Mwezi gwa 6

Akalamo kali kazibu kuli mukana mulebe; arhagwerhe buhashe bw’okubona ebintu by’obulagirire omu kalamo. Ciru akaba ntyo, aja ebwa cibikiro ciguma arhogezamo bicere bibirhi bisungunu, nkaba ciru byohe birhajegeraga omu kurhogera omu cibikiro. Yezu alimanyire ebi oyo mukana arhogezagyamwo: bicere bibirhi, rhusaranga rhusungunu-ngunu rhwamw’ago mango. Ciru orho rhusaranga rhurhakaguzire akafunzi omuntu alya, n’obu ko kali kanyunyi k’ibeyi lisungunu bwenene. Yezu asomerwa bwenene n’oyo mukana. Akema abanafunzi bage, n’okubayeresa oyo mukana. Aderha ntya: “Oyu mukana mukenyi ahânyire kulusha boshi.” Buzinda ahugûla erhi: “Boshi [bwenene abagale] bahiziremwo oku bisigala oku bunguke bw’ebirugu byabo; ci yehe omu bukenyi bwage ahiziremwo ehi anali agwerhe hyoshi, ehyankamubisire hyoshi.” (Mk. 12:43, 44) Erhi oyu mukana mwishwekerezi ahira omu cibikiro ensaranga agwerhe zoshi ly’alama olo lusiku, ayerekana oku acikubagîre oku Yehova amushibirira.​—Enna. 26:3. w21.04 buk. 6 cif. 17-18

Yezu agendekire aba n’entanya nyinja omu kasanzi koshi k’omukolo gwage gw’amahubiri hanw’igulu ananaba alonzize abanafunzi bage nabo bagendekere babà n’ezo ntanya. (Yn. 4:35, 36) Amango Yezu ali haguma n’abanafunzi bage, bayerekana oku kobinali bashagalukire omukolo gw’amahubiri. (Lk. 10:1, 5-11, 17) Cikone erhi bagwarha Yezu n’okumuniga, abanafunzi bage baheza irala lyabo ly’okuhubiri hisanzi hisungunu. (Yn. 16:32) Erhi Yezu afûka, abaha omurhima oku basegeze obwenge bwabo oku mukolo g’amahubiri. N’enyuma za Yezu okuja empingu, abanafunzi bage bajira omukolo gw’amahubiri n’obushiru bunji kuhika abashombanyi babo bajaciduduma nk’oku olwandiko lw’olusiku lw’ene lunayerekine. Yezu alongoza omukolo gwajiragwa n’abo Bakristu b’omu myaka igana mirhanzi na Yehova abagisha bulya bahikira aha bayushûka. Kwa lwiganyo, oku Pantekoste y’omu mwaka gwa 33 K.K.K., bantu hofi 3 000 babatizibwa. (Ebj. 2:41) N’omubalè gw’abanafunzi gwagendekera okuyushûka bwenene. (Ebj. 6:7) Ciru akaba ntyo, Yezu alêba oku omukolo gw’okuhubiri gwakayânire malehe manji bwenene omu nsiku nzinda kulusha agandi mango goshi.​—Yn. 14:12; Ebj. 1:8. w21.05 buk. 14 cif. 1-2

K’ocikengire amango wamanyaga okuli? Wakaciyumva oku ngasi muntu naye analonza amanye ebi wahikire aha wayemera. Wayemera n’obwalagale oku omwanzi guli omu Bibliya, gwanabarhabala babe n’akalamo kinja buno, n’obulangalire b’okunali omu mango gayisha. (Enna. 119:105) Oko kwakushumya warhondera okuganirira abîra bawe n’abantu b’omu mulala gwawe okuli kw’Ebibliya. Gurhigi byabire? Nkaba wasomerwa bwenene erhi bantu banji bakalahira oku barhalonzizi ebi oli wababwira. Ntaye muli rhwê wakasomerwa erhi abandi bakalahira omwanzi rhuyigiriza. Omu mango ga Yezu, bantu banji bakamulahira n’obu akagijira ebisomerine byaliyerekine oku ali abijira kugerera oburhabale bwa Nnâmahanga. Kwa lwiganyo, Yezu afûla Lazaro n’abashombanyi bage barhakahakanyire eco cisomerine. Cikone eby’okusomeza kuli kubona oku abakulu b’Abayahudi barhayemeraga oku Yezu ye Masiya. Na ntyo, barhôla omuhigo gw’okuniga Yezu na Lazaro!​—Yn. 11:47, 48, 53; 12:9-11. w21.05 buk. 2 cif. 1-2

Okacihangana oje oku ntimanano ngasi mango. Wanayunguka bwenene n’eprograme y’okuhâna omurhima erheganyizibwe olo lusiku, na kandi wanamanya bene winyu na bali binyu bwinja. Olongereze abîra omu cigamba wakayiga olwiganyo lwabo, wanalonza ciru n’aba murhagwerhi myaka miguma nabo erhi aba murhaburhagwa haguma. Ebibliya erhukengezize oku “abashosi bo bajira” obumanye. (Ayu. 12:12, Mashi Bible) Cikone abashosi nabo banaciyigiriza binji kugerera emisole mishwekerezi. Daudi ali musole bwenene kulusha Yonatani, cikone oko kurhabahanzagya okujira obwîra bwa hofi-hofi. (1 Sam. 18:1) Daudi na Yonatani barhabalana lyo bagendekera bakolera Yehova ciru akaba bali omu mazibu manji. (1 Sam. 23:16-18) Mwali wirhu ohamagalwa Irina oba Muhamirizi wa Yehova yene omu mulala gwage adesire ntya: “Bene wirhu na bali birhu banahikira aha babà babusi birhu erhi bene wirhu na bali birhu b’ekiroho. Yehova anabakolesa lyo bahikiriza amalagirire girhu.” Abîra bawe babà balonzize okukuha omurhima n’okukurhabala, kobinali banacifinja obabwire oku oli waciyumva lyo bakurhabala. w21.06 buk. 10 cif. 9-11

Yezu ahâna olwiganyo lwa mwami n’omurhumisi wage. Oyo mwami ababalira omwenda g’omurhumisi wage bulya arhagwerhe buhashe bwa kugujuha. Oyo murhumisi yo n’oyo, arhacihashigi babalira omwenda musungunu owabo murhumisi amugwerhe. Enyuma z’aho, oyo mwami akunira bwenene anaderha oku bamuhire omu lukoba. Ebijiro oyo murhumisi ajiraga arhali yene byalerhire amazibu cikone byagalerhera n’abandi barhumisi. Burhangiriza, ajira owabo murhumisi kubi erhi “aj’imuhira omu lukoba, kuhika alyûle.” Bwakabirhi, agayisa ababo barhumisi babonaga ebi anajiraga. Erhi ababo “babona byaba ntyo, bagaya bwenene.” (Mt. 18:30, 31) Ko n’oko, ebijiro birhu binahûme oku bandi. Gurhi byakaba erhi muntu mulebe akarhugokeza buzinda rhulahire oku rhurhamubabalira? Burhangiriza, rhwanarhuma aciyumva kubi bulya rhwamalahira oku rhurhamubabalire, rhurhamushibirire, na kandi rhurhamuzigiri. Bwakabirhi, rhwanarhuma abandi bali omu cigamba baciyumva kubi hano babona oku nta murhula guli egarhi kirhu n’oyo mwene wirhu erhi mwali wirhu. w21.06 buk. 22 cif. 11-12

Shetani aba alonzize bene bantu balemagwa oku nshusho ya Nnamahanga baje omu lugenzi lubi. Erhi Nnamahanga “àbona oku amabî g’omuntu garhalusire olugero” omu mango ga Nuhu “acîganya [erhi kugaya] mpu eci alemeraga omuntu hano igulu, alumwa bwenene omu murhima gwage.” (Murh. 6:5, 6, 11.) K’oko byaliyosire kwàshanjire? Buzira karhinda nanga! Shetani ali acishinga bwenene omu kubona obugonyi bwa ngasi lubero buli bwajirwa omw’igulu, kwa lwiganyo omulume okujira ecijiro c’obuhya n’omuntu orhali mukage erhi ecijiro c’obuhya ekarhi k’abalume n’ababo balume erhi bakazi n’ababo bakazi. (Ef. 4:18, 19) Shetani anacishinge bwenene erhi ashumya bala baharamya Nnamahanga omu njira y’okuli bajire ecaha. Hano oburhegesi bwa Shetani buhwa, nta muntu wanacibe ‘ali arhegeka owabo muntu, amulibuze bwenene’ na kandi ntaye wanacishereze igulu n’ensimba Yehova ahâga omuntu oku ashibirire. (Muh. 8:9, Mashi Bible; Murh. 1:28) Gurhi ebintu biyosire ene? Bantu baguma baguma basoma esiyanse badesire oku enyanya z’ebijiro by’abantu, milala muliyoni muguma gw’ensimba gwahera omu myaka misungunu yayisha. w21.07 buk. 12 cif. 13-14

Hali bakozi baguma na baguma ba Nnâmahanga bakacitumuza bwenene lugenda amagosa bajiraga mîra. Oko kucitumuza kunarhume barhanya oku Yehova arhakabababalira ciru bakaciyunjuza kunganaci. Okuciyigiriza lugenda oku Yehova ayereka abakozi bage obuzigire bwishwekerezi kwanakurhabala erhi akaba nawe oli walwisa entanya z’okucitumuza. Rhwanakolera Yehova omu mwishingo n’ezamiri zicîre. Oko kunahashikane bulya “omuko gw’Omugala Yezu gwanarhucêsa, gushuke ebyaha birhu byoshi.” (1 Yn. 1:7) Amango ovunisire omurhima lugenda buzamba bulebe, okengere oku Yehova aba mubidu, kobinali, ajira irala ly’okubabalira omunyabyaha ociyunjuzize. Olole olushangi omwandisi w’ennanga Daudi ahizireho egarhi k’obuzigire bwishwekerezi n’okubabalira. Ayandika ntya: “Nka kulya amalunga gali enyanya ly’igulu [kwo n’obuzigire bwage bwishwekerezi buli bunji kuli bala bamuyoboha, NWT]. Nka kula ebushoshokero eri kulî n’ebuzikiro, kwo Nnâmahanga ahirika kulî ebyaha birhu.”​—Enna. 103:11, 12. w21.11 buk. 5-6 cif. 12-13

Omulume Mukristu ashinganine akakenga mukage. (1 Pt. 3:7) Okukenga muntu mulebe kuhiziremo okumushibirira. Kwa lwiganyo, omulume anayerekane oku akenzire mukage omu kumuyereka oku kobinali aba wa bulagirire. Arhakamuhûna ajire ebintu bilushire obuhashe bwage. Na kandi, arhakakagerera mukage oku bandi bakazi. Gurhi akaciyumva erhi akakamugerera oku bandi? Mulume muguma orhali Muhamirizi, oba iba wa mwali wirhu muguma ohamagalwa Rosa anakamugerera oku bandi bakazi. Ezo nderho z’iba zitwa nka mugushu zinarhume aciyumva kubi bwenene na kandi zanarhumire obona nka arhamuzigira. Adesire ntya: “Mba ndagirire okukengezibwa ngasi mango oku Yehova ananshagalukire.” Lubero n’oyo mulume, omulume Mukristu yehe anahe mukage olukengwa. Aba amanyire oku ebijiro bya ntyo, byanahuma oku bwîra bwage haguma na mukage, n’oku bwîra bwage haguma na Yehova. Omulume okenzire mukage anamukunga-kunga, anamuvuge omunkwa n’okumuyereka n’obwalagale oku aba amusimire. w21.07 buk. 22 cif. 7-8

K’onavunike omurhima erhi irhu lirimo akantu olagirireko lyakabula kuhika omu kasanzi walil’ilagirireko? Cikone erhi bakakubwira oku hali ebirhumire binja, ka birha kahûna olembere n’okugendekera kwalinda. Olwiganyo luyerekine obulagirire bw’okulembera luganirirwe omu lwandiko lwa Emigani 13:11. Ludesire ntya: “Obugale buyisha duba kuyônda buja bwayônda; oburhondêra hitya, bwo buja bwakula.” Ka hali akanuni olo lwandiko lukuyigirizize? Buba bwenge okulembera amango rhuli rhwajira bintu bilebe, na ntyo rhwanajira ngasi kantu omu kasanzi kako. Emigani 4:18 erhubwizire oku “enjira y’abashinganyanya kw’eri nka bucè bwa lubûngu-bûngu [sezi-sezi], bwo buyisha bwakula kalînde kabâ kasirahînga [mulegerege].” Ezo nderho ziganirire enjira Yehova afulûliramwo abakozi bage omuhigo gwage bunyi-bunyi. Cikone kandi, olo lwandiko lwanakolesibwa omu njira Omukristu ajira amajambere g’ekiroho omu kalamo kage. Binahûne akasanzi ly’omuntu ahikira aha akula kiroho. w21.08 buk. 8 cif. 1, 3-4

Rhugwerhe binji byakujira okubona er’igulu ligendekire lyaja ebuzindikiriza bwalyo. (Mt. 24:14; Lk. 10:2; 1 Pt. 5:2) Rhweshi rhunalonze okukolera Yehova nk’oku rhwakanahasha. Banji bali bayushûla omukolo gwabo gw’amahubiri. Baguma baguma banacifinje okuba bapainiya. N’abandi banacifinje okujikolera oku Beteli erhi kuja omu mukolo gw’obubasi bw’enyumpa zirhu z’eciteokrasi. N’abandi bene wirhu banji bali bahikiriza ebihûnyirwe lyo babà bagula erhi barhabazi b’abagula. (1 Tm. 3:1, 8) Yehova anashagaluke bwenene erhi abona er’iroho linja ly’okucihâna abakozi bage bali bayerekana! (Enna. 110:3) Cikoki ka wavunisire omurhima bulya orhazigihikirira muhigo mulebe gw’ekiroho? Erhi akaba ntyo kobiri, wanashenga Yehova n’okumubwira oku oli waciyumva. (Enna. 37:5-7) Na kandi, wanahûna bene wirhu bakuzire kiroho amahano okubiyerekire oku wakakubûlamwo omukolo gwawe oha Yehova, na buzinda wanacihangana okolese ago mahano bakuhâga. Erhi wakajira ntyo, wanayishihikira aha wahâbwa ogo mukolo erhi kuhikira ogo muhigo. w21.08 buk. 20 cif. 1; buk. 21 cif. 4

Ana, mulebi-kazi aligwerhe myaka 84 cikone “arharhengaga omu hekalu.” “Okukaja oku ntimanano” ngasi mango kwamulerhire obunguke erhi abona Yezu kanaciri kabonjo. (Lk. 2:36-38) Muli gano mango girhu, hali bashosi banji bishwekerezi bali lwiganyo lwinja oku baciri misole. Rhwanayunguka bwenene erhi rhwakaciha akasanzi k’okubadosa amadoso n’okuyumvirhiza amango bali barhuganirira omwishingo bacibwinîre omw’ikubuliro lya Yehova. Bene wirhu na bali birhu bakola bashosi babà ba bulagirire omw’ikubuliro lya Yehova. Bacibwinîre omu njira ziri lubero gurhi Yehova agishire ikubuliro lyake n’oku abagishire bonene. Amagosa bajijire omu kalamo kabo gabayigirizize bintu binji. Okababona nka “nshoko ya bwenge,” onacihangane oyige binji kugerera kw’ebi bacibwinîre. (Mig. 18:4, NWT) Erhi wakaciha akasanzi k’okubamanya bwinja, obuyemere bwawe bwanazibuha. w21.09 buk. 3 cif. 4; buk. 4 cif. 7-8; buk. 5 cif. 11, 13

Nk’oku Izaya anaderhaga, abantu ba Yehova bali bayônka “amônka g’amashanja.” (Iz. 60:5, 16) Kugerera obulenga n’obuhashe mberuluka bw’abo balume n’abakazi bali nka buhirhi bali bayisha omu okuli, omukolo gw’okuhubiri guli gwajirwa omu bihugo 240 n’ebitabu biyimangire oku Bibliya biri byahânwa omu ndimi kulusha 1 000. Muli zino nsiku nzinda, ogo mukolo gw’okudundaganya amashanja guli gwaha abantu oluhya lw’okurhola omuhigo. Ngasi muntu akwanine acishoge erhi alunga okuboko Obwami bwa Nnâmahanga, erhi agendekera okulangalira amarhegesi g’er’igulu. Ciru akaba abantu ba Yehova banakenge amarhegeko g’ecihugo balamiremwo, barhayemera ciru n’ehitya okuja omu by’epolitike by’er’igulu. (Rm. 13:1-7) Bamanyire oku Obwami bwa Yehova bone bwayishiyusa amazibu ga bene bantu. Obwo Bwami burhaba cigabi c’er’igulu.​—Yn. 18:36, 37. w21.09 buk. 17-18 cif. 13-14

Erhi omuntu ozigira akaleka Yehova, kuli kwa bulagirire ogendekere wacizibuhya kiroho n’okuzibuhya abandi bantu b’omu mulala gwawe. Gurhi wakajiramwo ntyo? Yehova anakuha emisi erhi wakagendekera wakulikira eprograme yawe y’okusoma Akanwa ka Nnâmahanga, okurhanya kw’ebi oli wasoma n’okukaja oku ntimanano. Joanna, ishe na mukulu wage balekaga okuli, adesire ntya: “Nanyumve oburhulirize erhi nsoma emyanzi okubiyerekire bantu baguma na baguma baganirirwe omu Bibliya, nka Abigaili, Esteri, Ayubu, Yusufu, na Yezu. Enyiganyo zabo zinayunjuze omurhima gwani n’obwenge bwani entanya nyinja zinyihya amalumwa gani.” Erhi wakaciyumva ogayire bwenene, agendekere washenga Yehova. Oyinginge Nnâmahanga wirhu w’obuzigire akurhabale obone ako kanga nk’oku ali akabona onamuhûne ‘akuyigirize n’okukulangula enjira wageramwo.’ (Enna. 32:6-8) Kobinali, kwanaba kuzibu okubwira Yehova oku oli waciyumva. Cikone Yehova anahugûkwe bwinja amalumwa gawe g’emurhima. Anakuyinginzire omuyigulire omurhima gwawe.​—Lub. 34:6; Enna. 62:7. w21.09 buk. 27-28 cif. 9-10

Enyuma za Pasaka w’omu mwaka gwa 32 K.K.K., entumwa Petro, Yakobo, na Yowane bacibonera ecibonekerezi c’okusomeza bwenene. Oku ntondo ndîri, byanahashikana kwali oku Ntondo y’e Hermoni, babona enshusho ya Yezu yahinduka. “Obusu bwage bwarhondera okulangashana nk’izuba, n’emyambalo yage yaba myeru nka bulangale.” (Mt. 17:1-4, Mashi Bible) Entumwa zayumva Nnâmahanga aderha ntya: “Oyu ye Mugala wani muzigirwa, oyu nsima bwenene, mukaz’imuyumva.” Ezo ntumwa isharhu zayerekine kugerera akalamo kabo oku bayumvirhizize Yezu. Rhulonzize nirhu rhuyige olwiganyo lwabo. Rhuvuzire omunkwa okubona Yehova ali arhuha obulongozi bw’obuzigire kugerera “nnawabo” w’ecigamba, Yezu Kristu! (Ef. 5:23) Rhuhige “okumuyumvirhiza” nk’oku entumwa Petro, Yakobo na Yowane bakagijira. Muli oko, rhwanayishihâbwa migisho minji kurhangira buno n’obushagaluke burhagwerhi buzinda omu mango gayisha. w21.12 buk. 22 cif. 1; buk. 27 cif. 19

Mukristu muguma w’e Korinti akagijira obugonyi na muk’ishe. Entumwa Paolo yabwira Abakorinti oku bamutenge. Olo lugenzi lw’okujira eby’enshonyi lw’oyo mulume lwahûma bwenene oku bandi bali omu cigamba, baguma baguma bahikira aha barhacibona nk’eco ciri caha cizibu! (1 Kr. 5:1, 2, 13) Kasanzi kasungu enyuma z’aho, Paolo ayumva oku oyo munyabyaha ali amaciyunjunza okunali! Paolo abwira abagula ntya: “Mumubabalirage erhikwo munamuhire omurhima omu nda.” Olole ecarhumaga Paolo ababwira ntyo, aderha erhi: “[Ly’]oyo muhanya alek’irhogera omu burhe bulushire olugero.” Paolo ayumviza obwonjo oyo mulume waciyunjuzagya. Paolo arhal’ilonzize oyo mulume agogomerwe yeshi-yeshi erhi kulibuzibwa bwenene n’ebyo ajiraga bulya oko kwakarhumire alahira okucihûna obubabale. (2 Kr. 2:5-8, 11) Omu kuyiga olwiganyo lwa Yehova, abagula basima okuyerekana olukogo. Banahane kwa buzibu-zibu amango bihûnyire okujira ntyo cikone kandi banayerekane olukogo nka bihashikine n’erhi hakaba hali ecirhumire c’okujira ntyo. Erhi abagula bakabula buhana omuntu orhaciyunjuzizi lurhakaba lukogo bayerekine, cikone kwanaba kulekerera ebintu bibi. w21.10 buk. 11-12 cif. 12-15

Entanya z’okulumisa omurhima zanashushanyizibwa n’ebihulu. Bihulu biguma na biguma biba bisungunu-ngunu n’ebindi biba binenene. Kwa lwiganyo, erhi rhufungula amaruba g’eanvelope eriko eskoce, yanarhutwa hisungunu oku luhu. Cikone enyuma za lusiku luguma erhi ibirhi, rhwanaba nkaba rhurhaciri rhwakengera aha eyo skoce yarhutwaga. Ko n’oko hali orhugosa rhuba rhusungunu-ngunu. Kwa lwiganyo, omwîra wirhu anajira erhi kuderha akantu karhuvunyire omurhima, cikone rhuba babidu okubabalira duba-duba. Cikoki erhi akaba ecihulu ciri cinene bwenene, byanahûna munganga acihange n’okucihirako ebandaje. Cikone erhi rhwakagendekera rhwayaga erhi kuhuma kuli eco cihulu rhwanacibicilerhera amalumwa rhwenene. Eby’okugayisa, kuli kubona oku omuntu anajira akantu kashushine n’ako amango bamugayisize bwenene. Anagendekera arhanya kw’ebyo bihulu by’ekandalala na kunganaci bamugayisize. Cikone abantu babikira ababo akarhinda banakacilumisa omurhima bonene. Kuli kwa bulagirire bwenene okurhumikira ihano liri omu lwandiko lw’olusiku lw’ene. w21.12 buk. 12 cif. 15

Mugula mulebe ali arhanya okubiyerekire ebi owabo mwemezi acishoga lugenda okuyambala n’okuciyinjihya. Oyo mugula ashinganine acidose ntya: ‘Ka hali ecirhumire c’Ebibliya cinshumize ngend’iganiza oyo muntu?’ Bulya oyo mugula arhalonzizi okuhâna entanya zage, ashinganine ajidosa owundi mugula erhi wundi Mukristu okuzire kiroho entanya zage. Bombi haguma banacib’ilola amahano Paolo ahânyire lugenda okuyambala n’okuciyinjihya. (1 Tm. 2:9, 10) Paolo asegize amakanuni Omukristu akwanine arhanyeko lugenda emyambalo eshinganine, ya lugero, n’ekwanine. Cikone Paolo arhahiragaho eliste y’emyambalo omuntu akayambala n’eyi arhakayambala. Al’ihugûsirwe oku Omukristu agwerhe oluhûma lw’okucishoga gurhi ayambala kushimbana n’ebi Amandiko gadesire. Co cirhumire abagula bashinganine barhangilola erhi ebi oyo muntu anacishozire biri bya lugero binakwanine. Rhwanajira bwinja okukakengera oku Bakristu babirhi bakuzire kiroho banacishoga bintu bibirhi biri lubero, cikone erhi byombi binali binja. Rhushinganine rhuyake okuhiriraho abirhu bemezi amarhegeko girhu rhwenene okubiyerekire ebinja n’ebibi. w22.02 buk. 16 cif. 9-10

Rhugwerhe ebirhumire binja by’okuyerekana obuzigire bwishwekerezi rhwene na nnene. Birhumire biguma na biguma bihi ebyo? Olole gurhi eyi migani ekulikire yalongozibagwa n’iroho lya Nnâmahanga eshuzize kw’er’idoso: “Orhayemeraga obuzigire bwishwekerezi n’obwikubagirwa bikuleke. . . . Wàbona oku warhona onabe n’oburhimanya bwinja, omu masu ga Nyamuzinda n’ag’abantu.” “Omuntu w’obuzigire bwishwekerezi anacilerhere obunguke.” “Okulikira enjira y’obushinganyanya [y’obuzigire bwishwekerezi, NWT] ye hika oku kalamo.” (Mig. 3:3, 4, NWT; 11:17, NWT, amahugûlo g’idako; 21:21) Eyi migani eyerekine birhumire bisharhu byakarhushumya rhuyerekane obuzigire bwishwekerezi. Burhangiriza, okuyerekana obuzigire bwishwekerezi kunarhujire rhube ba ngulo ndarhi omu masu ga Nnâmahanga. Bwa kabirhi, okuyerekana obuzigire bwishwekerezi kunakarhulerhera obunguke rhwene na nnene. Kwa lwiganyo, obuzigire bwishwekerezi bunarhume rhwajira obwîra bulama nsiku nyinji haguma n’abandi. Bwa kasharhu, okuyerekana obuzigire bwishwekerezi kunarhume rhwayishihâbwa emigisho, ehiziremo n’obuzine bw’ensiku n’amango. Kobinali, rhugwerhe ebirhumire binja by’okurhôla kwa buzibu-zibu ezi nderho za Yehova, zidesire ntya: “Mukolerane n’obuzigire bwishwekerezi n’olukogo.” w21.11 buk. 8 cif. 1-2

Erhi akaba amarhangulo oli wageramo buno erhi aga wageragamo mîra garhumire obuyemere bwawe bwazambanya, oko kurhakuvunaga omurhima. Obone ako kanga nka kasanzi kakuseza obuyemere bwawe. Okashenga Yehova burhahusa, ci bwenene amango orhimanine n’amazibu. Oyemere n’obwalagale oku Yehova anakuha oburhabale kugerera abantu b’omu mulala gwawe erhi abîra. Erhi wakaleka Yehova okurhabale ly’ohashigera omu marhangulo ga muli gano mango, wanayishiyemera n’obwalagale oku ayishikurhabala olembere amarhangulo goshi wakayish’irhimanana nago omu mango gayisha. Yezu ayerekine kanga kahi na kahi abanafunzi bage bali omu bulagirire bw’okuba n’obuyemere bunji, cikone nta mango abire n’akarhinda oku barhakalembera amarhangulo bakageziremwo omu mango gayisha kugerera oburhabale bwa Yehova. (Yn. 14:1; 16:33) Aliyemire n’obwalagale oku obuyemere busêzire bwayishihashisa ehitû hy’abantu bacunguke amalibuko madarhi gayisha hano hofi-hofi. (Maf. 7:9, 14) Wayishiba egarhi k’abo bantu erhi muli gano mango wakakolesa ngasi bulyo ogwerhe ly’oseza obuyemere bwawe!​—Hb. 10:39. w21.11 buk. 25 cif. 18-19

Rhurhakacilangalira oku rhwalangwa kugerera ecisomerine. Cikone rhumanyire oku bala boshi balangalira Yehova ciru bakafâ buno, bayishilama ensiku n’amango omu mango gayisha. Hano hofi-hofi, obulangalire bwirhu omu buhashe bwa Yehova bw’okurhulanga bwahirwa omu marhangulo. Hano Gogi w’omu cihugo ca Magogi, k’okuderha omulungano gw’amashanja, arhera abakozi ba Nnâmahanga, akalamo kirhu kayishibonekana nka kali omu mazibu. Rhwanalagirire oku kuba n’obulangalire muli Yehova oku anarhuyokole. Omu masu g’amashanja, rhwanabonekane nka bibuzi birhagwerhi lungere na ntaye wakarhulanga. (Eze. 38:10-12) Rhwanabe rhurhagwerhi bikolanwa b’ivita, rhurhanakomerezibagwa okulwa ivita. Amashanja ganabone oku kuli kulembu okurhuhima. Barhakabona ebi rhuli rhwabona n’amasu girhu g’obuyemere k’okuderha, omurhwe gwa bamalahika gugwisire ecirâlo gunali eburhambi bw’abakozi ba Nnâmahanga, gucirheganyize okurhulwira. Bulya gurhi amashanja garhakababona? Bulya barhagwerhi masu g’obuyemere. Banasomerwe bwenene amango omurhwe gw’empingu gwanayishe guli rhurhabala!​—Maf. 19:11, 14, 15. w22.01 buk. 6 cif. 12-13

Bene wirhu na bali birhu boshi babà ba bulagirire omu masu ga Yehova, co cirhumire nirhu rhushinganine rhukababona oku bali ba bulagirire. Rhushinganine rhube babidu okujira ngasi ebi rhwakanahasha lyo rhubalanga n’okubashibirira. Erhi rhwakahugûkwa oku rhwasarhazize muntu mulebe erhi kumugayisa, rhurhashinganini rhulekere aho, n’okurhanya oku oyo muntu naye anakagayira busha erhi oku ahikira aha ayibagira oko rhwamujiriraga. Bulya gurhi bantu baguma na baguma bahikira aha basarhazibwa? Nkabaga enyanya z’ebi bageziremo, bene wirhu na bali birhu baguma baguma banakacibona oku bali babusha bwenene. N’abandi baciri bahyahya omu okuli, barhacihugûkwa oku bashinganine bakalembera obuzamba bw’abandi. Omu kanga koshi, rhushinganine rhukalonza omurhula egarhi kirhu. Na kandi, omuntu okalug’ibona oku abandi banakamugokeza ashinganine ahugûkwe oku obo buli buzamba anahûnyire okujira empindûlo. Ashinganine azijire ly’aba n’omurhula gw’ekandalala na ly’abandi bakaciyumva bwinja. w21.06 buk. 21 cif. 7

Yezu anakuyumvize obwonjo. Erhi rhwakaba rhuli rhwaciyumva kubi, rhunashagaluke bwenene erhi rhurhulirizibwa n’omwîra oli warhuyumviza obwonjo, ci bwenene omwîra wagezire omu mazibu gashushine n’agirhu. Yezu ali nk’oyo mwîra. Amanyire gurhi biba erhi omuntu ayumva obuzamba na nkalagirire oku burhabale. Anahugûkwe obuzamba bwirhu, ananalabirize gurhi rhwahâbwa oburhabale omu “mango gashinganine.” (Hb. 4:15, 16, NWT) Nka kula Yezu ayemeraga oburhabale bwa malahika amango ali omw’ishwa ly’e Getsemane, rhwanaba babidu okuyemera oburhabale Yehova arhuha, bube bw’omu bitabu, mavideo, hotuba, erhi kuhâbwa omurhima n’omugula orhulambagirire erhi mwîra okuzire kiroho. (Lk. 22:39-44) Yehova anakuha “omurhûla gwa Nyamuzinda,” n’okukuzibuhya. Erhi rhushenga, rhunahâbwe “omurhûla gwa Nyamuzinda gulushire ngasi nkengero.”​—Fl. 4:6, 7. w22.01 buk. 18-19 cif. 17-19

Yehova anakajira ebintu binja. Cikone amazibu rhwakaba rhugwerhe, kwanaba kulangalira bene bantu akolesa lyo barhulongoza. Nkaba rhwanahikira aha rhwacidosa erhi kobinali bala bajira bukulu bulebe omw’ikubuliro lya Yehova, banakajira ebintu kushimbana n’obulongozi bwage erhi bwabo bone. Okuderha okuli, rhurhakaderha oku rhulangalire Yehova erhi akaba rhurhalangaliri bala akolesa lyo barhuha obulongozi, balya aba alangalire. Ene Yehova ali alongoza ecigabi ca hanw’igulu c’ikubuliro lyage kugerera “mushizi mwirhonzi na mwikubagirwa.” (Mt. 24:45, NWT) Nk’oku byali okubiyerekire embaraza eri yalongoza y’omu myaka igana mirhanzi, oyo mushizi ali alongoza abantu ba Nnâmahanga b’omw’igulu lyoshi n’okuha abagula obulongozi. Buzinda abagula nabo banahâne obo bulongozi omu bigamba. Rhunayerekane oku rhulangalire enjira ya Yehova y’okujira ebintu erhi rhurhumikira obulongozi rhuhâbwa kugerera ikubuliro lyage n’abagula. w22.02 buk. 4 cif. 7-8

Rhugwerhe mwishingo munji na lukengwa lunji okubona rhuli Bahamirizi ba Yehova! Rhunashagaluke bwenene erhi rhurhabala muntu mulebe ‘olonzize okuyishiba n’obuzine bw’ensiku n’amango’ abe mwemezi. (Ebj. 13:48, NWT) Nirhu rhunaciyumve nk’okula Yezu aciyumvagya, “aba n’omwishingo munene kugerera iroho litagatifu” erhi abanafunzi bage bamuganirira ebintu binja bacibwinire omu mahubiri. (Lk. 10:1, 17, 21, NWT) Entumwa Paolo yahanula Timoteyo ntya: “Ocimanye wêne, omanye n’enyigirizo zawe.” Paolo ayushûla erhi: “Okajira ntyo, waciciza wêne, onacize abakuyumvirhiza.” (1 Tm. 4:16) K’okuderha oku omukolo gwirhu gw’amahubiri gunacungule obuzine. Rhunacimanye rhwenene bulya rhuba bacikala bw’Obwami bwa Nnâmahanga. Rhunaba rhulonzize ensiku zoshi rhukajira ebintu byalerhera Yehova irenge bilinganine n’omwanzi mwinja rhuja rhwayaliza. (Fl. 1:27) Rhunayerekane oku ‘rhumanyire enyigirizo zirhu’ erhi rhucirheganya bwinja embere rhuje omu mahubiri n’erhi rhuhûna Yehova oburhabale embere rhujihubiri abandi omwanzi mwinja. w21.10 buk. 24 cif. 1-2

“Obumuntu buhyahya” eri njira y’okurhanya n’okujira ebintu eyerekana amorhere ga Yehova. Omuntu anayambale obumuntu buhyahya omu kuyerekana ilehe ly’iroho litagatifu lya Nnâmahanga, k’okuderha, okulileka lishumye entanya zage, oku aciyumva ekandalala, n’ebijiro byage. Kwa lwiganyo, aba azigire Yehova n’abakozi bage. (Mt. 22:36-39) Omuntu wa ntyo anagendekere aba n’omwishingo ciru akaba ali alwisa amazibu. (Yk. 1:2-4) Aba wa kujira omurhula. (Mt. 5:9) Analembere abandi n’okubayeresa olukogo. (Kl. 3:13) Aba azigire aminja ananagajire. (Lk. 6:35) Anayerekane kugerera ebijiro byage oku agwerhe obuyemere busêzire muli Ishe w’omu mpingu. (Yk. 2:18) Anagendekere aba mutûdu amango bamamusholoshonza ananacihashe amango ali omu mashumi. (1 Kr. 9:25, 27; Tt. 3:2) Lyo rhuyambala obumuntu buhyahya, rhushinganine rhube n’amorhere goshi gaganirirwe omu Abagalasiya 5:22, 23 n’omu gandi mandiko g’Ebibliya. w22.03 buk. 8-9 cif. 3-4

Abagula banayiga olwiganyo lw’entumwa Paolo arhali omukuhubiri kone nyumpa oku yindi, ci n’omukuba babidu okuhâna obuhamirizi ngasi mango. (Ef. 6:14, 15) Aka Paolo, abagula banakolesa akasanzi bageza omu mukolo gw’amahubiri lyo bakomereza abandi kuhiramo n’abarhabazi b’abagula. (1 Pt. 5:1, 2) Cikoki abagula barhashinganini bayibagire omukolo gw’amahubiri mpu bulya bagwerhe mikolo minji. (Mt. 28:19, 20) Banalahira mikolo miguma na miguma lyo bagendekera baba ba lugero. Enyuma z’okurhanya kugerera isala, hali amango bakabona oku erhi bakayemera mukolo mulebe, barhacihashe okuhikiriza ebintu by’obulagirire, nk’okulongoza enterekêro y’omulala, okucihâna omu mukolo gw’amahubiri, n’okukomereza abana babo muli ogo mukolo. Bashinganine bayemere n’obwalagale oku Yehova aba ahugûsirwe obulonza bwabo bw’okuba ba lugero omu bintu byoshi. w22.03 buk. 26 cif. 4; buk. 27 cif. 7; buk. 28 cif. 8

Kw’ocikengire oku wakagiyoboha okuba Muhamirizi wa Yehova? Hali amango erhi wakagiciyumva oku orhakahasha ciru n’ehitya okuhubiri ahantu h’abantu banji. Erhi nkaba kandi wakagiyoboha oku abantu b’omu mulala gwawe erhi abîra bawe bakuhagalika. Erhi akaba ntyo ko wakagiciyumva, wanahugûkwa bwinja omwanafunzi wawe w’Ebibliya amango naye ali aciyumva nk’oku wakagiciyumva. Yezu ayerekine oku byanahashikana okuyumva oboba bwa ntyo. Cikone, ayinginga abanafunzi bage oku barhalekaga obo boba bwarhuma barhakolera Yehova. (Mt. 10:16, 17, 27) Okakomereza omwanafunzi wawe w’Ebibliya bunyi-bunyi akaganirira abandi ebi aba ayemire. Nkaba abanafunzi ba Yezu bayobohire erhi abarhuma omu mukolo gw’amahubiri. Cikone Yezu abarhabala omu kubabwira emunda bajihubiri n’omwanzi bagendikahubiri. (Mt. 10:5-7) Gurhi wakayigamwo olwiganyo lwa Yezu? Orhabale omwanafunzi wawe amanye ngahi akakahubiri. Kwa lwiganyo, wanamudosa erhi hali omuntu amanyire wakashagalukira okuyiga enyigirizo ndebe z’Ebibliya. Na buzinda wanamurhabala okurheganya ebi ayishiderha omu kumuyeresa enjira nembu y’okuganirira abandi ezo nyigirizo. w21.06 buk. 6-7 cif. 15-16

“Omu miniti misungunu, amabutiki n’enyumpa zarhondera okuhongoka.” “Abantu boshi bayoboha bwenene . . . Bantu banji badesire oku okwo kwajijire miniti ibirhi yone. Ci nièhe nabona nka kâli kasanzi kanji.” Ezo ziri nderho za bantu baguma na baguma bafulumukaga omusisi gw’idaho gwageraga omu Népal omu mwaka gwa 2015. Cikone, hali akandi kantu kali kadundaganya, arhali vile nguma yone erhi cihugo ciguma cone, kali kadundaganya amashanja goshi. Omulebi Hageyo ayandika ntya: “Ntyo kwo Nyakasane [Yehova, NWT] Nyamuzinda w’Emirhwe adesire. Hasigire mango masungunu ndundaganye amalunga n’igulu.” (Hag. 2:6) Okudundaganya amashanja Hageyo aganirire kurhali nka musisi gw’idaho gulerha obusherêze bone. Lubero n’oko, oko kudundaganya amashanja kuli kwahikiriza ebintu binja. Yehova arhubwizire ntya: “Nadundaganya amashanja goshi, obuhirhi bwago bwaluga [bwajamwo, NWT], n’enyumpa yani eyunjule irenge.” w21.09 buk. 14 cif. 1-3

Lyo abantu baba n’obwîra busêzire, kuba kwa bulagirire bakaganira ngasi mango n’okubwirana ebiri oku murhima. Ko n’oko lugenda obwîra bwirhu haguma na Yehova. Erhi rhumubwira kugerera isala oku rhuli rhwaciyumva, entanya zirhu n’amazibu girhu, rhunayerekane oku rhumulangalire n’oku rhuyemire oku aba arhuzigire. (Enna. 94:17-19; 1 Yn. 5:14, 15) Okageza akasanzi haguma n’abîra bishwekerezi; abîra bishwekerezi luba luhembo lurhenga emwa Yehova. (Yk. 1:17) Larha wirhu w’omu mpingu anayerekane oku arhushibirire omu kurhuha omulala gw’ekiroho gwa bene wirhu na bali birhu ‘barhuzigira ngasi mango.’ (Mig. 17:17) Omu maruba entumwa Paolo ayandikiraga Abakolosi, aganiriremo Bakristu baguma-baguma bakagimurhabala, adesire oku bo bali “burhulirize” bwage. (Kl. 4:10, 11) Ciru na Yezu Kristu naye akagishagalukira oburhabale abîra bage bakagimuha; bamalahika ciru n’abantu. (Lk. 22:43) Okuganirira omwîra wirhu okuzire kiroho amazibu girhu burhali buzamba, cikone okujira ntyo kwanarhulanga. w21.04 buk. 24-25 cif. 14-16

Bici oshinganine ojire erhi owinyu Mukristu akajira akantu kakugayisize? Ojire okwawe koshi ly’ohira omurhula egarhi kawe naye. Obwire Yehova kugerera isala lirhenzire oku murhima gurhi oli waciyumva. Omuhûne agishe oyo muntu wakugokezagya anakurhabale obone amorhere minja muli oyo muntu, kw’okuderha amorhere garhuma Yehova amuzigira. (Lk. 6:28) Erhi wakabona oku wamayabirwa okuyibagira ebi oyo mwene wirhu akujiriraga, wanalola gurhi wakagend’iyumvanya naye. Ensiku zoshi, kuli kwinja okakengera oku oyo mwene wirhu erhi mwali wirhu naye arhalilonzize mpu akuyagaze. (Mt. 5:23, 24) Amango oli waganira naye, okengere oku naye agwerhe obulonza bwinja. Gurhi wakajira erhi akaba arhalonzizi habe omurhula egarhi kinyu? “Mukalemberana.” Orhayakaga mwene winyu, ogendekere wamulembera. (Kl. 3:13) N’okw’obulagirire bwenene, orhabikaga akarhinda bulya kanashereza obwîra bwawe haguma na Yehova. Orhayemereraga akantu koshi-koshi karhuma wasarhala. Omu kujira ntyo, wanayerekana oku ozigire Yehova kulusha akandi kantu koshi-koshi.​—Enna. 119:165. w21.06 buk. 23 cif. 15