Mwezi gwa 5

Obuzigire bwa Yehova kuli rhwê, bwamushumya ayandikise Injili ini omu Bibliya lyo rhuhikira aha rhwamanya Omugala bwinja. E Injili ziba ziganirire akalamo ka Yezu n’omukolo gwage. Emyanzi eri omo enarhuganirire ebi Yezu akagiderha, ebi ajijire, na kandi erhuhugûlire gurhi akagiciyumva. Ebyo bitabu bini binarhurhabale ‘okukengêra’ olwiganyo lwa Yezu. Rhwanaderha oku ebyo bitabu bibamo enshando Yezu arhulekire oku rhukulikire. Co cirhumire erhi rhwakagendekera rhwayiga ebitabu by’e Injili, rhwanahikira aha rhwamanya Yezu bwinja. Okujira ntyo kwanarhurhabala rhushimbe enshando zage. Lyo rhuyunguka n’ebiri mw’ezo Injili, rhushinganine rhujire bintu binji kulusha okuzisoma kone. Rhushinganine rhukaciha akasanzi kw’okukaziyiga bwinja-bwinja n’okukazirhanyako bwenene. (Oshushanye na Yozwe 1:8, mahugûlo g’idako.) Obe nk’oli aha ebiganirirwe mw’ogo mwanzi gw’e Injili biri byajirikana. Okolese obuhashe bwawe bw’okubona ebintu omu bwenge ly’obona, n’okuyumva ebiri byajirikana, n’okuciyumva nk’oku omuntu oganirirwe mw’ogo mwanzi akagiciyumva. Ly’ohikira okujira ntyo, wanajira obusagasi omu bitabu ikubuliro lya Yehova lyarheganyize. w21.04 buk. 4-5 cif. 11-13

Myaka minji embere Yezu ayishe okw’igulu, Yehova ali erhi ayerekine omu Luderho lwage oku Masiya akaguzibwe nsaranga 30. (Zak. 11:12, 13) Owakalenganyize Yezu, akabire muguma w’omu bîra bage ba hofi-hofi. (Enna. 41:9) Omulebi Zakariya naye ayandika ntya: “Yirha lungere, ebibuzi bishandâbane hoshi hoshi.” (Zak. 13:7) Ahali h’okusarhazibwa n’ebyo byajirikanaga, obwemere bw’abantu birhohye bwasêra omu kubona oku Yezu amahikiriza obo bulebi boshi. Ka rhuli rhwabona amazibu gashushine n’ago ene? Neci. Muli kano kasanzi kirhu Bahamirizi baguma na baguma bali baleka okuli babe bagoma, banali balonza okuhindula abandi nabo babe bagoma. Bayalizize emyanzi erimo ehy’okuli, n’eyindi eyunjwire bunywesi oku biyerekire Abahamirizi ba Yehova banajire ntyo kugerera amaradiyo n’e enternete. Cikone ebyo byoshi birhasarhaza abantu birhohye. Lubero n’oko, babà bahugûsirwe oku Ebibliya yali erhi yalebire oku ebyo byoshi byanahikirire muli gano mango girhu.​—Mt. 24:24; 2 Pt. 2:18-22. w21.05 buk. 11 cif. 12; buk. 12-13 cif. 18-19

Amandiko gayerekine n’obwalagale oku obumanye bw’okunali bunayushûke lusiku oku lundi. (Kl. 1:9, 10) Yehova anafulûle okuli bunyi-bunyi, rhunashinganine rhulindirire kuhika obulangashane bw’okuli bube kalengerere. Erhi bene wirhu bali barhulongoza bahugûkwa oku rhushinganine rhujire empindûlo lugenda oku rhwal’ihugûsirwe kantu kalebe, barharhindira okukubula ako kantu. Ciru akaba madîni manji gacihamagala ga Cikristu ganakajira empindûlo lyo gashagalusa abemezi bago erhi lyo bajira obwîra n’igulu, empindûlo zijirwa omw’ikubuliro lya Yehova zinakarhurhabala rhuyegere Nnâmahanga n’okushimba olwiganyo lw’okuharamya Nnâmahanga Yezu arhondezagya. (Yk. 4:4) Empindûlo rhujira zirhashimba okw’igulu lidwirhe, rhurhanazijira mpu lyo rhusimisa abantu, cikone rhunajire empindûlo kushimbana n’oku rhwahugûsirwe bwinja Amandiko. Rhuba rhuzigire okuli!​—1 Ts. 2:3, 4. w21.10 buk. 22 cif. 12

Bici wakajira amango oli waciyumva oli kahumba? Osegeze obwenge kw’ebi Yehova ali ajira ly’akurhabala. (Enna. 55:22) Okujira ntyo kwanakurhabala ogenderere waba n’entanya nyinja kuyereker’akanga olimo. Orhanye kunganaci Yehova ali arhabala bene wirhu na bali birhu bakaciyumva bali kahumba. (1 Pt. 5:9, 10) Mwene wirhu Hiroshi, wajiraga myaka minji ali Muhamirizi yene omu mulala gwage, adesire ntya: “Okuhungûkwa oku ngasi muguma wirhu anakajira okwage koshi ly’akolera Yehova kwanaha omurhima bala ba muli rhwê babà bone omu okuli.” Kandi, obe n’enkomêdu nyinja y’okujira ebintu by’ekiroho. Eyo nkomêdu ehiziremo okubwira Yehova n’obwalagale oku oli waciyumva. Okasoma Akanwa ka Nnamahanga ngasi lusiku n’okurhanya oku myanzi eyerekine kunganaci Yehova akuzigira. Bakristu baguma na baguma banabike omu bukengere bwabo Amandiko gakabaha oburhulirize, kwa lwiganyo olwandiko lwa Ennanga 27:10 n’olwa Izaya 41:10. Abandi babwine oku okuyumvirhiza e anrejistrema y’ecitabu bali bayigiramo amango bali barheganya entimanano erhi amango bali basoma Ebibliya kunabarhabale barhaciciyumvagya bali kahumba. w21.06 buk. 9-10 cif. 5-8

K’oli walaka enyanya z’okufirwa n’omuzigirwa wawe? Olonze akasanzi k’okuseza obuyemere bwawe omu bulangalire bw’obufûke omu kusoma emyanzi eri omu Bibliya eganirire abantu bafûzirwe. K’oli walaka enyanya z’okubona hali omuntu w’omu mulala gwawe watenzirwe? Osome ly’obona ebikuyemezize oku ensiku zoshi enjira Nnâmahanga ahânamw’obuhane eba nyinja. Ciru wakarhimanana na mazibu gahi, okolese ako kasanzi omu kuseza obuyemere bwawe. Obwire Yehova oku oli waciyimva koshi. Orhakagiciyegula n’abandi, lubero n’oko ogendekere wayegera bene winyu na bali binyu. (Mig. 18:1) Ojire oku mikolo yakakurhabala olembere, ciru ankaba oli wayijira onali walaka erhi omu mirhenge. (Enna. 126:5, 6) Ogendekeze eprograme yawe y’okusoma Ebibliya, okuja oku ntimanano n’okuja omu mahubiri. Ogendekere warhanya oku migisho minji Yehova akurheganyize. Omu kubona kunganaci Yehova ali akurhabala, obuyemere bwawe bwanagendekera bwasêra. w21.11 buk. 23 cif. 11; buk. 24 cif. 17

Omu njira nci abanafunzi ba Yezu babà nka “bana barhorho”? Bandi igulu libona oku bali ba bulagirire? Bagale, bantu bamanyikine bwenene erhi bantu bagwerhe buhashe bunji. Lubero n’oko, abanafunzi ba Yezu banakabonekana nka barhali ba bulagirire, “bana barhorho” ba busha-busha. (1 Kr. 1:26-29) Cikone Yehova yehe arhababona ntyo. Bici byashumyagya Yezu aganire okubiyerekire “aba bana barhorho”? Abanafunzi bage bali bamamudosa ntya: “Ndi wankaderha mukulu omu Bwami bw’empingu?” (Mt. 18:1) Bayahudi banji ba mw’ago mango bakagibona oku okuba n’ecêyo erhi cikono cilebe oku kuli kwa bulagirire bwenene. Muntu muguma w’obwenge (savant) adesire ntya: “Omu kalamo kabo koshi, abalume bakagilongereza olukengwa, okumanyikana, okuhâbwa irenge, erhi kuyemerwa n’abandi.” Yezu alimanyire oku abanafunzi bage balishinganine bajire okwabo koshi lyo bakula omu murhima gwabo er’iroho ly’akamashigwe lyali omu nkomêdu z’Eciyahudi bakuliragamo. w21.06 buk. 20 cif. 2; buk. 21 cif. 6, 8, 9

Paolo arhulekire olwiganyo lwinja nka mugula. Kwa lwiganyo, erhi bene wabo b’e Tesalonika bali omu bulagirire bw’okuhâbwa ihano, Paolo arharhindiraga okubahalyo. Cikone, omu maruba gage, burhangiriza Paolo arhang’ibavuga omunkwa oku mukolo gwabo gw’obwishwekerezi, obuzigire bwabo, n’okulembera kwabo. Na kandi ahugûkwa akanga balimo, abona oku akalamo bali balama karhali kalembu n’oku bakag’ilembera okulibuzibwa. (1 Ts. 1:3; 2 Ts. 1:4) Ciru ahikira aha abwira abo bene wabo oku bali lwiganyo oku bandi Bakristu. (1 Ts. 1:8, 9) Bashagaluka bwenene okuyumva ezo nderho za Paolo z’okubavuga omunkwa! Buzira karhinda, oko kuyerekine oku Paolo alizigire bene wabo bwenene. Oko ko kwarhumaga aba n’obulyo bw’okuhâna amahano minja omu maruba abirhi ayandikiraga Abatesalonika.​—1 Ts. 4:1, 3-5, 11; 2 Ts. 3:11, 12. w22.02 buk. 15 cif. 6

Shetani anakolese abakulu b’amadîni g’obunywesi lyo baderha oku Yehova arhajira bonjo n’okuyelerhera bene bantu amalibuko. Ciru erhi abana bafâ, baguma baguma banaderhe oku Nnamahanga anabahesire mpu bulya alilagirire kuli bamalahika banji eyo munda empingu. Oko kuba kunywerhera Nnamahanga! Rhuyishi oku Yehova aba Larha w’obuzigire. Co cirhuma erhi rhwakalwala bwenene erhi kandi rhufîrwe na muntu mulebe rhwalizigire, rhurhakashobeka Nnamahanga wirhu oku ye wajijire ntyo. Lubero n’oko, rhujira obuyemere oku lusiku luguma anakubûle ebintu bicibiba binja. Rhwanabwira ngasi yeshi wakarhuyumvirhiza kunganaci Nnamahanga Yehova aba wabuzigire. Oko kunamuhe ishuzo aha ola oka musholoshonza. (Mig. 27:11) Yehova aba Nnamahanga wa bonjo. Anaciyumve kubi bwenene erhi ayumva rhuli rhwabanda endûlù nkaba enyanya z’amalibuko rhuli rhwalembera, enyanya z’okulibuzibwa erhi izino lyage lirhumire, erhi bulwala, erhi kurhaba kwirhu bimana. (Enna. 22:23, 24) Yehova anayumve amalibuko rhuli rhwageramo; ananalonze okugayusa, na kobinali anagayuse.​—Oshushanye na Olubungo 3:7, 8; Izaya 63:9. w21.07 buk. 9-10 cif. 9-10

Bene bantu barhumikira Yehova banashagalukire olukengwa lunene kulusha byoshi: okuzigira n’okuharamya Yehova ensiku n’amango! Yezu anayuse ngasi mazibu goshi gadwirhwe na Adamu na Eva erhi bacishoga okurhenga omu mulala gwa Nnâmahanga. Yehova anafûlè emiliyoni y’abantu bafîre n’okubahâ obulyo bw’okulama ensiku n’amango omw’igulu lyayish’ihindulwa paradizo. (Lk. 23:42, 43) Oku abantu bw’omu mulala gwa Yehova bayishihikira aha babà bimana, ko na ngasi muguma wabo anayerekane “ishungwe ly’irenge n’obukuze,” Daudi ayandikaga enyanya zabyo. Erhi akaba oli muguma w’omu ‘hitû hy’abantu,’ ogwerhe obulangalire bwinja. (Maf. 7:9) Nnâmahanga akuzigire, analonzize obe muguma w’omu mulala gwage. Co cirhumire ojire okwawe koshi ly’omushagalusa. Ngasi lusiku okakengera n’okubîka omu murhima gwawe ebiragane byoshi Yehova alaganyize. Oshagalukire olukengwa ogwerhe lw’okuharamya Larha wirhu muzigirwa w’omu mpingu, onashagalukire obulyo ogwerhe bw’okuyishimukuza ensiku n’amango! w21.08 buk. 7 cif. 18-19

Omulebi Yeremiya ajijire myaka minji ali ahubiri ciru akaba abantu barhakagiyumvirhiza n’okumuhagalika. Ahikira aha avunika omurhima erhi ‘kushekerwa n’okujacirwa’ kwa buca buyira kw’abantu bakagimuhagalika kurhuma, ciru arhanya oku akola aleka ogo mukolo. (Yer. 20:8, 9, Mashi Bible) Cikone Yeremiya arharhamaga! Bici byamurhabire ahime ezo ntanya zirhashinganini anagendekere aba n’omwishingo omu mukolo gwage gw’amahubiri? Akasegeza omu bwenge bwage bintu bibirhi bya bulagirire. Burhangiriza, omwanzi gwa Nnâmahanga Yeremiya akagihubiri, gwalihiziremo “obulangalire bw’ensiku zayisha.” (Yer. 29:11, Mashi Bible) Bwakabirhi, Yehova ahesa Yeremiya izino lyage. (Yer. 15:16) Na nirhu rhunakagend’ibwira abantu omwanzi guhanyîre obulangalire mw’er’igulu lirimo omwizimya na kandi rhunahamagalwe okw’izino lya Yehova rhwe nka Bahamirizi bage. Erhi rhwakakasegeza obwenge bwirhu kw’ebi bintu bibirhi by’obulagirire, rhwanaba n’omwishingo omu mukolo gwirhu gw’amahubiri ciru abantu bakarhuyumvirhiza erhi nanga. Co cirhumire orhavunikaga omurhima erhi kurhama erhi byakahûna kasanzi kanji embere abanafunzi bawe b’Ebibliya bajire amajambere kulusha oku wal’ilangalire. Ak’omuhinzi olembera, omukolo gwirhu gw’okujira abanafunzi nago guba guhûnyire okulembera.​—Yk. 5:7, 8. w21.10 buk. 27 cif. 12-13

Rhube rhukola rhugwerhe myaka minji rhuli Bahamirizi ba Yehova erhi rhuciri bahyahya, rhweshi rhushinganine rhugendekere rhwazibuhya obuyemere bwirhu. Bulya gurhi? Bulya erhi rhwakabula buba masu, obuyemere bwirhu bwanazambanya. Okengere oku obuyemere buba buyimangire oku bintu by’okunali birhabonekana. Kwanaba kulembu okuyibagira ebintu rhurhali rhwabona. N’oko ko kwarhumaga Paolo aderha oku okubula obuyemere biri ‘byaha birhuzonzire.’ Gurhi rhwakayakamw’ogo murhego? (2 Ts. 1:3.) Burhangiriza, okashenga Yehova ngasi mango akuhe iroho lyage litagatifu. Bulya gurhi? Bulya obuyemere buba cigabi ciguma c’omu bigabi b’ilehe l’iroho litagatifu. (Gl. 5:22, 23) Rhurhakahash’iba n’obuyemere omu Mulemi wirhu n’okubuzibuhya buzira burhabale bw’iroho litagatifu. Erhi rhwakakashenga Yehova iroho lyage litagatifu, anarhuha lyo. (Lk. 11:13) Ci bwenene rhwanakahûna Yehova ntya: “Orhuyushulire obuyemere.” (Lk. 17:5) Na kandi, okayiga ngasi mango Akanwa ka Nnâmahanga.​—Enna. 1:2, 3. w21.08 buk. 18-19 cif. 16-18

Abakola bashosi banarhabala omu njira nyinji. Ciru akaba banaba barhacigwerhi emisi baligwerhe embere, emyaka minji bagwerhe omu mukolo gwa Yehova yabarhabire babe na bumanye bunji. Yehova anacigendekera abakolesa omu njira ziri lubero. Omu Bibliya rhwanabona nyiganyo nyinji z’abakozi bishwekerezi ba Yehova bagendekire bamukolera banakola bashosihire. Kwa lwiganyo, Musa aligwerhe myaka hofi 80 erhi arhondera akolera Yehova nka mulebi wage na mwimangizi w’olubaga lwa Israheli. Yehova acigendekire akolesa Daniyeli nka mulebi wage erhi anakola agwerhe myaka 90 na kulusha. N’entumwa Yowane yagwerhe nkaba myaka 90 na kulusha erhi Yehova amulongoza n’iroho lyage ayandike ecitabu c’Amafulûlo. Ebibliya erhaganiriri bwenene omulume ‘mushinganyanya wakagirhinya Nyamuzinda’ ohamagalwa Simeoni, cikone Yehova alimumanyire anamuha olukengwa lw’okubona omwana Yezu n’okuleba okubiyerekire oyo mwana na nnina.​—Lk. 2:22, 25-35. w21.09 buk. 3-4 cif. 5-7

Ababusi bashinganine babe masu lyo barhagikagerera omwana oku wundi erhi kuhûna omwana ajire ebintu bilushire obuhashe bwage. Okujira ntyo kwanarhuma omwana avunika omurhima. (Ef. 6:4.) Mwali wirhu ohamagalwa Sachiko adesire ntya: “Nyama alilonzize nkole bwinja emasomo mpu lyo mpana obuhamirizi kuli mwalimu wani, na kuli larha orhali Muhamirizi. Kuli kuderha oku alilonzize nkapata 100 okw’igana amango g’amashindano, n’obu nakagibona oku birhakahashikana. Ciru akaba hamagera myaka minji nyusize amasomo, hali amango ntanya oku nkaba Yehova arhanshagalukira ciru ankaba nanjire okwani koshi lyo mmukolera.” Mwami Daudi aderha erhi “ntaharhîri bya bukulu” erhi ebimulenzire bulî. Obwirhohye n’olugero byakarhuma ‘arhûza n’okudêkerera.’ (Enna. 131:2) Bici ababusi bakaciyigiriza kugerera enderho za Daudi? Arhali mw’ebi bashinganine okujira byone ababusi bashinganine okubamo birhohye na ba lugero cikone na mw’ebi bakalonza abana babo bahikirize. Ababusi banarhabala abana babo bahugûkwe obuhashe bwabo n’obuzamba bwabo amango bali babarhabala bacihirireho emihigo eshinganine. w21.07 buk. 21-22 cif. 5-6

Yehova ahîre ngasi muguma wirhu oluhûma lw’okucishoga. K’okuderha oku rhwanacishoga erhi rhwamurhumikira erhi nanga. Bana baguma na baguma barhahâbagwa olwiganyo lwinja n’ababusi babo lw’oku bakakolera Yehova, cikone bacishozire okukolera Yehova n’obwishwekerezi. Haligi n’abandi bana ababusi babo bajijire okwabo koshi lyo babalera nk’oku Amandiko ganadesire, cikone erhi bakula banaleke Yehova. Rhuyumvirhage oku ngasi muguma wirhu yene okwanine acishoge erhi akolera Yehova. (Yoz. 24:15) Co cirhumire, mwe babusi muli mwalaka bulya abana binyu balesire Yehova, muhagalike entanya z’okubona nk’ebyo byamuhikire gali magosa ginyu! Agandi mango, omubusi analeke okuli, ciru n’omulala gwage. (Enna. 27:10) Oko kunavune abana omurhima bwenene bulya bakagibona oku omubusi wabo ye bakalolerakw’olwiganyo. Mwe misole, erhi akaba omubusi winyu atenzirwe, nirhu rhuli rhwaciyumva kubi akinyu! Muyemere n’obwalagale oku Yehova naye ahugûsirwe amalumwa ginyu. Amuzigire anashagalukire obwishwekerezi bwinyu. Kandi, mukengere oku, arhali mwe mwarhumaga ababusi binyu bahiga okujira ntyo. w21.09 buk. 27 cif. 5-7

Erhi Omukristu akatengwa, rhwanarhanya oku kw’akola ali nka cibuzi cilwazire. Alwazire omu hali y’ekiroho. (Yk. 5:14) Obulwala bw’ekiroho ko bunaba nka bulwala buguma buguma bw’omubiri, bwanayahukira duba-duba. Co cirhumire, omu kanga kaguma na kaguma biba bihûnyire okuyegula omuntu olwazire kiroho n’ecigamba. Obo buhane ciba cerekane c’obuzigire Yehova ajira oku bandi baciri bishwekerezi bw’omu buso Bwage, n’obo buhane bwanahûma oku murhima g’oyo munyabyaha n’oko kurhume aciyunjuza. Ciru ankaba oyo muntu ali mutengwa, anakaja oku ntimanano, ly’agendekera ahâbwa amahano n’okucibizibuhya obuyemere bwage. Na kandi agwerhe oluhûma lw’okuhâbwa ebitabu ly’akabikolesa yene na kandi analola eprograme za JW Télédiffusion. Na bulya abagula bali balola kunganaci ali ajira amajambere, mango maguma maguma banakamuha amahano n’obulongozi bwakamurhabala acibiba n’amagala minja g’ekiroho na ntyo anacib’iyemerwa nka muguma w’omu Bahamirizi ba Yehova. w21.10 buk. 10 cif. 9, 11

Ene, rhunashimbe olwiganyo lw’okuharamya Abakristu b’omu myaka igana mirhanzi barhulekeraga. Kwa lwiganyo, ikubuliro lirhu liba lipanzirwe nk’oku abo Bakristu balipanzirwe. Rhujira abangalizi b’omuzunguko, abagula n’abarhabazi b’abagula. (Fl. 1:1; Tt. 1:5) Entanya zirhu okubiyerekire obuhya n’ecijiro c’obuhya, obukenge rhujira oku butagatifu bw’omuko, n’irala rhujira okubiyerekire okulanga ecigamba kuli abanyabyaha barhalonzizi okuciyunjuza, byoshi biba biyimangire oku lwiganyo rhwalekeragwa n’Abakristu b’omu myaka igana mirhanzi. (Ebj. 15:28, 29; 1 Kr. 5:11-13; 6:9, 10; Hb. 13:4) Ebibliya erhubwizire n’obwalagale oku “buyemere buguma” bone Nnâmahanga aba ayemire. (Ef. 4:4-6) Luli lukengwa lunene rhugwerhe lw’okuba baguma bw’omu lubaga lwa Yehova n’okumanya okuli okubiyerekire Yehova n’emihigo yage! Rhweshi rhuhige okugendekera rhwacishwekerera oku okuli rhunabe n’ebirhuyemezize bisezire. w21.10 buk. 22-23 cif. 15-17

Mwami Yozafati arhiganana n’amazibu madarhi. Omurhwe munene gw’aba Amoni, aba Mowabu, n’abalume barhengaga omu eneo y’entondo y’e Seiri bamurhera barhera n’omulala gwage n’abantu bage. (2 Nga. 20: 1, 2) Gurhi Yozafati ajijire? Alongereza emisi n’oburhabale kurhenga emwa Yehova. Isala lya Yozafati liri omu 2 Enganîro 20:5-12, liyerekine kunganaci akagilangalira Ishe w’omu mpingu. Yehova aganiza Yozafati kugerera Omulawi wakagihamagalwa Yahazieli, amubwira ebinwa biri omu lwandiko lw’ene. Omu kulangalira Nnâmahanga wage n’omurhima goshi, Yozafati arhumikira ebi banamubwiraga. Erhi ye n’abantu bage bagend’ibuganana n’abashombanyi, arhali basoda bo ahizire embere z’ebyo bigusho, ci ahira abimbiza embere zabo. Yehova ahikiriza eciragane ahaga Yozafati, amurhabala abulabuza ogo murhwe gw’abashombanyi.​—2 Nga. 20:18-23. w21.11 buk. 15-16 cif. 6-7

Amango rhuli omu marhangulo, rhwanayemera n’obwalagale oku Yehova akola enyanya zirhu omu kurhuha oburhabale rhulagirireko lyo rhugendekera rhwalanga obwishwekerezi bwirhu. (2 Kr. 4:7-9) Rhwanalangalira oku Yehova agendekera arhuyereka obuzigire bwishwekerezi bulya Ebibliya erhubwizire oku “isu lya Yehova linalange abamuyoboha, bala balinda obuzigire bwage bwishwekerezi.” (Enna. 33:18-22, NWT) Embere rhurhondere okukolera Yehova, arhuyeresire obuzigire ayereka bene bantu boshi. Cikone kandi rhuli bakozi bage rhunayunguke n’obuzigire bwage bwishwekerezi. Kugerera obo buzigire, Yehova anarhuyubarhire n’amaboko gage gw’obulanzi. Agendekera arhubika hofi-hofi naye na kandi ahikiriza omuhigo gwage kurhuyerekera. Alonzize rhube bîra bage! (Enna. 46:1, 2, 7) Ciru rhwakaba rhuli rhwalwisa marhangulo gahi, Yehova arhuha emisi rhulagirireko lyo rhugendekera rhwaba bishwekerezi. w21.11 buk. 7 cif. 17-18

Banji ba muli rhwe bamanyire kanga kalebe muntu mulebe abikiraga akarhinda owabo munyakazi erhi owabo mwanafunzi, erhi mubusi wage, erhi mwene wabo w’omu mulala; kasanzi ka myaka minji! Okengere oku bene wabo Yozefu bamubikiraga akarhinda n’oko kwayishirhuma bajira ecijiro cibi bwenene. (Murh. 37:2-8, 25-28) Cikone Yozefu abajirira lubero n’oko bamujiriraga! Omu mango ahâbagwa obukulu akahashirig’icihôla kuli abo bene wabo cikone arhajiraga ntyo, abayeresa obwonjo. Yozefu arhabikaga karhinda. Lubero n’oko, akolesa ihano lipatine n’ebidesirwe omu lwandiko lwa Bene-Levi 19:18. (Murh. 50:19-21) Yozefu ahirireho Abakristu balonzize okushagalusa Nnâmahanga olwiganyo lw’okubabalira, okurhakabikirana akarhinda, n’okurhacihôla. Kandi, oko kulinganine n’ebiri omw’isala ly’olwiganyo, Yezu aderha oku rhukababalira abarhugokize. (Mt. 6:9, 12) Ko n’oko, entumwa Paolo yahanûla ababo Bakristu ntya: “Murhakag’icihôla mwenene, bira bani.”​—Rm. 12:19. w21.12 buk. 11 cif. 13-14

Bijingo bwenene omu nsiku 14 z’omwezi gwa Nizani mwaka gwa 33 muli Kano Kasanzi Kirhu (K.K.K.), Yezu aja omw’ishwa ly’e Getsemane. Eyo munda abwira Yehova ebyamuli oku murhima byoshi. (Lk. 22:39-44) Muli ako kasanzi kazibu Yezu “àrhûla ensengero . . . omu kuyama bwenene n’omu kurhoza emirenge.” (Hb. 5:7) Bici byarhumaga Yezu ashenga muli obo budufu embere afê? Akagishenga ly’ahûna Yehova emisi y’okumurhabala abêre mwishwekerezi n’okujira obulonza Bwage. Yehova ayumva ensengero z’okurhenga oku murhima Omugala ashengaga anarhuma malahika ly’amuha emisi. Akagirhanya oku mukolo munene al’igwerhe gw’okuhalira izino l’Ishe. Yehova ayumvirhizize ensengero za Yezu zirhenzire oku murhima. Bulya gurhi? Bulya akantu kakulu Yezu akagishenga kwali kubêra mwishwekerezi kuli Ishe n’okuhalira izino lyage. Yehova anayumva ensengero zirhu z’okumuhûna oburhabale, erhi akaba akantu kakulu karhuma rhwashenga kuba kulonza rhubêre bishwekerezi kuli ye n’okuhalira izino lyage.​—Enna. 145:18. w22.01 buk. 18 cif. 15-17

Olugenzi lwirhu l’okurhaja omu by’epolitike lunarhume bantu banji basarhala. Banabe bali balangalira oku nkaba amango g’obucaguzi nirhu rhwacagula muntu mulebe. Cikone, rhuba rhuhugûsirwe oku Yehova aba amanyire oku erhi rhwakacishoga muntu mulebe oku ye waba murhegesi wirhu, oko kwanayerekana oku rhulahire oku Arhacirhurhegekaga. (1 Sam. 8:4-7) Na kandi abantu banakarhanya oku rhwalishinganine rhukayubaka amasomo, amahopitali n’eyindi mikolo y’okuja kwarhabala abantu. Erhi babona rhusegize obwenge bwirhu oku mukolo gw’okuhubiri, ci arhali oku bintu byakayusa amazibu ga mw’er’igulu ho n’aho, oko kunarhume basarhala. Gurhi rhwakajira lyo rhurhagi sarhala? (Mt. 7:21-23) Rhushinganine rhusegeze obwenge oku mukolo Yezu arhurhegekaga oku rhujire. Nta mango rhwanabule kuba masu enyanya z’eby’epolitike erhi omu kulonza mpu rhuyuse amazibu ga mw’er’igulu. Rhuba rhuzigire abantu na kandi rhunashibirire amalagirire gabo, cikone rhumanyire oku enjira nyinja y’okubarhabala kuli kubayigiriza lugenda Obwami bwa Nnamahanga n’okubarhabala bajire obwîra bwa hofi-hofi haguma na Yehova. w21.05 buk. 7 cif. 19-20

Ciru akaba barhegesi banji b’amashanja banakaderha mpu banakolere Nnâmahanga, barhalonza okuleka oburhegesi bwabo n’obukulu bwabo lyo bayemera obwo Bwami bubarhegeke. Nk’oku abarhegesi banajiraga omu nsiku za Yezu, ene nalyo abarhegesi bali bahagalika Omwami Mwishogwa wa Nnâmahanga omu kulibuza abanafunzi bishwekerezi b’oyo Mwami. (Ebj. 4:25-28) Gurhi Yehova ajirire ago mashanja gali galahira okuyankirira ogo mwanzi? Olwandiko lw’Ennanga 2:10-12 lushuzize ntya: “Lero mwe bami b’igulu mube n’oburhimanya; muyemere amahâno, mwe batwi b’emanja b’igulu. Mukolere Yehova n’oboba munacishinge munali mwageramw’omusisi. Mukenge omugala, bulya nka murhajijiri ntyo, Nnâmahanga akunira na ninyu mwahungumuka kurhenga omu njira, bulya oburhe Bwage bunayake duba-duba. Ab’obushagaluke bali balya boshi bamuyakiramwo.” Enyanya z’olukogo lwage, Yehova ahîre abo bahagalika Obwami bwage akasanzi k’okurhola omuhigo mwinja. Banacishanja entanya zabo n’okuyemera Obwami bwa Yehova. Cikone, akasanzi kasigîre kakola kasungunu. (Iz. 61:2) Kulusha agandi mango goshi, kano ko kasanzi abantu bashinganine bamanye okuli n’okurhola omuhigo mwinja. w21.09 buk. 15-16 cif. 8-9

Paolo adesire oku rhurhimukwe n’ebintu by’omubiri rhwakanaba rhugwerhe. (Fl. 4:12) Akantu kirhu k’obulagirire buli bwîra bwirhu haguma na Nnâmahanga, ci arhali ebirugu by’omubiri byonene. (Hab. 3:17, 18) Olole ebi Musa abwiraga aba Israheli erhi bayusa myaka 40 omw’irungu: “Nyamubaho, Nyamuzinda wawe, akugishire omu mikolo yawe yoshi. . . . Laba oku ekola myaka makumi ani erhi na Nyamubaho, Nyamuzinda wawe anali haguma nawe: nta kantu wabuzire.” (Lush. 2:7) Muli eyo myaka 40, Yehova akaha aba Israheli amana balya. Emishangi yabo, k’okuderha erya mishangi barhenganaga e Misri, erhakoyaga ciru n’ehitya. (Lush. 8:3, 4) Yehova anashagaluka erhi rhwakaciyigiriza okukarhimukwa, k’okuderha okukashagalukira ebintu by’olugero arhuhire, n’okukabibona nka migisho n’okuvuga omunkwa kuli byo. w22.01 buk. 5 cif. 10-11

We mulume, ogwerhe omukolo gw’okushibirira abantu b’omu mulala gwawe, co cirhumire oshinganine ajire okwawe koshi ly’olanga n’okurhabala omulala gwawe. Erhi orhimanana n’amazibu, hali amango wakarhanya mpu nkaba ogwerhe obuhashe bw’okugalwisa wenene. Cikone, ohagalike iroho ly’okulangalira emisi yawe wenene. Lubero n’oko, okashenga Yehova oburhabale. Na kandi, okashenga burhahusa haguma na mukawe. Olonze obulongozi bwarhenga emwa Yehova omu kuyiga Ebibliya n’ebitabu rhuhâbwa n’ikubuliro lya Nnâmahanga, okolese n’amahano ohâbirwe omo. Hali abandi barhakayemera emihigo eyimangire oku Bibliya orhôzire, ciru nkaba banakubwira oku oli cihwinja. Banakubwira oku ensaranga n’ebintu zakagula byanalanga omulala gwawe. Cikone okengere olwiganyo lwa Yozafati. (2 Nga. 20:1-30) Alilangalire Yehova anayerekana ntyo kugerera ebijiro byage. Yehova arhalekaga oyo mulume mwishwekerezi, na nawe arhakakuleka.​—Enna. 37:28; Hb. 13:5. w21.11 buk. 15 cif. 6; buk. 16 cif. 8

Nnâmahanga arhulemire n’obuhashe bw’okuba n’amorhere gali nk’agage, co cirhuma rhuba rhulonzize okubona abandi bali bajirirwa okushinganine. (Murh. 1:26) Cikone, bulya rhurhaba bimana hali amango rhuyabirwa okutwa olubanja n’obushinganyanya okubiyerekire bintu bilebe ciru akaba rhuli rhwarhanya oku rhuhugûsirwe ebintu byoshi. Kwa lwiganyo, okengere gurhi Yona aciyumvagya kubi enyanya z’omuhigo Yehova arhôlaga gw’okuyereka aba Ninawi obwonjo. (Yon. 3:10–4:1) Cikone, orhanye okubyabire erhi Yehova abêra aba Ninawi obwonjo. Bantu 120 000 b’e Ninawi baciyunjuzagya bayokoka! Yona ye wal’ishinganine akubûle entanya zage ci arhali Yehova. Yehova arhaba asezibwe okuhugûlira bene bantu ecarhumire arhôla mihigo milebe. Kobinali, Yehova al’iyemerire abakozi bage ba mîra okuhâna entanya zabo okubiyerekire emihigo al’irhôzire erhi eyi al’ilonzize okurhôla. (Murh. 18:25; Yon. 4:2, 3) Hali n’amango akag’ibahugûlira emihigo yage. (Yon. 4:10, 11) Cikoki, arhaba alagirire oku kuyemererwa na nirhu embere erhi enyuma z’okujira kantu kalebe.​—Iz. 40:13, 14; 55:9. w22.02 buk. 3-4 cif. 5-6

Rhunacibone oku rhuli nka “murho” erhi rhuyereka abandi oku ‘barhulushire.’ (Fl. 2:3) Erhi rhwakakaba n’entanya za ntyo, rhurhakacikasarhaza abandi ngasi mango. Bene wirhu na bali birhu boshi babà barhulushire omu njira nguma erhi omu yindi. Kwanaba kulembu okuhugûkwa ntyo erhi rhwakakasegeza obwenge bwirhu oku morhere gabo minja. Ngasi mango rhukakengera er’ihano Paolo ahâga Abakritu b’e Korinti: “Ndi wakuhâga ecirhuma orhumanini n’abandi? Cici ojira orhahabagwa? N’akaba kuhâbwa wacihâbagwa, ca cirhuma walimbira abandi nka kulya arhali kuhâbwa wahâbagwa?” (1 Kr. 4:7) Co cirhumire rhushinganine rhube masu lyo rhurhagikaja omu murhego g’okulonza rhubonekane n’abandi erhi kurhanya mpu rhubalushire. Erhi akaba mwene wirhu mulebe anakageza ehotuba zihumire oku murhima na mwali wirhu mulebe aba mulenga okurhondeza ifunzo ly’Ebibliya, oyo mwene wirhu erhi oyo mwali wirhu ashinganine akaba mubidu okuha Yehova irenge. w21.06 buk. 21-22 cif. 9-10

Bahamirizi banji bali bagenderera okuba n’amazibu g’okuganira n’abantu aha mwababwe. Bahubiri baguma na baguma babà balamire omu maeneo gabamo enyumpa ziri nyubake buzibu-zibu, zinali ndange bwenene. Oku mulango gw’ezo nyumpa kwanaba kuli omulanzi arhanayemerirwi okuyigulira omuntu yeshi-yeshi orhali muhamagale na muntu mulebe wa mw’eyo nyumpa. Abandi bahubiri banaja omu mahubiri ga nyumpa oku yindi buzira mazibu, cikone banarhimana bantu basungunu bone bo bali aha mwababwe. Haligi n’abandi balambagira ebilometre n’ebilometre lyo bajibona muntu muguma yene, n’erhi bahikaho hali amango barhigana arhali aha mwage! Erhi akaba rhuli rhwarhimanana n’amazibu ga ntyo, rhurhavunikaga omurhima. Okalonza abantu omu kasanzi kali lubero. Rhwanaganira na bantu banji erhi rhwakabalambagirira omu kasanzi balugibonekana aha mwababwe. Bulya ntaye orhagaluka omw’ishasha lyage kasanzi kalebe! Bene wirhu na bali birhu banji banashagalukire okuhubiri enyuma z’emidi erhi bijingo bulya ko kasanzi balugibonamo bantu banji. Na mw’ako kasanzi ba nnanyumpa banakaba bali barhamûka aha mwababwe na kandi banabe bagwerhe akasanzi kw’okuganiza abandi. w21.05 buk. 15 cif. 5, 7

Ka rhuli rhwabona amazibu gashushine n’ago ene? Neci. Bantu banji ene banagaye bwenene erhi Abahamirizi ba Yehova balahira okujira enkomêdu zirhapatine n’amandiko, nk’okujira idinye ly’okukengera olusiku lw’okuburhwa k’omuntu erhi lya Noweri. N’abandi banagaye bwenene erhi Abahamirizi ba Yehova balahira okujira haguma nabo ensiku nkulu zijirwa omu cihugo, erhi enkomêdu zijirwa aha ciriyo zirhapatini n’Akanwa ka Nnamahanga. Byanahashikana abasarhala enyanya z’oko banakaba bayemire oku bali baharhamya Nnamahanga omu njira ayemire. Cikone barhakamushagalusa erhi bakazigira enkomêdu z’igulu ahali h’enyigirizo z’obwalagale ziri omu Bibliya. (Mk. 7:8, 9) Gurhi rhwakajira lyo rhurhagi sarhala? Kuli kwa bulagirire rhuzigire bwenene amarhegeko n’amakanuni ga Yehova. (Enna. 119:97, 113, 163-165) Erhi rhuzigira Yehova, rhunalahire ngasi nkomêdu yoshi-yoshi emugayisa. Nta kantu koshi-koshi rhuyemera kaje aha nafasi y’obuzigire rhujirako Yehova. w21.05 buk. 6 cif. 15-16

Gurhi rhwakakolesamwo oburhonde bw’entumwa Paolo? Rhushinganine rhugendekere rhwaba n’obuyemere busêzire omu kukaciyigiriza Ebibliya ngasi mango, omu kukasalira burhahusa n’omu kucihâna loshi omu mukolo Yehova arhuhîre oku rhujire. (2 Tm. 4:4) Okuba n’obuyemere busêzire, kwanarhurhabala rhurhahuliganaga amango rhuli rhwayumva emyanzi y’obunywesi bali barhushobeka. (Iz. 28:16) Obuzigire bwirhu kuli Yehova, Akanwa kage na kuli bene wirhu na bali birhu bwarhurhabala rhuyake okurhasarhazibwa na balya balesire okuli. Omu myaka igana mirhanzi, bantu banji basarhala, banalahira Yezu. Neci, hali n’abandi bamuyemire. Ciru balimo n’omubalè gw’abantu b’omu Sanhedrini y’Abayahudi ciru n’ ‘abakuhani banji babà n’obuyemere.’ (Ebj. 6:7; Mt. 27:57-60; Mk. 15:43) Ko n’oko ene nalyo, bantu banji barhasarhazibagwa. Bulya gurhi? Bulya babà bamanyire banazigire okuli babwine omu Mandiko. Akanwa ka Nnamahanga kadesire ntya: “Abarhonya irhegeko lyawe murhûla munji bayumva, barhanajira kantu bankasârhalakwo.”​—Enna. 119:165. w21.05 buk. 13 cif. 20-21

Paolo alihugûsirwe oku ngasi byoshi akagihikiriza omu mukolo gwa Yehova, akagibijira kugerera emisi ya Nnamahanga, ci arhali kugerera emisi yage yene. Kugerera iroho litagatifu, Yehova aha Paolo emisi y’okuhikiriza bwinja omukolo gwage gw’amahubiri, ciru akaba akag’ilibuzibwa, akwebwa omu mpamikwa, anakag’ilwisa agandi mazibu manji. Timoteyo, musole muguma wakagikola haguma na Paolo, naye alilangalire emisi ya Nnamahanga ly’ahikiriza bwinja omukolo gwage. Timoteyo alusa Paolo omu mibalamo yage y’obumisionere. Na kandi, Paolo akagirhuma Timoteyo oku alambagirire ebigamba ly’ajibiha omurhima. (1 Kr. 4:17) Nkaba Timoteyo akagiciyumva nk’arhakahasha ogo mukolo. Nkaba co carhumaga Paolo amubwira ntya: “Ntaye ogayaguzagye obusole bwawe.” (1 Tm. 4:12) Mw’ako kasanzi koshi, Timoteyo naye agwerhe akababo omu mubiri, kw’okuderha, ‘endwala zakagimuhunyanga ngasi mango.’ (1 Tm. 5:23) Cikone Timoteyo alimanyire oku iroho litagatifu lya Yehova lyakamuhire emisi alilagirireko ly’ayaliza omwanzi mwinja n’okukolera bene wabo.​—2 Tm. 1:7. w21.05 buk. 21 cif. 6-7

Abahâna ihano banakakulikira aka kanuni kali mu lwandiko lwa Yakobo 1:19. Yakobo ayandika ntya: “Ngasi muntu akabangaduka omu kuyumvirhiza, ci arhabaga wakuderha duba, arhanabaga wa kukunira duba.” Hali amango omugula akarhanya mpu amanyire ebintu byoshi okubiyerekire akanga, cikone ka kobinali akamanyirire bwinja? Olwandiko lw’Emigani 18:13 lurhukengezize ntya: “Oshuza arhanaciyûmva, kuyerekana ayerekana obuhwinja bwamubonesa nshonyi.” Kuli kwinja okubwira oyo muntu yene akuganirire ako kanga. Oko kuhiziremo okuyumvirhiza embere rhuderhe. Omugula anadosa ntya: “Bici biri byakuhikira omu kalamo kawe?” “Gurhi nakakurhabalamwo?” Erhi abagula bakaciha akasanzi k’okurhang’imanyirira emyanzi, kwanaba kulembu kulibo okurhabala n’okuha omurhima bene wabo na bali babo. ihano linja lihiziremo binji kulusha okusoma mandiko malebe erhi kubwira omuntu ebi ashinganine ajire byone. Bene wirhu na bali birhu baba omu bulagirire bw’okuyeresibwa oku rhubashibirire, rhubahugûsirwe rhunalonzize okubarhabala. w22.02 buk. 17 cif. 14-15