Mwezi gwa 9

Bantu baguma na baguma b’omu mango ga Yezu barhakagirhimukwa n’enyigirizo zage z’okusomeza. Cikone, basarhala erhi Yezu alahira oku arhabajirira ecimanyiso. (Mt. 16:4) Bici Amandiko gadesire? Omulebi Izaya ayandika oku biyerekire Masiya ntya: “Arhakabanda kahababo, arhakanaja ahamagaza, izu lyage lirhakayumvikana oku irango.” (Iz. 42:1, 2) Yezu ahikirizize omukolo gwage gw’amahubiri omu kahwenyenye n’omu bwirhohye. Arhayubakaga amahekalu g’okulonza abantu bamumanye, arhanakagiyambala emishangi yago-yago abo bakulu b’amadîni bakagiyambala, arhanabwiraga abantu oku bakamuhamagala oku mazino g’obukulu. Amango bakagisambisa Yezu, alahira oku arhajirira Mwami Herodi ecisomerine c’okulonza aciyerekane. (Lk. 23:8-11) Hali bisomerine biguma na biguma Yezu ajijire, cikone omukolo gwage gw’obulagirire gwali gwakuyaliza omwanzi mwinja. Abwira abanafunzi bage, erhi “kwo kwarhumaga nyisha.”​—Mk. 1:38. w21.05 buk. 4 cif. 9-10

Rhunakalonza balya “bagwerhe irala ly’okuba n’obuzîne bw’ensiku n’amango.” (Ebj. 13:48, NWT) Lyo rhurhabala abo bantu bahikire okuba banafunzi, rhushinganine rhubarhabale (1) bahugûkwe, (2) bayemere, na (3) bakolese ebi bali bayiga omu Bibliya. (Kl. 2:6, 7; 1 Ts. 2:13) Ngasi muntu w’omu cigamba anarhabala abanafunzi b’Ebibliya omu kubayeresa obuzigire n’okubayegereza amango bayishire oku ntimanano. (Yn. 13:35) Oli walongoza ifunzo ly’Ebibliya naye anahâna kasanzi kanji na misi minji ly’arhabala omwanafunzi aleke obuyemere erhi bijiro “byagwasire emizi” muli ye. (2 Kr. 10:4, 5, NWT) Byanahûna hagere myezi minji embere omuntu ahikire aho n’okuhikira omuhigo g’okubatizibwa. Cikone hali obunguke bw’okujira ntyo. w21.07 buk. 3 cif. 6

Hali madîni manji ene gali gaciderha oku gali ga Cikristu n’oku banaharamye Nnâmahanga omu njira emusimisa. Eco co cirhumire bantu banji ene barhamanyiri ebi balimo! Banadose ntya: “K’idini liguma lyone ly’okuli lihaba, erhi goshi gasimisa Nnâmahanga?” K’omu bwenge bwirhu rhuba rhuyemire buzibu-zibu oku enyigirizo zirhu zo ziba z’okuli n’oku enjira Abahamirizi ba Yehova bamuharamyamo yone emusimisa? Entumwa Paolo yal’iyemire n’obwalagale oku abwine okuli. (1 Ts. 1:5) Ebyo aliyemire birhal’iyimangire oku akagiciyumva kone. Paolo akag’iciyigiriza Akanwa ka Nnâmahanga n’obushiru. Aliyemire oku “Amandiko goshi galongozibagwa n’iroho lya Nnâmahanga.” (2 Tm. 3:16, NWT) Bici ebi akagiciyigiriza byafulwîre? Omu Mandiko, Paolo abona ecirhumire cirhankalahirwa ciyerekine oku Yezu ye wali Masiya walaganyizibagwa, eco cirhumire abakulu b’idîni ly’Abayahudi balahira okuciyemera. Abo balyalya bakagicikunga oku bali barhumwa ba Nnâmahanga, cikone bakagimuhakana omu bijiro byabo. (Tt. 1:16) Lubero n’abo balyalya, Paolo arhacishogaga mandiko gahi g’Ebibliya akalahira n’aga akayemera. Ali mubidu okukolesa n’okuyigiriza “amahano goshi ga Nnâmahanga.”​—Ebj. 20:27, NWT. w21.10 buk. 18 cif. 1-2

Ciru akaba rhwe rhurhwera rhunadômere, rhushinganine rhukengere oku Nnâmahanga y’ekuza. (1 Kr. 3:6, 7) Yehova anakabona akalamo ka ngasi muntu oku kali ka bulagirire. Arhuhîre olukengwa lw’okukola haguma n’Omugala omu mukolo gw’okugusha haguma abantu ba ngasi ishanja embere obuzinda bw’er’igulu buhike. (Hag. 2:7) Omukolo gwirhu gw’amahubiri gwanashushanyizibwa n’omukolo gw’okucungula abantu. Nirhu rhunashushanyizibwe n’abantu b’omu cigusho c’okucungula abantu bahirimirweko n’olukumba. Omukolo abo bantu boshi bajira guba gwa bulagirire, ciru ankaba hali amango bacungula bantu basungunu bone omo lukumba. Oko kushushine n’omukolo gwirhu gw’amahubiri. Rhurhaba rhumanyire bantu banganaci bakacicunguka mw’er’igulu lya Shetani. Cikone Yehova anakolesa ngasi muguma wirhu ly’abarhabala. Andreas, olama e Bolivie adesire ntya: “Nambone oku buba bushiru bwa bantu banji burhabala omuntu arhondere okuyiga okuli kuba omu Bibliya n’okuhikira aha abatizibwa.” Neci, rhugenderere okuba n’entanya nyinja oku biyerekire omukolo gwirhu gw’amahubiri. Erhi rhwakajira ntyo, Yehova anarhugisha, n’omukolo gwirhu gw’amahubiri gwanaba nshôko y’omwishingo. w21.05 buk. 19 cif. 19-20

Omuhigo omuhivi ajira guba muguma gone: kugwarha erhi kuniga ensimba ali ahiva. Anakolesa mirhego minji ly’arhuluba ensimba, nk’oku muguma wa balya bacishomagya mpu balirhuliriza Ayubu aderhaga. (Ayu. 18:8-10) Gurhi omuhivi ajira ly’ensimba egwarhwa n’omurhego anarhegaga? Anarhangicifunza binji kuli eyo nsimba. Anamanyirire ngahi ekaja? Bici esima? Na gurhi akayigwarha buzira kumanya? Shetani ashushanyizibwe n’oyo muhivi wa ntyo. Anakacifunza binji kuli rhwe. Anakalola ngahi rhwaja na bici rhusima. Na buzinda anarhege omurhego alangalire oku gwanarhugwarha buzira kumanya. Cikone Ebibliya erhubwizire n’obwalagale oku erhi rhwakagwarhwa omu murhego gwage, byanacihashikana rhugurhengemo. Na kandi erhuyigirizize gurhi rhwakayakamwo emirhego yoshi ya Shetani. Obucibone n’irala ly’okuba na binji yo mirhego ibirhi mikulu Shetani alugikolesa. Hakola hali myaka minji Shetani ali akolesa ezo ngeso mbi, anabwine oku bantu banji banagwarhwe mw’ezo ngeso. Kw’ayorha nka muntu oli warhega orhunyunyi, anaje arhuhugûla lyo rhuja oku mwiguli erhi oku bukila arhezire. (Enna. 91:3) Cikone rhurhashinganini rhugwarhwe omu murhego gwa Shetani. Bulya gurhi? Bulya Yehova arhufulûlire obwengehushu Shetani akolesa.​—2 Kr. 2:11. w21.06 buk. 14 cif. 1-2

Bene wirhu na bali birhu bishwekerezi bakola bashosihire banashushanyizibwa n’ezo diamants; babà ba ngulo ndarhi bwenene. Akanwa ka Nnâmahanga kashushanyize emvi zabo n’ecimanè erhi couronne. (Mig. 20:29) Cikone, agandi mango rhwanabula bubona obulagirire bw’abo bene wirhu na bali birhu. Emisole ebona obulagirire bw’abo bene wirhu na bali birhu bakola bashosi yanaba n’akantu k’obulagirire bwenene kulusha ciru ezo diamants. Bene wirhu na bali birhu bakola bashosi babà ba ngulo ndarhi omu masu ga Yehova. Anababone gurhi bayosire omu kandalala, abamanyire, ananashagalukire amorhere gabo minja. Yehova anashagaluke erhi abona abo bene wirhu na bali birhu bali bayigiriza emisole obumanye bapatire omu myaka yoshi bakolire Yehova n’obwishwekerezi. (Ayu. 12:12; Mig. 1:1-4) Kandi, Yehova anashagalukire okulembera kwabo. (Mal. 3:16) Barhabulaga mazibu omu kalamo kabo; ciru akaba ntyo, bagendekera babà n’obuyemere buzibu muli Yehova. Obulangalire bwabo okubiyerekire akasanzi kayisha bukola busêzire bwenene kulusha amango bamanyaga okuli. Na Yehova abazigire bulya bagendekire bayaliza izino lyage “ciru n’omu myaka y’obushosi.”​—Enna. 92:12-15, NWT. w21.09 buk. 2 cif. 2-3

Ngasi mango byanakahûna rhulabirize ebirhushumya rhujire kantu kalebe. Rhwanacidosa ntya: ‘Ka nancigerere oku bandi ly’omanya oku ndi wa bulagirire? Ebinshumya oku njire kantu kalebe, ka kuba kulonza nyereke abandi oku niene nyishikajira bwinja erhi kubayereka oku nie ndushire abandi? Erhi nnambijire lyo nshagalusa Yehova?’ Ebibliya erhuhanwîre oku rhurhakag’icigerera oku bandi. Bulya gurhi kurhali kwinja okujira ntyo? Omu njira nguma, erhi rhwakakarhanya oku rhwe rhujira ebintu bwinja kulusha bene wirhu erhi bali birhu, oko kwanarhuma rhwaba ba bucibone. N’omu yindi njira, okucigerera oku bandi kwanarhuma rhwahikira aha rhwavunika omurhima. (Rm. 12:3) Rhushinganine rhukakengera oku Yehova akulwire ngasi muguma wirhu emwage, arhali mpu bulya rhugwerhe iranga linja, erhi mpu bulya rhuyishiganira erhi mpu bulya rhuba rhumanyikine bwenene, cikone ajijire ntyo bulya rhuba rhumuzigire rhunakanayumvirhiza Omugala.​—Yn. 6:44; 1 Kr. 1:26-31. w21.07 buk. 14-15 cif. 3-4

Lyo rhuhikira aho, rhushinganine rhukasalira, okuyiga Akanwa ka Nnamahanga, n’okukarhanyako. Ocihâne wenene muli ebyo bintu, onahûne Yehova emisi. Iroho litagatifu lyage lyanakurhabala olwise ngasi kantu kakarhuma walonza okucigerera oku bandi. Na kandi Yehova anakurhabala amanye erhi ogwerhe obucibone n’erhi oli wacifinja eby’abandi, ananakurhabala okule duba-duba ago morhere mabi omu murhima gwawe. (2 Nga. 6:29, 30) Yehova ayishi omurhima gwirhu. Na kandi ayishi kunganaci rhulwisa iroho l’igulu n’obuzamba bwirhu. Yehova anarhuzigire bwenene erhi abona kunganaci rhuli rhwalwisa ebyo byoshi. Yehova akolesize olwiganyo lw’obuzigire buba egarhi k’omuzire n’akabonjo kage ly’ayerekana gurhi aciyumva kuli rhwê. (Iz. 49:15) Rhuhîrwe omurhima okumanya oku Yehova anarhuzigire bwenene erhi abona rhuli rhwajira okwirhu koshi lyo rhumukolera n’omurhima goshi! w21.07 buk. 24-25 cif. 17-19

Nirhu rhwanayushûla omwishingo gwirhu erhi rhwakacihâna loshi omu mikolo yoshi bakarhuha oku rhujire omu mukolo gwa Yehova. ‘Ocihâne’ omu mukolo gw’amahubiri n’omu mikolo y’ecigamba. (Ebj. 18:5, Mashi Bible; Hb. 10:24, 25) Okaja oku ntimanano erhi wanarheganyize ebi mwayishiyiga ly’oyishihâna amashuzo g’okuhânana omurhima. Okabona ebipindi by’abanafunzi bakuhîre omu ntimanano y’omu garhi k’omugobe oku biri bya bulagirire. Erhi bakakuhûna oku orhabale okuhikiriza mukolo mulebe omu cigamba, wanakacihangana ogujire bwinja n’omu mango gakwanine. Orhakagi gayaguza omukolo bakuhîre omu cigamba n’okubona nk’okugujira kuli kuheza akasanzi kawe kone. Ocihangane okakubûla bwinja obuhashe bwawe. (Mig. 22:29) Oku wagendekera wacihâna loshi omu mikolo yawe y’ekiroho, ko wakagendekera wajira amajambere duba-duba n’omwishingo gwawe gwanagendekera gwayushûka. (Gl. 6:4) Na kandi wanabona oku kuli kulembu okucishinga haguma n’abahâbirwe omukolo wakagilonza okuba nago.​—Gl. 5:26. w21.08 buk. 23 cif. 11

Rhuyake obucibone, rhunagendekere rhwayigirizibwa. Nka kula endwala yakahuma oku misi y’omurhima gw’omuntu na buzinda erhume gurhacikole bwinja, ko n’obucibone bwakahuma oku murhima gwirhu gw’olwiganyo na ntyo burhume rhurhacirhumikire obulongozi bwa Yehova. Abafarizeyo bajira emirhima yabo ebe mizibu nk’ibuye na ntyo balahira ebyaliyerekine n’obwalagale oku ebi Yezu akagijira akagibijira kugerera iroho lya Nnâmahanga. (Yn. 12:37-40) Oko kwali kubi bwenene bulya kwarhumire barhabona obuzine bw’ensiku n’amango. (Mt. 23:13, 33) Kuli kwa bulagirire bwenene erhi rhwakagendekera rhwaleka Akanwa ka Nnâmahanga n’iroho lyage bihindule obumuntu bwirhu n’okushumya entanya zirhu n’emihigo yirhu! Bulya Yakobo ali mwirhohye, akagiyemera ayigirizibwe na Yehova. Na bulya ali mwirhohye co carhumire aba mwigiriza mulenga. w22.01 buk. 10 cif. 7

Erhi rhwakagendekera ‘rhwashenga burhahusa,’ rhwanacikubagira Larha wirhu w’omu mpingu. (Kl. 4:2, Mashi Bible) Ciru akaba ishuzo okw’isala lirhu lyanabonekana nka lyalegerire, Yehova arhulaganyize oku ashuza oku masala girhu “omu mango gakwanine.” (Hb. 4:16, NWT) Co cirhumire rhurhashinganini rhuderhe Yehova kubi erhi akaba kantu kalebe karhahikiriri duba-duba nk’oku rhwal’ilangalire. Kwa lwiganyo, bantu banji bakola bagwerhe myaka minji bali bahûna Nnâmahanga oku Obwami bwage buyishage bushereze er’igulu. Ciru Yezu naye arhubwizire oku rhukashenga ntyo. (Mt. 6:10) Cikone bwanaba buhwinja bunene erhi omuntu akanyihya obuyemere bwage muli Nnâmahanga mpu bulya obuzinda burhayishiri omu mango bene bantu balilangalire oku lyo bwayisha! (Hab. 2:3; Mt. 24:44) Rhwanaba benge erhi rhwakagendekera rhwalinda Yehova n’okugendekera rhwashenga n’okuba n’obuyemere muli ye. Obuzinda bwanayishe omu kasanzi kashinganine, kw’okuderha ‘olusiku n’akasanzi’ Yehova acishozire oku lyo bwayisha. N’olo lusiku lwanabonekane oku luli lwinja kuli abantu boshi.​—Mt. 24:36; 2 Pt. 3:15. w21.08 buk. 10 cif. 10-11

Omushosi oli mwirhohye anahikire aha ahugûkwa oku obushosi bwanarhuma arhacihikirize ebintu binji akagijira embere. Rhuganirire olwiganyo lw’abangalizi b’omuzunguko. Erhi bakayeneza myaka 70, banahâbwe ogundi-gundi mukolo. Kwanaba kuzibu okuyemera eyo mpindûlo. Babà bashagalukire omukolo gwabo gw’okurhabala bene wirhu. Cikone, banahugûkwe oku kwanaba kwinja abaciri misole bajire ogo mukolo. Muli eyo njira, banayerekane entanya ziri nk’eza Bene-Levi b’omu Israheli ya mîra. Erhi bakayenezize myaka 50, bakagihûnwa baleke omukolo gwabo bakagijira omw’ihema ly’entimanano. Arhali ogo mukolo baligwerhe omw’ihema ly’entimanano go gwakajira babe n’omwishingo. Bakagijira n’obushiru emikolo yabo yoshi n’okucihangana okurhabala emisole. (Mib. 8:25, 26) Ciru akaba abangalizi ba mîra, barhaciri balambagirira ebigamba ene, babà mugisho omu cigamba cabo. w21.09 buk. 8-9 cif. 3-4

Yezu aganirire omwanzi gw’oburhulirize guyerekire omwana mulalahi, ogo mwanzi guli omu Luka 15:11-32. Musole muguma gwagomera ishe, gwarhenga ahamwabo, alikula (agenda) “aja omu cihugo c’ihanga.” Eyo munda, alama akalamo k’olugenzi lubi n’eby’enshonyi. Erhi amazibu gamuhikira, arhanya bwenene. Ahugûkwa kunganaci al’ilamire akalamo kinja erhi aciri aha mw’ishe. Nk’oku Yezu aderhaga, oyo musole “acijamwo [agalukirwa n’obwenge, NWT].” Ahiga oku akola agaluka emwabo ly’ajihûna ishe obwonjo. Akasanzi ogo musole gwahugûkagwa oku gwajijire kubi bwenene kali ka bulagirire. Byalihunyire ajire kantu kalebe! Omwana mulalahi ayerekine oku aciyunjuzize ebyaha byage okunali. Olo lwiganyo gurhali mwanzi gwakurhuha omurhima kone. Amakanuni luyigirizize ganarhabala abagula b’ecigamba amango bali bajira okwabo koshi lyo bamanya erhi kobinali omwemezi wajiraga ecaha cizibu anaciyunjuzize. w21.10 buk. 5 cif. 14-15

Bici birhakadundaganywa? Entumwa Paulo ayandika ntya: “Kulya kuba rhwâhâbirwe Obwami burhankahuligana, rhusêre buzibu mw’eyo nshokano . . . rhukolere Nyamuzinda rhunamusimise, rhumurhinye rhunamukenge.” (Hb. 12:28) Hano oko kudundaganya kwa buzinda kuhikirira, Obwami bwa Nnâmahanga bone burhakadundaganywa. (Enna. 110:5, 6; Dan. 2:44) Rhurhagwerhi kasanzi ka kuhêza! Abantu bakwanine okucishoga: Ka bagendekera balama nk’oku er’igulu liri lyaheka lyo bayish’isherezibwa, erhi ka bajira okwabo koshi lyo akalamo kabo kalingana n’obulonza bwa Nnâmahanga lyo bayishiba n’obuzine bw’ensiku n’amango? (Hb. 12:25) Kugerera omukolo gwirhu gw’amahubiri, rhwanarhabala abantu lyo bahikira aha barhôla omuhigo mwinja. Rhunagendekere rhwakengera ezi nderho za Nnawirhu Yezu: “Ogu mwanzi mwinja gw’Obwami gwayishiyalizibwa omw’igulu lyoshi lyo buba buhamirizi oku bantu b’amashanja goshi, na ntyo ly’obuzinda bwanayishe.”​—Mt. 24:14, NWT. w21.09 buk. 19 cif. 18-20

Mwe bagula mugwerhe omukolo gwago-gwago gw’okurhuliriza bene wirhu na bali birhu bishwekerezi abazigirwa babo balesire Yehova. (1 Ts. 5:14) Mwanalonza ehisanzi hy’okujira ntyo embere n’enyuma z’entimanano. Mwanabalambagirira aha kâ n’okusalira haguma nabo. Mwanahubiri haguma nabo na ciru mwanabayegereza oku nterekêro yinyu y’omulala. Balungere b’ekiroho bashinganine bayereke ebibuzi bya Yehova biri omu burhe obwonjo, obuzigire, n’okubishibirira. (1 Ts. 2:7, 8) Yehova “arhalonza hajire owahera, ci alonza boshi baciyunjuze.” (2 Pt. 3:9) Ciru omuntu akajira ecaha cizibu, obuzine bwage buciri bwa bulagirire omu masu ga Yehova. Orhanye okw’ibeyi linene Yehova alipire: ahâna Omugala muzigirwa ngombôlo enyanya z’abanya-byaha. Enyanya z’obuzigire bwage, Yehova analonze okurhabala abo bamulesire bamugalukire. Analangalire oku bajira ntyo, nk’oku olwiganyo Yezu aganiriraga lw’omwana mulalahi luyerekine.​—Lk. 15:11-32. w21.09 buk. 30-31 cif. 17-19

Gurhi rhwakaderha erhi akaba orhacijira binji omu mukolo gw’okuhubiri n’okuyigiriza enyanya z’obuzamba bw’omubiri? Wanacibiba n’omwishingo omu mukolo gwawe gw’okusarula. Rhuganirire ebyahikiraga Mwami Daudi erhi ye n’abalume bali boshi bacungula emilala yabo n’abintu byabo babirhêsa omu maboko g’ababisha b’aba Amaleki. Balume magana abirhi bal’irhamire bwenene barhacihashaga okulwa, na ntyo basigala enyuma lyo balanga ebirugu. Enyuma z’okuhima er’ivita, Daudi aderha oku bahâbwe erhi bagabe ebyo bintu barhêsagya kuguma. (1 Sam. 30:21-25) Ko n’oko lugenda omukolo gwirhu gw’okujira abanafunzi omw’igulu lyoshi. Ngasi bantu bajira okwabo koshi lyo bajira omukolo gw’amahubiri, banashagalukire okucungulwa kwa ngasi mwanafunzi muhyahya banamurhabale arhondere alambagira omu njira ehêsire ebwa buzine. Yehova anabone obushiru bwirhu n’ebinja birhushumya okuhubiri, ananarhuhembe. Na kandi arhuyigirizize gurhi rhwakabamwo n’omwishingo omu cigabi rhukola omu mukolo munene gw’okusarula. (Yn. 14:12) Rhwanayemera n’obwalagale oku Nnâmahanga agendekera arhuyemera erhi rhwakaba rhurharhamiri! w21.10 buk. 28 cif. 15-17

Amango rhuli rhwashosihala, nkaba rhwanakayoboha mpu rhurhacibe ba bulagirire omu masu ga Yehova nk’oku byali embere. Kobinali, rhwanaba rhurhacigwerhi misi minji nk’eyi rhwaligwerhe embere, cikoki rhwanakolesa obwenge bwirhu n’obulenga rhukola rhugwerhe lyo rhurhabala emisole ekolese emisi yabo yoshi n’okuyemera emikolo mihyahya omu cigamba. Abakola bashosi bashinganine babe birhohye erhi bakalonza barhabale emisole. Omuntu mwirhohye anakabona oku abandi bamulushire. (Fl. 2:3, 4) Abakola bashosi bayerekana obo borhere banahugûkwe oku hali njira nyinji ziyemerirwe n’Amandiko z’okuhikiriza mukolo mulebe. Muli oko, barhakasêza ngasi muntu oku ajire ebintu nk’oku bakagibijira embere. (Muh. 7:10) Ciru akaba bakola bagwerhe bumanye bunji bakashangîra haguma n’emisole, banahikire aha bahugûkwa oku “ebiri byagera omw’igulu binahinduke” n’oku kwanaba kwa bulagirire bacikomereze okujira ebintu omu njira mpyahya.​—1 Kr. 7:31. w21.09 buk. 8 cif. 1, 3

Ntamango Yehova akahûna abantu bage oku bajire akantu kagalugalu. Aba mutagatifu loshi-loshi. Oko kwayerekinwe bwinja kugerera ebyali biyandike oku hy’olubamba hy’enoro hyali oku cimane omukuhani mukulu akagiyambala. Kw’ehyo hy’olubamba baliyandisireko ntya: “Obutagatifu buli bwa Yehova.” (Lub. 28:36-38, NWT) Omwanzi gwali kw’ehyo hy’olubamba hy’enoro gwakagiyemeza ngasi yeshi wagubwine oku kobinali Yehova aba mutagatifu. Gurhigi byakabire lugenda omw’Israheli orhakahashir’ibona ehyo hy’olubamba hy’enoro bulya arhalishinganine okuyegera omukuhani mukulu? K’akahashirimanya oku Yehova aba mutagatifu? Neci! Ngasi mw’Israheli akagiyumva ogo mwanzi gwasomwa amango bakagisoma Irhegeko embere z’abalume, abakazi, n’abana. (Lush. 31:9-12) Erhi akaba waliho ago mango wakayumvirhe oku basoma ezi nderho: “Nie Yehova Nnâmahanga winyu, munashinganine . . . mube batagatifu, bulya niono mba mutagatifu.” “Mushinganine mube batagatifu embere zani, bulya niono, Yehova, mba mutagatifu.”​—Lev. 11:44, 45; 20:7, 26, NWT. w21.12 buk. 3 cif. 6-7

Bantu baguma na baguma banacihira omu ntanya okurhalusire olugero lugenda amalagirire g’omubiri. Nkaba baba balamire omu cihugo cirimo ehali y’obukenyi bwenene. Ciru kwanaba kuzibu kulibo okubona ensaranga z’okuhikiriza amalagirire g’omulala gwabo. Erhi nkaba owakagishibirira omulala afîre, na buzinda omulala gwanabêra buzira nsaranga zakahikiriza amalagirire gago. Rhwanahikira aha rhwaba bakucikubagira ahali h’okucihiriraho entanya zirhalusire olugero. Rhukengere oku Yehova arhulaganyize n’obwalagale oku ashibirira amalagirire girhu g’omubiri erhi rhwakashokoza ebintu by’ekiroho. (Mt. 6:32, 33) Arheganyize ngasi kantu koshi ly’ahikiriza eco cirangane. (Lush. 8:4, 15, 16; Enna. 37:25) Erhi akaba Yehova anashibirire orhunyunyi n’amauwa, rhurhagwerhi ecirhumire c’okucilibuza lugenda ebi rhushinganine rhulye erhi ebi rhushinganine rhuyambale! (Mt. 6:26-30; Fl. 4:6, 7) Nka kula obuzigire bushumya ababusi binja bahikirize amalagirire b’abana babo, obuzigire bunashumye Larha w’empingu ahikirize amalagirire g’omubiri g’olubaga lwage. w21.12 buk. 17 cif. 4-5; buk. 18 cif. 8

Ka hali omuntu erhi winyu mwemezi okola akusarhazize? Obone olwiganyo lwa Yozefu akoleragwa okurhashinganini na bene wabo. Agendekera asegeza obwenge bwage oku mukolo gwa Yehova, na Yehova ayishimuhemba enyanya z’oko kulembera. Erhi hagera nsiku, Yozefu arhacikagikengera amalumwa goshi ageragamwo, anakabona kunganaci Yehova amugishire. (Murh. 45:5) Aka Yozefu, rhunarhulirizibwe erhi rhuyegerera Yehova n’okuleka yene alerhe obushinganyanya omu kasanzi kashinganine. (Enna. 7:17; 73:28) Erhi akaba oli walembera obubule bw’obushinganyanya erhi kandi kantu kali kakusarhaza, okengere oku Yehova aba hofi “n’emirhima egayire.” (Enna. 34:18, NWT) Akuzigire enyanya z’oko kulembera kwawe n’okubona onamurhuleko emizigo yawe. (Enna. 55:22) Ye Mutwi w’Emanja w’igulu lyoshi. Anabone ebintu byoshi. (1 Pt. 3:12) K’oba mubidu okulinda Yehova amango oli walwisa amazibu orhakahashihima? w21.08 buk. 11 cif. 14; buk. 12 cif. 16

Bwanaba bwenge erhi rhwakakolesa akalamo kirhu omu njira eyerekine oku rhusimire okushagalusa Yehova. Rhushinganine rhucihirireho ebintu by’obulagirire. Hali amango okucishoga oku rhwakolesa akasanzi kirhu kuhiramwo okucishoga egarhi ka mikolo ibirhi erhali mibi. Omwanzi gumanyikine bwenene g’oku Yezu alambagiriraga Mariya na Marta guhugwîre ntyo n’obwalagale. Buzira karhinda Marta al’ishagalukire okuyegereza Yezu, n’oko kwarhuma arhondera arheganya biryo binji. Cikone, muli ago mango, Mariya, ayunguka bwenene n’oko kulambagirira Yezu ali balambagirire, ayegera Nnawabo n’okuyumvirhiza enyigirizo zage. Ciru ankaba Marta agwerhe ebirhumire binja byamushumagya, Mariya acishozire “omwanya mwinja kulusha.” (Lk. 10:38-42) Nkaba Mariya ahikire aha ayibagira biryo bici balire olo lusiku, cikone rhwanayemera oku arhakayibagire ebi Yezu amuyigirizize. Nirhu rhwanashagalukira akasanzi rhugeza haguma na Yehova nk’oko Mariya ashagalukire akasanzi agezagya haguma na Yezu. w22.01 buk. 27 cif. 5-6

Ciru akaba Ahabu acirhohyagya embere za Yehova, olugenzi lwage lwayish’iyerekana n’obwalagale oku arhalic’iyunjuzize eby’okunali. Arhakulaga enterekêro ya Baali omu bwami bwage. Arhanagendekezagya enterekêro ya Yehova. Enyuma z’okufâ kwa Ahabu, Yehova ayerekana n’obwalagale gurhi akagimubona. Omulebi wa Nnâmahanga Yehu aderha ntya: Âli ‘mubi’ (2 Nga. 19:1, 2) Rhurhanyagye ntya: Erhi akaba obuciyunjuze bwa Ahabu bwali bw’okunali, omulebi wa Yehova arhakadesire oku Ahabu ali muntu mubi wal’ishombire Yehova. Kobinali, ciru akaba Ahabu ayerekine ehiri nka hyabuciyunjuze, arhaciyunjuzagya yeshi-yeshi erhi okunali. Bici olwiganyo lwa Ahabu lwakarhuyigiriza? Ahabu acirhohya erhi ayumva omwanzi Eliya aderhaga lugenda omulala gwage. N’oko ajiraga kwali kwinja. Cikone ebyajiraga buzinda, byo byayerekine oku okuciyunjuza kwage kurhalirhenzire oku murhima. K’okuderha oku okuciyunjuza kuhiziremo bintu binji ahanyuma n’okuderha kone oku rhuciyumvirhe kubi. w21.10 buk. 3 cif. 4-5, 7-8

Izaya ali mulebi, binabonekine nka na mukage naye agwerhe eyage mikolo y’obulebi akagihikiriza, bulya akagihamagalwa “omulêbi-kazi.” (Iz. 8:1-4) Izaya na mukage, bombi balisegize okuharamya Yehova omu kalamo kabo. Abajire omu buhya ba muli gano mango nabo banasegeza akalamo kabo oku mukolo gwa Yehova omu kujira ngasi byoshi bakanahasha omu mukolo gwage. Banazibuhya obulangalire bwabo muli Yehova omu kuyiga obulebi bw’Ebibliya haguma n’okubona gurhi ngasi mango bunakahikirira. (Tt. 1:2) Banarhanya oku cigabi bakajira omu kuhikiriza bulebi buguma na buguma. Kwa lwiganyo, banaba n’omukolo gw’okujira omu kuhikirizibwa kw’obulebi Yezu ahânaga buyerekine oku omwanzi mwinja gwanayigirizibwe omw’igulu lyoshi embere obuzinda buyishe. Oku abajire omu buhya bakagendekera babona kunganaci obulebi bw’Ebibliya buli bwahikirira, ko bakanazibuhya omuhigo gwabo gw’okujira binji nk’oku bakanahasha omu mukolo gwa Yehova. w21.11 buk. 16 cif. 9-10

Yezu alonza owayishishibirira nnina, bulya byanahashikana abe alikola mukana. Obuzigire bwa Yezu kuli Mariya n’okubona alimushibirire kwarhuma aha Yowane omukolo gw’okushibirira amalagirire gage g’ekiroho. Kobinali obo buli buzigire bunji Yezu ayeresire nnina muzigirwa wamushibiriraga kurhangira erhi aburhwa n’okuyimanga aha burhambi bwage erhi afâ! Bici ezo nderho za Yezu zakarhuyigiriza? Obwîra bwirhu haguma na bene wirhu na bali birhu Bakristo bwanasêra kulusha obwîra rhujira haguma na bene wirhu b’omu mulala. Bene wirhu b’omu mulala banarhuhagalika na ciru banarhulikirira, cikone nk’oku Yezu arhulaganyagya, erhi rhwakabêra bishwekerezi kuli Yehova n’ikubuliro Lyage, ‘rhwanahâbwa kali igana’ kulusha ebi rhwahezize. Bene wirhu banji banabà nka bagala birhu erhi bali birhu, n’abandi banaba nka ba nyama erhi ba larha. (Mk. 10:29, 30) Gurhi ociyumva omu kubà omu mulala gw’ekiroho gubamwo ecinyabuguma kugerera obuyemere n’obuzigire bajira kuli Yehova na kuli ngasi muguma wabo?​—Kl. 3:14; 1 Pt. 2:17. w21.04 buk. 9-11 cif. 7-8

Obuzigire bwishwekerezi bunajire binji kulusha ebihûnyirwe. Ene nalyo nk’oku byanali embere, bene wirhu na bali birhu banji bacishozire okuyereka ababo bemezi obuzigire bwishwekerezi ciru na kuli bala barhal’imanyine nabo kurhenga mîra. Kwa lwiganyo, erhi bamanya oku hali bene wirhu bahikirwe n’obuhanya, banalonze okumanya duba-duba gurhi bakabarhabalamwo. Erhi muntu mulebe w’omu cigamba akaja omu kanga kazibu, barharhindira okurhabala oyo muntu n’ebi alagirireko. Ak’aba Makedoniya b’omu myaka igana mirhanzi, banajire binji kulusha ebihûnyirwe. Banajire okwabo koshi, omu kuhâna “ciru kurhalusa obuhashe bwabo bwône” lyo barhabala bene wabo babulirwe. (2 Kr. 8:3) Abagula b’obuzigire nabo banabone n’okuvuga bene wirhu na bali birhu omunkwa kuli ebi bali bajirira abandi. Oko kubavuga omunkwa omu kasanzi kashinganine kunabahe emisi balagirireko lyo barhagirhama okujira ntyo.​—Iz. 32:1, 2. w21.11 buk. 11 cif. 14; buk. 12 cif. 21

Ngasi mango rhweshi rhuba rhulagirire okw’ihano. Mango maguma na maguma, rhunarhôle omuhigo gw’okugend’idosa ihano muntu mulebe rhuba rhukenzire. Omu kandi kanga, mwene wirhu obwine oku rhukola rhuli hofi rhujire “akantu kabi,” kakayish’irhulerhera nyamanja, anarhuyegera ly’arhuha ihano. (Gl. 6:1, NWT) Na kandi, hali amango rhuhâbwa ihano omu njira y’obuhane enyuma z’okujira amagosa mazibu. Ciru rhwakahâbwa ihano omu njira ehi, rhushinganine rhuliyumvirhize. Okujira ntyo kuli kwinja kuli rhwe, kwananayokola obuzine bwirhu! (Mig. 6:23) Olwandiko lwirhu lwʼolusiku lwene lurhuhîre omurhima oku ‘rhuyumvirhize ebinwa by’ab’obwenge.’ Nta mwene muntu yeshi-yeshi oyishi ebintu byoshi; ensiku zoshi hanakaba omuntu omanyire binji wanabwine binji kurhulusha. (Mig. 12:15) Co cirhumire okuyumvirhiza ihano, kunayerekane oku rhuli birhohye. Kunayerekane oku rhuhugûsirwe oku hali ebi rhurhakahasha, n’oku rhuhugûsirwe oku rhulagirire oku burhabale bw’abandi lyo rhuhikiriza emihigo yirhu. Omwami w’obwenge wakag’ihamagalwa Solomoni ayandika ntya: “Ahali abahabûzi [erhi, bahanûzi] banji, emihigo kuyunjula eyunjula.”​—Mig. 15:22. w22.02 buk. 8 cif. 1-2

Okuciyunjuza kw’okunali kuhiziremo bintu binji ahanyuma n’okuderha kone oku rhuciyumvirhe kubi enyanya z’ecaha rhwajijire. Oko kuhiziremo okujira empindûlo omu murhima n’omu ntanya. Kandi kuhiziremo okuyaka olugenzi lubi n’okucib’irhondera okurhumikira amarhegeko ga Yehova. (Eze. 33:14-16) Akantu karhangiriza omuntu wajijire ecaha ashinganine ajire kuli kucibigalula obwîra bwage haguma na Yehova. Orhanye gurhi rhwakajira erhi rhwakamanya oku mwîra wirhu mulebe anajijire ecaha cizibu. Kwanaba kugokeza rhugokize omwîra wirhu erhi rhwakafulika ecaha cage. Ciru rhurhakahasha okufulika eco caha bulya Yehova anakabon’ebintu byoshi. (Mig. 5:21, 22) Wanarhabala oyo mwîra wawe omu kumukengeza oku abagula balonzize okumurhabala. Erhi omwîra wawe akalahira okubwira abagula, wanagendibabwira wene kuli ako kanga, ly’oyerekana oku olonzize okumurhabala. w21.10 buk. 6-7 cif. 19-21

Rhweshi rhwanayiga olwiganyo lwa Yezu lw’okuba n’iroho ly’okucihâna. Ebibliya edesire oku “ayanka [arhôla] obworhere bw’omuja.” (Fl. 2:7) Omuja mwinja erhi mukozi mwinja, anakalonza obulyo bw’okushagalusa nnawabo. Nka muja wa Yehova na mukozi wa bene winyu na bali binyu, buzira karhinda ojira irala ly’okuhikira aha wakolesibwa bwenene na Yehova na bene winyu. Ocidose: ‘Ka mba mubidu okucihâna lyo ntabala abandi? Kamba mubidu okuhâna obwani burhabale amango hali obulagirire bw’abantu bw’okugendicesa ahantu h’okujirira entimanano nkulu erhi aha Nyumpa y’Entimanano?’ Kwa lwiganyo, nkaba ohikire aha wabona oku oshinganine ocihâne kulusha ly’okarhabala abandi, cikone orhamanyiri gurhi wajira ntyo. Muli ako kanga, wanashenga Yehova kurhenga oku murhima, omubwire ngasi kantu. Omubwire oku oli waciyumva koshi onamuhûne akuhe “irala n’obuhashe bw’okujira.”​—Fl. 2:13, NWT. w22.02 buk. 22-23 cif. 9-11

Yezu ayerekine olukogo omu kujirira abandi aminja n’okuba wa lugero, ciru n’amango kurhali kulembu okujira ntyo. (Mt. 11:29, 30) Kwa lwiganyo, erhi mukazi muguma Mufoinike amuyinginga oku afumye omwana wage, Yezu arhang’ilahira oku arhafumye oyo mwana, cikone erhi oyo mukazi ayerekana obuyemere bunji, olukogo lwashumya Yezu okufumya oyo mwana. (Mt. 15:22-28) Ciru akaba Yezu ali wa lukogo, arhakag’ileka okuhâna ihano. Mango maguma na maguma akag’iyerekana olukogo omu kuhanûla kwa buzibu-zibu aba al’izigire. Kwa lwiganyo, erhi Petro alonza okuvuna Yezu omurhima ly’arhag’ijira obulonza bwa Yehova, Yezu amuhanûla embere z’abandi banafunzi. (Mk. 8:32, 33) Yezu arhajiraga ntyo mpu ly’abonesa Petro nshonyi, cikone alonzagya amukomereze n’okurhonda ezindi ntumwa zirhakag’ihalanjika. Buzira karhinda, Petro ayumvirhe enshonyi, cikone ayungusire n’obo buhane ahâbagwa. Ly’oyereka abantu ozigire olukogo lw’okunali, hali amango byakahûna obahanûle n’obwalagale. Amango oli wajira ntyo, oyige olwiganyo lwa Yezu omu kuhâna amahano gayimangire oku makanuni gali omu Kanwa ka Nnâmahanga. w22.03 buk. 11 cif. 12-13

Rhunahe Yehova enterekêro erhi rhumukuza. (Enna. 34:1) Rhunakuze Yehova erhi rhuganirira abandi okubiyerekire amorhere gage minja n’emikolo yage. Erhi rhwakaba ba kuvuga omunkwa, rhwanaba na bintu binji rhwakaderha okubiyerekire Yehova. Rhwanakaha Yehova irenge erhi rhwakakaciha akasanzi k’okurhanya oku bwinja bwage n’ebi arhujirire. Omukolo gw’amahubiri gunarhuhe obulyo bw’‘okurhûla Nyamuzinda enterekêro y’obukuze ngasi mango, kwo kuderha emburho y’orhunwa’ rhwirhu. Nka kula rhurhangirhanya kw’ebi rhwabwira Yehova omw’isala, ko rhunashinganine rhurhang’ikarhanya kw’ebi rhwabwira abantu rhwarhimanana nabo omu mukolo gw’amahubiri. Rhuba rhulonzize “enterekêro [yirhu] y’obukuze” ebe nyinja bwenene. Co cirhuma rhuderha n’obushagaluke amango rhuli rhwahubiri abandi. w22.03 buk. 21 cif. 8