Mwezi gwa 8

Nkaba Yezu aganiriraga abasoda b’e Roma bakomerhaga emisumari omu maboko n’omu magulu gage. Oko kurhashinganini koshi bamukoleraga kurharhumaga ayumviza abo bantu obumvu erhi kubabikira akarhinda. (1 Pt. 2:23) Aka Yezu, nirhu rhushinganine rhube babidu okukababalira abandi. (Kl. 3:13) Bantu baguma, ciru n’ab’omu mulala gwirhu, banarhuhagalike bulya barhahugusirwi obwemere bwirhu n’ebirhuma rhulama kulebé. Banarhuderhera obunywesi, banarhuha oloho embere z’abandi, banabera ebitabu birhu kandi erhi kurhuyobohya oku barhujirira kubi. Ahali hw’okubabikira akarhinda, rhwanashenga Yehova oku abayigule omurhima lyo nabo bahikira aha bayemera okuli. (Mt. 5:44, 45) Hali amango rhubona oku kuli kuzibu okubabalira abarhugokize, bwenene erhi bakarhujirira kubi bwenene. Cikone erhi rhwakaleka obumvu n’akarhinda birhôle enafasi omu murhima gwirhu, rhwanaba erhi rhuli rhwacilumisa rhwene. (Enna. 37:8) Erhi rhuhiga okubabalira, rhurhacigendekera rhwaciyumva kubi enyanya z’amagosa barhujiriraga.​—Ef. 4:31, 32. w21.04 buk. 8-9 cif. 3-4

Ka hali omuntu ozigira watenzirwe n’ecigamba? Oko kunagayise bwenene! Orhanye gurhi Yehova aciyumvirhe kubi bwenene erhi bamalahika baguma na baguma b’omu mulala gwage bamuleka! (Yd. 6) Ocibigirhanya gurhi aciyumvagya kubi bwenene erhi aba Israheli, lubaga lwage luzigirwa, bamugomera kanji-kanji. (Enna. 78:41) Oyemere n’obwalagale oku Larha wirhu w’obuzigire w’omu mpingu naye anaciyumve kubi erhi omuntu ozigira akamuleka. Anahugûkwe oku ociyumva. Enyanya z’obwonjo bwage, anakuha oburhulirize n’oburhabale olagirirekwo. Erhi mugala wabo erhi mwali wabo aleka Yehova, kanji-kanji ababusi banakacidosa erhi hali okundi bakajijire lyo barhabala oyo mwana abêre omu okuli. Mwene wirhu muguma adesire ntya: “Nacitumuza. Nakalôrha ebilôrho bibi.” Mwali wirhu muguma naye wahikiragwa n’akanga kali nk’ako, akacitumuza ntya: “Ka hali akantu kabi najijire niè nka muzîre? Nakarhanya mpu nkaba ntahashaga nayigiriza mugala wani okuli.” w21.09 buk. 26 cif. 1-2, 4

Bantu baguma na baguma banarhanye oku abakozi ba Nnâmahanga barhakahashiyigiriza abandi Ebibliya mpu bulya barhajaga oku masomo g’eteoloji. Cikone bakwanine bacilolere ebintu bonene. Ntyo ko Luka mwandisi w’e Injili ajiraga. Ajira okwage koshi ly’ahumbirira “eyo myanzi yoshi n’obushiru kurhenga aha murhondero gwayo.” Alilonzize abayishikasoma ‘bamanye bwinja’ oku ebinwa bayumvagya lugenda Yezu “binali by’okunali.” (Lk. 1:1-4) Abayahudi balilamire e Beroya baligwerhe oborhere buli nk’obo bwa Luka. Erhi bayumva oburhangiriza omwanzi mwinja guyerekire Yezu, bajilongereza omu Mandiko g’Ecihabraniya lyo babona erhi ebyo binali by’okunali. (Ebj. 17:11) Ko n’oko ene nalyo, kuli kwa bulagirire abantu bakalongereza emyanzi y’okunali. Bashinganine bakashushanya emyanzi olubaga lwa Nnâmahanga lwayigirizagya n’ebi Amandiko gadesire. Na kandi bashinganine bakaciyigiriza emyanzi eganirire abakozi ba Yehova ba gano mango girhu. Erhi bakakalongereza “emyanzi bwinja”, barhakayemera ngasi kalimi kabahusa amasu. w21.05 buk. 3 cif. 7-8

K’omu cigamba cinyu muli omuntu wakayegereza aha mwawe? Hali amango abirhu Bakristu bashagalukira bwenene okugeza akasanzi haguma nirhu. Baguma na baguma banabone oku kurhali kwinja okugeza akasanzi haguma na bene wabo b’omulala barhali Bahamirizi omu mango g’ensiku nkulu z’ecipagani. N’abandi hali ensiku baciyumva kubi bwenene, kwa lwiganyo, erhi olusiku omuzigirwa wabo afâga luhika. Erhi rhwakakageza akasanzi haguma na bene wirhu na bali birhu bali balwisa amazibu ga ntyo, rhwanayerekana oku kobinali rhuba ‘rhubashibirire.’ (Fl. 2:20) Hali bintu binji byakarhuma mango maguma na maguma Omukristu aciyumva ali kahumba. Cikone, rhurhashinganini rhuyibagire oku Yehova aba ahugûsirwe akanga rhulimo. Anarhuhe ebi rhulagirireko, kanji-kanji kugerera abirhu Bakristu. (Mt. 12:48-50) Na nirhu rhwanayereka Yehova oku rhushagalukire ogo mupango g’obuzigire ahiragaho, nka rhwakajira okwirhu koshi lyo rhurhabala bene wirhu na bali birhu. Kasanzi kalebe rhuciyumve bwinja erhi rhuciyumve kubi, ngasi mango rhukakengera oku rhurhali kahumba bulya Yehova ali haguma na nirhu ensiku zoshi! w21.06 buk. 13 cif. 18-20

Yezu agendekire aba n’entanya nyinja anagendekera ajira omukolo gw’amahubiri ciru akaba bantu baguma na baguma barhakagisimisibwa. Bulya gurhi? Bulya alimanyire kunganaci abantu balilagirire oku kumanya okuli analilonzize ahe bantu banji obulyo b’okuyemera omwanzi g’Obwami. Analimanyire oku hali abantu barhasimisibwa n’ogo mwanzi oku murhondero, cikone buzinda banayishihikira aha basimisibwa nago. Orhanye oku byabaga omu mulala gwage. Nta mwene wabo ciru n’omuguma wabire mwanafunzi wage omu myaka isharhu n’enusu ayusagya omu mukolo gw’amahubiri. (Yn. 7:5) Cikone, enyuma z’okufûka, bahikira aha babà Bakristu. (Ebj. 1:14) Rhurhamanyiri ndi wahikira aha ayemera okuli kw’Ebibliya rhukayigiriza. Bantu baguma na baguma banajire nsiku nyinji lyo bayemera okuli n’abandi banayemere ho n’aho. Ciru na balya bakalahira okuyumvirhiza omwanzi rhukayigiriza banabone olugenzi lwirhu lwinja, na buzinda banahikira aha barhondera ‘okukuza Nnâmahanga.’ w21.05 buk. 18 cif. 17-18.

Erhi Yezu ali hanw’igulu, aha abanafunzi bage omukolo gugwerhe bigabi bibirhi. Ababwira oku bahubiri omwanzi mwinja g’Obwami, anabayeresa gurhi bakajira ntyo. (Lk. 8:1) Kwa lwiganyo, ababwira gurhi bashinganine okujira amango abantu bayankirire bwinja omwanzi g’Obwami n’amango barhaguyankiriri. (Lk. 9:2-5) Na kandi alêba emunda omukolo gwabo gw’okuhubiri gwakahisire omu kubabwira oku bakahânyire “obuhamirizi oku mashanja goshi.” (Mt. 24:14, NWT; Ebj. 1:8) Kandi abwira abanafunzi bage oku bayigirize abantu okushimba ebintu byoshi arhegekaga. Yezu ayerekine oku ogo mukolo gw’obulagirire gwakajijirwe muli zino nsiku zirhu, “kuhika oku buzinda bw’igulu.” (Mt. 28:18-20) Na kandi, omu mafulûlo Yezu ahâga Yowane, ayerekana n’obwalagale oku abanafunzi bage boshi bashinganine barhabale abandi bayige binji lugenda Yehova.​—Maf. 22:17. w21.07 buk. 2-3 cif. 3-4

Omw’igulu ly’ene, bantu banji bali balongozibwa n’iroho ly’akamashigwe. Omuntu oguza bintu bilebe, anajira okwage koshi ciru akolese n’enjira zirhashinganini ly’aguza kulusha ababo barhimbuzi. Omushasi wa mucezo mulebe anahikira aha avuna n’obulonza owabo mushasi w’omu ekipe bali basharha nayo mpu lyo babahima. Omwanafunzi olonzize okupata enafasi oku université elengerire, anazimba amashuzo g’amashindano ly’apata enafasi kw’eyo université. Rhwê nka Bakristu, rhuba rhumanyire oku olugenzi lwa ntyo luba lubi bwenene, n’oku luba cigabi c’omu ‘bijiro by’omubiri.’ (Gl. 5:19-21) Cikoki, ka byanahikira abakozi ba Yehova bahire iroho ly’akamashigwe omu cigamba buzira kumanya? Eryo lir’idoso lya bulagirire bulya iroho ly’akamashigwe lyanarhuma ecinyabuguma cabulikana omu cigamba. Rhwanajira bwinja erhi rhwakayiga enyiganyo z’abalume n’abakazi bishwekerezi ba mîra barhajagamo iroho ly’akamashigwe. w21.07 buk. 14 cif. 1-2

Obuzigire bwishwekerezi bunarhushumye rhurhabale bala bavunisire omurhima. Bene wirhu na bali birhu banji ene banarhabale n’obulonza bene wirhu erhi bali birhu b’omu cigamba bavunisire omurhima erhi kuciyumva kubi. Baba bazigire bene wabo na bali babo, banajira irala linji ly’okujira ebi bakanahasha lyo babarhabala. (Mig. 12:25, NWT, amahugûlo g’idako; 24:10) Paolo arhuhîre omurhima oku rhukajira ntyo erhi aderha ntya: “Muderhe omu njira y’okurhuliriza abavunisire omurhima, murhabale engonyi, mukalembera abantu boshi.” (1 Ts. 5:14, NWT) Kanji-kanji, enjira nyinja rhwakarhabalamwo mwene wirhu erhi mwali wirhu ovunisire omurhima kuli kumuyumvirhiza n’okumuyereka oku rhumuzigire. Yehova anavuge omunkwa oku bintu binja oli wajirira ciguma c’ebibuzi byage by’engulo ndarhi. Emigani 19:17, Mashi Bible, edesire ntya: “Obêra omukenyi bwonjo akamuha, erhi Nyamuzinda ahozize, na Nyamuzinda acimujuhe kuli eco cijiro cinja ajijire.” w21.11 buk. 10 cif. 11-12

Bici rhwakajira ene lyo rhucirheganya okubiyerekire amango gayisha? Kuli kwa bulagirire rhukarhimukwa n’ebi rhugwerhe n’okuba n’omwishingo munene omu bwîra bwirhu rhugwerhe haguma na Yehova. Oku rhwakagendekera rhwamanya Nnâmahanga, ko rhwanagendekera rhwaba n’obulangalire omu buhashe bwage bw’okurhulanga amango Gogi w’omu cihugo ca Magogi anarhurhere. Enderho z’olwandiko lwʼolusiku lwʼ ene zihugwîre bulya gurhi Daudi alimanyire oku alishinganine alangalire oburhabale bwa Yehova. Ngasi mango Daudi akagilangalira Yehova, na Nnâmahanga wage arhamulekereraga. Erhi Daudi aciri musole, ajilwisa nnakagali w’omufilistini wakagihamagalwa Goliyati, anamubwira ntya: “Nyamubaho [Yehova, NWT] ene akuhânyire omu maboko gani.” (1 Sam. 17:46) Buzinda bw’aho, Daudi akagikolera mwami Saulu, walonzagya okumuniga cikone “Nyamubaho ali” haguma na Daudi. (1 Sam. 18:12) Bulya Daudi acibwinire oburhabale bwa Yehova omu mango gageraga, alimanyire oku ashinganine amulangalire muli ago marhangulo ga mw’ako kasanzi. w22.01 buk. 6 cif. 14-15

Omu ngasi mikolo Yehova ajira, anacihîrireho akasanzi alagirirekwo ly’ahikiriza omukolo gwage. Anajire ntyo ly’alerhera izino lyage irenge na kandi anakujire oku bunguke bw’abandi. Kwa lwiganyo, rhurhanye okubiyerekire oku Yehova arheganyig’izagyamwo bene bantu igulu bunyi-bunyi. Okubiyerekire ebyo, Ebibliya eganirire “olubibi,” aha amakôndo galyo “gasimikira,” n’okubiyerekire “ibuye ly’eciriba.” (Ayu. 38:5, 6) Na kandi aciha akasanzi k’okurhanya kw’ebi ali amajira. (Murh. 1:10, 12) Ka wanarhanya gurhi bamalahika baciyumvirhe erhi babona kunganaci emikolo y’obulemi bwa Yehova eri yahikirira bunyi-bunyi? Kobinali oko kwabashagalusa bwenene! Kasanzi kaguma bahikira aha barhondera “bayimba n’omwishingo.” Isomo lihi rhukuzire aho? Byahunyîre ebihumbi by’emyaka lyo Yehova ahikiriza emikolo yage y’obulemi, cikone erhi Yehova alabiriza ebi ali amalema n’erhi abirhanyako, anaderha oku “binali binja.”​—Murh. 1:31. w21.08 buk. 9 cif. 6-7

Omu lwiganyo luguma Yezu ahânaga, aganirire mulume muguma walonzagya okubalama. Embere agende, ahamagala abajà erhi bambali na buzinda aha ngasi muguma wabo etalanta ajiramo oburhimbuzi. Omu kuhugûkwa obuhashe bwa ngasi muguma, oyo mulume aha mwambali muguma talanta irhanu, aha owundi ibirhi, na buzinda aha owakasharhu nguma. Oyo murhanzi n’owakabirhi bakola bwenene lyo bayungula etalanta za nnawabo. Cikone oyo wakasharhu yehe, ntaco ajijire n’eyo talanta ahâbagwa, na ntyo nnawabo amukula omu kazi. Ak’olya mujà murhanzi, omujà wakabirhi naye arhôla kwa buzibu-zibu omukolo ahâbagwa anacihangana bwenene okukolera nnawabo. Na ntyo, arhimbula n’ezo talanta nnawabo amuhâga buzinda zayunguka zindi ibirhi. Okuba mubidu n’okukola bwenene kwarhuma oyo mujà ahembwa. Nnawabo arhashagalukaga kone, cikone ayerekana oku ali mwambali mwinja ananamujira murhambo omu binji! w21.08 buk. 21 cif. 7; buk. 22 cif. 9-10

Yehova ali alembera bwenene muli zino nsiku nzinda. Arhalonzizi omuntu yeshi-yeshi asherezibwe. (2 Pt. 3:9) Ahîre abantu boshi oluhya lw’okuciyunjuza. Cikone, okulembera kwage kugwerhe obuzinda. Abali balahira obo bulyo bw’okuciyunjuza baja omu kanga kali nka kalya kahikiraga Faraoni omu mango ga Musa. Yehova abwira Faraoni ntya: “Ncilekêrerage okuboko kwani, singa nâkuyisire n’ecâhirà we n’olubaga lwawe, wâli wahirigirha omu igulu. Ci alaga ecârhumire nakuleka: nti nkuyereke obuhashe bwani lyo bamanyisa izino lyani omu igulu lyoshi.” (Lub. 9:15, 16) Amashanja goshi gayishihikira aha gamanya oku Yehova ye Nnâmahanga muguma w’okuli. (Eze. 38:23) Okudundaganya kuganirirwe omu lwandiko lw’osiku lw’ene, buli bushereze bw’ensiku n’amango kuli balya balahira, aka Faraoni, oku Yehova arhali yeshinganine okurhambula. w21.09 buk. 18-19 cif. 17-18

K’oli waciyumva kubi okubona hali omuntu ozigira watenzirwe? Na gurhigi wakajira erhi wakabona oku bantu baguma na baguma b’omu cigamba bali baderha ebintu bibi byakarhuma wacibiciyumva kubi bwenene? Okuderha okuli, abantu boshi barhakakaderha ebyakusimisa. (Yk. 3:2) Rhweshi rhurhaba bimana, co cirhumire orhasomeragwa erhi bantu baguma na baguma bakabula ebi bakubwira kandi erhi bakubwire buzira kulonza ebyakarhuma waciyumva kubi. Okengere er’ihano ly’entumwa Paulo: “Mukalemberana munababalirane.” (Kl. 3:13) Ogendekere warhabala abantu baciri bishwekerezi b’omulala gw’omuntu watenzirwe. Kulusha agandi mango goshi, balagirire oku buzigire bwawe n’okuhâbwa omurhima. (Hb. 10:24, 25) Agandi mango, abantu b’omulala gw’owatenzirwe banabone oku bene wirhu na bali birhu baguma na baguma barhacibaganiza. N’oko kunarhume baciyumva nka nabo batenzirwe. Orhayemeraga oko kwahika! Emisole ababusi babo batenzirwe bo balagirire bwenene oku kuvugwa omunkwa n’okuhâbwa omurhima. w21.09 buk. 29 cif. 13-14; buk. 30 cif. 16

Amango okola mushosi n’ociri musole bali baganira, bombi banayunguke. (Rm. 1:12) Mwe misole, mwanabona ebyakamuyemeza n’obwalagale oku Yehova anashibirire abakozi bage, n’abakola bashosi nabo banaciyumva oku obazigire. Banashagalukira okuganirira gurhi Yehova abagishire. Oku emyaka eri yagera, ko n’iranga ligendekera lyaharabika, cikone abali bishwekerezi kuli Yehova banagendekere babà binja ngasi mwaka. (1 Ts. 1:2, 3) Bulya gurhi bohe bagendekera babà binja? Bulya, oku emyaka eri yagera, ko banagendekire baleka iroho litagatifu lya Nnâmahanga libakomereze n’okubarhabala babe n’amorhere minja. Oku rhwagendekera rhwamanya bene wirhu na bali birhu bakola bashosi, okubaha olukengwa, n’okuciyigiriza binji kuli bo, ko rhwanagendekera rhwababona oku bali ba ngulo ndarhi! Ecigamba coshi canasêra amango abaciri misole bali bashagalukira abakola bashosi na kandi amango abakola bashosi nabo bali bashagalukira abaciri misole. w21.09 buk. 7 cif. 15-18

Rhuyake okuba bakali bwenene, rhucihangane okuba ba “lukogo” lunji, aka Nnâmahanga wirhu. (Ef. 2:4) Olukogo luba luhiziremo bintu binji kulusha okuyumviza abandi obwonjo kone. Muli oko, olukogo lwahugwîrwe nka “bonjo buli bwakola.” Co cirhumire, rhweshi rhushinganine rhukalabiriza gurhi rhwakarhabala abantu bw’omu mulala gwirhu, ab’omu cigamba n’abalungu birhu. Kobinali haba njira nyinji z’okuyerekana olukogo. Ka hali muntu mulebe omanyire olagirire oku kurhulirizibwa? Ka rhwanajira kantu kalebe lyo rhuhâna oburhabale, nkaba omu kumuha ebiryo, erhi kumujirira kantu kalebe rhurhanyize akaba alagiririreko? Ka hali Omukristu wagalusire omu cigamba olagirire oku bîra bakamurhuliriza n’okumuzibuhya? Ka rhwanaganirira abandi omwanzi mwinja gw’oburhulirize? (Ayu. 29:12, 13; Rm. 10:14, 15; Yk. 1:27) Erhi rhwakaba babidu okubona amalagirire g’abandi gali nk’ago, rhwanabona oku rhugwerhe njira nyinji rhwakayerekanamw’olukogo. Erhi rhuyereka abandi olukogo, rhunashagaluse Larha wirhu w’omu mpingu, Nnâmahanga oba wa “lukogo” lunji! w21.10 buk. 13 cif. 20-22

Omu Ennanga 23, Daudi aganirire ebintu biba bya bulagirire ensiku zoshi, k’okuderha emigisho minji y’ekiroho abire nayo omu kuyemera Yehova nka Lungere wage omuyabula. Yehova amuheka “omu njira nnungêdu [y’obushinganyanya, NWT],” Anarhabala Daudi n’obwishwekerezi omu kasanzi kinja n’omu kasanzi kabi. Daudi alimanyire oku obuzine bwage omu “bulambo bw’akahasi kinja” ka Yehova burhakabire buzira mazibu. Hali amango akahikire aha avunika omurhima, ak’oli walambagira “omu kabanda k’omwizimya,” akanabire n’abashombanyi banji. Cikone okubona oku Yehova ye wali Lungere wa Daudi omuyabula ‘nta mabi ayobohire.’ Omu njira nci Daudi ‘arhabulaga cici’? Agwerhe ebintu byoshi al’ilagirireko ly’abêra hofi na Yehova. Omwishingo gwage gurhal’iyimangire oku bintu by’omubiri. Daudi akag’irhimukwa n’ebi Yehova akag’imuha. Ebyali bya bulagirire omu kalamo kage kwali kugishwa n’okulangwa na Nnâmahanga. Kugerera enderho za Daudi rhwanabona kunganaci kuba kwa bulagirire okuba n’entanya nyinja okubiyerekire ebintu by’omubiri. w22.01 buk. 3-4 cif. 5-7

Abahamirizi ba Yehova ba mango ga mîra nabo barhimanine n’abantu barhakag’ibayumvirhiza, kwa lwiganyo Nuhu ajijire myaka minji ali “muhubiri w’obushinganyanya.” (2 Pt. 2:5, NWT) Buzira karhinda, al’ilangalire oku abandi bakamuyumvirhizize cikone nta cimanyiso Yehova amuhîre cal’iyerekine oku bakamuyumvirhizize. Lubero n’oko, erhi abwira Nuhu oku ayubake esafina, Nnâmahanga aderha ntya: “Waja omu nkuge [safina] we na bagala bawe, na mukawe na baka bagala bawe mweshi nabo.” (Murh. 6:18) Erhi Nuhu ayumva obuliri n’obunene bw’esafina Nnâmahanga omubwiraga oku ayubake, nkaba ahugûkwa oku bantu basungunu bone bakamuyumvirhizize. (Murh. 6:15) Nk’oku rhunamanyire, nta muntu ciru n’omuguma wayumvirhizize emyanzi Nuhu ajaga ahamiriza. (Murh. 7:7) K’omu ntyo Yehova abona Nuhu nk’oyabirwe n’omukolo? Nanga ciru n’ehitya! Nnâmahanga abona oku Nuhu ahashir’ihubiri bulya ajijire n’obwishwekerezi byoshi Yehova amubwiraga oku ajire.​—Murh. 6:22. w21.10 buk. 26 cif. 10-11

Orhanye gurhi Ruti akaciyumvirhe enyanya z’ezo nderho za Noemi! Ruti ajijire okwage koshi ly’arhabala Noemi. Ruti alaka haguma naye, amurhuliriza, analambagira haguma naye nsiku nyinji. Ciru akaba ntyo, Noemi aderha erhi: “Nyamubaho [Yehova, NWT] amangalula maboko mumu.” Kugerera ezo nderho, Noemi aba nk’orhamanyiri oburhabale Ruti wali aha burhambi bwage amuhire. Oko nkaba kwakalumisize Ruti omurhima! Ciru akaba ntyo, arhalekaga Noemi. (Rut. 1:3-18) Ene, mwali wirhu ovunisire omurhima nkaba anaderha eby’okurhulumisa omurhima, ciru akaba rhwajijire okwirhu koshi lyo rhumurhabala. Cikone rhurhalekaga ebyo arhubwizire birhume rhwagaya. Rhurhaleka oyo mwali wirhu oli omu bulagirire, na kandi rhunashenge Yehova arhurhabale rhubone enjira rhwakamurhulirizamwo. (Mig. 17:17) Hali amango mwali wirhu olagirireko kantu kalebe akarhangilahira oburhabale bwirhu. Cirhu akaba ntyo, obuzigire bwishwekerezi bunarhushumye rhurharhamaga erhi kuleka.​—Gl. 6:2. w21.11 buk. 11 cif. 17-19

Omu Bibliya, oluderho “tagatifu” na “obutagatifu” luganirire okuca omu lugenzi n’omu bintu b’idîni. Ezo nderho kandi zanahâna entanya z’okuhirwa eburhambi enyanya z’omukolo gwa Nnâmahanga. Omu zindi nderho, rhwanabonwa oku rhuli batagatifu erhi akaba rhugwerhe olugenzi lwinja, erhi rhwakaharamya Yehova omu njira ayemire, n’erhi rhwakaba n’obwîra bwinja haguma naye. Okumanya oku rhwanaba n’obwîra bwa hofi-hofi haguma na Nnâmahanga wirhu mutagatifu kwanarhurhuliriza, ci bwenene erhi rhurhanya kw’ebi Ebibliya erhuyigirizize lugenda obutagatifu bwa Yehova. Yehova aba acire omu ngasi njira. Ebi bamalahika baba hofi n’eciti c’obwami baderhwa bamaserafi baderhaga birhuyeresire ntyo. Baguma mulibo baderha ntya: “Mutagatifu, mutagatifu, mutagatifu ali Yehova w’emirhwe.” (Iz. 6:3, NWT) Lyo baba n’olushangi lwa hofi-hofi haguma na Nnâmahanga wabo mutagatifu, bamalahika baba bashinganine babe batagatifu, banaba bo. w21.12 buk. 3 cif. 4-5

Kanji-kanji misole ye karhanya gurhi yageza akalamo kabo. Omu yindi njira, abalimu b’emasomo n’abantu b’omu mulala barhali Bahamirizi banabashumya oku basome e université mpu lyo bayishimanyikana omw’igulu. Okuja kw’ago masomo kwanabarhôla kasanzi kanji. Omu yindi njira, ababusi n’abîra b’omu cigamba banahe emisole omurhima oku egeze akalamo kabo omu mukolo gwa Yehova. Bici byakarhabala omusole guzigire Yehova lyo gurhôla omuhigo mwinja? Gwanayunguka omu kusoma n’okurhanya olwandiko lwa Abefezi 5:15-17. Enyuma z’okusoma eyo milongo, omusole gwanacidosa ntya: ‘“Obulonza bwa Yehova” bo buhi? Muhigo guhi gwakamushagalusa? Mihigo ehi yakantabala nkolese bwinja akasanzi kani?’ Okengere oku, “ensiku ziri mbi,” n’er’igulu lirhegesirwe na Shetani lyahika ebuzinda hano hofi-hofi. w22.01 buk. 27 cif. 5

Mangaci Yakobo abaga mwanafunzi mwishwekerezi wa Yezu? Enyuma za Yezu akufûka, “abonekera Yakobo, abonekera n’entumwa zoshi.” (1 Kr. 15:7) Enyuma z’eyo ntimanano Yakobo aba muguma w’omu banafunzi ba Yezu. Amango entumwa zali omu cumpa c’enyanya e Yeruzalemu amango bakag’ilinda okuhikirira kw’eciragane c’okuhâbwa iroho litagatifu, Yakobo ahali. (Ebj. 1:13, 14) Enyuma z’aho, Yakobo ashagalukira okukola nka muguma w’omu mbaraza eri yalongoza y’omu myaka igana mirhanzi. (Ebj. 15:6, 13-22; Gl. 2:9) Na kasanzi kalebe embere z’omwaka gwa 62 K.K.K., alongozibwa n’iroho litagatifu ly’ayandikira Abakristu bashîge amavurha amaruba. Ene rhwanaciyunguka n’ago maruba, rhube rhugwerhe obulangalire bw’okulama empingu erhi hanw’igulu. (Yk. 1:1) Nk’oku Josephus, histoirien muguma w’omu myaka igana mirhanzi ayerekine, Yakobo anigagwa erhi Omukuhani Mukulu wakagihamagalwa Ananiya arhegeka oku anigwe. Yakobo agendekera abêra mwishwekerezi kuli Yehova kuhika oku buzinda bw’akalamo kage ka hanw’igulu. w22.01 buk. 8 cif. 3; buk. 9 cif. 5

Isomo liguma rhwakakula omu lwandiko lw’olusiku lw’ene kuli kumanya oku rhurhakagirhanya mpu Yehova anarhuyasa amazibu gakahira obuyemere bwirhu omu marhangulo. Nk’oku Yezu anarhangulagwa kuhika oku buzinda, nirhu rhushinganine rhube bishwekerezi kuhika ebwa kufâ nka byamahûna ntyo. (Mt. 16:24, 25) Cikone, rhuyemire n’obwalagale oku Yehova arhakayemera rhwaja omu marhangulo garhalusire emisi yirhu. (1 Kr. 10:13) Erindi isomo rhwakaciyigiriza, kuli kuhugûkwa oku aka Yezu, byanahashikana nirhu rhulibuzibwe okurhakwanini. (1 Pt. 2:19, 20) Abantu banarhuhagalike arhali mpu bulya rhwajijire akantu kabi, cikone bulya rhurhaba cigabi c’er’igulu na kandi bulya rhunakahamiriza okuli. (Yn. 17:14; 1 Pt. 4:15, 16) Yezu alihugûsirwe bulya gurhi Yehova amulekereraga oku alibuzibwe. Lubero na Yezu, hali amango abakozi bishwekerezi ba Yehova bali omu mazibu bahikira aha bacidosa bici birhumire Yehova alekerera bintu bilebe bibahikire. (Hab. 1:3) Nnâmahanga wirhu w’obonjo na wakulembera aba amanyire oku erhi abo bene wirhu bacidosa ntyo, kurhaba kubula obuyemere, cikone babà balagirire oku burhulirize yene akabaha.​—2 Kr. 1:3, 4. w21.04 buk. 11 cif. 9-10

Yehova anayemera enterekêro yirhu erhi akaba epatani n’obulonza bwage rhunali rhwayihâna omu njira y’obuzigire na ya bukenge. Rhuba rhumanyire oku ashinganine okuhâbwa enterekêro, rhunalonzize enterekêro yirhu ebe nyinja bwenene. Rhunaharamye Yehova erhi rhumushenga. Amandiko gashushanyize amasala girhu n’obukû burheganye bwinja-bwinja bwakag’ihânwa omw’ihema ly’entimanano na buzinda omu hekalu. Obo bukû bwakagishagalusa Nnâmahanga. Ko n’oko, amasala girhu garhenzire oku murhima ‘kushagaluka agashagalukira,’ ciru akaba rhukolesize enderho nembu. (Mig. 15:8, Mashi Bible; Lush. 33:10) Yehova anashagalukire okuyumva enderho zirhu ziyerekine oku rhumuzigire rhunamuvuzire omunkwa. Aba alonzize rhumuganirire okubiyerekire ebirhulibuzize, obulangalire bwirhu, n’irala lirhu. Embere oshenge Yehova, wanarhag’irhanya kw’ebi waderha. Erhi wakajira ntyo, wanaha Sho w’omu mpingu isala linja liri nka bukû. w22.03 buk. 20 cif. 2; buk. 21 cif. 7

Okw’ivita ly’Armagedoni, arhali rhwe rhwanahige ndi wanayeresibwe olukogo lwa Yehova na ndi orhakaluyeresibwa. (Mt. 25:34, 41, 46) Ka rhwanalangalire enjira ya Yehova y’okutwa emanja, erhi oko kwanarhume rhwasarhala? Kobinali, ene rhushinganine rhuzibuhye obulangalire bwirhu muli Yehova na ntyo kwanayish’iba kulembu kuli rhwe okumulangalira omu mango gayisha. Orhanye gurhi rhwayish’iciyumva hano rhuja omw’igulu lihyahya. Idîni ly’obunywesi lirhakacihaba, abarhunzi bakulu-bakulu n’abakulu b’epolitike balibuza abantu banarhuma baba bakenyi nabo barhakacihaba bundi. Endwala, obushosi, n’okufîrwa n’abazigirwa birhakacihaba ciru n’ehitya. Shetani n’abazimu bage bayish’ishwekwa myaka cihumbi ciguma. Amazibu gadwirhwe n’obugoma bwabo gayish’ihwa. (Maf. 20:2, 3) Ago mango, rhwayish’ishagaluka bwenene okubona rhwalangalire enjira ya Yehova y’okujira ebintu! w22.02 buk. 6-7 cif. 16-17

Yezu akag’ilonza obulyo bw’okujira omurhula ananaha abandi omurhima oku bakayumvikana. Abayigiriza oku bakajira omurhula haguma na mwene wabo erhi akaba bal’ilonzize Yehova ayemere enterekêro yabo. (Mt. 5:23, 24) Na kanji-kanji arhabîre entumwa zage oku zileke akadali zagwerhe okubiyerekire ndi wali mukulu mulibo. (Lk. 9:46-48; 22:24-27) Lyo rhuba bantu ba kujira omurhula, rhushinganine rhujire binji ahanyuma n’okuyaka kone ebintu byakarhuma rhurhayumvikana n’abandi. Rhushinganine rhukalonza obulyo bw’okujira omurhula n’okuha bene wirhu na bali birhu omurhima bakayusa okurhayumvikana kwakaba egarhi kabo. (Fl. 4:2, 3; Yk. 3:17, 18) Rhwanacidosa ntya: ‘Bintu bihi mba mubidu okuleka lyo njira omurhula haguma n’abandi? Erhi mwene wirhu erhi mwali wirhu akansarhaza, ka nambîke akarhinda? Ka naninde oku oyo muntu ayish’ijira omurhula haguma na nani, erhi nambe murhanzi okugend’ijira ntyo, ciru akaba oyo muntu ali abonekana oku ye wadwirhe ago mazibu?’ w22.03 buk. 10 cif. 10-11

Hamagera myaka minji Ebibliya elebire oku abakozi ba Nnâmahanga ‘banacihâne n’obulonza’ omu mukolo gwage idako ly’obulongozi bw’Omugala. (Enna. 110:3, NWT) Obo bulebi buli bwahikirira ene. Ngasi mwaka, abakozi ba Yehova bali bayerekana obushiru omu kugeza amagana g’emiliyoni y’ensa omu mukolo gw’amahubiri. Banajire ntyo n’obulonza buzira kulipwa kantu koshi-koshi. Na kandi banacihe akasanzi k’okuha ababo bemezi oburhabale bw’omubiri, bw’ekandalala, n’obw’ekiroho. Bene wirhu bahizirweho banageze nsa nyinji bali barheganya entimanano n’okujira omukolo gw’okulambagirira ebibuzi. Bici bibashumya bajire eyo mikolo yoshi? Buba buzigire: buzigire bajira kuli Yehova na kuli omulungu. (Mt. 22:37-39) Yezu arhulekire olwiganyo lw’okuhira amalagirire g’abandi oku nafasi ntanzi kulusha agage. Rhunajire okwirhu koshi lyo rhulonza okukulikira enshando zage. (Rm. 15:1-3.) Abayiga olwiganyo lwage banabe na bunguke bunji. w22.02 buk. 20 cif. 1-2

Omu mango g’aba Israheli, abakozi bakagikolera ensaranga balishinganine balipwe oku buzinda bwa ngasi mulegerege g’omukolo gwabo. Okuberana omushahara g’oyo munyakazi kwali kwarhuma arhacibona ensaranga zahikiriza amalagirire g’omulala gwage muli olo lusiku. Yehova ahugûla oku oyo mukozi: “Ali omu bulagirire n’akalamo kage kayegemire ogo mushahara gwage.” (Lush. 24:14, 15, NWT; Mt. 20:8) Ene bakozi banji banakalipwa liguma erhi kabirhi omu mwezi, ci arhali ngasi lusiku. Ciru ankaba ntyo, akanuni kali omu lwandiko lwa Bene-Levi 19:13 kaciri ka bulagirire. Ba bose baguma na baguma banalonze okulyalyanya abakozi babo omu kubalipa mushahara musungunu bwenene kulusha oku bishinganine. Bayishi oku abo bakozi banagendekera babakolera ciru bakabaha mushahara musungunu bwenene. Omu njira nguma, abo ba bose banaba ‘nkababerine omushahara gw’omukozi.’ Omukristu oli wajira omukolo g’oburhimbuzi ashinganine alole erhi ali akamasa abakozi bage okushinganine. w21.12 buk. 10 cif. 9-10

Enyuma z’amalibuko goshi Yezu ageziremo, alishinganine ayumve enyorha. Alilagirire oku mishi ly’ayusa enyorha yamugwerhe. Yezu arhabonaga nka buli buzamba okubwira abandi oku ali aciyumva; nirhu rhurhashinganini rhukarhanya ntyo. Banji muli rhwe banabone oku kurhali kwa bulagirire okuhuna abandi oburhabale. Cikone erhi rhwakalagirira oku burhabale, rhurhakagirhindira okubwira abandi barhurhabale. Kwa lwiganyo, erhi akaba rhuli bashosi erhi balwala, rhwanaba n’obulagirire b’omwîra wakarhujîra ecibuye erhi kurhulusa emwa munganga. Erhi rhwakavunika omurhima, rhwanabwira omugula erhi mwîra wirhu Mukristu okuzire kiroho entanya zirhu ly’arhubwira “akanwa kinja” karhushagalusa. (Mig. 12:25) Rhukengere oku bene wirhu na bali birhu babà barhuzigire bwenene, banaba balonzize okurhurhabala amango rhuli “omu mbaka.” (Mig. 17:17) Cikone barhakahashisoma ebirhuli emurhima. Nkaba barhakanahashimanya ebi rhulagirireko nka rhurhababwiziri byo. w21.04 buk. 11-12 cif. 11-12

Erhi akanga kirhu kashanja, oko kuba kuzibu kuli banji ba muli rhwe. Bene wirhu na bali birhu baguma na baguma bajijire myaka minji omu mukolo gwago-gwago gw’akasanzi koshi, omukolo gwabo gwashanjire. Abandi bahûnyirwe okuleka omukolo gwabo bal’izigire bwenene erhi myaka yabo erhuma. Biyumvikine oku, rhwanaciyumva kubi bwenene erhi akanga kirhu kakashanja omu njira ya ntyo. Kwanaba kulembu kuli rhwe okukômera akanga kirhu kahyahya erhi rhwakakakabona nk’oku Yehova akabona. Ali ahikiriza bintu binji ene, rhunagwerhe olukengwa lwago-lwago lw’okukola haguma naye. (1 Kr. 3:9) Obuzigire Yehova arhujirako bohe burhakashanja. Co cirhumire, erhi mpindûlo ndebe zajiragwa omw’ikubuliro zakakuhûmako, ayake okuhêza kasanzi kanji omu kucidosa bulya gurhi ezo mpindûlo zajijirwe. Ahali h’okukacifinja “ensiku zàli burhanzi,” okashenga Yehova ly’akurhabala obone ebintu binja biri mw’ezo mpindûlo. (Muh. 7:10) Ogendekere waba nʼentanya nyinja. Okujira ntyo kwanarhurhabala rhugendekere rhwaba n’omwishingo n’okubêra bishwekerezi ciru n’amango akanga kirhu kamashanja. w22.03 buk. 17 cif. 11-12

Bandi Yehova ayereka obuzigire bwishwekerezi? Ebibliya eyerekine oku rhwanazigira bintu binji, kwa lwiganyo “okuhinga,” “amamvu n’amavurha,” “okuhanûlwa,” “obumanye,” “obwenge,” n’ebindi n’ebindi. (2 Nga. 26:10; Mig. 12:1, Mashi Bible; 21:17; 29:3, NWT) Cikone, nta mango obuzigire bwishwekerezi buyerekanwa oku bintu; oku bantu kone buyerekanwa. Cikoki Yehova arhayerekana obuzigire bwage bwishwekerezi kuli ngasi muntu. Anakabuyerekana kuli bala bajira obwîra bwa hofi-hofi haguma naye. Nnâmahanga wirhu aba mwishwekerezi oku bîra bage. Agwerhe omuhigo mwinja kubayerekera, arhakanaleka okubazigira ciru n’ehitya. Yehova ayeresire bene bantu boshi obuzigire. Yezu abwira mulume muguma wakag’ihamagalwa Nikodemu ntya: “Nnâmahanga azigire igulu, kuhika ahâna Omugala cusha, mpu ngasi yeshi wamuyemera alek’ihera, ci abone obuzine bw’ensiku n’amango.”​—Yn. 3:1, 16; Mt. 5:44, 45. w21.11 buk. 2 cif. 3; buk. 3 cif. 6-7

Akalamo ka mw’er’igulu kali kazibu bwenene, na kandi omu mango gayisha rhwarhimanana na mazibu manji galushire aga. (Mt. 24:21) Rhuli rhwalindirira olusiku ebyo byoshi byaba byagezire; rhurhakacibikengera birhakanacihaba bundi. (Iz. 65:16, 17) Co cirhumire, rhushinganine rhugendekere rhwazibuhya oborhere bwirhu bw’okulembera. Bulya gurhi? Bulya Yezu adesire erhi: “Bulêmbezi bwinyu mwacizemwo obuzine bwinyu!” (Lk. 21:19) Okurhanya gurhi abandi bali balwisa amazibu gashushine n’agirhu kwanarhuzibuhya rhugendekere rhwalembera. Indi oba lwiganyo lwinja lw’okulembera? Yehova Nnamahanga. K’er’ishuzo likusomezize? Nkaba erhi wakalirhanyako lirhakacikusomera. Er’igulu liri lyarhegekwa n’Omubi, co cirhumire lirimo mazibu manji. Yehova agwerhe obuhashe bw’okushereza bo na buno er’igulu ligalugalu, cikone acigendekire alembera kuhika olusiku ahizireho luhike. (Rm. 9:22) Nnamahanga wirhu agendekire alembera kuhika olo lusiku luhike. w21.07 buk. 8 cif. 2-4