Mwezi gwa 7

Okutenga omuntu guba mupango gwa Yehova. Obo buhâne bunalerhere abantu boshi obunguke, ciru n’owajiraga ecaha. Bantu baguma na baguma omu cigamba banaderha oku muhigo mwinja gw’okutenga muntu mulebe, cikone okengere oku kanji-kanji abo bantu barhaganirira ebintu bibi omuzigirwa wabo anajijire. Kobinali, rhurhahugûkwa ebintu byoshi byajijirwe. Co cirhumire, kuli kwinja rhukalangalira oku abagula batwaga olo lubanja bacihanganyire okukulikira amakanuni g’Amandiko n’okulutwa “okw’izino lya Nyamuzinda [Yehova, NWT].” (2 Nga. 19:6) Erhi wakalunga okuboko omuhigo gw’abagula gw’okutenga omuzigirwa wawe, wanarhabala oyo muntu ahikire aha agalukira Yehova. Elizabeth adesire ntya: “Okutwa olushangi loshi haguma na mugala wirhu mukulu kwali kuzibu bwenene. Cikone, erhi agalukira Yehova, yene aderha oku okumutenga gwali muhigo mwinja. Buzinda, avuga omunkwa okubona oku oko kutengwa kwamuyigirizize binji.” w21.09 buk. 28-29 cif. 11-12

Orhanye okubiyerekire oyo mukana. Buzira karhinda oyo mukana alilonzize naye ahe Yehova binji kulusha. Cikone, ajira okwage koshi; aha Yehova ebintu binja bwenene agwerhe. Na Yezu alimanyire oku oburhabale b’oyo mukana bwali bwa bulagirire omu masu g’Ishe. Isomo ly’obulagirire kuli rhwê liri ly’eri: Yehova anashagalukire erhi rhumuha ebintu binja bwenene rhugwerhe, kw’okuderha, omukolo rhumujirira n’omurhima goshi n’obugumaguma bwirhu boshi. (Mt. 22:37; Kl. 3:23) Yehova anashagaluke bwenene erhi abona rhuli rhwajira okwirhu koshi lyo rhumukolera! Ako kanuni kayerekire akasanzi n’emisi rhukolesa omu nterekêro rhuha Yehova, kw’okuderha omu mukolo gw’amahubiri n’omu ntimanano zirhu. Gurhi wakakolesa isomo rhukuzire omu mwanzi g’oyo mukana? Orhanye oku bantu omanyire balagirire okubwirwa oku obushiru bajira omu mukolo gwa Yehova bunamushagaluse. Nkaba hali mwali wirhu okola mugikulu omanyire oli waciyumva kubi erhi kucibona wa busha-busha bulya arhacigwerhi misi y’okugeza kasanzi kanji omu mukolo gw’amahubiri nk’oku akagijira embere. w21.04 buk. 6 cif. 17, 19-20

Yehova amanyire akasanzi kinja k’okuyusa obubi buli mw’er’igulu. Okulembera kwage kwarhabire okugusha haguma ehitû hinene hirimo emiliyoni y’abantu bali bamuharamya n’okumuha irenge. Boshi baba bashagalusire bwenene okubona Yehova alembire nsiku nyinji kuhika bahikira aha baburhwa, bayiga gurhi bakamuzigira, banahikira aha bacihâna emwage. Okulembera kwa Yehova kwanabonekane oku gwali muhigo mwinja amango anahembe emiliyoni ya muli rhwê yagendekire yalembera kuhika ebuzinda! Ciru ankaba amalumwa n’amalibuko goshi Shetani adwirhè, Yehova agendekire abêra “Nnamahanga w’obushagaluke.” (1 Tm. 1:11, NWT) Nirhu akage rhwanagendekera rhwaba n’obushagaluke omu kulindirira kuhika amango Nnamahanga acêsa izino lyage, ahalire ehaki yage y’okurhambula, akule obubi boshi, n’okumaliriza amazibu girhu goshi. Rhweshi rhuhige okugendekera kwalembera, na kandi rhucirhulirize omu kumanya oku Larha wirhu w’omu mpingu naye ali alembera. w21.07 buk. 13 cif. 18-19

Bantu banji b’omu myaka igana mirhanzi babula buyemera Yezu. Na kandi rhwayishibona bulya gurhi bantu banji ene bacilekerera kuhika bahikire aha basarhala. N’akantu k’obulagirire, rhwayishiyiga bulya gurhi kuli kwa bulagirire okuba n’obuyemere buzibu muli Yezu lyo rhurhagikasarhala. Bakamugayaguza mpu bulya ali mwene omubinji. Na kandi ali muburhwa w’e Nazareti, lugo abantu bakagibona mpu lusungunu bwenene na lwa busha-busha. Ciru na Natanaeli embere abe mwanafunzi wa Yezu, arhangiderha ntya: “K’e Nazareti yankarhenga akantu kinja?” Akagirhanya oku bulebi buli omu lwandiko lwa Mikeyo 5:2, bwalidesire oku Masiya anaburhwe e Betelehemu ci arhali e Nazareti. Omulebi Izaya alêba oku abashombanyi ba Yezu barhakashibirira “emyanzi eyerekire iburha lya [Masiya].” (Iz. 53:8, NWT) Abo bantu bacicihâga akasanzi k’okulolereza emyanzi eyerekire Yezu, bakahugûsirwe oku akaburhirwe e Betelehemu n’oku akarhenzire omw’iburha lya Mwami Daudi. (Lk. 2:4-7) Na ntyo aha Yezu aburhiragwa halipatine n’aha obulebi buli omu Mikeyo 5:2 bwâlilebire. Amazibu abo bantu bagwerhe galigi gahi? Abo bantu bali babidu okulutwa. Barhalimanyire emyanzi yoshi eyerekire Yezu. N’oko kwakarhuma basarhala. w21.05 buk. 2-3 cif. 4-6

Ebibliya erhuhîre enyiganyo nyinja z’abantu bagishirwe bulya bayemire amahano. Rhuganirire olwiganyo lwa Ayubu. Ciru akaba akag’iyoboha Nnâmahanga, arhali mwimana. Erhi ali omu mazibu, aderha entanya mbi. N’oko kwarhuma Elihu na Yehova bamuha ihano lya ho n’aho. Gurhi Ayubu ajijire? Ayemera er’ihano n’obwirhohye. Aderha ntya: “Nàsambîre buzira bukengere . . . namagalula oku naderhaga, nkola naciyunjuza omu kucibêrera omu katulo n’omu lùvû.” (Ayu. 42:3-6, 12-17) Ayerekana oku ali mwirhohye omu kuyemera ihano Elihu amuhâga, ciru ankaba Elihu ali murho kumulusha. (Ayu. 32:6, 7) Ko n’oko, obwirhohye bwanarhurhabala rhukolese ihano ciru ankaba rhuli rhwarhanya oku rhurhalishinganini erhi owarhuhâga lyo ali murho kurhulusha. Ka rhweshi rhurhalagirire oku kuba n’ilehe l’iroho litagatifu n’okuhikira aha rhwaba bigiriza binja b’omwanzi mwinja? w22.02 buk. 11 cif. 8; buk. 12 cif. 12

Ngasi muntu w’omu cigamba agwerhe omukolo g’okugendekeza omurhula n’obuzigire omu cigamba lyo nta muntu yeshi-yeshi waciyumvagya nk’ali kahumba. Enderho n’ebijiro birhu byanaha abandi omurhima! Bici wakajira ly’orhabala balya babà bone omu okuli lyo bagendekera baciyumva oku nabo bali baguma b’omu cigamba? Obe murhanzi okurhondeza obwîra haguma n’abandi. Rhwanajira ntyo omu kukayankirira n’obushagaluke abantu bahyahya bayishire omu cigamba cirhu. (Rm. 15:7) Cikone rhwanajira binji kulusha okulamusanya kone. Rhulonzize rhujire obwîra busêzire haguma n’abandi enyuma za kasanzi kalebe. Co cirhumire okashagalukira abahyahya onayerekane oku obashibirire. Olonze okumanya gurhi bayosire na mazibu maci bali barhimanana nago, cikone orhajaga omu bintu byabo bibonekine nk’ihwè. Baguma na baguma ba mulibo banaba n’amazibu gw’okubwira abandi entanya zabo, co cirhumire, orhabasezagya oku baganire haguma na nawe. Lubero n’oko, wanabadosa amadoso garhakarhuma bakubwira ihwè lyabo, n’amango bali bakushuza wabayumvirhiza onarhuzize. Kwa lwiganyo, wanabadosa gurhi bamanyagamwo okuli. w21.06 buk. 11 cif. 13-14

Rhunashagalukire olukengwa rhugwerhe l’okukolera Yehova omu cinyabuguma nka “buso buguma” buyabwirwe na “lungere muguma”! Ecitabu Tengenezo Lenye Kufanya Mapenzi ya Yehova, oku bukurasa bwa 165, cidesire ntya: “Bulya nawe onayunguke n’eco cinyabuguma, ogwerhe omukolo gw’okucigendekeza.” Na ntyo, rhushinganine “rhucikomereze okukabona bene wirhu na bali birhu nk’oku Yehova ababona.” Rhweshi rhuli “bana barhorho,” rhunali ba bulagirire omu masu ga Yehova. Ka ntyo ko nawe obona bene winyu na bali binyu? Yehova anabone n’okushagalukira ngasi kantu koshi ojira ly’obarhabala n’okubashibirira. (Mt. 10:42) Rhuba rhuzigire bwenene abirhu Bakristu. Co cirhumire ‘rhumanye rhwankarhuma mwene wirhu asarhala erhi ahirime.’ (Rm. 14:13) Rhunakabona bene wirhu na bali birhu oku barhulushire, rhunaba rhulonzize okubababalira n’omurhima gwoshi. Na nirhu rhurhakagicileka rhusarhazibwe n’abandi. Lubero n’oko, “rhushimbulire ebilerha omurhûla n’ebyankarhabala abirhu.”​—Rm. 14:19. w21.06 buk. 24 cif. 16-17

Erhi rhwakakaciyigiriza n’okukolesa omu kalamo kirhu amahano rhukûla omu Kanwa ka Nnâmahanga n’ikubuliro lyage, rhwanagendekera rhwaba n’amorhere g’Ecikristu. Na kandi rhwanahikira aha rhwaba na bumanye bunji lugenda Nnâmahanga. Yezu akolesize olwiganyo luyerekine oku omwanzi gw’Obwami rhuja rhwayaliza ko guba nka mburho nsungunu eja yakula bunyi-bunyi omu mirhima y’abantu birhohye. Aderha ntya: “Emburho enacimerere, enakule [owayirhweraga] arhanamanyiri. Bulya obudaka bwonene buyêza, burhanzi ebyasi, hakulikire omusîsi, na buzinda amahemba omu musîsi.” (Mk. 4:27, 28) Yezu alonzangya okuhugûla oku nka kula emburho ekula bunyi-bunyi, ko n’omuntu oyemera omwanzi gw’Obwami akula bunyi-bunyi omu hali y’ekiroho. Kwa lwiganyo, erhi abanafunzi birhu b’Ebibliya birhohye barhondera okujira obwîra bwa hofi-hofi haguma na Yehova, rhunarhondere okubona mpindûlo zirhali nyi bamakajira omu kalamo kabo. (Ef. 4:22-24) Cikone rhushinganine rhukakengera oku Yehova yekuza eyo mburho nsungunu omu mirhima yabo. w21.08 buk. 8-9 cif. 4-5

Rhwanaba n’omwishingo erhi rhwakagulongeza ahantu hinja. Omuntu oshagalukira “ebi amasu gali gabona” anarhimukwe n’ebi agwerhe n’okushagalukira akanga alimo. Lubero n’oko, omuntu oshimbulira amarala g’eyi n’eyi anagendekere alalikira akantu birhakahashikana okuba nako. Isomo lihi rhukuzire aho? Lyo rhuba n’omwishingo, rhushinganine rhusegeze obwenge bwirhu oku bintu rhugwerhe ci arhali oku bintu rhurhakahash’iba nabyo. Ka kobinali byanahashikana okurhimukwa n’ebi okola ogwerhe? Bantu banji banarhanye mpu birhakahashikana, bulya erhi hagera kasanzi, rhunacibilonza okuba n’ebindi bintu bihyahya. Cikone byanahashikana okurhimukwa. Rhwanashagalukira ebi rhugwerhe ci arhali ebi “amasu gali gabona.” Gurhi rhwakajiramwo ntyo? Lyo rhubona ishuzo, rhuganirire olwiganyo lw’etalanta Yezu ahânaga luganirirwe omu Mateyo 25:14-30. Rhwasegeza obwenge bwirhu kw’ebi lwakarhuyigiriza okubiyerekire okuba n’omwishingo, n’okuguyushûla omu migisho rhwakaba rhugwerhe muli gano mango. w21.08 buk. 21 cif. 5-6

Yehova anashibirire “abalibusire n’abacîrhôhize omu murhima.” Ngasi muguma wirhu anarhabala omu kuha abo bene wirhu na bali birhu bazigirwa omurhima, ci arhali abagula bone. Njira nguma rhwakabahâmwo omurhima kuli kuyerekana oku kobinali rhubashibirire. Yehova aba alonzize rhuyereke ebyo bibuzi byage by’obulagirire kunganaci aba abizigire. (Mig. 19:17) Na kandi rhwanarhabala bene wirhu na bali birhu omu kuba birhohye na ba lugero. Rhurhalonza okujira ebintu byakarhuma abandi barhusegezako entanya zabo bulya oko kwanarhuma barhuyumviza obumvu. Lubero n’oko, rhwanakolesa obuhashe n’obumanye bwirhu lyo rhuhânana omurhima. (1 Pt. 4:10, 11) Rhwanayiga gurhi rhwakakajirira abandi omu kulola gurhi Yezu akagikolera abanafunzi bage. Ye wali muntu mukulu bwenene walamaga hanw’igulu. Cikone, ali “mutûdu na mwirhohye w’omurhima.” (Mt. 11:28-30) Akagiyigiriza omu kukolesa enderho nembu, n’enyiganyo nyinja zakag’ikahuma oku mirhima y’abantu birhohye.​—Lk. 10:21. w21.07 buk. 23 cif. 11-12

Ocihirireho akasanzi k’okuganiza bene wirhu na bali birhu bakola bashosi. Kobinali, barhacibona bwinja, barhanacilambagira duba-duba, banakola bagwerhe amazibu g’okuganira, cikone baciri misole omu kandalala, banacijirîre “izino [linja]” haguma na Yehova. (Muh. 7:1) Okengere bulya gurhi Yehova ababona oku babà ba ngulo ndarhi. Ogendekere wabayereka olukengwa. Obe aka Elisha. Ananîra ho Eliya olusiku luzinda bagezagya haguma. Kasharhu koshi abwira Eliya erhi: “Ntakuleke.” (2 Bam. 2:2, 4, 6) Oyerekane oku oshagalukire bene wirhu na bali birhu bakola bashosi omu kukabadosa amadoso lyo baganira. (Mig. 1:5; 20:5; 1 Tm. 5:1, 2) Wanabadosa amadoso nk’aga: “Amango waciri murho, bici byakuyemezize n’obwalagale oku wabwîne okuli?” “Gurhi ebi wacibwinîre omu kalamo byakurhabire oyegere Yehova?” “Bici byakurhabire ogendekere okuba n’omwishingo omu mukolo gwa Yehova?” (1 Tm. 6:6-8) Buzinda oyumvirhize amango bali bakuganirira ebi bacibwinîre. w21.09 buk. 5 cif. 14; buk. 7 cif. 15

Onayerekane oku ozigire Nnâmahanga, erhi ojira okwawe koshi ly’orhumikira irhegeko ly’okuhubiri n’okujira abanafunzi. (1 Yn. 5:3) Okengere oku buzigire bwawe kuli Yehova bo bwakushumagya orhondere okuhubiri nyumpa oku yindi. Ka kwali kulembu okurhumikira er’irhegeko? Nkaba nanga. Ka wal’iyobohire erhi ohika hofi n’enyumpa ntanzi wahubirigiko? Buzira karhinda nkaba waliyobohire! Cikone walimanyire oku ogo g’omukolo Yezu alonzize ojire, n’oko kwarhuma warhumikira er’irhegeko. Na ntyo erhi hagera kasanzi, orhacikag’iyoboha okuja omu mukolo gw’amahubiri. Gurhigi wakaderha lugenda okulongoza ifunzo ly’Ebibliya? K’okurhanya gurhi walilongoza kunakarhuma wayoboha? Nkaba. Cikone, erhi wakashenga Yehova oku akurhabale ohime obo boba n’oku aguhe oburhwali bw’orhondeza ifunzo, Yehova anakurhabala omu kuzibuhya irala lyawe ly’okujira abanafunzi. w21.07 buk. 3 cif. 7

Omu mango ga mîra, abajà bakagihirwa kw’ecimanyiso c’okuyerekana bali bajà bandi. Ko n’oko ene, abantu boshi bakwanine baje kw’ecimanyiso c’olwiganyo omu kuboko erhi oku malanga. Entanya zabo n’ebijiro byabyo byanayerekana erhi balunzire okuboko eby’epolitike by’er’igulu. Ka rhwayemera eco cimanyiso c’olwiganyo n’okulunga okuboko amarhegesi g’er’igulu? Abalahira okuja kw’eco cimanyiso banarhimanane na mazibu manji. Ecitabu c’Amafulûlo cidesire: “Ntaye wankaciguzire nisi erhi aguze arhanalikwo ecimanyiso.” (Maf. 13:17) Cikone abakozi ba Nnâmahanga bamanyire gurhi Nnâmahanga ayishijira balya bali kw’ecimanyiso ciganirirwe omu Amafulûlo 14:9, 10. Ahali h’okuja kw’eco cimanyiso, bohe bayandika omu kuboko kwabo, “Ndi wa Nyakasane [Yehova, NWT].” (Iz. 44:5) Aka ko kasanzi rhushinganine rhuciyemeze n’obwalagale erhi obwishwekerezi bwirhu kuli Yehova buli buzibu. Erhi akaba buli buzibu, Yehova ashagaluka n’okuderha n’obwalagale oku rhuli bage! w21.09 buk. 18 cif. 15-16

Rhwanahikiriza bwinja omukolo gwirhu gw’amahubiri erhi rhwakayunguka n’oburhabale bw’abandi. Entumwa Paolo ayeresire Timoteyo enjira akagikolesa omu mukolo gwage gw’okuhubiri n’okuyigiriza na buzinda aha Timoteyo omurhima oku akolese ezo njira ly’arhabala abandi. (1 Kr. 4:17) Aka Timoteyo, nirhu rhwanayunguka n’obulenga bwa bene wirhu na bali birhu b’omu cigamba. Kandi, oshinganine okashenga Yehova akulongoze ngasi mango nk’oli omu mahubiri. Nta kantu rhwakahasha okujira buzira burhabale bw’iroho lyage litagatifu. (Enna. 127:1; Lk. 11:13) Obwire Yehova ebintu n’obwalagale amango oli wamushenga oburhabale kugerera isala. Kwa lwiganyo, wanamuhûna akulongoze emw’omuntu ogwerhe omurhima mwinja waba mubidu okukuyumvirhiza. Oshinganine kandi okuciha akasanzi k’okuciyigiriza Ebibliya we nnene. Akanwa ka Nnâmahanga kadesire ntya: ‘Mumanyirire obulonza bwa Nnâmahanga; mumanye aminja, ebi asima n’ebishinganine lwoshi.’ (Rm. 12:2) Oku rhugendekire rhwayemera n’obwalagale oku rhumanyire okuli lugenda Nnâmahanga, ko rhwakanayerekana n’obwalagale oku rhuyemire ebi rhuli rhwaganirira abandi amango rhuli omu mahubiri. w21.05 buk. 18 cif. 14-16

Gurhi byakaba erhi wakabona oku wajijire okwawe koshi washenga Yehova enyanya z’oyo mwanafunzi, cikone arhali ajira amajambere n’oku bihûnyire okuleka okuyiga naye? Erhi gurhi wakajira erhi akaba orhasigirhabala muntu mulebe ahikire obubatizo? Ka wanacitumuza n’okurhanya oku nkaba Yehova arhagisha omukolo gwawe gw’amahubiri? Obone oku Yehova apima obwihangane bwirhu. Yehova anakalaba obushiru bwirhu n’okulembera kwirhu. Yehova anakabona oku rhwahikirizize bwinja omukolo gwirhu erhi rhugujira n’obushiru n’obuzigire, ciru abandi bakarhuyumvirhiza erhi nanga. Paolo ayandika ntya: “Nyamuzinda arhali mubula burhondekezi [bushinganyanya] mpu ayibagira ebijiro binyu n’obuzigire mwàyerekîne oku izino lyage bulya mwàkolire abatagatifu munacidwirhe mwakujira.” (Hb. 6:10) Yehova aba akengire obushiru bwirhu n’obuzigire bwirhu, ciru akaba obo bushiru burhayanyiri amalehe minja. Na ntyo wanacibonera wenene enderho Paolo adesire omu lwandiko lw’olusiku lw’ene. w21.10 buk. 25 cif. 4-6

Obwinja n’obuzigire bwa Yezu bwakagibonekana kugerera oku akagijirira abanafunzi bage. Alimanyire oku bagwerhe obuhashe n’akanga kali lubero. Barhakahâbirwe mikolo miguma na kandi boshi barhakalehesire kuguma omu mahubiri. Ciru akaba ntyo, akagishagalukira obushiru burhenzire oku murhima goshi ngasi muguma wabo akagiyerekana. Oborhere bwa Yezu bw’okuhugûkwa akanga ka ngasi muntu, bubonekine kugerera olwiganyo ahânaga lw’amagerha (talanta). Mw’olo lwiganyo, oyo muntu (nnawabo) aha ngasi murhumisi wage omukolo kushimbana n’ “obuhashe bwage.” Murhumisi muguma wa muli balya barhumisi babirhi bali masu ayunguka binji kulusha owabo. Cikone nnawabo abavuga bombi omunkwa omu kukolesa ezi nderho zishushine: “Kwokwo, murhumisi mwinja na mwikubwagirwa!” (Mt. 25:14-23) Ngasi mango Yezu anakarhukolera n’obuzigire n’obwinja. Ayishi oku obuhashe n’akanga kirhu biba lubero, na kandi anashagaluke erhi rhujira okwirhu koshi lyo rhukolera Ishe. Kuli kwinja rhukajirira abandi aka Yezu. w21.07 buk. 23 cif. 12-14

Mwami Daudi akagiyerekana olukogo. Kwa lwiganyo, erhi Nabali ashuza Daudi omu njira erhali y’obukenge analahira oku arhamuha ebiryo n’abalume bali boshi, Daudi ayumva oburhe bwenene anahiga okugend’iyirha Nabali n’abantu b’omu nyumpa yage boshi. Kugerera oku cijiro ca duba-duba Abigayili muka Nabali ajiraga, Daudi acîkwa okubulaga omuko gw’abo bantu. (1 Sam. 25:9-22, 32-35) Okengere oku erhi Daudi ayumva oburhe bwenene, ahiga oku Nabali n’abantu b’omu mwage bashinganine bafê. N’enyuma z’aho, Daudi aba mubidu okuderha oku olya mulume mugale w’omu lwiganyo Natani akolesagya ashinganine afê. Muli aka kanga ka kabirhi rhwanacidosa bulya gurhi Daudi wali muntu mwinja akahikire aha atwira abandi olubanja kubi ntyo. Olole akanga alimo. Muli ako kasanzi ezamiri ya Daudi yakagimutumuza. Okutwira abandi olubanja n’obukali ciba cerekane c’obulwala bw’ekiroho. w21.10 buk. 12 cif. 17-18; buk. 13 cif. 20

Kugerera enderho z’olwandiko lw’olusiku lw’ene, rhuyumvirhe oku rhwanayiga olwiganyo lwa Yehova, yeba lwiganyo lukulu lw’obutagatifu. Rhwanaba batagatifu rhunashinganine okubabo omu lugenzi lwirhu. Oko kwanabonekana nka kurhakahashikana bulya rhurhaba bimana. Petro naye akagijira amagosa garhalimanyi; cikone olwiganyo lwage luyerekine oku ‘rhwanaba batagatifu.’ Erhi bantu banji barhanya oku muntu oli mutagatifu, banarhanye oku aba muntu orhajira mwishingo oyambala emishangi y’idîni anali alola n’obutûdu. Cikone ezo ntanya zirhakaba z’okunali. Yehova aba mutagatifu, cikone Ebibliya eyerekine oku aba “Nnâmahanga w’obushagaluke.” (1 Tm. 1:11, NWT) Bala bamuharhamya banakahamagalwa ba “bushagaluke.” (Enna. 144:15, NWT) Yezu atumuzize balya bakagiyambala emishangi y’okubaberula n’abandi n’okuyerekana obushinganyanya bwabo embere z’abantu. (Mt. 6:1; Mk. 12:38) Rhwe nka Bakristu rhunabe n’entanya nyinja okubiyerekire oku rhubona obutagatifu kugerera ebi rhwayizire omu Bibliya. Rhuba rhuyemire n’obwalagale oku Nnâmahanga wirhu w’obuzigire arhakarhuha irhegeko rhurhakahash’irhumikira. w21.12 buk. 2 cif. 1, 3

Omu bintu byoshi Yehova arhuhîre, nkaba akantu kaguma kakulu ka muli ebyo byoshi buli buhashe b’okumuharamya. Rhunayereke Yehova oku rhumuzigire omu “kushimba amarhegeko gage.” (1 Yn. 5:3) Egarhi k’amarhegeko Yehova alonzize rhushimbe, hali irhegeko Yezu arhuhâga ly’okujira abanafunzi rhunababatize. (Mt. 28:19) Na kandi arhurhegesire oku rhuzigirane. (Yn. 13:35) Yehova anajire abantu barhumikira amarhegeko gage babe baguma bw’omu mulala gwage gw’omw’igulu lyoshi. (Enna. 15:1, 2) Okazigira abandi. Obuzigire bo buba borhere bukulu bwa Yehova. (1 Yn. 4:8) Yehova ayerekine oku aba arhuzigire ciru n’embere rhumumanye. (1 Yn. 4:9, 10) Rhunayige olwiganyo lwage erhi rhuyereka abandi obuzigire. (Ef. 5:1) Enjira nguma nyinja rhwakayekamw’abandi oku rhubazigire kuli kubarhabala bayige binji lugenda Yehova obu ehisanzi hy’okujira ntyo hicihali. (Mt. 9:36-38) Erhi rhwakajira ntyo, rhwanabaha obulyo bw’okuyishiba baguma bw’omu mulala gwa Nnâmahanga. w21.08 buk. 5-6 cif. 13-14

Bulya Yezu al’izigire Yehova bwenene, oko kwamushumya acihâna ly’ajira obulonza bwage ananacihâna erhi rhwe rhurhuma. (Yn. 14:31) Akalamo ka Yezu ka hanw’igulu kayerekine oku al’izigire abantu bwenene. Ngasi lusiku, akag’iyerekana obuzigire n’obwonjo, ciru n’amango bantu baguma na baguma bakag’imuhagalika. Enjira y’obulagirire Yezu ayeresiremwo abantu obuzigire, kwali kubayigiriza okubiyerekire Obwami bwa Nnâmahanga. (Lk. 4:43, 44) Na kandi, Yezu ayerekine obuzigire bw’okucihâna kuli Nnâmahanga na kuli bene bantu omu kuyemera alibuke bwenene n’okunigwa n’abanya-byaha. Omu kujira ntyo, aha ngasi muguma wirhu obulyo bw’okuyish’ilama ensiku n’amango. Rhwacihânyire emwa Yehova n’okubatizibwa bulya rhuba rhumuzigire bwenene. Co cirhumire, aka Yezu, rhushinganine rhuyerekane obuzigire kuli Yehova kugerera oku rhujirira abantu. Entumwa Yowane yayandika ntya: “Orhazigira mwene wabo adwirhe abona, ntakwo ankazigira Nyamuzinda arhabona.”​—1 Yn. 4:20. w22.03 buk. 10 cif. 8-9

Kurhaba kulembu okugeza akasanzi haguma na Yehova ciru ankaba rhunashagalukire okujira ntyo. Rhulamire akalamo kalimo binji bya kujira, n’oko kwanarhuma kurhaba kulembu okuba n’eprograme nyinja y’okujira ebintu by’ekiroho. Akazi, emikolo y’omulala, n’eyindi mikolo y’obulagirire yanarhurhôla kasanzi kanji ly’ejirwa n’oko kwanarhuma rhwarhanya oku rhurhagwerhi kasanzi k’okusalira, okuyiga, n’okurhanya. Hali akandi kantu ka muli gano mango girhu karhôla akasanzi kirhu. Erhi rhwakabula kuba masu rhwanayemerera emikolo erhabonekini nka mibi erhurhôle akasanzi rhwakakolesize omu kuyegerera Yehova. Kwa lwiganyo, ebintu biyerekire okucishagalula. Rhweshi rhunashagalukire okuba n’akasanzi k’okurhamuka. Cikone eby’okucishagalusa binja nabyo byanarhurhôla kasanzi kanji n’oko kurhume rhurhacibona akasanzi rhwakolesa omu bintu by’ekiroho. Rhushinganine rhuhire okucishagalusa aha nafasi yako.​—Mig. 25:27; 1 Tm. 4:8. w22.01 buk. 26 cif. 2-3

Erhi Yehova arhegeka aba Israheli oku bakazigira abalungu babo, arhababwiraga oku bakazigira abantu b’omu bûko bwabo bone erhi b’omw’ishanja lyabo lyone. Ababwira oku bakazigira n’ecigolo ciri egarhi kabo. Ogo mwanzi guyumvikine guli omu lwandiko lwa Bene-Levi 19:33, 34. Ecigolo calishinganine cikajirirwa “nk’oku omwanaburhwa anajirwa,” n’aba Israheli balishinganine ‘basîme’ eco cigolo nk’oku bacisîma bonene. Kwa lwiganyo, aba Israheli baliyemerire ecigolo cilamire emwabo n’abakenyi boshi oku bakayungusire n’omupango g’okukundeza gwalihizirweho. (Lev. 19:9, 10) Akanuni kayerekire okuyereka ebigolo obuzigire kaciri kakolesibwa oku Bakristu ene. (Lk. 10:30-37) Gurhi bajiramwo ntyo? Omw’igulu muli emiliyoni y’ababunga, nkaba hali ciru n’abalamire hofi n’ahamwinyu. Kuli kwa bulagirire rhujirire abo balume, abakazi, n’abana n’obukenge. w21.12 buk. 12 cif. 16

Oku rhwakagendekera rhwalonza obulongozi bwa Yehova ene, ko rhwakanagendekera rhwaba n’obulangalire omu buhashe bwage bw’okurhuyokola omu mango gayisha. Biba bihûnyire obuyemere n’okuba mubidu okulangalira Yehova lyo rhuhûna bose wirhu ekonjé lyo rhuja oku ntimanano zirhu nkulu erhi oku ntimanano z’ecigamba erhi kumuhûna ashanje ensa zirhu z’okukola lyo rhukaja oku ntimanano zoshi n’okugeza kasanzi kanji omu mahubiri. Orhanyagye gurhi byakaba erhi bose wirhu akalahira ebyo byoshi na buzinda rhuheze akazi kirhu. Ka rhugwerhe obuyemere oku Yehova arhakarhuleka arhakanarhulikirira n’oku ngasi mango agendekera arhuhikirigiza amalagirire girhu g’omusingi? (Hb. 13:5) Bantu banji bali omu mukolo gw’akasanzi koshi banaganirire ebi bacibwinire biyerekine kunganaci Yehova abarhabire amango balimulagirireko. Yehova aba mwishwekerezi. Bulya Yehova arhuli aha burhambi, rhurhagwerhi ecirhumire coshi c’okuyoboha amango gayisha. Nnâmahanga wirhu arhakarhulekerera erhi rhwakakahira Obwami bwage oku nafasi ntanzi omu kalamo kirhu. w22.01 buk. 7 cif. 16-17

Gurhi okulangalira kwirhu abagula kwakajamwo omu marhangulo? Orhanye erhi akaba omuntu watengagwa ali mwîra wirhu wa hofi-hofi. Hali amango rhwakarhanya erhi kobinali abagula bahugûsirwe ebintu byoshi, erhi rhuje rhwacidosa erhi kobinali batwire olubanja omu njira Yehova akalutwiremo. Bici byakarhurhabala lyo rhugendekera rhwaba n’entanya nyinja okubiyerekire ogo muhigo gwarhôzirwe? Rhunajire bwinja erhi rhukengera oku okutenga omuntu wajiraga ecaha guba mupango gwa Yehova n’oku gunalerhere obunguke owajiraga ecaha n’ecigamba. Erhi omunyabyaha orhaciyunjuzizi akayemererwa okubêra omu cigamba, anashumya abandi nabo bakajira ebyaha. (Gl. 5:9) Na kandi, hali amango akabula buhugûkwa oku ecaha cage ciri cizibu, n’oku ashinganine ajire empindûlo omu ntanya n’omu bijiro byage ly’ayemerwa na Yehova. (Muh. 8:11) Rhwanayemera n’obwalagale oku abagula banarhôle kwa buzibu-zibu omukolo gwabo erhi bahiga oku muntu mulebe ashinganine atengwe. w22.02 buk. 5-6 cif. 13-14

Okulembera n’obwinja gaba morhere ga bulagirire amango muntu mulebe amalahira ihano liyimangire oku Bibliya. Omugula ashinganine ayake oborhere bw’okugaya duba-duba erhi akaba ihano ahânaga lirhayemirwi erhi kukolesibwa ho n’aho. Co cirhumire omugula anashenga Yehova agishe olya olagirire okw’ihano anamurhabale abone ecirhumire c’er’ihano n’okulikolesa. Mwene wirhu wahanûlagwa anaba n’obulagirire bw’akasanzi k’okurhanya lugenda ebi bamubwiraga. Erhi omugula akaba wa kulembera na mwinja, kwanaba kulembu kuli mwene wirhu wahâbagwa ihano aliyumvirhize n’okulikolesa. Ensiku zoshi, ihano rhwahâna lishinganine likayimangira oku Kanwa ka Nnâmahanga. Rhurhaba rhulonzize ihano rhwahânaga libe linja kone ci na kandi ‘lisîmîse omuntu.’​—Mig. 27:9, Mashi Bible. w22.02 buk. 18 cif. 17; buk. 19 cif. 19

Amango rhushenga Yehova oku arhuhe emisi y’okulwisa marhangulo malebe erhi rhuhime buzamba bulebe, hali amango rhurhanya nkaba oku Yehova amalegerera okurhushuza. Bulya gurhi Yehova arhashuza oku masala girhu goshi ho n’aho? Amasala girhu garhenzire oku murhima ganamuyerese oku rhugwerhe obuyemere muli ye. (Hb. 11:6) Kandi Yehova anashagaluke bwenene erhi abona rhuli rhwajira okwirhu koshi lyo rhulama nk’oku amasala girhu ganadesire n’erhi rhujira okwirhu koshi lyo rhujira obulonza bwage. (1 Yn. 3:22) Co cirhumire rhushinganine rhube bakulembera n’okukola nk’oku amasala girhu ganadesire ngasi mango erhi rhulonza okuhima nkomêdu ndebe erhi buzamba bulebe. Yezu arhurhabire rhuhugûkwe oku hali masala girhu maguma maguma garhakashuzibwako ho n’aho. Aderha ntya: “Mugendekere mwahûna, mwahâbwa; mugendekere mwalonza, mwarhôla; mugendekere mwakomamba, mwayigulirwa; bulya ngasi ohûna anahâbwe, na ngasi olonza anarhôle, n’okomamba oku lumvi, anayigulirwe.”​—Mt. 7:7, 8. w21.08 buk. 8 cif. 1; buk. 10 cif. 9-10

Ly’ozibuhya obuyemere bwawe omu Mulemi, oshinganine ogendekere waciyigiriza Akanwa ka Nnâmahanga. (Yoz. 1:8) Orhanye gurhi ebintu byoshi Ebibliya yalebaga byahikirire na gurhi ebi abandisi boshi b’Ebibliya bayandisire biba bipatine. Okujira ntyo kwanazibuhya obuyemere bwawe oku haba Omulemi w’obuzigire na mwenge warhulemaga analongoza Ebibliya n’iroho litagatifu. (2 Tm. 3:14; 2 Pt. 1:21) Amango oli wayiga Akanwa ka Nnâmahanga, wanarhanya kunganaci amahano gamuba gakakurhabala. Kwa lwiganyo, Ebibliya yali erhi yarhonzire oku okuzigira ensaranga kuba kubi n’oku kunanalerhe “malumwa manji omu murhima.” (1 Tm. 6:9, 10; Mig. 28:20; Mt. 6:24) Obo burhonde Ebibliya erhuhîre bw’okurhazigira ensaranga buli bwa bulagirire bwenene! Ka hali agandi makanuni g’Ebibliya nawe wabwine oku gali ga bulagirire? Oku rhwakagendekera okuzigira amahano gali omu Bibliya, ko rhwakanagendekera okulangalira obwenge buhubûka emwa Omulemi wirhu w’obuzigire. (Yk. 1:5) N’oko kwanarhuma akalamo kirhu kaba n’omwishingo.​—Iz. 48:17, 18. w21.08 buk. 17-18 cif. 12-13

Akaba okola oli washosihala, oyemere n’obwalagale oku Yehova akengire omukolo wamujirire omu mango gageraga. Walunzire okuboko n’obushiru bunji omukolo gw’amahubiri. Walembire amarhangulo, ciru n’amarhangulo g’okuvuna omurhima, wakulikira amakanuni g’obushinganyanya g’Ebibliya omu kalamo kawe, wahikiriza emikolo yago-yago mizibu bwenene, n’okukomereza abandi. Wajijire okwawe koshi ly’olambagira nk’oku ikubuliro lya Yehova linali lyahêka. Walunzire abandi okuboko wanabaha omurhima bagendekere omu mukolo gwabo gw’akasanzi koshi. Yehova akuzigire bwenene enyanya z’obwishwekerezi bwawe. Alaganyize oku ‘arhakalekêrera abacishwekera kuli ye.’ (Enna. 37:28, NWT) Akubwizire ntya n’obwalagale: “Kuhika mumere emvi kubagalira ncimmubagalira.” (Iz. 46:4) Co cirhumire, orharhanyagya mpu bulya okola oli washosihala, orhaciri wa bulagirire omw’ikubuliro lya Yehova. Oli wa bulagirire bwenene! w21.09 buk. 3 cif. 4

Yehova anayerekane olukogo enyanya z’obwenge bwage burhankagerwa. Ebibliya erhubwizire oku “obwenge bw’enyanya” buba “buyunjwire lukogo n’ emburho nyinja.” (Yk. 3:17, NWT) Aka omubusi w’obuzigire, Yehova aba amanyire oku olukogo lwage lwanalerhera abana erhi bakozi bage bunguke bunji. (Iz. 49:15) Olukogo lwa Nnâmahanga lunakabaha obulangalire bw’amango gayisha ciru akaba barhaba bimana. K’okuderha oku obwenge bwa Yehova burhankagerwa bunakamushumya arhuyereke olukogo amango abwine ecirhumire c’okujira ntyo. Ciru ankaba ntyo, Yehova ayishi mangaci birhakacihûna okuyerekana olukogo. Kugerera obwenge, arhalekerera amabi gagendekere enyanya z’okubona aba wa lukogo. Rhurhanye kwa lwiganyo erhi omukozi wa Nnâmahanga akacishoga okuba n’olugenzi lw’okukajira ebyaha ngasi mango. Gurhi rhwakajira muli ako kanga? Kugerera obulongozi bw’iroho litagatifu lya Nnâmahanga, Paolo ayandika erhi: “Mumanye mwankakômera” omuntu wa ntyo. (1 Kr. 5:11) Banyankola maligo barhaciyunjuzizi, banakatengwa n’ecigamba. Okujira ntyo kuba kwa bulagirire bwenene bulya kunalange bene wirhu na bali birhu bishwekerezi na kandi kunayerekane enjira ntagatifu za Yehova. w21.10 buk. 9-10 cif. 7-8

Rhunahe Yehova enterekêro erhi rhulunga okuboko omukolo gw’Obwami omu kuhâna oburhabale. Abaisraheli barhal’ishinganine baje embere za Yehova maboko mûmu. (Lush. 16:16) Bakag’ilerhera Yehova engalo z’ebirugu kushimbana n’obuhashe bwabo. Omu kujira ntyo, bakag’iyerekana oku bashagalukire emipango yoshi yal’irhôzirwe lyo bayunguka kiroho. Gurhi rhwakayerekanamwo oku rhuzigire Yehova n’oku rhushagalukire ngasi kantu ali arhuha? Enjira nguma rhwakajiramwo ntyo kuli kuhâna oburhabale bw’ensaranga kushimbana n’obuhashe bwirhu lyo rhulunga okuboko ecigamba cirhu n’omukolo gw’Obwami omw’igulu lyoshi. Kushimbana n’oko entumwa Paolo yaderha ntya: “Obulonza bukabiduha, eci omuntu agwerhe co cinarhuma asimwa, ci arhankadôsibwa eci arhagwerhi.” (2 Kr. 8:4, 12) Yehova anashagalukire ngasi burhabale rhuhâna kurhenga oku murhima ciru akaba buli busungunu.​—Mk. 12:42-44. w22.03 buk. 24 cif. 13

Abagula barhakayusa amazibu goshi abakozi ba Yehova bali balwisa. Ciru akaba ntyo, Yehova alonzize abagula bajire okubakanahasha lyo baha ebibuzi omurhima n’okubilanga. Gurhi abagula bajira mikolo minji bakabonamwo akasanzi k’okuha abandi oburhabale balagirireko? Kukulikira olwiganyo lwa Paolo. Paolo akag’ilonza obulyo bw’okuvuga bene wabo omunkwa n’okubaha omurhima. Kwanaba kwinja erhi abagula bakayiga olwiganyo lwa Paolo omukujirira abakozi ba Yehova n’obuzigire bunji. (1 Ts. 2:7) Paolo akag’ibwira ababo bemezi n’obwalagale oku abazigire n’oku Yehova naye abazigire. (2 Kr. 2:4; Ef. 2:4, 5) Paolo akag’ijirira bene wabo na bali babo b’omu cigamba nka bîra anakag’igeza akasanzi haguma nabo. Ayerekana oku al’ibalangalire omukubaganirira okubiyerekire ebi al’iyobohire n’obuzamba bwage. (2 Kr. 7:5; 1 Tm. 1:15) Cikone, Paolo arhakag’isegeza obwenge oku mazibu gage. Lubero n’oko, al’ilonzize okurhabala bene wabo na bali babo. w22.03 buk. 28 cif. 9-10