûla gwa Nyamuzinda gwanalanga omurhima gwawe n’obukengere bwawe.’ (Enna. 139:23, NWT; amahugûlo g’idako; Fl. 4:6, 7) Na kandi okakengera oku orhali wene. w21.04 buk. 20 cif. 1; buk. 21 cif. 4-6

Gurhi wahikiragamwo aha waba Muhamirizi wa Yehova? Nkaba oburhanzi wayumvagya “omwanzi mwinja” waguyumvagya kugerera ababusi bawe, erhi abinyu mukola mweshi erhi binyu banafunzi, erhi kugerera amahubiri ga nyumpa oku yindi. (Mk. 13:10, NWT) Buzinda, muntu mulebe akolesa kasanzi kanji na misi minji ly’alongoza ifunzo ly’Ebibliya haguma na nawe. Kugerera er’ifunzo, wahikira aha wazigira Yehova wanayiga oku naye aba akuzigire. Yehova akukulula waja omu okuli, na buno, bulya oli mwanafunzi wa Yezu Kristu, ogwerhe obulangalire bw’okuyishilama ensiku n’amango. (Yn. 6:44) Buzira karhinda onavuge Yehova omunkwa okubona Ashumize muntu mulebe akuyigirize okuli n’okubona Akuyemire oku obe muguma w’abakozi bage. Obu rhukola rhumanyire okuli, rhugwerhe olukengwa lw’okurhabala abandi bacilunge haguma na nirhu omu njira ehesire ebwa buzine. Nkaba rhunabone oku kuli kulembu okuhubiri nyumba oku yindi, cikone nkaba rhunabone oku kuli kuzibu okurhondeza amafunzo g’Ebibliya n’okugalongoza. w21.07 buk. 2 cif. 1-2