Mwezi gwa 3

“Ebibuzi” by’omu lwiganyo luli omu Mateyo 25:31-36 bishushanyizibwe n’abashinganyanya b’omu mango mazinda bagwerhe obulangalire bw’okulama hanw’igulu, k’okuderha, ebindi bibuzi. Enjira nkulu ebindi bibuzi bagendekeramwo baba bishwekerezi oku bashîge amavurha ba Kristu kuba kubalunga okuboko omu omukolo munene gw’omw’igulu lyoshi, k’okuderha, okuhubiri n’okujira abanafunzi. (Mt. 24:14; 28:19, 20) Ngasi mwaka omu migobe eri embere z’amango rhwajira Okukengera olufû lwa Yezu, abantu b’ebindi bibuzi banayerekane oku balunzire okuboko bene wabo Kristu omu kujira n’obushiru akampanye k’omw’igulu lyoshi k’okulalika abasimisibwe lyo bayisha aha Kukengera olufû lwa Yezu. Banarhabale okurhôla emihigo eshinganine ly’Okukengera olufû lwa Yezu kujirwa omu ngasi cigamba c’omw’igulu lyoshi. Abantu b’ebindi bibuzi baba bashagalukire okulunga okuboko bene wabo Yezu muli eyo njira. Abantu b’ebindi bibuzi baba bahugûsirwe oku Yezu anabone oku ebi bajirire bene wabo bashîge amavurha ko banali nka ye banabijirire.​—Mt. 25:37-40. w22.01 buk. 22 cif. 11-12

Erhi rhuyiga amorhere ga Yezu n’oku akagijirira abandi, rhunabe erhi rhuyizire olwiganyo lwa Yehova. Orhanye oku bonjo afaga olya mushomyo, okucihira aha nafasi y’olya mukazi wali lwazire omududu n’obwonjo akagiyumviza abafîrirwe. (Mk. 1:40, 41; 5:25-34; Yn. 11:33-35) Omu kugendekera kwayiga amorhere ga Yehova, ko rhwakanagendekera rhwamuyegera. Okushimba enshando za Yezu kunarhurhabale lyo er’igulu libi lirharhumaga rhwabula kuba masu. Omu budufu buzinda bw’akalamo ka Yezu hanw’igulu, agwerhe oburhwali b’okuderha ntya: “Nahimire igulu.” (Yn. 16:33) Alonzagya okuderha oku arhayemeraga ashumikwa n’entanya z’abantu b’igulu, emihigo yabo, n’ebijiro byabo. Yezu arhalekaga akantu koshi-koshi karhume abula busegeza obwenge bwage oku mukolo gwarhumaga arhenga empingu: okuhalira Ishe Yehova. Bici oko kurhuyigirizize? Mw’er’igulu, muli bintu binji byakarhuma rhwabula kuba masu. Cikone, aka Yezu, erhi nirhu rhwakagendekera rhwasegeza obwenge bwirhu oku kujira obulonza bwa Yehova, ‘rhwanayishihima’ igulu.​—1 Yn. 5:5. w21.04 buk. 3-4 cif. 7-8

Entumwa Paolo alimanyire eci ciragane Yezu ahânaga cidesire oku “ngasi yeshi wamuyemera [Yezu] . . . abone obuzine bw’ensiku n’amango.” (Yn. 3:16; Rm. 6:23) Paolo ali muguma wa balya bajira obuyemere omu ngombôlo. Aliyemire n’obwalagale oku Yehova aba mubidu okubabalira ciru abajijire ebyaha bizibu erhi bakaciyunjuza. (Enna. 86:5) Paolo aliyemire oku Nnâmahanga anamuzigire bwenene bulya arhumire Yezu ly’afâ enyanya z’ebyahya byage. Oyumve enderho z’okuhâna omurhima Paolo adesire ziri omu Abagalasiya 2:20: “Mugala wa Nyamuzinda . . . wanzigiraga anacihâna erhi nie ntuma.” Paolo arharhanyagya oku Nnâmahanga arhakamuzigira bulya ali mubi bwenene. Arhaderhaga ntya: ‘Mpugusîrwe bulya gurhi Yehova azigira bene wirhu, cikone birhakahashikana niehe anzigire.’ Paolo akengeza Abaroma ntya: “Kristu arhufîra rhunaciri banya-byaha.” (Rm. 5:8) Obuzigire bwa Nnâmahanga burhajira lugero! Paolo aliyemire n’obwalagale obuhashe b’obuzigire bwa Nnâmahanga. Paolo alimanyire kunganaci Yehova akagilembera ishanja lya Israheli. w21.04 buk. 22 cif. 8-10

Amango oli walongoza ifunzo ly’Ebibliya orhabale omwanafunzi wawe ahikire aha azigira Yehova. Gurhi wakajiramwo ntyo? Okalola bulyo buhi wakakolesa ly’orhabala omwanafunzi ayige binji kuyerekera amorhere ga Yehova. Orhabale omwanafunzi wawe akabona Yehova oku aba Nnamahanga w’obushagaluke orhabala balya bamuzigira. (1 Tm. 1:11; Hb. 11:6) Oyereke omwanafunzi wawe oku anayunguka erhi akakolesa amahano amuhire, onamuhugûlire oku ago mahano gayerekine obuzigire Yehova amujirako. (Iz. 48:17, 18) Erhi omwanafunzi wawe akazigira Yehova bwenene oko kwanamushumya ajire empindûlo z’obulagirire. Ly’omwanafunzi ahikira obubatizo, biba bihûnyire aleke bintu biguma biguma. Banafunzi baguma na baguma banaleke bintu biguma na biguma by’omubiri. Banji mulibo, byanahûna baleke abîra babo barhaba bazigire Yehova. Hali n’abandi bakayakwa n’abantu b’omu mulala gwabo barhaba bazigire Abahamirizi ba Yehova. Yezu alaganya oku nta mango balya boshi bamukulikire bànacidose mpu lero ndi wababwiraga oku babe banafunzi bage we. Bayishihâbwa oluhembo lw’okuba n’omulala gw’ekiroho gubazigire.​—Mk. 10:29, 30. w21.06 buk. 4-5 cif. 8-9

Entumwa Paolo yashushanyize omukolo g’okujira abanafunzi n’omukolo g’obuhinzi, ayerekana oku rhushinganine rhujire binji ahanyuma n’okurhwera emburho kone. Akengeza Abakorinti ntya: “Niono nie narhweraga, Apolo naye akâbombêza eyo mburho n’amîshi . . . mwe ishwa [lya Nyamuzinda].” (1 Kr. 3:6-9, Mashi Bible) Rhwê nka bakozi ba Nyamuzinda bali omu “ishwa lyage” arhali mburho zone rhurhwera cikone rhunakâzibombêza n’okulabiriza ngasi mango erhi ziri zajira amajambere. Ngasi mango rhunakakengera oku Nnâmahanga orhuma emburho zakula. Luli lukengwa lunene rhugwerhe lw’okuhubiri n’okuyigiriza abandi okuli! Kobinali ogo mukolo gunarhulerhere obushagaluke. Entumwa Paolo yarhabalaga bantu banji b’e Tesalonika babe banafunzi, ayerekine oku akag’iciyumva omu kuderha ntya: “Bundi bulangalire buci rhugwerhe, gandi masima maci rhwabone, lindi ishungwe lihi lyarhulerhere irenge embere za Nnawirhu Yezu olusiku agaluka [amango g’okubâho kwage, NWT] aha nyuma zinyu? Neci, mw’oyo mwe irenge lirhu, mwe na busime bwirhu.”​—1 Ts. 2:19, 20; Ebj. 17:1-4. w21.07 buk. 3 cif. 5; buk. 7 cif. 17

Yehova ye wakululaga ngasi muguma wirhu emunda ali. (Yn. 6:44) Orhanye bici oko kuhugwîre. Erhi Yehova aba ali alabiriza emirhima y’emiliyoni n’emiliyoni y’abantu bali hanw’igulu, abona akantu kw’obulagirire muli we: murhima mwirhohye gwakahikira aha gwamuzigira. (1 Nga. 28:9) Yehova akuyishi, aba akuhugûsirwe, anaba akuzigire. Okwo kurhuhire omurhima bwenene! Yehova anakushibirire bwenene, na kandi anashibirire bene winyu na bali binyu Bakristu. Lyo Yezu ahugûla ntyo, ashushanya Yehova na lungere. Gurhi lungere ogwerhe bibuzi 100 akajira erhi akabona oku cibuzi ciguma cirhali omu buso? “K’arhakaleka birya bindi makumi gali mwenda na mwenda omu ntondo, agend’ilonza cirya cihezire.” Erhi lungere akabona eco cibuzi, arhakacikalihira mpu bulya caheraga. Lubero n’oko anacishinga bwenene. Isomo lici rhukuzire aho? Ngasi cibuzi ciba ca babulagirire omu masu ga Yehova. Yezu adera ntya: “Burhali bulonza bwa Sho w’empingu mpu muguma muli aba barhorho ahere.”​—Mt. 18:12-14. w21.06 buk. 20 cif. 1-2

Erhi rhurhanya oku buzigire Nnâmahanga arhujirako, na nirhu rhunazibuhye obuzigire rhumujirako n’obwîra bwirhu haguma naye. (Rm. 8:38, 39) Rhunashumibwe okuyiga olwiganyo lwa Yezu. (1 Pt. 2:21) Omu nsiku ziri embere z’amango rhwajira Okukengera olufû lwa Yezu, rhunasegeze obwenge bwirhu oku myanzi eganirirwe omu Bibliya okubiyerekire emigobe mizinda y’akalamo ka Yezu hanw’igulu, olufû lwage, n’okufûka kwage. Ehotuba ejirwa ebijingo by’olusiku lw’Okukengera olufû lwa Yezu, enarhukengeze obuzigire Yezu arhujirako. (Ef. 5:2; 1 Yn. 3:16) Erhi rhusoma n’okurhanya okubiyerekire olwiganyo lwa Yezu lw’okucihâna enyanya z’abandi, rhunaciyumve rhusezibwe ‘rhube n’olugendo luli nk’olugendo âli agwerhe.’ (1 Yn. 2:6) Rhunanahige okugendekera rhwabêra omu buzigire bwa Nnâmahanga. (Yd. 20, 21) Rhwanabêra omu buzigire bwa Nnâmahanga omu kujira okwirhu koshi lyo rhumurhumikira, lyo rhucêsa izino lyage, n’okushagalula omurhima gwage. (Mig. 27:11; Mt. 6:9; 1 Yn. 5:3) Okuja aha Kukengera olufû lwa Yezu kunarhushumye rhulame omu njira eri nk’ebwizire Yehova ntya: ‘Ndonzize mbêre omu buzigire bwawe ensiku n’amango!’ w22.01 buk. 23 cif. 17; buk. 25 cif. 18-19

Yehova arhuhîre oluhembo lw’oluhûma lw’okucishoga. Rhwanacishoga ebi rhwajira omu kalamo kirhu. Larha wirhu w’omu mpingu anashagaluke bwenene erhi rhucishoga okumukolera. (Enna. 84:11; Mig. 27:11) Rhwanakolesa bwinja oluhûma lwirhu lw’okucishoga omu njira ziri lubero. Omu kuyiga olwiganyo lwa Yezu, rhwanacishoga okukahira amalagirire g’abandi oku nafasi ntanzi embere z’agirhu. Mango maguma Yezu n’entumwa zage bal’irhamire bwenene, balonza ahantu hali akahwenyenye lyo baj’irhamûka. Cikone birhahashikanaga barhamûke. Ehitû hy’abantu hyabarhimana aho, banakagilindirira okuyigirizibwa na Yezu. Cikone oko kurhagayisagya Yezu. Lubero n’oko, ayumviza abo bantu obonjo. Na gurhigi ajijire muli ako kanga? “Arhondera okubayigiriza binji.” (Mk. 6:30-34) Erhi rhuyiga olwiganyo lwa Yezu omu kuhâna akasanzi kirhu n’emisi yirhu lyo rhurhabala abandi, oko kunalerhere Larha wirhu w’omu mpingu irenge.—Mt. 5:14-16. w21.08 buk. 3 cif. 7-8

Yehova asima ebintu biri lubero-lubero. Oku alemire bene bantu n’ebindi byoshi kunayerekane ntyo. Ngasi muguma wirhu arhayumanana n’owundi. Co cirhumire nta mango Yehova akarhugerera oku bandi. Analabirize omurhima gwawe, ananalolereze akandalala kawe. (1 Sam. 16:7) Na kandi ayishi obuhashe bwawe, obuzamba bwawe n’oku wakulagamwo. Arhakanakuhûna oku ojire ebintu bilushire obuhashe bwawe. Rhushinganine rhuyige Yehova omu kukacibona nk’oku naye arhubona. Na ntyo rhwanaba “n’engererezo zishinganine,” zakarhuma rhurhacikarhanya oku rhulushire abirhu erhi rhuli ba busha. (Rm. 12:3) Kobinali, rhwanaciyigiriza binji kugerera enyiganyo za bene wirhu erhi bali birhu bishwekerezi bahikiriza omukolo gw’amahubiri bwinja. (Hb. 13:7) Okujira ntyo kwanarhuma rhwabona gurhi rhwakajira lyo nirhu rhuhikiriza omukolo gw’amahubiri bwinja. (Fl. 3:17) Cikone haba olubero egarhi k’okuyiga olwiganyo lwinja lwa muntu mulebe n’okulukolesa ly’ocigerera kuli ye. w21.07 buk. 20 cif. 1-2

Wanazibuhya obuyemere omu Mulemi omu kukalabiriza ensimba, emirhi, n’enyenyezi. (Enna. 19:1) Erhi wakagendekera waciyigiriza binji okubiyerekire ebyo bintu, ko wakanagendekera wayemera n’obwalagale oku Yehova yeba Lulema. Amango oli waciyigiriza okubiyerekire ebiremwa, ojire okwawe koshi ly’ohugûkwa ebi eco ciremwa cifulwîre kuli Omulemi wirhu. (Rm. 1:20) Kwa lwiganyo, wanamanya oku ahanyuma n’okurhumolekera n’okurhuha ecidurhu cirhuma obuzine bwagendekera, izuba lirhu libamo ebi baderha rayons ultraviolets zakahira obuzine omu mazibu. Rhuli bene bantu rhuba rhulagirire oku kantu kakarhulanga kw’ezo rayons. Rhunanalangwe! Gurhi rhulangwamwo? Enyumpa yirhu, kw’okuderha igulu lijira empenzi ekalilanga, ehamagalwa couche d’ozone, enakacuya ezo rayons ultraviolets zirhenga omw’izuba lyo zirhag’irhuhikako. Oku ezo rayons ultraviolets zigendekera zayaka ko n’eyo couche d’ozone nayo egendekera yayushuka. K’orhayemirigi oku hashinganine habe muntu mulebe wajiraga ebyo byoshi n’oku yeba Mulemi w’obuzigire na mwenge? w21.08 buk. 17 cif. 9-10

Ciru n’enyuma z’omuntu okubatizibwa, rhushinganine rhugendekere rhwamuzigira n’okumukenga. (1 Yn. 4:20) Gurhi rhwakajiramwo ntyo? Akantu kaguma rhwakajira, kuli kumuyereka oku rhumulangalire. Kwa lwiganyo, rhurhakamushobeka mpu bintu bibi erhi ntanya za kucikaliza zamushumagya aje omu okuli. Lubero n’oko, rhwanayereka mwene wirhu erhi mwali wirhu oku rhumukenzire, omu kumuyereka oku arhulushire. (Rm. 12:10; Fl. 2:3) Obe wa kubabalira na wakujirira abantu boshi aminja. Akaba rhulonzize rhube egarhi ka balya bakahash’ihamagala Yehova Ishe wabo ensiku n’amango, rhushinganine rhukakolesa Akanwa kage omu kalamo kirhu. Kwa lwiganyo, Yezu ayigirizize oku rhushinganine rhukababalira n’okujirira abantu boshi aminja, ciru n’abashombanyi birhu. (Lk. 6:32-36) Cikone hali amango rhubona oku kuli kuzibu okujira ntyo. Erhi akaba ntyo kobiri, rhushinganine rhuyige okurhanya n’okujira aka Yezu. Erhi rhujira okwirhu koshi lyo rhurhumikira Yehova n’okuyiga olwiganyo lwa Yezu, rhunayerese Larha wirhu w’omu mpingu oku rhulonzize rhube baguma b’omu mulala gwage ensiku n’amango. w21.08 buk. 6 cif. 14-15

Ociyigirize okulangalira Yehova. Arhulaganyize migisho minji erhi rhwakagendekera rhwamulangalira n’okujira okwirhu koshi lyo rhumukolera. Ebibliya erimo nyiganyo nyinji z’abantu bacihanyîre loshi omu mukolo gwa Yehova. Kanji-kanji abo bantu bajijire kantu kalebe embere bahâbwe emigisho yago-yago na Yehova. Kwa lwiganyo, erhi Abrahamu arhenga ahamwage, “agenda arhanamanyiri aha aja,” go mango Yehova amugishaga. (Hb. 11:8) Yakobo ahabagwa emigisho yago-yago enyuma z’okulwisa malahika. (Murh. 32:24-30) Erhi ishanja ly’aba Israheli liri hofi lihike omu Cihugo c’Amalaganyo, abantu bayikiraga erhi abakuhani bayusihira amagulu omu Yordani. (Yoz. 3:14-16) Na kandi wanaciyigiriza binji kugerera enyiganyo z’Abahamirizi ba Yehova ba muli gano mango girhu balangalire Yehova banacihangana okujira binji omu mukolo gwage. w21.08 buk. 29-30 cif. 12-14

Mwe bene wirhu na bali birhu mukola bashosi, mumanyire gurhi ebintu byakagijirwa embere, cikone kandi munabone oku kuli kwa bulagirire okucikomereza empindûlo. Ninyu mwe bashosi mwazindig’ibatizibwa, mugwerhe binji mwakahâna. Emisole yanashagalukira okuyumva ebi mwacibwinîre n’amasomo mwaciyigirizize. Erhi ‘mwakakahâna’ oku muhako gw’obumanye mukola mugwerhe, Yehova anamugisha bwenene. (Lk. 6:38) Bene wirhu na bali birhu mukola bashosi, erhi mwakakayegerera emisole, mweshi mwanarhabalana. (Rm. 1:12) Ngasi muguma agwerhe akantu k’obulagirire owundi arhagwerhi. Abakola bashosi bagwerhe obwenge n’obumanye kulusha emisole. N’emisole nayo egwerhe emisi kulusha abashosi. Erhi emisole n’abakola bashosi bakakola haguma nka bîra, banalerhera Larha wirhu w’omu mpingu w’obuzigire irenge n’oko kunalerhere ecigamba coshi emigisho. w21.09 buk. 8 cif. 3; buk. 13 cif. 17-18

Bulya gurhi Bayahudi banji barhahugûkagwa oku Yezu afâgamwo? Bakaderha oku obo Yezu amanikwa oku murhi, kwanarhuma abonekana nka cishungu na nka munya-byaha​—ci arhali ye Masiya. (Lush. 21:22, 23) Abayahudi basarhazibagwa n’oku Yezu afâgamwo barhahugûkagwa oku ali mweru-kweru, n’oku bamushobekaga eby’obunywesi, n’oku ebi bamujiriraga birhalishinganine. Abatwaga olubanja lwa Yezu barhashimbaga obushinganyanya. Akagombe k’okutwa emanja k’Abayahudi kajira entimanano duba-duba, na ntyo barhacitwaga olo lubanja nk’oku byalihûnyire. (Lk. 22:54; Yn. 18:24) Ahali hw’okuyumvirhiza ebi bakagishobeka Yezu buzira kabôlo, abazuzi bakalonza “abashobeka Yezu eby’obunywesi, mpu lyo bamuyirha.” (Mt. 26:59; Mk. 14:55-64) N’enyuma z’okufûka kwa Yezu, abo bazuzi bamuhanaga okurhashinganini bahonga abasirika b’e Roma bakag’ilanga enshinda yage “nfaranga nyinji” mpu lyo bayaliza emyanzi y’obunywesi omukuhugûlira abantu bulya gurhi omubiri gwa Yezu gurhaciri omu nshinda.​—Mt. 28:11-15, Mashi Bible. w21.05 buk. 11 cif. 12-13

Yehova acilonzagya akasherezize er’igulu ho n’aho. Cikone okulembera kwage kwarhurhabire bwenene! Ngasi muntu yeshi w’omw’iburha lya Adamu na Eva anaburhwe erhi arhanali mwimana. Ciru ankaba ntyo Yehova aba abazigire anaba abashibirire, ananalaganyize oku ayusa er’igulu libi. (1 Yn. 4:19) Ahizireho olusiku anayukirize obulwala n’agandi mahanya galibuza abantu. K’obuzigire bwage burhakarhushumya nirhu rhugendekere rhwalembera nsiku nyinji akage kuhika olo lusiku luhike? Yehova ayerekine olwiganyo lwinja lw’okulembera. Yezu ahashiriyiga olwiganyo lw’Ishe lw’okulembera. Erhi Yezu ali hanw’igulu, alembera enderho mbi, okubonesibwa nshonyi, n’okumanikwa oku murhi gw’amalibuko erhi rhwê rhurhuma. (Hb. 12:2, 3) Buzira karhinda, olwiganyo lwa Yehova lw’okulembera lwahîre Yezu emisi y’okulembera. Nirhu lwanarhuha emisi y’okulembera. w21.07 buk. 12-13 cif. 15-17

Rhunacibonere ngasi lusiku obwonjo bwa Larha wirhu. (Enna. 103:10-14) Abaganda ba Yezu barhali bimana; cikoki akagibayeresa obwonjo n’okubababalira. Ciru ahâna obuzine bwage buzira kusêzibwa lyo rhubabalirwa ebyaha birhu. (1 Yn. 2:1, 2) Obuzigire buba omu mulala gwirhu gw’ekiroho bunasêre erhi ‘rhwakakababalirana rhwêne na nnene.’ (Ef. 4:32) Kobinali, hali amango kurhaba kulembu okubabalira abandi, co cirhumire rhushinganine rhucihangane okujira ntyo. Mwali wirhu muguma abwine oku ecigabi c’Ilabiro ly’Akalalizi calidesire “Tuwe Tayari Kusameheana” camurhabire akajira ntyo. Ayandisire ntya: “[Eco cigabi] cahugwîre oku okuba mubidu okubabalira abandi kurhali kuyemera olugenzi lwabo lubi erhi kuderha oku lurharhumire waciyumva kubi. Cikone okubabalira kuli kuleka okubika akarhinda enyanya z’ebyo bakujirire n’okugendekera waba n’omurhûla.” Erhi rhubabalira bene wirhu na bali birhu, rhunayerekane oku rhubazigire n’oku rhuli rhwayiga Larha wirhu, Yehova. w21.09 buk. 23-24 cif. 15-16

Yezu alizigire okuli, k’okuderha okuli okubiyerekire Nnâmahanga n’emihigo Yage. Yezu akagilama nk’oku okuli kunayerekine, anarhabire abandi nabo bamanya okuli. (Yn. 18:37) Abanafunzi b’okuli ba Yezu nabo babà bazigire okuli bwenene. (Yn. 4:23) Co carhumaga entumwa Petro yahamagala Obukristu oku yo “njira y’okuli.” (2 Pt. 2:2) Enyanya z’obuzigire bagwerhe oku okuli, Abakristu b’omu myaka igana mirhanzi balahira entanya z’idîni, enkomêdu mbi, bakalahira n’entanya za bene bantu zakagiba ziri lubero n’okuli. (Kl. 2:8) Ko n’oko ene, Abakristu b’okuli banacihangane okugendekera “bashimba okuli” omu kujira okwabo koshi ly’akalamo kabo n’obuyemere bwabo buyimangira oku Kanwa ka Yehova. (3 Yn. 3, 4) Abakozi ba Nnâmahanga b’ene, barhaderha oku bohe bamanyire ngasi kantu koshi kaba omu Bibliya. Hali amango bajira amagosa okubiyerekire enyigirizo zabo n’oku ikubuliro lyabo lilongozibwa. Erhi igosa limanyikana bwinja, banajire okwabo koshi lyo balikubûla. w21.10 buk. 21-22 cif. 11-12

Nka kula enkuta zakag’izunguluka evile za mîra lyo zilanga bacikala bazo, ntyo ko n’emikolo y’obuzigire bwishwekerezi ya Yehova erhuzunguluka ly’erhulanga oku mazibu gakahira obwishwekerezi bwirhu omu marhangulo. Na kandi, obuzigire bwishwekerezi bwa Yehova bunamushumye arhubulule emunda ali. (Yer. 31:3) Omwandisi w’ennanga Daudi akolesize olundi luderho luganirire obulanzi abakozi ba Nnâmahanga bashagalukira. Ayandika ntya: “Nnâmahanga yeba lwakiro lwani, Nnâmahanga onyereka obuzigire bwishwekerezi.” Daudi acibiderha lugenda Yehova ntya: “Yeba buzigire bwishwekerezi bwani na lwakiro lwani, w’ibuye ncifulikaho lirimo omurhula na muciza wani, mpenzi yani n’Ola ncifulikamo.” (Enna. 59:17; 144:2, NWT) Gurhi Daudi ayerekine olushangi luhali egarhi k’obuzigire bwishwekerezi bwa Yehova n’olwakiro n’ibuye ly’okucifulikaho? Ciru rhwakaba rhulamire ngahi, erhi rhwakanaba rhuli bakozi bage, Yehova anarhuha obulanzi boshi rhulagirireko lyo rhugendekera rhwalanga obwîra bwirhu bw’engulo ndarhi rhujira haguma naye. w21.11 buk. 6 cif. 14-15

Erhi Yezu n’abanafunzi bage barhimanana n’omulaba omu nyanja, Yezu akolesa ako kasanzi ly’arhabala abanafunzi bage babone omu kanga kahi bal’ilagirire oku buyemere bunji. (Mt. 8:23-26) Erhi omulaba mudarhi bwenene guli gwagera n’obwarho buli bwahêkwa eyi n’eyi ako kasanzi Yezu ali omw’îro ly’akadodo. Erhi abanafunzi bage bayoboha bwenene bamutula banamubwira oku abacize, Nnawabo abashuza ntya: “Bici birhumire mwayoboha ntya, aba b’obwemere busungunu?” K’oli walwisa “omulaba mudarhi bwenene” omu kalamo kawe? Nkaba ago mazibu gahiziremo okuhikirwa n’obuhanya. Erhi nkaba gwanaba mulaba gwa lwiganyo, nk’obulwala budarhi bukola burhuma waciyumva kubi orhanaciyishi bici wankacijira. Byanahashikana olibuke mango maguma na maguma, cikone orhalekaga oko kulibuka kwarhuma orhalangalira Yehova. Omuyegerere kugerera isala ly’obwalagale. Oseze obuyemere bwawe omu kurhanya lugenda akasanzi Yehova akurhabalagamo omu mango gageraga. (Enna. 77:11) Wanayemera n’obwalagale oku arhakakulekerera buno ciru n’omu mango gayisha. w21.11 buk. 22 cif. 7, 10

Muntu mulebe akacibwizire oku, okubona arhasagirhôla akantu karhali kage, akagiba erhi akenzire er’irhegeko. Cikoki, hali ezindi njira akazimbiremwo. Kwa lwiganyo, omurhimbuzi wakakolesize emirengo erhashinganini erhi mituntume ly’arheba abakliya bage akagiba erhi abazimbire omu njira ndebe. Olwandiko lwa Bene-Levi 19:13 luyerekine olushangi egarhi k’okuzimba n’okurhaba mwikubagirwa omu by’oburhimbuzi, gudesire ntya: “Murhashinganini okupunja owinyu.” Okupunjana omu by’oburhimbuzi ko kunali nka kuzimba. Okubona irhegeko lya kali munani lyalidesire oku okuzimba kuli kubi, amahugûlo gali omu citabu ca Bene-Levi garhurhabire rhuhugûkwe oku rhwakakolesa ebyalidesirwe mw’er’irhegeko. Entanya za Yehova okubiyerekire okurhaba mwikubagirwa n’okurhazimba zanarhulerhera bunguke bunji. Rhwanacidosagya rhwenene ntya: ‘Kushimbana n’entanya ziri omu lwandiko lwa Bene-Levi 19:11-13, ka hali empindûlo nshinganine njire omu kalamo kani lugenda kantu kalebe? K’antanyize oku nshinganine njire empindûlo lugenda oku njira oburhimbuzi erhi enkomêdu zani lugenda omukolo?’ w21.12 buk. 9-10 cif. 6-8

Amango oli wasalira wene, okarhanya oku magosa wajijire omu mulegerege goshi n’okuhûna Yehova obonjo kuli go. Cikoki erhi akaba wajijire ecaha cizibu, byanahûna olonze oburhabale bw’abagula. Banakuyumvirhiza n’okukuha amahano gw’obuzigire garhenga omu Kanwa ka Nnâmahanga. Banasalira haguma na nawe, n’okuhûna Yehova akolese enterekêro Yezu ahânaga ly’ohikira aha ‘wafuma [kiroho].’ (Yk. 5:14-16) Kandi kwanaba kwinja okarhanya oku ngombôlo. Hali amango wakaciyumva kubi amango oli warhanya oku mazibu Mwene Nyamuzinda ageziremo. Cikone, erhi wakagendekera warhanya oku nterekêro Yezu ahânaga, wanazigira Yezu bwenene ciru n’Ishe. Na ngasi mwaka rhunayushule obushagaluke bwirhu lugenda engombôlo, omu kuja oku lusiku lw’Okukengera olufû lwa Yezu n’okulalika abandi nabo balujeko. Luli lukengwa lunene Yehova arhuhîre l’okuyigiriza abandi okubiyerekire Omugala! w21.04 buk. 18-19 cif. 13-16

Orhanye gurhi Yezu ajijire erhi ehitû hy’abantu hilonza okurhimanana naye oku ntondo. Yezu ali amayusa obudufu boshi ali ashenga. Byanahashikana abe alirhamire bwenene, cikone erhi abona ehyo hitû hy’abantu, ayumviza abakenyi n’abalwala balimo obwonjo. Arhali kufumya kone abafumize cikone abajirira ehotuba y’okushumya bwenene yamakajirwa kulusha ezindi zoshi, k’okuderha, Amahubiri g’oku Ntondo. (Lk. 6:12-20) Yezu ahânyire akasanzi kage ly’arhabala abandi. K’orhanyize gurhi Yezu aciyumvirhe erhi ayumva oku omwîra wage Yowane Mubatiza bamutwire irhwe? Ebibliya edesire ntya: “Erhi Yezu ayumva eyo myanzi, [eyerekire okuyirhwa kwa Yowane], arhenga eyo munda, aja omu bwarho mpu aje hâge hâge yene.” (Mt. 14:10-13, Mashi Bible) Cikone ehitû hy’abantu hyahika aho embere ahikeho. (Mk. 6:31-33) Ahugûkwa oku bali omu bulagirire bw’okurhulirizibwa kiroho, na ho n’aho arhondera okuhikiriza ago malagirire.​—Lk. 9:10, 11. w22.02 buk. 21 cif. 4, 6

Gurhi rhushinganine rhujire erhi rhwakahugûkwa oku rhwagokize owirhu mwemezi? Rhushenge Yehova oburhabale. Rhwanamuhûna agishe obushiru bwirhu bw’okulonza rhucibiyumvanya na mwene wirhu. Na kandi rhwanaciha akasanzi k’okucilabiriza rhwenene. Rhwanacidosa rhwenene aga madoso: ‘Kamba mubidu okuyaka obucibone, n’okuhûna obwonjo n’obwirhohye, na ntyo nyumvikane n’owundi? Gurhi Yehova na Yezu bakaciyumva erhi nakarhôla omuhigo g’okujira omurhula na mwene wirhu erhi mwali wirhu?’ Amashuzo girhu kw’ago madoso ganarhushumya rhuyumvirhize Yezu na kugerera obwirhohye rhwanalonza owirhu mwemezi lyo rhujira omurhula naye. Erhi rhujibona mwene wirhu lyo rhuyusa okurhayumvikana kuli egarhi kirhu naye, rhushinganine rhujire ntyo n’iroho ly’obwirhohye. (Ef. 4:2, 3) Rhwanagenda rhubone oyo rhwagokezagya lyo rhuyusa obo burhe boshi bumuli oku murhima. Okengere oku okugalula omurhula egarhi kawe na mwene winyu kuli kwa bulagirire kulusha okulonza okumanya owagwerhe amagosa na ndi orhagagwerhe.​—1 Kr. 6:7. w21.12 buk. 26 cif. 13-16

Yezu aciyumva kubi bulya alimanyire oku bantu banji bamw’olo lugo bali bamayerekana oku barhayumvirhize omwanzi g’Obwami. N’oko kwakarhumire Yeruzalemu asherezibwa na ngasi Muyahudi wakayokosire akahêsirwe bujà. (Lk. 21:20-24) N’eby’okugayisa, nk’oku Yezu ali amaleba, bantu banji bamulahira. Gurhi bantu banji b’emunda olama bayankirira omwanzi g’Obwami? Gurhi wakaciyigiriza kugerera emirenge ya Yezu, erhi akaba bantu basungunu bo bayankirira bwinja okuli oli wabayigiriza? Yehova anashibirire abantu. Emirenge ya Yezu erhukengezize kunganaci Yehova ashibirira abantu. “Arhalonza hajire owahera, ci alonza boshi baciyunjuze.” (2 Pt. 3:9) Ene rhunayerekane oku rhuzigire abalungu birhu omu kugendekera rhwacihâna ly’omwanzi mwinja guhuma oku murhima gwabo.​—Mt. 22:39. w22.01 buk. 16-17 cif. 10-12

Obuyemere bwawe bwagendekera bwayushûka omu kugendekera warhanya oku bintu Yehova amakajirira olubaga lwage n’ebi amakakujirira wenene. Akantu k’obulagirire bwenene, obuzigire bwawe kuli Yehova bwanayushuka bwenene. Kulusha obundi borhere boshi, obuzigire, bwanakushumya orhumikire Yehova, ocihâne ly’omushagalusa, onalembere ngasi marhangulo. (Mt. 22:37-39; 1 Kr. 13:4, 7; 1 Yn. 5:3) Nta kantu kakaba k’obulagirire kulusha okuba n’obuzigire kuli Yehova n’okumuyegera! (Enna. 63:1-7) Okengere oku isala, okuyiga, n’okurhanya biba bigabi by’enterekêro yirhu. Aka Yezu, okalonza ahantu hali akahwenyenye ly’ogeza akasanzi haguma na Yehova. Oyake ebyakarhuma orhasegeza obwenge bwawe kw’ebi oli wayiga. Oshenge Yehova akurhabale okasegeza obwenge oku mikolo y’ekiroho ohizire okujira. Erhi buno wakakolesa bwinja akasanzi kawe, Yehova anakuhe oluhembo lw’akalamo k’emyaka n’emyaka omw’igulu lihyahya.​—Mk. 4:24. w22.01 buk. 31 cif. 18-20

Entanya zirhu zinakashumya ebijiro birhu. Co carhumaga Yezu arhuyigiriza oku rhushinganine rhuyake entanya zakarhuma rhwajira ecaha cizibu. (Mt. 5:21, 22, 28, 29) Rhuba rhulonzize rhushagaluse Larha wirhu w’omu mpingu, k’arhali ntyo? Co cirhumire, kuli kwa bulagirire rhukayaka ho n’aho ngasi ntanya mbi zakarhuyisha omu bukengere! Yezu aderha ntya: ‘Ebirhenga ekanwa, omu murhima birhenga.’ (Mt. 15:18) Kobinali, enderho zirhu zinayerekane binji okubiyerekire oku rhuyosire ekandalala. Co cirhumire ocidose ntya: ‘Ka nandahire okunywerha ciru akaba okuderha okuli kwanderhera amazibu? Erhi akaba ndi mulume erhi mukazi wajire omu buhya, ka nambe masu lyo ntag’ilehya owundi muntu orhali ibanie erhi mukanie? Ka nanyake loshi-loshi enderho ziganirire eby’enshonyi? Ka nanshuze n’obutûdu amango muntu mulebe amangayisa?’ Okurhanya bwenene kw’ago madoso kwanakurhabala. Co cirhumire, erhi akaba rhulonzize rhuhogole obumuntu bwa mîra, rhushinganine rhuyake okukakolesa enderho mbi, okunywerha, n’enderho zirimo eby’okujira eby’enshonyi. w22.03 buk. 5 cif. 12-14

Bala bahûna ihano ahali h’okulinda mpu muntu mulebe ayishe abahanûle, banajire amajambere g’ekiroho kulusha bala barhahûna ihano. Co cirhumire rhukalonza gurhi rhwakahûnamwo ihano. Mangaci rhushinganine rhukahûna abirhu bemezi ihano? Olole hali isharhu rhwakahûnamwo ihano. (1) Mwali wirhu abwire omuhubiri ogwerhe obulenga oku amuluse okw’ifunzo lyage na buzinda amuhûne ihano okubiyerekire oku akakubûla enjira yage y’okuyigiriza. (2) Mwali wirhu ociri mulamba alonzize okugula amapantalo cikone arhang’idosa mwali wirhu okuzire kiroho entanya zage lugenda amapantalo acishoga. (3) Mwene wirhu bamuhe ehotuba ageza oburhangiriza. Anahûna mwene wirhu okola ogwerhe obulenga bw’okugeza ehotuba amuyumvirhize hano aba ali ayigeza omu ntimanano na buzinda amuhe amahano. Ciru na mwene wirhu okola ogwerhe myaka minji ali ageza ehotuba anajira bwinja erhi akahûna ihano bene wirhu bakola bagwerhe obulenga kumulusha na buzinda analikolesa.​—Mig. 19:20. w22.02 buk. 13 cif. 15-17

Yehova aba arhuzigire n’okurhushibirira, nk’oku ayeresagya Yezu obuzigire n’okumushibirira amango arhimananaga n’amazibu omu mukoko gwage hanw’igulu. (Yn. 5:20) Akagihikiriza amalagirire goshi ga Yezu: ag’ekiroho, ag’ekandalala n’ag’omubiri. Kandi Yehova ali mubidu okubwira Omugala oku amuzigire ananamuyemire. (Mt. 3:16, 17) Nta mango Yezu aciyumvirhe kahumba bulya alilangalire oku ensiku zoshi Ishe w’obuzigire ali haguma naye. Aka Yezu, rhweshi rhwacibwinîre obuzigire bwa Yehova omu njira nyinji. Orhanye k’oku: Yehova arhukulwire emwage ananarhuhîre omulala gw’ekiroho gubamw’obuzigire n’ecinyabuguma gurhurhabala rhube n’omwishingo n’okuhikiriza amalagirire girhu g’ekandalala. (Yn. 6:44) Kandi Yehova ali arhuha ebiryo by’ekiroho rhulagirireko lyo rhuba n’obuyemere busêzire. Ananarhurhabale okuhikiriza amalagirire girhu ga ngasi lusiku g’omubiri. (Mt. 6:31, 32) Erhi rhwakakarhanya oku buzigire bwa Yehova kuli rhwe, obuzigire bwirhu kuli ye bunasêra. w21.09 buk. 22 cif. 8-9

Gurhi akalamo kawe kal’iyosire embere orhondere okuyiga Ebibliya haguma n’Abahamirizi ba Yehova? Banji ba muli rhwe barhacisima barhanye gurhi akalamo kabo kal’iyosire. Nkaba entanya zirhu n’obumuntu bwirhu byakag’ibumbwa n’amakanuni g’er’igulu okubiyerekire ebinja n’ebibi. Akaba ntyo, ‘rhwâli mbulabulangalire na mbula-Nyamuzinda en’igulu.’ (Ef. 2:12) Cikoki erhi oyiga Ebibliya, wamanya oku ojira Sho w’omu mpingu okuzigira bwenene. Wahugûkwa oku akaba olonzize okushagalusa Yehova, n’okuba muguma w’omu bakozi bage, oshinganine ojire empindûlo z’obulagirire omu kalamo kawe, omu njira obona ebintu, n’omu ntanya zawe. Nkaba wal’ishinganine ociyigirize okulama kushimbana n’amakanuni gage. (Ef. 5:3-5) Yehova, Mulemi wirhu na Larha w’omu mpingu, yeshinganine ahige olugenzi abantu b’omu mulala gwage bashinganine babe nalo. Anarhuhûnyire oku embere rhubatizibwe, rhushinganine rhujire okwirhu koshi lyo ‘rhuhogola obumuntu bwa mîra haguma n’engeso zabo.’ w22.03 buk. 2 cif. 1-3

Abantu b’ebindi bibuzi banashagalukire okuja aha Kukengera olufû lwa Yezu lyo balola ebyajirwa n’okurhanya oku bulangalire bwabo. Bajira irala ly’okuyumvirhiza ehotuba egera amango g’Okukengera olufû lwa Yezu, bulya ecigabi cinji cayo cinasegeze ebi Kristu na balya 144 000 bayish’irhambula haguma naye bayishijirira bene bantu bishwekerezi omu kasanzi k’Oburhegesi bw’Emyaka Cihumbi. Idako ly’obulongozi bw’Omwami wabo Yezu Kristu, abo bami b’empingu bayishirhabala okuhindula igulu libe paradizo n’okurhabala bene bantu babe bimana. Emiliyoni y’abantu eja aha Kukengera olufû lwa Yezu lyo balola kone ebyajirwa enashagaluke bwenene omu kulola n’okurhanya lugenda amango gayisha gurhi obulebi bw’Ebibliya bwanahikirire, kwa lwiganyo, obulebi buli omu Izaya 35:5, 6; 65:21-23; n’Amafulûlo 21:3, 4. Erhi barhanya gurhi akalamo kabo n’ak’abazigirwa babo kayishiyorha omw’igulu lihyahya, banazibuhye obulangalire bwabo bw’amango gayisha n’okuzibuhya omuhigo gwabo gw’okugendekera kwakolera Yehova.​—Mt. 24:13; Gl. 6:9. w22.01 buk. 21 cif. 5-7

Engombôlo byo bici? Lir’ibeyi Yezu ahânaga ly’alipa ebi Adamu ahezagya. (1 Kr. 15:22) Bulya gurhi rhuba rhulagirire oku ngombôlo? Bulya amakanuni ga Yehova gw’obushinganyanya nk’oku ganayerekinwe omu Irhegeko, galihunyîre oku obuzine bushinganine bulipire obundi. (Lub. 21:23, 24) Adamu ahezize obuzine bwage bwimana. Ly’obushinganyanya bwa Nnâmahanga buhikirizibwa, Yezu ahâna obuzine bwage nterekêro. (Rm. 5:17) Muli ntyo, Yezu ahikira okuba “Larha w’ensiku n’amango” kwa balya boshi bajira obuyemere omu ngombôlo. (Iz. 9:6, Mashi Bible; Rm. 3:23, 24) Obuzigire bwa Yezu kuli Ishe w’empingu, na kuli rhwê, bo bwamushumyagya ahâne obuzine bwage nterekêro. (Yn. 14:31; 15:13) Obwo buzigire bwa Yezu bwamurhabala ahiga okugendekera abêra mwishwekerezi kuhika ebuzinda n’okuhikiriza obulonza bw’Ishe. Yezu ajijire ntyo omu kubêra mwishwekerezi kuhika okufâ kwage. Enyanya z’ebi Yezu ajiraga, omuhigo gwa Yehova gw’aha murhondero kuyerekera bene bantu n’igulu, gwayish’ihikirizibwa. w21.04 buk. 14 cif. 2-3