Mwezi gwa 4

Yezu ayerekine obuzigire bunji erhi aba mubidu okuhâna obuzine bwage erhi rhwe rhurhuma. (Yn. 15:13) Rhurhakahash’ilipa Yehova na Yezu kuli obo buzigire barhuyeresire. Cikone rhwanayerekana kugerera akalamo kirhu ka ngasi lusiku oku rhuvuzire omunkwa. (Kl. 3:15) Abashîge amavurha basima engombôlo bwenene, bulya yoyanahashise okuhikirira kw’obulangalire bwabo. (Mt. 20:28) Kugerera obuyemere bwabo omu nterekêro Yezu ahânaga, Yehova adesire oku bali bashinganyanya anabayemera nka bana bage balere. (Rm. 5:1; 8:15-17, 23) Abantu b’ebindi bibuzi nabo banavuge omunkwa okubiyerekire engombôlo. Bulya bajira obuyemere omu nterekêro Yezu ahânaga, baba bacîre omu masu ga Nnâmahanga, banagwerhe obulangalire bw’okuyish’irhenga “omu malibuko madârhi.” (Maf. 7:13-15) Abantu b’ebyo bigusho byombi banayerekane oku bavuzire omunkwa okubiyerekire engombôlo, omu kukaja aha Kukengera olufû lwa Yezu ngasi mwaka. w22.01 buk. 23 cif. 14-15

Yezu aciyumvirhe kubi bwenene okubiyerekire ebi bamushobekaga byarhumaga anigwa. Bamushobekaga mpu ali muntu ojacira Nnâmahanga: mpu arhakagikenga Nnâmahanga ciru n’izino lyage. (Mt. 26:64-66) Ebyo bamushobekaga byakagimuluma bwenene oku murhima na ntyo alangalira oku Ishe arhaleke bamugayaguze mw’eyo njra. (Mt. 26:38, 39, 42) Yezu amanikwa oku murhi ly’akûla Abayahudi omu buheherere bwago-bwago balimo. (Gl. 3:10) Baliyemire oku barhumikira Amarhegeko ga Nnâmahanga, cikone barhagarhumikiraga ciru n’ehitya. Erhi baleka okugarhumikira, ecaha bayimaga kurhenga emwa Adamu cayushulwakwo obuheherere. (Rm. 5:12) Irhegeko lya Nnâmahanga lyaliyerekine oku omuntu wakaba anajijire cirya caha cakarhumire bamutwira okufâ, alishinganine anigwe. Buzinda omurhumba gwage gwalishinganine okumanikwa oku murhi. (Lush. 21:22, 23; 27:26) Erhi Yezu amanikwa oku murhi, byahashikana kuli el’ishanja lyamulahiraga nalyo liyunguke n’engombôlo ahânaga. w21.04 buk. 16 cif. 5-6

Orhanye gurhi olusiku luzinda lw’akalamo ka Yezu hanw’igulu lwaliyosire. Abasoda b’e Roma bamugwarha banamushurhagula. (Mt. 26:52-54; Yn. 18:3; 19:1) Amataraki bakag’ikolesa lyo bamushurha, gakagiyomola eminyafu oku mubiri gwage. Enyuma z’aho bamuhesa omurhi muzirho bwenene oku mugongo gwakagidw’omuko. Yezu arhondera abulula ogo murhi ly’aguheka emunda bajimumanikira, cikone erhi bali omu njira barhimana muntu muguma, bamuseza oku arhwaze Yezu kw’ogo murhi. (Mt. 27:32) Erhi Yezu ahika aho bamunigiraga, abashombanyi bage bamukomerha emisumari omu maboko n’omu magulu. Obuzirho b’omubiri gwa Yezu bwarhuma halya bakomerherhaga emisumari haja ebihulu. Abîra ba Yezu na nnina balaka bwenene, abarhegesi b’Abayahudi bohe bakamushekera. (Lk. 23:32-38; Yn. 19:25) Yezu alibuzibwa nsa nyinji. Omurhima gwage n’amahaha gage, birhacikag’ikola bwinja n’oko kwarhuma arhaciyisa bwinja. Embere afê ajira isala lizinda ly’okubona ahimire byoshi. Ayinamya irhwê lyage, na ntyo ahâna obuzine bwage. (Mk. 15:37; Lk. 23:46; Yn. 10:18; 19:30) Yezu afâ bunyi-bunyi, omu njira y’amalumwa na yakugayaguzibwa! w21.04 buk. 16 cif. 4

Yezu aganiza entumwa zage nyishwekerezi 11 okubiyerekire ndagano ibirhi: endagano mpyahya n’endagano y’Obwami. (Lk. 22:20, 28-30) Ezo ndagano zahashize ezo ntumwa n’ogundi mubalè gw’abantu okuyish’iba bami na bakuhani omu mpingu. (Maf. 5:10; 14:1) Abashîge amavurha basigîre hanw’igulu bali mw’ezo ndagano zombi, bone balya omugati n’okunywa idivayi aha Kukengera olufû lwa Yezu. Yehova abahire obulangalire bwago-bwago: okuba n’obuzine bw’empingu burhakacifâ burhankanabola, okurhambula haguma na Yezu n’okuba haguma n’abandi bashîge amavurha 144 000 na kulusha byoshi, bayishiba haguma na Yehova Nnâmahanga! (1 Kr. 15:51-53; 1 Yn. 3:2) Abashîge amavurha baba bahugûsirwe oku bashinganine bagendekere babêra bishwekerezi kuhika okufâ.—2 Tm. 4:7, 8. w22.01 buk. 21 cif. 4-5

Bishumusi bibirhi byâli bimanisirwe oku murhi eburhambi bwa Yesu. (Lk. 23:40, 41) Muguma wa muli bo anacibwira Yezu: “Oyishinkengera han’oja omu Bwami bwawe.” (Lk. 23:42) Yezu alimanyire oku Ishe aba wakubabalira, co carhumaga aderha enderho z’okuha obulangalire oyo mushumusi wali hofi kufâ. (Enna. 103:8; Hb. 1:3) Yehova aba mubidu okurhuyumviza obonjo n’okurhubabalira erhi rhwakahungama kobinali ebintu bibi rhwajijire n’okuba n’obuyemere oku rhwanababalirwa ebyaha birhu kugerera omuko gwa Yezu Kristu. (1 Yn. 1:7) Bantu baguma baguma banabone nka Yehova arhakabababalira. Erhi akaba onaciyumve ntyo, wanarhanya kw’aka kanga: Hisanzi hisungunu embere Yezu afê, ayumviza mushumusi muguma obonjo bulya amarhondera okuyerekana obuyemere. Co cirhumire orhanye kunganaci ayumviza obonjo abakozi bage bishwekerezi!​—Enna. 51:1; 1 Yn. 2:1, 2. w21.04 buk. 9 cif. 5-6

Omu kuba mwishwekerezi kuhika ebwa lufû, Yezu ahikiriza bintu binji. Burhangiriza, ayerekana oku Shetani aba munywesi. Yezu ayerekana oku byanahashikana omuntu mwimana abêre mwishwekerezi ciru Shetani akamuhira omu mazibu gahi. Bwa kabirhi Yezu ahâna akalamo kage nka ngombôlo. Olufû lwage lwahashisize bene bantu barhali bimana babe n’obulyo bw’okuyegerera Yehova n’obw’okuyishilama ensiku n’amango. Bwa kasharhu, Yezu ayerekana oku kobinali Yehova yeshinganine okurhambula bene bantu, anakûla izino ly’Ishe kw’izinga. Neci, rhushinganine okubona ngasi lusiku oku lo lusiku lwirhu luzinda l’okuyerekana obwishwekerezi bwirhu! N’erhi rhwakahikira aha rhwafâ, rhwanahashiderha ntya n’obwalagale: “Yehova, najijire okwani koshi lyo ngendekera nabêra mwishwekerezi kuli we, lyo nyereka Shetani oku ali munywesi, lyo mpalira izino lyawe n’ehaki yawe y’okurhambula!” w21.04 buk. 12 cif. 13-14

Enyuma z’okushobeka Yezu n’okumutwira olubanja kw’ebi arhajijire, Yezu ashekerwa, bamushurhagula, na buzinda bamumanika oku murhi gw’amalibuko. Bamukomerha emisumari omu maboko n’omu magulu gage. Ngasi kuyisa na ngasi kuderha ali ayumva amalumwa makali bwenene. Cikone ashinganine aderhe bulya ebi aderha biri bya bulagirire. Rhuciyigirizize masomo manji g’obulagirire kugerera enderho nzinda za Yezu! Rhukengezibwe obulagirire b’okubabalira abandi n’okuyemera oku Yehova naye anarhubabalire. Rhugwerhe olukengwa l’okuba n’omulala gwa bene wirhu na bali birhu baba babidu okurhurhabala. Cikone amango rhulonzize barhurhabale rhushinganine rhubabwire ebi rhulagirireko. Rhuyemire oku Yehova anarhurhabala rhulembere ngasi mazibu gakarhuhikira. Na kandi, rhubwine obulagirire b’okubona ngasi lusiku oku lo lusiku lwirhu luzinda l’okuyerekana obwishwekerezi bwirhu n’okulangalira oku ciru rhwakafâ Yehova anarhufûle. w21.04 buk. 8 cif. 1; buk. 13 cif. 17

Okushimba enshando za Yezu kunarhulongoze ebwa buzine bw’ensiku n’amango. Erhi musole muguma wâli gwerhe birugu binji adosa ebi ashinganine ajire ly’ayishiba n’obuzine bw’ensiku n’amango, Yezu amubwira erhi: “oyishe, onkulikire.” (Mt. 19:16-21) Yezu abwira Abayahudi barhal’iyemire oku ye Kristu ntya: “Ebibuzi byani . . . binankulikire. Mbiha obuzine by’ensiku n’amango.” (Yn. 10:24-29) Rhunayerekane oku rhugwerhe obuyemere muli Kristu omu kujira ebi aderhaga n’omu kuyiga ebi akagijira. Erhi rhwakajira ntyo, rhwanabera omu njira ehêsire ebwa buzine bw’ensiku n’amango. (Mt. 7:14) Kuli kwa bulagirire rhurhang’imanya Yezu embere rhurhondere okushimba enshando zage. ‘Okuhikira okumanya’ Yezu kali kantu rhushinganine okukajira ngasi mango. Erhi rhwakayiga amorherhe gage, entanya zage, n’amarhegeko gage, rhwanahikira aha rhwamumanya bwinja-bwinja. Ciru akaba rhukola rhugwerhe myaka minji omu okuli, rhushinganine rhugenderere rhwacihangana lyo rhuhikira aha rhwamanya Yehova n’Omugala bwinja. w21.04 buk. 4 cif. 9-10

Byanahashikana hali amango entumwa Paolo akagiciyumva kubi lugenda oku alilamire embere abe Mukristu. Rhurhakasomerwa okubona acidesire ye “wa burhanzi” omu banya-byaha! (1 Tm. 1:15) Embere Paolo amanye okuli, akagija lugo oku lundi ly’alibuza Abakristu, akakwêba baguma baguma omu mpamikwa ciru hali n’abandi akagiderha oku bayirhwe. (Ebj. 26:10, 11) Ka wanahashirhanya gurhi Paolo akagiciyumva erhi akarhiganyire omusole Mukristu ababusi bago banigagwa erhi y’erhuma? Paolo akagiciyumva kubi enyanya z’amagosa gage, cikone arhakacishanjire ebyagezire. Ayemera n’obwalagale oku Yezu afîre erhi yerhuma, n’oko kwarhuma ayandika ntya: “Nshôkano ya Nyamuzinda yanjiraga okûla ndi.” (1 Kr. 15:3, 10) Bici oko kwakarhuyigiriza? Okuyemera oku Yezu afîre erhi we orhuma kwanakuhashisa okuba n’obwîra busêzire haguma na Yehova. (Ebj. 3:19) Ebi rhuli rhwajira buno n’omu mango gayisha byo Yehova asegeza k’obwenge, ci arhali amagosa rhwajiraga omu mango ga mîra.​—Iz. 1:18. w21.04 buk. 23 cif. 11

Ciru akaba Bayahudi banji bw’omu mango ga Yezu barhal’ilangalire oku Masiya al’ishinganine afê, olole ebi Amandiko gali erhi galebire okubimuyerekire: “Acihânyire kuhika okufa anaganjirwa omu banyankola-maligo. Abarhwire ebyaha by’omwandu gw’abantu, anasengerera abanya-byaha.” (Iz. 53:12) Oko kuyerekine oku Abayahudi barhagwerhe ecirhumire coshi-coshi c’okusarhala erhi Yezu anigwa nka munyabyaha. Ene, rhwanabula kusarhala erhi rhwakaciyigiriza n’okuhugûkwa bwinja mwanzi mulebe. Oku Mahubiri gage g’oku Ntôndo, Yezu abwira abakagimuyumvirhiza oku bantu baguma na baguma “bakanammuderhera ngasi mabi.” (Mt. 5:11) Shetani yeba nshôko y’obo bunywesi boshi. Anakashumya abashombanyi birhu bayalize emyanzi mibi na ya bunywesi kuli balya babà bazigire okuli. (Maf. 12:9, 10) Rhushinganine rhuyake okuyumvirhiza obo bunywesi buyalizibwa n’abashombanyi birhu. Rhurhakagiyemera obo bunywesi bwarhuyobohya erhi bunyihye obuyemere bwirhu. w21.05 buk. 11 cif. 14; buk. 12 cif. 16

Orhabale omwanafunzi wawe w’Ebibliya akalangalira Yehova. Yezu abwira abanafunzi bage n’obwalagale oku Yehova ayishibarhabala bulya Abazigire. (Mt. 10:19, 20, 29, 30) Okengeze omwanafunzi wawe n’obwalagale oku naye Yehova amurhabala. Wanamurhabala akalangalira Yehova omu kukashenga haguma naye okubiyerekire emihigo yage. Franciszek olama e Pologne, adesire ntya: “Kanji-kanji mwalimu wani akagihira emihigo yani omu masala gage. Erhi nkabona kunganaci Yehova ali ashuza oku masala ga mwalimu wani, nani narhondera okukasalira. Na kabona kunganaci Yehova akagintabala amango nakagibwira bose wani oku ampe oluhusa l’okuja oku ntimanano z’ecigamba n’oku ntimanano nkulu.” Yehova aba ashibirire bwenene abanafunzi birhu b’Ebibliya. Anashagaluke erhi abona omukolo abalimu Bakristu bali bajira lyo barhabala abantu bamuyegere, ananabazigire enyanya z’oko. (Iz. 52:7) Ciru akaba nt’ifunzo ly’Ebibliya oli walongoza muli gano mango, wanarhabala abanafunzi b’Ebibliya bajire amajambere kuhika babatizibwe omu kukalusa abandi bahubiri amango bajilongoza amafunzo g’Ebibliya. w21.06 buk. 7 cif. 17-18

Rhwanayerekana oku rhushagalukire oluhembo lw’okuba n’Akanwa ka Nnâmahanga omu kukakasoma ngasi mango. Rhwanapanga eprograme y’okukasoma Ebibliya ci arhali kukayisoma amango rhugwerhe akasanzi kone. Omu kukaciyigiriza Akanwa ka Nnâmahanga, ngasi mango rhwanaba n’obuyemere buzibuhire. Lubero n’ “ab’obukengere bunji” ba mw’er’igulu, rhugwerhe obuyemere busezire buyimangire oku Kanwa ka Nnâmahanga. (Mt. 11:25, 26) Okuciyigiriza eco citabu citagatifu kwarhumire rhwahugûkwa bulya gurhi igulu ligendekire lyabiha, na bici Yehova arheganyize okujira lugenda aga mabi goshi. Co cirhumire rhuhige okugendekera kwazibuhya obuyemere bwirhu n’okurhabala bantu banji nka bihashikine nabo babe n’obuyemere omu Omulemi wirhu. (1 Tm. 2:3, 4) Na kandi rhugendekere rhwalindirira amango abantu boshi bazine balamire okw’igulu banakakuza Yehova omu kuderha ezi nderho ziri omu Amafulûlo 4:11: “Nnawirhu Nyamuzinda, oshinganine ohâbwe irenge . . . bulya we walemaga ebintu byoshi.” w21.08 buk. 19 cif. 18-20

Nka balungere, abagula bagwerhe omukolo gw’okuhâna ihano amango hali obulagirire bw’okujira ntyo. Bagwasirwe bajire okwabo koshi lyo bahâna ihano lishinganine, ly’okushumya na lya ‘kusîmîsa omuntu.’ (Mig. 27:9, Mashi Bible) Abagula baba bazigire bene wabo na bali babo. Hali amango bayerekana obo buzigire omu kugend’ihanûla muntu mulebe walikola ali hofi aje omu njira mbi. (Gl. 6:1) Embere omugula aj’ihanûla muntu mulebe, ashinganine arhanye oku bintu biguma na biguma Paolo adesire okubiyerekire obuzigire. Paolo aderha ntya: “Obuzigire buba bwa kulembera na bwinja. . . . Bunabwikire ebintu byoshi, bunayemere ebintu byoshi, bunalangalire ebintu byoshi, bunalembere ebintu byoshi.” (1 Kr. 13:4, 7, NWT) Okurhanya kuli eyo milongo erimw’olo lwandiko kwanarhabala omugula ahugûkwe bici bimushumize ly’ajihâna ihano n’okugend’ibona mwene wirhu erhi anagwerhe entanya nyinja. Erhi oyo wahâbagwa ihano akabona oku omugula amushibirire, anaba mubidu okuliyemera. w22.02 buk. 14 cif. 3; buk. 15 cif. 5

Yehova alema abana bage b’ekiroho n’aba bene bantu, boshi bali bimana, barhali kw’izabyo lyoshi-lyoshi. Cikone Shetani (kw’okuderha “Mugoma”) ashumya Adamu na Eva, nabo bagomera Nnamahanga. Abandi bamalahika na bene bantu nabo bamushimba mw’obo bugoma bwage. (Yd. 6) Yehova aciyumva oku bamamulenganya. Cikone alembera, anacigendekire alembera kuhika amango ashereza abo bagoma gahike. Oko kwayish’irhuliriza n’okugisha abakozi bage bishwekerezi bagendekire balembera akage obubi buli mw’er’igulu! Shetani ashobeka omukozi mwishwekerezi wa Yehova wakag’ihamagalwa Ayubu, aderha oku abakozi ba Yehova boshi banamukolere bulya abahîre ecituliro. (Ayu. 1:8-11; 2:3-5) Kuhika buno Ibilisi acigendekire ashobeka bene bantu. (Maf. 12:10) Rhwanajira okwirhu koshi lyo rhuyereka Shetani oku oko aderhaga kurhaba kw’okuli omu kulembera amazibu girhu n’omu kubera bishwekerezi kuli Yehova bulya rhumuzigire. w21.07 buk. 9 cif. 7-8

Entumwa Paolo akolesize olwiganyo lwinja ly’arhuyigiriza obulagirire bw’okujira empindûlo omu kalamo kirhu. Ayandika oku rhushinganine rhukomerhe obumuntu bwirhu bwa mîra mw’emisumari “oku murhi.” (Rm. 6:6, NWT) K’okuderha oku rhulonzize rhuyige olwiganyo lwa Yezu. Rhushinganine rhuyake entanya n’ebijiro Yehova ashomba. Okujira ebyo bintu kone kwakarhuma rhwaba n’ezamiri zicîre n’okuba n’obulangalire bw’okuyish’ishagalukira akalamo ensiku n’amango. (Yn. 17:3; 1 Pt. 3:21) Yehova arhakashanja amakanuni gage ly’arhushagalusa. Lubero n’oko, rhushinganine rhushanje oku rhuba rhuyosire n’okulama kushimbana n’amakanuni gage. (Iz. 1:17, 18; 55:9) Ciru n’enyuma z’okubatizibwa, oshinganine ogendekere walwisa irala lyawe ly’omubiri. Okahûna Yehova oburhabale, olangalire iroho lyage, ci orhalangaliraga obuhashe bwawe wenene. (Gl. 5:22; Fl. 4:6) Rhushinganine rhucihangane lyo rhuhogola obumuntu bwirhu bwa mîra n’okurhacibuyambala. w22.03 buk. 6 cif. 15-17

Yehova alaganyize oku erhi rhwakahira Obwami oku nafasi ntanzi n’erhi rhwakalama nk’oku amakanuni gage gadesire, anarhuhâ ebiryo, emishangi, n’aharhwakalama. (Mt. 6:33) Erhi rhwakakakengera ntyo, rhwanayaka okukarhanya oku ebintu by’omubiri er’igulu lihâna byanarhuma rhwaba n’omurhula n’omwishingo gw’ensiku zoshi. Rhuyishi oku enjira nguma yone rhwakabamwo n’omurhula gw’ekandalala kuli kujira obulonza bwa Yehova. (Fl. 4:6, 7) Ciru ankaba rhugwerhe obuhashe bw’okugula bintu binji, rhwanacidosa erhi rhugwerhe emisi y’okukabikolesa. Rhushinganine rhukengere oku Nnâmahanga arhuhire omukolo gw’okujira omu mulala gwage. Kw’okuderha oku rhurhashinganini rhuhikire aha rhwabula kuba masu. Kobinali, rhurhalonzizi rhube nka gulya musole gwalahiraga obulyo gwahâbagwa bw’okukolera Yehova, n’okuba muguma w’omu bana bage balere, bulya alicishwekire oku birugu bya hanw’igulu!​—Mk. 10:17-22. w21.08 buk. 6 cif. 17

Omu kuyiga Amandiko, wanabona obumuntu n’amorhere ga Yehova; ago morhere go n’ago go gabonekana kugerera obulemi. Okuyiga amorhere ga Yehova kunarhuyemeze n’obwalagale oku hw’aba. (Lub. 34:6, 7; Enna. 145:8, 9) Oku wagendekera wamanya Yehova bwinja-bwinja, ko wanagendekera waba n’obuyemere buzibuhire muliye, ko n’obuzigire bwawe kuli ye bwayushuka, ko n’obwîra bwawe haguma naye bwasêra. Okaganirira abandi enyanya z’obuyemere bwawe muli Nnâmahanga. Cikone gurhi wakajira erhi oyu oli waganiza akakudosa idoso liyerekine oku agwerhe akarhinda lugenda okubaho kwa Nnâmahanga, orhanamanyiri gurhi wakamushuza? Olonze ishuzo ly’Ebibliya omu citabu cirhu cilebe na buzinda wanaliganirira oyo muntu. Na kandi wanabwira owundi Muhamirizi okuzire kiroho okurhabale. Oyu wajiganiza ayemere ishuzo wamuha erhi alilahire, wanayunguka bwenene okubona wajijire obo busagasi. Obuyemere bwawe bwanagendekera bwazibuha. w21.08 buk. 18 cif. 14-15

Rhurhahûnyirwi okuleka ebintu byoshi lyo rhusimisa Yehova. (Muh. 5:19, 20) Cikone, erhi rhwakaleka okujira binji omu mukolo gwa Yehova mpu bulya rhurhalonzizi okuleka bintu bilebe, rhwanahikira aha rhwarhogera omu murhego guli nka gulya mulume muguma oganirirwe omu lwiganyo Yezu ahânaga arhogeragamo; oyo mulume alonza okulama akalamo kinja bwenene cikone ayibagira Nnâmahanga. (Lk. 12:16-21) Erhi amazibu garhuhikira, rhunasalire n’okukolesa obuhashe bwirhu bw’okurhanya lyo rhubona ebi rhushinganine rhujire. (Mig. 3:21) Yehova anakarhugisha omu njira nyinji bwenene. Rhwanayerekana kunganaci rhuba rhushagalukire eyo migisho, omu kujira okwirhu koshi lyo rhukuza Nnâmahanga. (Hb. 13:15) Okujira ntyo kuhiziremo okujira binji omu mukolo gwirhu gw’amahubiri, n’oko kwanarhuma rhwahâbwa migisho minji. Ngasi lusiku rhukalonza enjira ‘rhwakalabulamwo n’okubona oku Yehova aba mwinja.’ (Enna. 34:8) Erhi rhwakajira ntyo, rhwanayiga Yezu waderhaga ntya: “Ebiryo byani kuli kujira obulonza bw’owantumaga n’okuyukiriza omukolo gwage.”​—Yn. 4:34. w21.08 buk. 30-31 cif. 16-19

Shetani aba alonzize rhube n’obucibone burhalusire olugero. Ayishi oku erhi rhwakacilekerera rhurhegekwe n’obucibone burhalusire olugero, rhwanaba akage na ntyo rhwanayishibula obuzine bw’ensiku n’amango. Oko ko kwarhumaga Paolo arhurhonda, oku omuntu anajamw’ “obucibone na ntyo atwirwe olubanja luli nk’olu Ibilisi atwiragwa.” (1 Tm. 3:6, 7, NWT) Oko kwanahikira ngasi muguma wirhu, rhube rhuciri bahyahya omu okuli erhi rhube rhukola rhugwerhe myaka minji rhuli rhwakolera Yehova. Obucibone ko bunaba nka kucizigira wenene. Shetani analonze rhube bakucizigira rhwenene omu kusegeza obwenge bwirhu oku bunguke bwirhu rhwenene kulusha okubusegezako Yehova, ci bwenene amango rhuli omu mazibu ly’alonza rhujire ntyo. Kwa lwiganyo, ka bakola bakushobesire ebi orhajijire? K’okola ojirirwe okurhashinganini? Shetani anasima ohikire aha wagaya Yehova erhi bene winyu. Na kandi Ibilisi analonza orhanye oku ly’okubûla ebintu, oshinganine ojire ebintu nk’oku onalonzize ahali hw’okukulikira obulongozi Yehova ahanyîre omu Kanwa kage.​—Muh. 7:16, 20. w21.06 buk. 15 cif. 4-5

Yehova aha omulebi Hageyo omukolo gw’obulagirire gw’okujira. Byanahashikana Hageyo ali w’omu bagalukaga e Yeruzalemu kurhenga e Babiloni omu mwaka gwa 537 Embere za Kano Kasanzi Kirhu (E.K.K.K.). Kasanzi kasungunu enyuma z’abo bakozi ba Yehova bishwekerezi okuhika e Yeruzalemu, barhondera okuyubaka enyumpa ya Yehova, erhi hekalu. (Ezr. 3:8, 10) Cikone, erhi bayus’irhondera ntya, ebintu byashanja. Enyanya z’okuhagalikwa, bavunika omurhima banaleka okuyubaka. (Ezr. 4:4; Hag. 1:1, 2) Na ntyo, omu mwaka gwa 520 Embere za Kano Kasanzi Kirhu (E.K.K.K.), Yehova arhûma Hageyo oku aj’ibaha omurhima bashubirire obubasi bw’enyumpa yage n’okuyiyusa. (Ezr. 6:14, 15) Omwanzi gwa Hageyo gwali gwa kurhabala Abayahudi bazibuhye obuyemere bwabo muli Yehova. Oluderho “Yehova w’emirhwe” lwalikwanine luhe Abayahudi omurhima. Yehova ajira omurhwe munene bwenene gwa bamalahika babà idako ly’obulongozi bwage. Co cirhumire, Abayahudi balikwanine bamulangalire lyo bahikiriza ogo mukolo. w21.09 buk. 14-15 cif. 4-5

Ene, Abahamirizi ba Yehova bw’omw’igulu lyoshi bacibwinire ecinyabuguma n’obuzigire bajiranako. Kulusha ebindi bigamba b’idîni byoshi, ecinyabuguma cirhu cirhabamo kabôlo k’ishanja, k’irangi ly’omubiri erhi ka bûko. Rhunacibonere rhwene n’obwalagale oku rhuba rhuzigirine, amango g’entimanano zirhu z’ecigamba n’entimanano zirhu nkulu. Ebyo rhucibonera oku ntimanano zirhu binaseze ebirhuyemeza n’obwalagale oku enterekêro yirhu eba eyemirwe na Yehova. (Yn. 13:34) Amandiko garhubwizire oku ‘rhuzigirane rhwêne na nnene.’ (1 Pt. 4:8) Njira nguma rhwakayerekanamwo oku rhuba rhuzigirine kuli kukababalira abandi n’okulembera okurhaba bimana kwabo. Na kandi rhunalonze obulyo bw’okuba bahânyi n’okuyegereza abantu boshi omu cigamba ciru na balya barhugokize. (Kl. 3:12-14) Obuzigire bwa ntyo co ciba cimanyiso cikulu c’Abakristu b’okuli. w21.10 buk. 22 cif. 13-14

K’okutenga omunyabyaha orhaciyunjuzizi kwanamurhabala ashanje olugenzi lwage? Neci kwanamurhabala. Banji ba bala barhogire omu caha cizibu, bahikire aha bahugûkwa oku omuhigo muzibu-zibu abagula barhôlaga enyanya zabo gwabarhabire bahugûkwe oku kubi bakagijira, n’oko kwarhuma bashanja olugenzi lwabo, kwanabarhabire bacibigalukira Yehova. (Hb. 12:5, 6) Rhuganirire lwiganyo luguma. Lungere abone oku cibuzi ciguma c’omu bibuzi byage cilwazire. Amanyire oku ly’acibuka eyo ndwala bihûnyire aciyegule n’ebindi bibuzi erhi n’obuso. N’obu ayishi oku ebibuzi biba byakulama omu buso, nka birhalamiri omu buso byanalwala omuzungwe bulya biba bikomire okulama haguma. K’okuyegula eco cibuzi kuyerekine oku ali muminya erhi mukali? Nanga ciru n’ehitya. Amanyire oku erhi akalekera eco cibuzi cilwazire haguma n’ebindi bibuzi, eyo ndwala yanayahukira obuso boshi. Omu kuyegula eco cibuzi cilwazire, analange obuso boshi. w21.10 buk. 10 cif. 9-10

Luli lukengwa bwenene okuba baguma b’omu mulala gw’obuzigire gwa bene wirhu na bali birhu b’omw’igulu lyoshi. Rhuba rhulonzize bantu banji bwenene nk’oku byakanahashikana bacilunge haguma na nirhu omu kuharamya Nnâmahanga wirhu. Co cirhumire, rhushinganine rhube masu lyo rhurhagijira akantu koshi-koshi kakarhuma rhwaheza irenge ly’olubaga lwa Nnâmahanga erhi lya Larha wirhu w’omu mpingu. Rhunacihangane okuba n’olugenzi lwakashumya abantu bayemere omwanzi mwinja. Bantu baguma na baguma banarhugayaguza erhi ciru kurhuhagalika bulya rhuli rhwarhumikira Larha wirhu w’omu mpingu. Gurhigi rhwakajira erhi rhwakayumva ehy’oboba amango rhuli rhwaganirira abandi okubiyerekire obuyemere bwirhu? Rhwanalangalira oku Yehova n’Omugala barhurhabala. Yezu abwizire abanafunzi bage oku barhashinganini bakayoboha enyanya z’ebi baderha na gurhi babiderha. Bulya gurhi? Yezu ahugûla ntya: “Ebi mwaderha mwabihabwe muli ako kasanzi, bulya arhali mwe mwaderha, ci iroho litagatifu lya Sho lyo lyaderha kugerera mwe.”​—Mt. 10:19, 20, NWT. w21.09 buk. 24 cif. 17-18

Musa akolesize oluderho lw’olwiganyo lushushine n’olo lugenda olwakiro. (Enna. 90:1, NWT; amahugûlo g’idako) Hisanzi hisungunu embere Musa afê, aderha ezindi nderho z’okuhâna omurhima. Ayandika ntya: ‘Ayorha aba lwakiro, Nyamuzinda omu nsiku za mîra, anacikazikushumbiriza amaboko gage g’ensiku n’amango.’ (Lush. 33:27) Bici omusemwa gudesire oku “anacikazikushumbiriza amaboko gage g’ensiku n’amango” gurhubwizire lugenda Yehova? Bulya Yehova aba Lwakiro lwirhu, rhunaciyumve rhuli omu murhula. Cikone, hali amango rhuyumva rhuvunisire omurhima bwenene n’okuyumva ezo ntanya za ntyo zirhahwiri duba-duba. Bici Yehova arhujirira muli ako kasanzi? (Enna. 136:23) Anarhuhireko amaboko gage, arhuyimanze bunyi-bunyi n’okurhurhabala rhucibiyimanga na gombi. (Enna. 28:9; 94:18) Okumanya oku rhushinganine rhukalangalira oburhabale bwa Nnâmahanga kunarhurhabale rhukakengera oku anarhugishe muli ezi njira ibirhi. Burhangiriza, anarhurhabale rhuciyumve rhuli omu murhula rhunali omu lwakiro lw’okunali ciru ankaba rhulamire ngahi. Bwa kabirhi, Larha wirhu w’omu mpingu aba arhushibirire bwenene. w21.11 buk. 6 cif. 15-16

Yezu alimanyire oku abanafunzi bage balagirire oku buyemere lyo balwisa amazibu g’obubule bw’obushinganyanya. Ly’abarhabala bwalwise oko, abaha olwiganyo luli omu citabu ca Luka. Yezu aganirira olwiganyo lwa mukana muguma walonzagya ahabwe obushinganyanya agendikalakira burhahusa muzuzi muguma orhali mushinganyanya. Aliyemire n’obwalagale oku okujikalakira oyo muzuzi burhahusa kwamulerhera obunguke. Buzinda bw’aho, oyo muzuzi amujirira nk’oku anakagimuhûna. Isomo lici rhukuzire aho? Yehova arhaba mubule w’obushinganyanya. Co carhumaga Yezu aderha ntya: “Ka Nnâmahanga abishogwe bage bamubirikira buca-buyira arhabatwira olubanja?” (Lk. 18:1-8) Buzinda Yezu ayushula nya: “K’amango Mwene-omuntu ayisha anashimane obuyemere en’igulu?” Amango rhuli rhwalwisa obubule bw’obushinganyanya, rhushinganine rhuyerekane kugerera okulembera oku rhugwerhe obuyemere busêzire buli ak’ob’oyo mukana. Omu kuba n’obuyemere bwa ntyo, rhwanayemera n’obwalagale oku Yehova agendekera arhurhabala. Na kandi rhushinganine rhuyemere obuhashe bw’isala. w21.11 buk. 23 cif. 12; buk. 24 cif. 14

Mwe misole, ka hali amango muciyumva nk’amakanuni ga Yehova gamushwesire? Ntyo ko Shetani alonzize mukarhanya. Aba alonzize mukasegeza obwenge bwinyu kw’ebi abali omu njira ngali bali bajira, bulya bali babonekana nka bagwerhe akalamo kinja. Anakolesa ebi eyinyu misole y’emasomo eri yajira erhi kugerera ebi mubona oku Enternete ly’omuciyumva nka hali akantu k’okucishagalusa mubuzire. Shetani aba alonzize okarhanya oku amakanuni ga Yehova gaba gamuhanzize okushagalukira akalamo nk’oku mulonzize. Cikone mukengere ntya: Shetani arhaba alonzize abali balambagira omu njira ngali babone ebyayishibahikira oku buzinda. (Mt. 7:13, 14) Lubero n’oko, Yehova amuyeresire ebintu binja arheganyize abagendekire babêra omu njira ehêsire ebwa buzine.​—Enna. 37:29; Iz. 35:5, 6; 65:21-23. w21.12 buk. 23 cif. 6-7

Rhuyishi oku rhushinganine rhukababalira abandi, n’ako kali kantu kinja rhwakajira. Cikone kwanaba kuzibu okujira ntyo. Nkaba hali amango entumwa Petro nayo yakagiyabirwa okujira ntyo. (Mt. 18:21, 22) Bici byakarhurhabala lyo rhuhash’ibabalira abandi? Burhangiriza, orhanye kunganaci Yehova akubabalire. (Mt. 18:32, 33) Rhurhaba rhushinganine obonjo bwage, cikone anarhubabalire n’obulonza. (Enna. 103:8-10) Co cirhumire, “kukwanine nirhu rhuzigirane.” Na ntyo okubabalira abandi l’ir’irhegeko, rhushinganine rhukababalira. Rhujira ideni ly’okubabalira bene wirhu na bali birhu. (1 Yn. 4:11) Bwakabirhi, orhanye oku bintu byakahika erhi rhwakakababalira abandi. Rhwanaba erhi rhurhabire oyo muntu warhugokezagya, rhwanajira ecigamba cibe n’ecinyabuguma, rhwanalanga obwîra bwirhu haguma na Yehova, na kandi rhwanarhula ogo muzigo muzirho. (2 Kr. 2:7; Kl. 3:14) Buzinda, rhukashenga Olya orhuhûnyire oku rhukababalira abandi. Orhahâga Shetani engwarhiro y’okuyusa omurhula oshagalukira guba egarhi kawe na bene winyu. (Ef. 4:26, 27) Rhulagirire oku burhabale bwa Yehova lyo rhurhagikarhogera omu murhego gwa Shetani. w21.06 buk. 22 cif. 11; buk. 23 cif. 14

Daudi akag’icifulika ly’ayasa obuzine bwage. Mwami Saulu w’e Israheli, al’ihizire oku kuhika amunige. Erhi Daudi ali omu bulagirire bw’okulonza ebi alya, aja omu lugo lw’e Nobi, ahûnamo migati irhanu. (1 Sam. 21:1, 3) Enyuma z’aho, Daudi n’abantu bage bagend’icifulika omu lwala. (1 Sam. 22:1) Bulya gurhi Daudi ahikiragamw’ako kanga? Saulu ayumviza Daudi obumvu bwenene bulya bantu banji bal’izigire Daudi n’abasoda bage bakag’ihima amavita. Na kandi Saulu al’imanyire oku okurharhumikira kwage kwarhumire Yehova amulahira n’oku acishozire Daudi oku ye mwami wayish’irhegeka ahali hage. (1 Sam. 23:16, 17) Cikone, bulya Saulu ye waciri mwami w’e Israheli, al’igwerhe basoda banji, na bantu banji bakag’imulunga okuboko, co carhumaga Daudi acifulika ly’ayasa obuzine bwage. Ka Saulu akag’irhanya oku okujira ntyo kwarhuma Nnâmahanga arhahikiriza omuhigo gwage lugenda Daudi? (Iz. 55:11) Ebibliya erhadesiri ntyo, cikone hali akantu rhwakayemera n’obwalagale: Saulu acihira yene omu mazibu. Abalonza okulwisa Yehova kuhimwa bahimwa ngasi mango! w22.01 buk. 2 cif. 1-2

Yezu akagikola bwenene omu mukolo gw’amahubiri. Akagiyerekana oku azigire abantu omu kugendekera abayigiriza omu ngasi bulyo. (Lk. 19:47, 48) Bici byakagimushumya ajire ntyo? Yezu akagibayumviza obwonjo. Hali amango abantu balonzagya okuyumvirhiza Yezu n’abanafunzi bage kuhika “babula amango g’okulya.” (Mk. 3:20, Mashi Bible) Na kandi Yezu akagiba mubidu okujiyigiriza abantu budufu, mango galishinganine kuli muntu muguma w’omu bumvirhiza bage. Bantu banji b’omu bayumvirhizagya Yezu embere barhabaga banafunzi bage. Cikone ngasi boshi bayumvirhe ebi ali ayigiriza bahâbirwe obuhamirizi. Ene nalyo rhulonzize okuha ngasi muntu obulyo bw’okuyumvirhiza omwanzi mwinja. (Ebj. 10:42) Lyo rhuhikira aho, rhushinganine rhujire empindûlo lugenda omukolo gwirhu gw’amahubiri. Ahali h’okuhubiri kushimbana n’eprograme erhushinganine, rhwanaba babidu okujira empindûlo omu programe yirhu y’okuhubiri amango kwakaba kulembu okurhimanana n’abantu. Erhi rhwakajira ntyo, rhwanayemera n’obwalagale oku rhwanashagalula Yehova. w22.01 buk. 17 cif. 13-14

Ene abantu banabone oku kuli kuzibu okulangalira ngasi yeshi ogwerhe bukulu bulebe. Babwine oku abatwi b’emanja n’abakulu b’epolitike banakayereka abagale enzigirizi n’okuyima abakenyi obushinganyanya. Na kandi, bakulu b’amadîni baguma na baguma banakajira ebintu bibi, n’oko kwarhumire bantu baguma na baguma barhacilangalira Nnâmahanga. Co cirhumire erhi omuntu ayemera okuyiga Ebibliya haguma na nirhu, kurhaba kulembu okumurhabala ly’azibuhya obulangalire bwage muli Yehova na muli bala ali akolesa lyo barhulongoza omu cigabi ca hanw’igulu c’ikubuliro lyage. Kobinali, arhali abanafunzi b’Ebibliya bone bashinganine okulangalira Yehova n’ikubuliro lyage. Ciru na bala ba muli rhwe bakola bagwerhe myaka minji bali bakolera Yehova barhashinganini baheze ebibayemezize oku enjira Yehova ajiramwo ebintu eba nyinja ensiku zoshi. Hali kanga kaguma na kaguma karhuhikira kakahira obulangalire bwirhu muli Yehova omu marhangulo. w22.02 buk. 2 cif. 1-2.