Mwezi gwa 2

Yehova aba alonzize abakozi bage boshi babe n’omwishingo. Aba hofi na ngasi muguma wirhu, ananabone amango rhuli rhwaciyumva kubi enyanya z’entanya z’okurhuvuna omurhima. (Enna. 145:18, 19) Rhuganirire kunganaci Yehova ashibiriraga omulebi wage Eliya. Oyo mulume mwishwekerezi alilamire omu kasanzi kazibu k’ishanja ly’aba Israheli. Muli ako kasanzi abakozi ba Yehova balibuzibwa bwenene, na Eliya ye walishimbirwe bwenene n’abakulu bakagilonza okuhagalika Nnâmahanga. (1 Bam. 19:1, 2) N’okundi kwarhumaga Eliya aja aciyumva kubi, kuli kubona oku akagirhanya oku yene mulebi wa Yehova ocisigire. (1 Bam. 19:10) Ho n’aho Yehova ajira kantu kalebe ly’arhabala Eliya. Arhuma malahika ayereka oyo mulebi Wage n’obwalagale oku arhali yene waciri mulebi wa Yehova, haciri abandi ba Israheli bakagikolera Nnâmahanga n’obwishwekerezi! (1 Bam. 19:5, 18) Yezu abwira abanafunzi bage n’obwalagale oku babà n’omulala gw’ekiroho gw’omw’igulu lyoshi. (Mk. 10:29, 30) Na Yehova, Larha wirhu w’omu mpingu, alaganyize oku agendekera arhabala balya boshi balonzize okumukolera.​—Enna. 9:10. w21.06 buk. 8-9 cif. 3-4

Bantu banji banasarhale erhi enyigirizo zirhu ziyerekana n’obwalagale enyigirizo n’entanya z’obunywesi z’amadîni. Abakulu b’amadîni banakayigiriza abemêzi babo oku Nnâmahanga anahanire ba nyankola maligo omu muliro gw’ecihenama. Banakolese ezo nyigirizo z’obunywesi lyo barhegeka abantu nk’oku banalonzize. Abakozi ba Yehova baharamya Nnâmahanga w’obuzigire, banafulûle n’obwalagale ezo nyigirizo z’obunywesi. Kandi abakulu b’amadîni banayigirize oku iroho lirhafâ. Rhunayerekane n’obwalagale aha ezo nyigirizo z’ecipagani zarhondereraga, nk’ezo—nyigirizo zali z’okuli—obufûke bw’abafîre burhakacibire bwa bulagirire. Lubero n’enyigirizo z’amadîni manji gakaderha oku Nnâmahanga arheganyîze ngasi kantu karhuhikira embere, rhunayerekane oku omuntu ajira oluhûma l’okucishoga na kandi anacishoga okukolera Nnâmahanga. Gurhi abakulu b’amadîni bajira erhi bayumva rhuli rhwafulûla obunywesi bw’amadîni? Kanji-kanji, banagaye bwenene! Erhi akaba rhuba rhuzigire okuli, rhushinganine rhuyemere ebi Nnâmahanga adesire. (Yn. 8:45, 46) Lubero na Shetani Ibilisi, rhunasêre omu okuli. Nta mango rhwanalahire ebi rhuba rhuyemire. (Yn. 8:44) Nnâmahanga aba abwizire abakozi bage erhi: “Mushombe amabi, mucishwêkere oku minja,” nka kulya Yezu akagijira.—Rm. 12:9; Hb. 1:9. w21.05 buk. 10 cif. 10-11

Bici rhushinganine rhujire erhi rhwakabona oku rhwagwasirwe omu murhego g’obucibone erhi omu gw’irala ly’okuba na binji? Rhwanarhengamw’ogo murhego! Entumwa Paolo adesire oku balya ‘bagwasirwe mpira’ na Ibilisi banacirhenga omu murhego gwage. (2 Tm. 2:26, Mashi Bible) Orhakagiyibagira oku Yehova ajira misi minji kulusha Shetani. Co cirhumire erhi rhwakayemera oburhabale bwa Yehova, rhwanahash’irhenga omu ngasi mirhego yoshi ya Ibilisi. Ahali hw’okukahikira aha rhwarhenga omu mirhego ya Shetani, rhushinganine rhukayiyaka loshi-loshi. Rhwanahash’ijira ntyo kugerera oburhabale bwa Nnamahanga. Co cirhumire, okashenga Yehova ngasi lusiku akurhabale ly’omanya erhi ago morhere mabi gakola gali gashumya entanya n’ebijiro byawe. (Enna. 139:23, 24) Orhayemeraga ciru n’ehitya warhegekwa n’ago morhere! Hakola hali myaka minji Shetani ali ahiva. Cikone hano hofi-hofi ashwekwa na buzinda asherezibwe. (Maf. 20:1-3, 10) Rhuli rhwalindirira oku olo lusiku lwahika. Omu kulindirira oku olo lusiku lwahika, ogendekere wahugûkwa bwinja emirhego ya Shetani. Ojire okwawe koshi ly’obucibone n’irala ly’okuba na binji birhakurhegekaga. Ohige okugendekera ‘kwalwisa Shetani, wabona oku akuyakira kuli.’ w21.06 buk. 19 cif. 15-17

Yehova anashagaluke bwenene erhi omuntu ayemera okuli, n’amango arhondera okuganirira abandi ebi ali ayiga. (Mig. 23:15, 16) Ene Yehova ali acishinga bwenene erhi acibona ebi abakozi bage bali bahikiriza! Kwa lwiganyo, ciru akaba hali obu bulwala bw’okuyahukira omw’igulu lyoshi, omu mwaka gw’omukolo gwa 2020, rhwalongozize mafunzo g’Ebibliya 7 705 765, rhwarhabala bantu 241 994 bacihâna emwa Yehova n’okubatizibwa. Abo banafunzi bahyahya nabo bacibilongoza amafunzo g’Ebibliya n’okujira banafunzi banji kulusha. (Lk. 6:40) Buzira karhinda, rhunarhume Yehova aba n’omwishingo erhi rhujira abandi babe banafunzi. Omukolo gw’okujira abanafunzi guba mukolo muzibu, cikone kugerera oburhabale bwa Yehova, rhwanahash’ijira okwirhu koshi lyo rhuyigiriza abahyahya bahikire aha bazigira Larha wirhu w’omu mpingu. Ka rhwanacihirirah’omuhigo g’okurhondeza n’okulongoza ciru ifunzo liguma lyone ly’Ebibliya? Nkaba rhwasomerwa n’okubona ebi rhwahikirizize amango rhuli rhwakolesa ngasi bulyo rhugwerhe b’okurhondeza ifunzo ly’Ebibliya haguma na ngasi muntu rhurhimanine naye. Rhwanayemera n’obwalagale oku Yehova agisha obushiru bwirhu. w21.07 buk. 6-7 cif. 14-16

Mwami Daudi ahanyîre nsaranga nyinji na birugu binji bya ngulo ndarhi ly’alunga okuboko obubasi bw’ehekalu. (1 Nga. 22:11-16) Erhi akaba rhurhacigwerhi emisi y’okurhabala omu mikolo y’obubasi, rhwanahâna ensaranga rhwakanabona lyo rhulunga okuboko eyo mikolo. Na kandi, rhwanarhabala abaciri misole bayunguke n’obumanye rhukola rhugwerhe omu mukolo gwa Yehova. Okubiyerekire okuba muhânyi, rhurhanye oku lwiganyo lw’entumwa Paulo. Ahûna Timoteyo oku acilunge naye omu mukolo gw’obumisionere, na Paulo ayigiriza ogo musole enjira zage z’okuhubiri n’okuyigiriza. (Ebj. 16:1-3) Oko kukomereza Paulo akomerezagya Timoteyo kwamurhabala naye abe muhubiri mwinja w’omwanzi gw’Obwami. (1 Kr. 4:17) Timoteyo naye akolesa ezo njira Paulo amuyigirizagya ly’akomereza abandi. w21.09 buk. 12 cif. 14-15

Bici rhwakaciyigiriza kugerera olwiganyo lwa Apolo n’olwa Paolo? Abo balume bombi balimanyire bwinja Amandiko. Bombi bali bigiriza binja banalimanyikine. Na bombi barhabire bantu banji bahikira aha babà banafunzi. Cikone bombi nta muguma wakagiba luhali l’owabo. (Ebj. 18:24) Na ntyo, kasanzi kasungunu enyuma z’aho erhi Apolo arhenga e Korinti, Paolo amugukulira oku acibigaluka eyo munda. (1 Kr. 16:12) Apolo akolesa enshokano zage omu njira nyinja bwenene: kuyaliza omwanzi mwinja n’okuzibuhya bene wabo. Na kandi rhwanayemera n’obwalagale oku Apolo ali mwirhohye. Kwa lwiganyo, nta kantu koshi-koshi kayerekine oku agayire erhi Akila na Prisila “bamuzabûlira kwinja enjira ya Nyamuzinda.” (Ebj. 18:24-28) Entumwa Paolo yalimanyire bwinja-bwinja omukolo mwinja Apolo ahikirizize. Cikone arhayobohaga oku abantu babona nka Apolo ye omulushire. Obwirhohye, olugero, n’okuba n’entanya nyinja kwa Paolo kwabonekana kugerera amahano ahâga ecigamba c’e Korinti.​—1 Kr. 3:4-6. w21.07 buk. 18-19 cif. 15-17

Adamu na Eva bacishoga okurharhumikira Nnâmahanga, na ntyo oko kwarhuma abakaga omu mulala gwage. Cikone bicigi byahikire iburha lyabo? Enyanya z’obuzigire bwage, Yehova arhôla omuhigo gwakahashisa bana baguma na baguma bw’omu iburha lya Adamu bayemire okumurhumikira, bayishiba baguma bw’omu mulala gwage. Ajijire ntyo kugerera enterekêro y’Omugala cusha. (Yn. 3:16) Na ntyo kugerera enterekêro Yezu ahânaga, bantu 144 000 babezire bishwekerezi kuli Nnâmahanga bayemerirwe okuba bana balere ba Nyamuzinda. (Rm. 8:15-17; Maf. 14:1) Na kandi, emiliyoni y’abantu bishwekerezi, bali barhumikira n’okujira obulonza bwa Nnâmahanga. Bagwerhe obulangalire bw’okuyishiba baguma bw’omu mulala gwa Nnâmahanga loshi-loshi oku buzinda bw’amarhangulo mazinda gayishiba enyuma z’Emyaka Cihumbi y’Oburhegesi bwa Kristu. (Enna. 25:14; Rm. 8:20, 21) Ciru na muli gano mango banahamagala Yehova, Lulema wabo, “Larha.” (Mt. 6:9) Abanafûlwè nabo bayish’ihâbwa obulyo bw’okuyiga ebi Yehova alonzize bajire. Abayish’iyemera obulongozi bwage bayishihikira nabo aha babà baguma bw’omu mulala gwage. w21.08 buk. 5 cif. 10-11

Entumwa Paolo al’ihâbirwe omukolo gw’amahubiri, n’omu myaka minji, agendekire agubona oku kali kantu kaguma k’omu bintu byali bya bulagirire omu kalamo kage. Akag’ihubiri “embere z’abantu banji na nyumpa oku yindi.” (Ebj. 20:20) Na kandi, akag’ikolesa ngasi bulyo boshi agwerhe ly’ahubiri! Kwa lwiganyo, amango akag’ilindira ababo banyakazi e Atene, ahubiri ecigusho c’abantu balengerire, na baguma ba mulibo bayumvirhiza. (Ebj. 17:16, 17, 34) Ciru n’amango Paolo ali omu “mugozi,” akag’ihubiri abakag’imulambagirira. (Fl. 1:13, 14, Mashi Bible; Ebj. 28:16-24) Paolo akolesize bwinja akasanzi kage. Akag’ilalika abandi bagende haguma naye omu mahubiri. Kwa lwiganyo, omu mubalamo gwage murhanzi gw’obumisiyonere, agenda na Yowane wakag’ihamagalwa Marko; n’omu mubalamo gwa kabirhi, agenda na Timoteyo. (Ebj. 12:25; 16:1-4) Buzira karhinda, Paolo ajijire okwage koshi ly’ayigiriza abo balume gurhi bapanga ecigamba, gurhi bajira omukolo gw’okulambagirira ebibuzi, na gurhi bakabamwo balimu binja.​—1 Kr. 4:17. w22.03 buk. 27 cif. 5-6

Bantu baguma na baguma banaderhe oku barhakayemera oku haba Omulemi bulya barhakayemera ebi barhakahashibona. Cikone banayemere bintu biguma na biguma birhabonekana, kwa lwiganyo nk’emisi erhuma igulu lyakola bwinja (pesanteur), bulya hali ebintu biyerekana oku eyo misi eba y’okunali. Obuyemere buganirirwe omu Bibliya nabo buba buyimangire oku “bintu by’okunali birhabonekana.” (Hb. 11:1, NWT) Binahûne akasanzi n’obushiru lyo rhuciyigiriza rhwene ebintu byakarhuyemeza n’obwalagale oku haba Omulemi, na bantu banji barhajira obo bushiru b’okujira ntyo. Omuntu orhajira busagasi ly’abona ebirhumire byakamuyemeza oku haba Omulemi, anahikira aha aderha oku Nnâmahanga arhahaba. Enyuma z’okuyiga ebintu byakayemeza oku haba Omulemi, bantu baguma na baguma basomire esiyanse bahikire aha bayemera oku amalunga n’igulu byalemirwe. Oku murhonderho, badesire oku harhaba Omulemi mpu bulya ntamango bakola bayigirizize eby’obulemi oku université. Cikone, bahikire aha bamanya Yehova n’okumuzigira. Kuhikira buno, rhweshi rhushinganine rhuzibuhye obuyemere bwirhu omu Mulemi, rhube rhwasomire erhi rhurhasomaga. w21.08 buk. 14 cif. 1; buk. 16 cif. 6-7

Yezu akolesize olwiganyo lw’okurhuliriza lw’omwana mulalahi ly’arhurhabala rhuhugûkwe kunganaci Yehova asima okuyerekana olukogo. Oyo mwana arhenga ahamwabo “ashandaza ebirugu byage omu bulalahi.” (Lk. 15:13) Buzinda, aciyunjuza olo lugenzi lubi alikola agwerhe, acirhohya anagaluka emwabo. Gurhi ishe ajijire? Yezu adesire ntya: “Erhi aba aciri kuli, ishe amulangira, ayumva obwonjo bwamugwarha; anaciyisha ali bulibirha, amuyababira, amuhobera.” Oyo mushamuka arhabonesagya oyo mugala nshonyi. Lubero n’oko, amuyereka olukogo anamubabalira, buzinda acibimuyegereza omu mulala. Oyo mwana mulalahi agosize bwenene, cikone enyanya z’okuciyunjuza kwage kw’okunali, ishe amubabalira. Omubusi w’olukogo oganirirwe mw’olo lwiganyo ashushanyizibwe na Yehova. Mw’eyo njira ehûmire oku murhima, Yezu ayerekana okw’Ishe aba alonzize okubabalira abanyabyaha baciyunjuzize n’omurhima goshi.​—Lk. 15:17-24. w21.10 buk. 8 cif. 4; buk. 9 cif. 6

Ene, bakulu banji b’amadîni bajijire okwabo koshi lyo bafulika ebintu biyerekine oku Nnâmahanga ajira izino. Balikuzire omu mpindûlo z’Ebibliya bahindulaga omu zindi ndimi, banahanzize okukolesa er’izino omu makanisa gabo. Ka hali owakalahira oku arhali Abahamirizi ba Yehova bone baha izino lya Yehova obukenge n’irenge liba lishinganine? Kulusha ebindi bigusho byoshi by’amadîni, rhunamanyise abantu boshi izino lya Nnâmahanga! Co cirhumire rhunajire okwirhu koshi lyo rhushinganana okuhamagalwa okw’izino ly’Abahamirizi ba Yehova! (Iz. 43:10-12) Rhwacapisize kopi zilushire miliyoni 240 z’empindûlo y’Ebibliya ehamagalwa Biblia-Takatifu Tafsiri ya Ulimwengu Mupya, eba ekolesize izino lya Yehova ngasi hoshi libalikuzirwe omu zindi mpindûlo z’Ebibliya. Na kandi rhuli rhwacapisa ebitabu biyimangire oku Bibliya bimanyisa abandi izino lya Yehova omu ndimi 1 000 na kulusha! w21.10 buk. 20-21 cif. 9-10

Rhunahe Yehova enterekêro erhi rhurhabala abirhu Bakristu bali omu bulagirire. Yehova al’ilaganyize oku akahembire Abaisraheli bakag’iyereka abakenyi olukogo. (Lush. 15:10) Kobinali, ngasi mango erhi rhurhabala owirhu mwemezi oli omu bulagirire, Yehova anabone nka ngalo rhumuhire. (Mig. 19:17) Kwa lwiganyo, erhi Abakristu b’e Filipi barhumira Paolo engalo erhi ali omu mpamikwa, aderha oku eri “nterekero Nnâmahanga ayankirira anasimiswa nayo.” (Fl. 4:18) Orhanye oku bantu b’omu cigamba cinyu onacidose ntya: ‘Ka muli muntu mulebe nakarhabala?’ Yehova anashagaluke erhi abona rhwakolesa akasanzi kirhu, emisi yirhu, obuhashe bwirhu, n’ebirugu birhu lyo rhurhabala abali omu bulagirire. Yehova anabone ebyo oku ciri cigabi c’enterekêro yirhu. (Yk. 1:27) Enterekêro y’okuli eba ehûnyire akasanzi n’obushiru. Cikone gurhaba muzigo muzirho. (1 Yn. 5:3) Bulya gurhi? Bulya obuzigire rhujirako Yehova na bene wirhu na bali birhu bo burhushumya rhumuharamye. w22.03 buk. 24 cif. 14-15

Lyo rhuyereka bene wirhu na bali birhu olukogo, rhushinganine rhumanye amazibu bagwerhe. Kwa lwiganyo, mwali wirhu mulebe anaba alwazire endwala nzibu bwenene. Arhaciduduma enyanya z’eyo ndwala, cikoki nkaba anashagalukira okuhâbwa oburhabale. K’anashagaluka erhi rhwakamurhabala okudeka ebiryo erhi okucêsa enyumpa? Nkaba mwene wirhu mulebe ahêzize akazi. Ka kurhakaba kwinja okumuha olusaranga lwakamurhabala kuhika amango abona akandi kazi, buzira kucimanyisa oku we wamuhaga lo? Rhurhashinganini rhukalinda kuhika bene wirhu na bali birhu barhuhûne oburhabale lyo rhubayereka oku rhuli ba lukogo. Aka Yehova, rhwanajira kantu kalebe embere barhuhûne oburhabale. Izuba lyage linarhumolekere rhweshi ngasi lusiku buzira kumuhûna lyo! N’ecidûrhu c’izuba cinarhabale abantu boshi, ciru na bala barhavuga Yehova omunkwa. K’orhayemiri oku Yehova anarhuyerese obuzigire omu kuhikiriza amalagirire girhu? Rhunazigire Yehova bwenene omu kubona oku aba wa lukogo bwenene na muhanyi! w21.09 buk. 22-23 cif. 12-13

Obuzigire bwishwekerezi bwa Nnâmahanga bunamushumye okubabalira. Erhi Yehova abona omunyabyaha ociyunjuzize aleke n’ebyaha byage, obuzigire bwage bwishwekerezi bunamushumye okubabalira. Daudi aderha lugenda Yehova ntya: “Arharhujirira kungana ebyaha birhu, arhanarhulyuza kungana obubi bwirhu.” (Enna. 103:8-11) Kugerera ebi Daudi yenene acibwinire, ahugûsirwe oku amalumwa omuntu aba nago amango ezamiri eri yamutumuza ganaba manji bwenene. Cikone kandi ayiga oku Yehova aba “mubidu w’okubabalira.” Bici bishumya Yehova abe wa kubabalira? Ishuzo liri omu lwandiko lw’olusiku lw’ene. Kobinali, nk’oku Daudi aderhaga omw’isala, Yehova aba wa kubabalira bulya aba wa buzigire bunji na mwishwekerezi kuli bala boshi bamushenga. Erhi rhujira ecaha kuba kwinja okuciyumva kubi lugenda ebi rhwajiraga, n’oko kuciyumva kubi kunashinganine. Oko kwanarhushumya rhuciyunjuze n’okurhôla emihigo yakarhurhabala lyo rhurhacijaga mw’ago magosa. w21.11 buk. 5 cif. 11-12

Yehova aba azigire izino lyage, anaba alonzize ngasi muntu alikenge. (Iz. 42:8) Cikone hakola hali myaka 6 000, er’izino lyage linja lihizirwekw’izinga. (Enna. 74:10, 18, 23) Oko kwarhondereraga amango Ibilisi (kw’okuderha “Kakoza”) ashobekaga Nnamahanga oku ayimire Adamu na Eva kantu kalebe kinja balilagirireko. (Murh. 3:1-5) Kurhondera ago mango, Yehova agenderire ashobekwa oku ayimire bene bantu ebintu bàlilagirireko. Yezu agayisibwa bwenene n’er’izinga lyahiragwa okw’izino l’Ishe. Yehova yene ojira ehaki y’okurhambula empingu n’igulu, n’oku arhambula ko kuba kwinja. (Maf. 4:11) Cikone Ibilisi ajira akwage koshi lyajira bamalahika na bene bantu barhanye oku Nnamahanga arhajira eyo haki. Hano hofi-hofi, ago mashitaka gashuzibwa liguma lya loshi. Yehova anajire abantu boshi bayemere oku Obwami bwage bone bo bwakalerha omurhula g’okunali hanw’igulu. w21.07 buk. 9 cif. 5-6

Biba biyumvikine kuli nnawabo w’omulala okulonza okuha abantu b’omu mulala gwage ebiryo, emishangi, n’enyumpa. K’oli walwisa amazibu g’obukenyi? Akaba ntyo kobiri, ako kali kasanzi kazibu kuli we. Ciru akaba ntyo, wanakolesa ako kasanzi ly’oseza obuyemere bwawe. Oshenge bwenene, osome n’okurhanya oku nderho Yezu aderhaga ziri omu Mateyo 6:25-34. Olole enyiganyo za muli gano mango ziyerekine oku Yehova anakashibirira abacihâna omu mikolo y’Ecikristu. (1 Kr. 15:58) Okujira ntyo kwanakuyemeza n’obwalagale oku nk’oku Sho w’omu mpingu arhabalaga abandi bali omu kanga kashushine n’akawe, ko nawe akurhabala. Amanyire ebi olagirireko, anayishi gurhi akakuhikirigizabyo. Erhi wakacibonera gurhi Yehova akurhabire omu kalamo kawe, obuyemere bwawe bwanasêra ly’ohasha okulembera amarhangulo madarhi g’amango gayisha. w21.11 buk. 20 cif. 3; buk. 21 cif. 6

Obuyemere bwa Bakristu banji bunakasêra enyanya z’enyigirizo lugenda engombôlo. Banagenderere okujira omukolo gw’amahubiri ciru akaba bali bahagalikwa, banalembere amazibu ga ngasi lubero gabahikira omu kalamo kabo koshi. Rhuganirire olwiganyo lw’entumwa Yowane. Ayusize nkaba myaka kulusha 60 ali ayaliza okuli lugenda Yezu n’engombôlo. Erhi agwerhe hofi myaka 100, bamushobeka oku ali ahira akavulindi omu Burhegesi bw’e Roma, n’oko kwarhuma bamuhira omu mpamikwa oku cirhwa c’e Patmosi. Bici byarhumaga bamuhira omu mpamikwa? Bulya akagiderha “oluderho lwa Nyamuzinda n’obuhamirize bwa Yezu.” (Maf. 1:9) Olwo luli lwiganyo lwinja lw’obuyemere n’okulembera! Kugerera amandiko Yowane ayandikaga galongozibagwa n’iroho litagatifu, ayerekine oku alizigire Yezu n’oku alishagalukire engombôlo bwenene. Omu mandiko gage, aderhire kulusha kali 100 engombôlo erhi obunguke engombôlo yakarhuha. (1 Yn. 2:2) Bibonekine bwinja oku Yowane ashagalukire engombôlo. w21.04 buk. 17 cif. 9-10

Yehova alilonzize abakozi bage bakayerekana oku bashibirire bala bagwerhe bulema bulebe b’omubiri. Kwa lwiganyo, aba Israheli barhakaheherire omuntu oli bihuli. Obo buheherere bwal’ihiziremo okurhera muntu mulebe erhi kulonza kantu kalebe kabi kamuhikire. Okujirira ebihuli ntyo kwali kubi bwenene. Arhakayumvirhe ebi bakagimuderhera, na ntyo arhagwerhe obuhashe bw’okucihalira yenene. Na kandi, omu Bene-Levi 19:14 rhuciyigirizize oku abakozi ba Yehova barhalishinganine ‘bahire embere z’omuhurha ecisârhazo.’ Lugenda abantu bagwerhe obulema b’omubiri, citabu ciguma c’amahugûlo cidesire ntya: “Omu Proche-Orient ya mîra [abantu bagwerhe bulema bulebe bw’omubiri] bakagikolesibwa kubi erhi kujirirwa kubi.” Nkaba muntu mulebe muminya akahizire ecisarhazo embere z’omuhurha ly’alonza okumujirira kubi erhi kumushekera. Obo bwali buminya bwenene. Kugerera er’irhegeko, Yehova arhabala abakozi bage babone oku bashinganine bakayerekana obwonjo kuli bala barhagwerhe owakabaderhera. w21.12 buk. 8-9 cif. 3-4

Yakobo alʼiyobohire bulya mukulu wage akacibire amubikire akarhinda. Arhangishenga Yehova amubwira lugenda ago mazibu. Na kandi, arhumira Ezau oku bintu alidwirhe. (Murh. 32:9-15) Buzinda, erhi akola arhimanana na mukulu wage busu oku busu, Yakobo aba ye murhanzi okuyesa Ezau obukenge. Afukama embere za Ezau, arhali mpu liguma lyone erhi kabirhi, cikone afukamiriza kali nda koshi! Yakobo ayerekana obwirhohye n’obukenge, na ntyo ayumvanya na mukulu wage. (Murh. 33:3, 4) Rhwanaciyigiriza isomo ly’obulagirire kugerera oko Yakobo acirheganyagya ly’ajirhimanana na mukulu wage n’erhi akola ayegera Ezau. N’obwirhohye Yakobo ahûna Yehova oburhabale. Buzinda akola kushimbana n’isala lyage omu kurhôla emihigo y’okulonza ayumvanye na mukulu wage. Erhi barhimanana na mukulu wage, Yakobo arhaganiraga haguma na Ezau okubiyerekire owagwerhe amagosa na ndi orhagagwerhe. Omuhigo gwa Yakobo gwali gwakulonza okuyumvanya na mukulu wage. Ka wanayiga olwiganyo lwa Yakobo?​—Mt. 5:23, 24. w21.12 buk. 25 cif. 11-12

Erhi orhanya gurhi Yezu afâga enyanya z’ebyaha birhu, nkaba wanaderha ntya: ‘Nciyumvirhe nka ntalishinganine olo luhembo lwago-lwago.’ Bulya gurhi wakahikira aha waciyumva ntyo? Emirhima yirhu erhali mimana yanarhurheba, n’okurhujira rhukaciyumva nka rhuli babusha-busha erhi oku rhurhashinganini okuzigirwa. (1 Yn. 3:19) Omu kanga ka ntyo rhushinganine rhukakengera oku “Nyamuzinda alushire omurhima gwirhu.” Larha wirhu w’omu mpingu oku arhuzigira n’okurhubabalira kulushire entanya z’akarhinda zikacifulika omu mirhima yirhu. Kuli kwa bulagirire rhuyemere oku Yehova aba arhuzigire. Lyo rhuhikira aho, rhushinganine rhukasoma Akanwa ka Nnâmahanga ngasi mango, okushenga burhahusa n’okukaba ngasi mango haguma n’abantu bage bishwekerezi. Bulya gurhi kuli kwa bulagirire okujira ebyo byoshi? Wahugûkwa amorhere ga Yehova. Wahugûkwa kunganaci aba akuzigire. Okurhanya oku cigabi c’Akanwa ka Nnâmahanga ngasi lusiku kwanakurhabala obe n’etanya nyinja, n’ “okukubûla ebintu” biri omu murhima n’omu bwenge bwawe.​—2 Tm. 3:16. w21.04 buk. 23-24 cif. 12-13

Okuba n’obuyemere busêzire, kuhûnyire binji kulusha okuba n’obumanye kone. Rhushinganine rhukarhanya kw’ebi rhuli rhwayiga. Rhuganirire olwiganyo l’omwandisi w’Olulanga lwa 77. Al’ivunisire omurhima bulya akagirhanya oku ye n’abandi ba Israheli barhacir’iyemirwe na Yehova. Ezo ntanya z’okuvunika omurhima zakarhuma arhaja îro budufu. (Mulongo gwa 2-8) Gurhi ajijire? Abwira Yehova ntya: “Nankâkengêra ogw’ebijiro byawe byoshi, nakâgerêreza ogw’ebisômerine byawe.” (Mulongo gwa 12, Mashi Bible) Kobinali, oyo mwandisi w’olulanga al’ihugûsirwe bwinja ebintu Yehova ajiriraga abantu bage mango mîra, cikone bulya aligayire adosa ntya: “Ka kwo kunali aminja gage ajira gahwire obu? K’oburhê bwage bwo bwarhumirage lero rhwamurhenga emurhima?” (Mulongo gwa 9, Mashi Bible) Oyo mwandisi w’olo lulanga akagirhanya oku mikolo ya Yehova n’oku lukogo n’obwonjo Nnâmahanga bayerekaga mango mîra. (Mulongo gwa 11) Bunguke buci oko kwalesire? Omwandisi w’olo lulanga ahikira aha ayemera n’obwalagale oku Yehova arhakalekerera abantu Bage. (Mulongo gwa 15) w22.01 buk. 30-31 cif. 17-18

Gurhi Yehova aciyumva okubiyerekire abakozi bage bishwekerezi bafîre? Ali alinguza okucibibabona! (Ayu. 14:15) Ka wanarhanya kunganaci Yehova acifinja okucibibona omwîra wage Abrahamu? (Yk. 2:23) Erhi kandi Musa bakagishambala naye “busu oku busu”? (Lub. 33:11) Na kandi ali alindirira oku amango gahikage acibirhondera ayumvirhiza zirya nyimbo z’okuhâna obukuze Daudi n’ababo bazihi b’ennanga bakagiyimba! (Enna. 104:33) Ciru akaba abo bîra ba Nnamahanga bafîre, Yehova arhabayibagiri. (Iz. 49:15) Akengire ngasi kantu okubiyerekire obumuntu bwabo. Lusiku luguma anacibagalulire obuzine, na buzinda acibirhondera ayumva amasala gabo garhenzire oku murhima n’okucibirhondera ayemera enterekêro yabo. Ezi ntanya zanakurhuliriza, erhi akaba wafîrirwe n’omuzigirwa wawe. Erhi obugoma burhondera omu Edeni, Yehova alimanyire oku akalamo k’abantu kakabire kazibu embere kacibiba kinja. Yehova aba ashombire obubi, obubule bw’obushinganyanya, n’obushungu buyunjwire mw’er’igulu ene. w21.07 buk. 10 cif. 11; buk. 12 cif. 12

Erhi rhuzigira bene wirhu na bali birhu, rhunayerekane oku rhushagalukire engombôlo. Bulya gurhi? Bulya Yezu arhahânaga obuzine bwage kuli rhwê rhwêne cikone ajijire ntyo kuli bene wirhu na bali birhu nabo. Bulya Yezu arharhindiraga okubafîra, oko kuyerekine n’obwalagale oku anababone oku bali ba bulagirire. (1 Yn. 3:16-18) Ebi rhujirira bene wirhu na bali birhu, byo biyerekana oku rhuba rhubazigire. (Ef. 4:29, 31–5:2) Kwa lwiganyo, rhunabarhabale amango balwazire, amango bali omu mazibu, kwa lwiganyo amango bahikirwe n’obuhanya. Gurhi rhushinganine rhujire erhi owirhu Mukristu akaderha erhi arhujirire kantu kalebe kakarhugayisa? K’ojira enkomedu y’okubîka akarhinda? (Lev. 19:18) Erhi akaba ntyo, er’ihano lyanakurhabala: ‘Mukalemberana munababalirane akaba hali owagayisize owabo. Nyakasane [Yehova, NWT] ammubabalire: mumuyankirekwo olwiganyo.’ (Kl. 3:13) Ngasi mango erhi rhubabalira bene wirhu na bali birhu, rhunayereke Larha wirhu w’omu mpingu oku kobinali rhushagalukire engombôlo. w21.04 buk. 18 cif. 12-13

Nkaba rhwanakolera Yehova bwenene, n’okuhikira aha rhwarhabala bantu banji babatizizbwe. Cikone rhunahikire aha rhwahugûkwa oku oburhabale Yehova arhuha bo burhuma rhwajira ebyo byoshi. Hali akandi kantu rhuciyigirizize kugerera olwiganyo lwa Apolo n’olw’entumwa Paolo: erhi akaba rhugwerhe mikolo minji yago-yago omu cigamba, rhwanarhabala bwenene lyo rhugendekeza omurhula. Kunganaci rhuvuzire omunkwa okubona abalume bahizirweho n’iroho litagatifu banagendekeze omurhula n’ecinyabuguma erhi bahâna amahano gayimangire oku Kanwa ka Nnamahanga n’omu kusegeza obwenge kuli Yezu Kristu, lwiganyo lwirhu, ci arhali kuli bo bonene! (1 Kr. 4:6, 7) Ngasi muguma wirhu ajira nshokano erhi buhashe bulebe ahâbagwa na Nnamahanga. Hali amango rhwakaciyumva nk’omukolo rhujira guba musungunu bwenene. Cikone ebijiro bisungunu by’okugendekeza omurhula ko biba nka nyuzi nsungunu-ngunu zirhuma omushangi gwagwarhana. Rhujirage okwirhu koshi lyo rhukula omu murhima gwirhu ngasi ntanya zakalerha iroho ly’akamashigwe. Rhweshi rhuhige okugendekera kwajira ebi rhwakanahasha byoshi lyo rhugendekeza omurhula n’ecinyabuguma omu cigamba.​—Ef. 4:3. w21.07 buk. 19 cif. 18-19

Wanayemera n’obwalagale oku wanacibone abazigirwa bawe bafîre. Emirenge Yezu alakaga erhi ali arhuliriza abîra bage bafîrirwe, erhuyemezize n’obwalagale oku anafûle abafîre! (Yn. 11:35) Wanarhabala abafîrirwe. Yezu arhalakaga haguma na Mariya na Marta kone, ci abayumvirhiza n’okubarhuliriza. (Yn. 11:25-27) Nirhu ntyo ko rhwakajirira abafîrirwe. Mugula muguma olama e Australie, ohamagalwa Dan, adesire ntya: “Enyuma z’okufîrwa na mukanie, nal’ilagirire oku burhulirize. Bene wirhu na bakabo bakayisha omushi n’obudufu lyo banyumvirhiza. Bakagindeka mbabwire gurhi ndi naciyumva barhanakagiciyumva kubi mpu bulya ndinalaka ngasi kasanzi. Bakampa oburhabale, nk’okushuka omutuga gwani, okugendigula ebi ndagirireko n’okunyendera ebiryo amango ntahashiri okujira ntyo. Banakag’ishenga haguma na nani ngasi mango. Bayerekana oku bali bîra b’okunali ‘omu mbaka.’”​—Mig. 17:17. w22.01 buk. 16 cif. 8-9

Yehova aba arhulongize ebintu binja. (Mig. 4:20-22) Anayerekane oku aba arhuzigire erhi arhuhanûla kugerera Akanwa kage, ebicapo birhu, erhi omu kukolesa owirhu mwemezi okuzire kiroho. (Hb. 12:9, 10) Osegeze obwenge oku mwanzi guli omu ihano ci arhali oku bakuhâga lyo. Hali amango nkaba rhuciyumva oku ihano lirhahânyirwe omu njira nyinja. Kobinali, ngasi yeshi ohâna ihano, akwanine okulihâna omu njira nembu lyo liyemerwa. (Gl. 6:1) Cikone erhi akaba rhwe rhuli rhwahanûlwa, rhushinganine rhukasegeza obwenge bwirhu oku mwanzi guli mw’er’ihano, ciru akaba rhuli rhwarhanya oku lirhahânyirwe omu njira nyinja. Rhushinganine rhukacidosa ntya: ‘Ciru akaba ntashagalukire oku er’ihano lyahânagwa, ka hali ebi lyakanyigiriza? Ka nanaleka okusegeza obwenge bwani oku buzamba bw’omuntu wampaga ihano lyo linderhera obunguke?’ Rhwanaba erhi rhukozire n’obwenge erhi rhwakakalonza gurhi rhwayungukamwo n’ihano rhwahâbagwa. w22.02 buk. 12 cif. 13-14

Yehova ayishi oku binarhuhûne akasanzi n’obushiru lyo rhuyaka entanya mbi n’enkomêdu mbi. (Enna. 103:13, 14) Cikone, kugerera Akanwa kage, iroho lyage litagatifu, n’ikubuliro lyage, Yehova anakarhuha obwenge, emisi, n’oburhabale rhulagirireko lyo rhushanja okurhuyosire. Okolese Ebibliya ly’olaba aha oshinganine ojire empindûlo. Akanwa ka Nnâmahanga ko kakola nka ciyo; kanakurhabala olabirize entanya zawe, enderho zawe, n’ebijiro byawe. (Yk. 1:22-25) Na Yehova anakurhabala ensiku zoshi. Anakurhabala bwinja bulya aba ahugûsirwe ebiba omu murhima gwawe. (Mig. 14:10; 15:11) Co cirhumire obe n’enkomêdu y’okukamushenga n’okukayiga Akanwa kage ngasi lusiku. Oyemere n’obwalagale oku amakanuni ga Yehova gaba minja. Rhwanayunguka na ngasi kantu Yehova arhuhûnyire rhujire. Abalama kushimbana n’amakanuni gage banacikenge bonene, bajira omuhigo omu kalamo, n’omwishingo gw’okunali.​—Enna. 19:8-11. w22.03 buk. 4 cif. 8-10

Rhunahe Yehova enterekêro erhi rhuyubaka n’okushibirira aha rhujirira entimanano. Ebibliya edesire oku okujira ihema ly’entimanano n’ebirugu byalimo gwali “mukolo mutagatifu.” (Lub. 36:1, 4, NWT) Ene nalyo, Yehova anabone omukolo gw’okuyubaka Enyumpa z’Entimanano n’ezindi nyumpa z’eciteokrasi oku guli mukolo mutagatifu. Bene wirhu na bali birhu baguma na baguma banageze kasanzi kanji mw’eyo mikolo. Kobinali rhunashagalukire oburhabale bahâna omu mukolo gw’Obwami. Banajire n’omukolo gw’amahubiri. Ciru baguma na baguma ba mulibo banalonze okuba bapainiya. Abagula b’ecigamba banayerekana oku balunzire okuboko eyo mikolo y’obubasi omu kurharhindira okuyemerera abo bene wirhu na bali birhu b’obushiru okuba bapainiya amango bamahikiriza ebihûnyirwe. Rhube rhujira obulenga omu mukolo gw’obubasi erhi nanga, ngasi muguma wirhu anajira okwage koshi ly’arhabala oku mukolo gw’okucesa n’okushibirira ezo nyumpa. w22.03 buk. 22 cif. 11-12