Mwezi gwa 10

Enyigirizo zirhu n’obuyemere bwirhu biba biyimangire oku Kanwa ka Nnâmahanga. Ciru akaba ntyo, bantu banji ba muli gano mango girhu bali basarhala mpu bulya oku rhujira enyigirizo zirhu kuba kwa ntya-ntya kone, mpu n’ebi rhuyigiriza arhali byo balonza bayumve. Gurhi rhwakajira lyo rhurhagi sarhala? Entumwa Paolo yabwira Abakristu balilamire e Roma ntya: “Obuyemere burhenga omu kuyumva emyanzi, n’eyo myanzi erhenga omu kubwirwa akanwa ka Kristu.” (Rm. 10:17, NWT) Co cirhuma rhunayubakire obuyemere bwirhu oku amandiko, ci arhali omu kujira amadinye g’amadîni garhapatini n’amandiko, ciru gakakabamw’omuyinjihirizo guyosire gurhi. Rhushinganine rhube n’obuyemere busêzire, buyimangire oku bumanye b’okunali bulya “nta muntu wakasîmîsa Nnâmahanga buzira bwemere.” (Hb. 11:1, 6, Mashi Bible) Na ntyo, rhurhalagiriri oku cimanyiso cago-cago carhenga empingu lyo rhuyemera oku rhwabwine okuli. Okuyiga enyigirizo ziri omu Bibliya kunazibuhye obuyemere bwirhu n’okurhuyemeza n’obwalagale oku rhwabwine okuli, n’oko kunarhume rhurhacibe n’akarhinda. w21.05 buk. 4-5 cif. 11-12

Etumwa Paolo alwisize mazibu manji. Alilagirire oku misi bwenene amango bamushurhaga, erhi bamubanda amabuye, n’erhi bamuhira omu mpamikwa. (2 Kr. 11:23-25) Paolo ayemire n’obwalagale oku hali amango akagilwisa entanya z’okuciyumva kubi. (Rm. 7:18, 19, 24) Na kandi akagilwisa obulwala ahamagalaga “akababo omu mubiri,” anakagihûna Nnâmahanga oku amurhenze kuliko. (2 Kr. 12:7, 8) Yehova aha Paolo emisi y’okuhikiriza omukolo gwage gw’amahubiri, ciru akaba akagilwisa ago mazibu goshi. Orhanye kw’ebi Paolo ahikirizize. Kwa lwiganyo, amango alishwekirwe omu nyumpa e Roma, ahalira n’obushiru boshi omwanzi mwinja erhi ali embere z’abakulu b’Abayahudi erhi nkaba embere z’abakulu b’eguvernema. (Ebj. 28:17; Fl. 4:21,22) Na kandi ahubiri Balanzi banji ba Mwami anayaligiza omwanzi mwinja balya boshi bakagimulambagirira. (Ebj. 28:30, 31; Fl. 1:13) Mw’ako kasanzi ko n’ako, Paolo ayandika maruba manji galongozibagwa n’iroho litagatifu, ganacirigaha Abakristu b’okuli bunguke bunji ene. w21.05 buk. 21 cif. 4-5

Obucibone bwarhuma Mwami Uziya w’e Yuda abula kuyumvirhiza amahano, na ntyo ajira ebintu n’obuhalanjisi. Mwami Uziya ali ntwali ya mulume. Akagilwa amavita anagahime, akagihikiriza mikolo minji y’obubasi, n’ey’obuhinzi. “Nyamuzinda amuha okuyololoka.” (2 Nga. 26:3-7, 10) Ebibliya edesire oku “erhi aba akola agwerhe misi minji ntyo, omurhima gwage gwarhangira okulengerera n’okubiha” n’okwo kwo kwamuyisire. Embere z’aho Yehova ali amarhegeka oku bakuhani bone bashinganine okuyokera obukû omu hekalu. Cikone Mwami Uziya n’obuhalanjisi bwage aja omu hekalu mpu naye ayoce obukû. Yehova arhashagalukiraga eco cijiro n’oko kwarhuma amuhâna omu kumuhirak’olushomyo. (2 Nga. 26:16-21) K’obucibone bwanarhuhira omu murhego guli nk’ogu Uziya ajagamo? Neci, n’oko kwanahikira erhi rhwacirhanyiza rhwenene. Ngasi mango rhukakengera oku Yehova warhuhaga buhashe bulebe erhi omukolo gwago-gwago rhwakaba rhugwerhe omu cigamba. (1 Kr. 4:7) Erhi rhwakaba n’obucibone, Yehova arhakarhukolesa ciru n’ehitya. w21.06 buk. 16 cif. 7-8

Yezu al’imanyire oku arhali ntyo kw’omukolo gw’amahubiri gw’entumwa gwakayosire ensiku zoshi. Kobinali, rhurhamanyiri bantu banga ba muli balya bayumvirhizagya abanafunzi ba Yezu aha murhondero bahikire aha babà bemezi. Abanafunzi ba Yezu bal’ishinganine bahugûkwe oku obushagaluke bwabo burharhenziri mw’ebi bahikirizize, cikone akantu k’obulagirire kakabahire obushagaluke kwal’ikumanya oku Yehova ashagalukire obushirhu bwabo. Erhi rhwakakalembera omu mukolo gwirhu gw’amahubiri, rhwanayish’ihâbwa obuzine bw’ensiku n’amango. Okubona rhuhinga n’okurhwera emburho z’okuli kw’Obwami n’omurhima goshi, kandi “rhunarhwere omw’iroho” omu kuleka iroho litagatifu lya Nnâmahanga likole n’obulonza omu kalamo kirhu. Erhi rhwakabula “burhama” erhi “kuleka,” Yehova arhubwizire n’obwalagale oku rhwanasarule obuzine bw’ensiku n’amango, rhube rhwarhabire muntu mulebe acihâne emwa Nnâmahanga erhi nanga.​—Gl. 6:7-9, NWT. w21.10 buk. 26 cif. 8-9

Mango maguma Yezu n’abanafunzi bage bayumva omurhamo enyanya z’okugeza kasanzi kanji omu mahubiri. Balilagirire oku hantu h’okurhamukira, cikone engabo y’abantu yayisha ebakulikire. Obwonjo bwashumya Yezu, arhondera okubayigiriza “binji.” Yezu acihira oku nafasi y’eyo ngabo y’abantu. Abona kunganaci bali balibuka, kunganaci balilagirire oku bulangalire, na ntyo alonza okubarhabala. Ene nalyo abantu ntyo ko bayosire. Oku bali babonekana embuga kurhakag’irhurheba. Bali nka buso bwa bibuzi buli bwaja eyi n’eyi kone, bulya birhagwerhi omungere wabilongoza. Paolo ayerekine oku abo bantu ba ntyo balamire buzira bulangalire barhanamanyiri Nnâmahanga. (Ef. 2:12) Erhi rhulola ehali y’ekiroho y’abantu b’omu eneo yirhu, obuzigire n’obonjo bunarhushumye okurhabala. N’enjira nyinja rhwakabarhabalamwo kuli kubayigiriza Ebibliya. w21.07 buk. 5 cif. 8

Omuntu oba wakucizigira yene aba wabucibone na kandi wa kucikaliza. Omuntu oyagalwa n’abandi anakayumviza obumvu ebi abandi bagwerhe, ci kandi anakalonza abarhôle n’ebi bagwerhe. Kobinali, okuyagalwa n’abandi ko kunayorha nka nshombo. Engeso y’okucizigira wenene n’okukayagalwa n’abandi byanashushanyizibwa n’izinga lyakaja omu mazutu erhi omu esanse bahira omu motere gurhuma e aviyo yayaka. Eyo aviyo yanahashibalala eje emalunga, cikone er’izinga lyanafunga enjira amazutu gagereramo, n’oko kwanarhuma e aviyo yarhibuka. Ko n’oko, omuntu anakolera Yehova kasanzi kalebe. Cikone erhi akaba ali wakucizigira yenene na wakuyagalwa n’abandi, anahikira aha arhibuka. (Mig. 16:18) Anahikira aha aleka okukolera Yehova n’oko kwanamulerhera amazibu kugalerhere n’abandi. Lyo rhurhagiba n’engeso mbi y’okucizigira rhwenene rhwanakakengera ngasi mango er’ihano lya Paolo: “Ntaco mujirage n’omurhima gw’okuciberulamwo mirhwe ibirhi erhi gw’okuciyerekana oku murhali; cingasi muguma akagerereza n’obwirhohye oku ababo bamulushire.”​—Fl. 2:3 w21.07 buk. 15-16 cif. 6-8

Bantu baguma baguma banarhanye oku idîni ly’okuli lishinganine libe n’obuhashe bw’okushuza oku madoso goshi gahaba, ciru n’oku madoso garhashuzibwi omu Bibliya. K’oko kuyumvikine? Rhuganirire olwiganyo entumwa Paolo ahânaga. Aha ababo bemezi omurhima oku ‘balabirize ebintu byoshi,’ cikone ayemera n’obwalagale oku hali ebintu naye arhalihugûsirwe. (1 Ts. 5:21, NWT) Ayandika ntya: “Ebi rhuyishi bibâ bya bihimbi,” ayushula erhi, “rhucidwirhe rhwabonera omu cilolero.” (1 Kr. 13:9, 12) Paolo arhal’ihugûsirwe ebintu byoshi, na nirhu ene rhurhaba rhuhugûsirwe ebintu byoshi. Cikone Paolo alimanyire enyigirizo z’okuli z’omusingi gw’obulonza bwa Yehova. Ebi alimanyire lugenda omuhigo gwa Yehova byamuyemeza n’obwalagale oku abwine okuli! Enjira nguma yakarhurhabala lyo rhugendekera rhwayemera n’obwalagale oku rhwabwine okuli, kuli kushushanya olwiganyo lw’enterekêro Yezu arhondezagya n’oku Abahamirizi ba Yehova baharamyamwo Nnâmahanga ene. w21.10 buk. 18-19 cif. 2-4

Mwe bene wirhu na bali birhu mukola bashosi, mube muli omu mukolo gw’akasanzi koshi erhi nanga, mwanajira binji bwenene lyo murhabala abandi. Gurhi mwakajiramwo ntyo? Mucihangane okucikomereza akanga kahyahya, mucihirireho emihigo mihyahya, munasegeze obwenge bwinyu kw’ebi mwakahasha okujira, ci arhali kw’ebi murhakahasha. Mwami Daudi alilonzize n’omurhima gwage goshi okuyubakira Yehova enyumpa. Cikone, erhi Yehova amubwira oku omusole Solomoni ye wajira ogo mukolo, Daudi ayemera ogo muhigo gwa Yehova analunga obo bubasi okuboko n’omurhima gwage goshi. (1 Nga. 17:4; 22:5) Daudi arhabonaga oku ye walishinganine bwenene okujira ogo mukolo mpu bulya Solomoni “aciri murho, na nta bwenge acibona.” (1 Nga. 29:1) Daudi alimanyire oku, obo bubasi bwakahikirire kugerera emigisho ya Yehova, ci arhali kugerera emyaka erhi bumanye bw’abaliyimangire ogo mukolo. Aka Daudi, bene wirhu bakola bashosi banagendekere bakola omukolo gwa Yehova n’obushiru ciru n’amango omukolo balikomîre okujira omw’ikubuliro lya Yehova gwamashanje. Na kandi, banamanye oku Yehova agendekera okugisha emisole eri yajira emikolo bakagijira embere. w21.09 buk. 9 cif. 4; buk. 10 cif. 5, 8

Emihigo y’ekiroho enalongoze akalamo n’okurhuma kaba n’omuhigo. Cikone, akantu kakarhurhabala, kuli kukacihiriraho emihigo elinganine n’obuhashe bwirhu n’akanga kirhu, ci arhali mihigo eri nk’ey’abandi. Rhurhakalonza rhwenene rhukajira ebyakarhuma rhwavunika omurhima. (Lk. 14:28) Okubona oli mukozi wa Yehova, orhashushini n’owundi, onali wa bulagirire omu mulala gwawe gulimo abantu bali lubero-lubero. Yehova arhakukululaga emwage mpu bulya wali mwinja bwenene kulusha abandi bantu. Cikone akukulwire emwage bulya abwine omu murhima gwawe oku oli muntu mwirhohye wakayigirizibwa n’okujira empindûlo. Oyemere n’obwalagale oku anashagaluke bwenene erhi ojira okwawe koshi ly’omukolera. Okulembera n’obwishwekerezi bwawe binayerekane oku ojira “omurhima nkana na mwinja.” (Lk. 8:15) Co cirhumire ogendekere wajira okwawe koshi ly’oha Yehova ebi wakanahasha. Na ntyo wanaba n’ecirhumire cinja c’ ‘okucîkungira.’​—Gl. 6:4. w21.07 buk. 24 cif. 15; buk. 25 cif. 20

Biba bihunyire rhube bakulembera oku obushinganyanya bwajirwa. Kwa lwiganyo, erhi abagula bamanya oku muntu mulebe omu cigamba anajijire ecaha cizibu, banalongereze kugerera isala “obumanye bw’enyanya” lyo bahugûkwa entanya za Yehova okubiyerekire ako kanga. (Yk. 3:17, Mashi Bible) Omuhigo gwabo guba gwakurhabala owajiraga ecaha cizibu arhenge “omu njira âli ahabukiremwo,” erhi byakahashikana okujira ntyo. (Yk. 5:19, 20) Na kandi banalonze okujira okwabo koshi lyo balanga ecigamba n’okurhuliriza abasarhazibagwa. (2 Kr. 1:3, 4) Kandi amango abagula bali bashibirira ebintu biyerekire ecaha cizibu, banajire obusagasi lyo bahugûkwa bwinja ebintu, n’okujira ntyo kwanahûna kasanzi kanji. Na buzinda banasalira n’okuha oyo wajiraga ecaha amahano garhenzire omu Mandiko na ntyo bahâne obuhane nk’oku “bishinganine.” (Yer. 30:11) Abagula barhanarhôla omuhigo duba-duba. Erhi bakashibirira ebintu omu njira eshinganine, oko kwanalerhera ecigamba coshi obunguke. w21.08 buk. 11 cif. 12-13

Enyanya z’ishali lyajaga e Israheli, Noemi, n’iba, na bagala babirhi babungira e Mowabu. Erhi bakola bali eyo munda iba wa Noemi afâ. Abo bagala babirhi baja omu buhya, cikone akantu k’okugayisa, nabo bafâ. (Rut. 1:3-5) Ebyo byahikiraga Noemi byarhuma avunika omurhima bwenene. Avunika omurhima bwenene kuhika arhondera okuderha oku Yehova anamujirire amaligo. Oyumve gurhi ahugwîre entanya zage lugenda Nnâmahanga: “Oluhi lwa Nyakasane lwampisireko.” “Nyamubaho anyunjuzize malibuko.” Acibiderha ntya: “N’obu Nyamuzinda ancinaguzize, Nyamubaho wanjirire aga maligo.” (Rut. 1:13, 20, 21) Yehova aba ahugûsirwe oku “okubonererwa kwanajira omuntu mwenge abe musirhe.” (Muh. 7:7, NWT) Ashumya Ruti arhabale Noemi n’okumuyereka obuzigire bwishwekerezi. Kugerera obulonza n’obwinja, Ruti arhabala nazala acibiba n’entanya nyinja n’okuhugûkwa oku Yehova agendekire amuzigira. w21.11 buk. 9 cif. 9; buk. 10 cif. 10, 13

Okusegeza obwenge bwirhu oku mikolo rhugwerhe ene, ka kuli kuderha oku rhwanalekaga okulonza gurhi rhwakajiramo binji omu mukolo gwa Yehova? Nanga! Rhukakengera oku rhwanahasha rhunashinganine okucihiriraho emihigo y’ekiroho yakarhurhabala rhugendekere rhwaba n’obushiru lyo rhuyana amalehe omu mahubiri n’okurhabala bene wirhu na bali birhu. Rhwanahikira aho erhi rhwakagendekera rhwaba benge na ba lugero omu kugendekera kwasegeza obwenge bwirhu omu kurhabala abandi ahali h’okucikaliza rhwenene. (Mig. 11:2; Ebj. 20:35) Mihigo ehi wakakacihiriraho wenene? Ohûne Yehova akurhabale ohugûkwe emihigo wakahashihikira. (Mig. 16:3) Ka wanacihangana ohikire omuhigo g’okuba painiya murhabazi erhi wakasanzi koshi, okujikola oku Beteli, erhi kuja omu mikolo y’obubasi? Erhi nkaba wanahashiyiga olulimi luhyahya ly’ohubiri omwanzi mwinja kuli balya baderha olo lulimi erhi kugendihubiri omu yindi eneo. w21.08 buk. 23 cif. 14-15

Yehova anakabona oku obuzigire bwishwekerezi buba bwa bulagirire bwenene. (Hoz. 6:6) Kugerera omulebi Mikeyo, Nnâmahanga wirhu arhubwizire oku ‘rhuzigire obuzigire bwishwekerezi.’ (Mik. 6:8, NWT, amahugûlo g’idako.) Kobinali, embere rhubuzigire, rhushinganine rhumanye obuzigire bwishwekerezi byo bici. Obuzigire bwishwekerezi byo bici? Oluderho “buzigire bwishwekerezi” luli hofi kali 230 omu Biblia Tafsiri ya Ulimwengu Mupya. Olo luderho byo bici? Nk’oku biyerekinwe omu “Maana ya Maneno ya Biblia” gali mw’eyo Bibliya, olo luderho luganirire “obuzigire bushumye n’okucihâna, obwishwekerezi, n’okucishwekerera bwenene. Kanji-kanji lunakolesibwe omu kuganirira obuzigire Nnâmahanga ajira kuli bene bantu, cikone kandi bunayerekanwe egarhi ka bene bantu.” Yehova ye lwiganyo lukulu lw’okuyerekana obuzigire bwishwekerezi. Birhasomerini okubona Mwami Daudi aderha ntya: “Yagirwa Yehova, obuzigire bwawe bwishwekerezi buhisire kuhika empingu . . . Obuzigire bwawe bwishwekerezi buli bwa ngulo ndarhi bwenene, Yagirwa Nnâmahanga!” (Enna. 36:5, 7, NWT) Aka Daudi, ka nirhu rhunashagalukire bwenene obuzigire bwishwekerezi bwa Nnâmahanga? w21.11 buk. 2 cif. 1-2; buk. 3 cif. 4

Omulala gwa Yehova gw’empingu guhiziremwo Yezu Kristu, “Nfula omu biremwa byoshi,” n’ehitu hya bamalahika. (Kl. 1:15; Enna. 103:20) Amango Yezu âli hanw’igulu, ayerekine oku abantu bishwekerezi banahamagala Yehova Ishe wabo. Erhi aba ali aganiza abanafunzi bage, Yezu ahamagala Yehova “Larha na Sho.” (Yn. 20:17) N’erhi rhucihâna emwa Yehova n’okubatizibwa, rhunabe baguma b’omu mulala guzigirana gwa bene wirhu na bali birhu. (Mk. 10:29, 30) Yehova aba Larha w’obuzigire. Yezu alonzize rhukabona Yehova nk’oku omubona: nka mubusi wa lukogo na wa buzigire rhwakayegera, arhali nka muntu orhagwerhi buzigire ohâna amarhegeko gone. Arhondera isala ly’olwiganyo n’ezi nderho: “Larha wirhu.” Yezu akarhubwizire oku rhukahamagala Yehova “Ogala Byoshi,” “Lulema,” erhi “Mwami w’ensiku n’amango”​​—ago goshi gali mazino gage g’obukulu gakwanine ganayemerirwe n’Amandiko. (Murh. 49:25; Iz. 40:28, NWT; 1 Tm. 1:17) Cikone akolesa oluderho “Larha.” w21.09 buk. 20 cif. 1, 3

Mwami Manasé naye alahira oburhonde Yehova akagimuha kugerera abalebi bage. Buzinda, “Nyamubâho anaciyisha abarhumîre abarhambo n’engabo y’abalwi ba mwami w’e Siriya, bagwarha Manasé n’ebyuma by’amino-mino n’erhi babà bamamushweka na ba caburhinda babirhi b’ecuma c’omulinga bamuhêka e Babiloni.” Bibonekine oku, erhi Manase ali omu mpamikwa omu cindi cihugo, arhanya bwenene. “Acirhohereza embere za Nyamubâho Nyamuzinda wa b’ishe.” Ciru na kandi ajira binji kulusha oko. “Arhondera okushenga Nyamubâho [olukogo].” Na ntyo, Manasé agendekera “amushenga.” (2 Nga. 33:10-12) Erhi hagera kasanzi, Yehova ashuza oku masala ga Manasé. Abona empindûlo omu murhima g’oyo mulume nk’oku amasala gage ganaliyerekine. Yehova ahumwa oku murhima n’amasala g’emirenge ga Manasé na ntyo acibimuyimika omu bwami bwage. Manasé ajira okwage koshi ly’ayerekana kunganaci aciyunjuzize. w21.10 buk. 4 cif. 10-11

Akila na Priska barhenga ahantu balikola bakomire, bacibiyubaka enyumpa buhyahya n’okucibirhondeza buhyahya omukolo gwabo gw’okusuka amahema. Omu nyumpa yabo mpyahya e Korinti, Akila na Priska barhondera okurhabala ecigamba c’eyo munda n’okukola haguma na Paolo lyo bazibuhya bene wabo b’eyo munda. Enyuma z’aho, bahamira omu zindi vile z’eyo munda zalimw’obulagirire bunji bw’abahubiri. (Ebj. 18:18-21; Rm. 16:3-5) Akalamo bal’ilamire kali kinja bwenene banagwerhe omwishingo! Ene nalyo omulume n’omukazi barhôline banayiga olwiganyo lwa Akila na Priska omu kuhira Obwami bwa Nnâmahanga oku nafasi ntanzi omu kalamo kabo. Amango omulume n’omukazi bacir’ibashebana go mango minja bakaganirira lugenda emihigo y’omu kalamo kabo. Erhi abarhôline bahiga okurhôla emihigo y’ekiroho haguma n’okuyihikiriza, banabone kunganaci iroho lya Yehova liri lyabarhabala omu njira nyinji.​—Muh. 4:12. w21.11 buk. 17 cif. 11-12

Kobinali, rhukwanine rhumanyirire omu murhima gwirhu obulongozi bwa Yehova lugenda okukakenga ababusi birhu. Obikirire omu bwenge oku obulongozi buli omu lwandiko lwa Bene-Levi 19:3, buyerekire okukenga sho na nyoko, buyishire enyuma z’oluderho ludesire ntya: “Mushinganine mube batagatifu, bulya niono, Yehova Nnâmahanga winyu, mba mutagatifu.” (Lev. 19:2, NWT) Kushimbana n’er’ihano Yehova arhuhire ly’okukenga ababusi birhu, rhwanacidosagya rhwenene ntya: ‘Ka nankenge ababusi bani?’ Wanahiga okujira empindûlo erhi wakarhanya oku omu mango gageraga walishinganine obakenge kulusha. Orhakashanja ebyagezire, cikone muli gano mango wanahiga okukageza akasanzi haguma n’ababusi bawe n’okubarhabala kulusha. Nkabaga wanajira okwawe koshi ly’okageza kasanzi kanji haguma nabo. Erhi, ka wanabaha burhabale bunji b’omubiri, bw’ekiroho, erhi bw’ekandalala? Okujira ntyo kulinganine n’ebi olwandiko lwa Bene-Levi 19:3 ludesire. w21.12 buk. 4-5 cif. 10-12

Mwami Daudi, mulume wajiraga ebyaha bizibu. Kwa lwiganyo, ajira obugonyi haguma na Batisheba, ciru ayirhisa n’iba. (2 Sam. 11:2-4, 14, 15, 24) Arhali Daudi yene oko kwadwirhire amazibu, cikone kwagalerhera n’abandi bakage. (2 Sam. 12:10, 11) Omu gandi mango, Daudi abula kulangalira Yehova erhi aganja omubalè gw’abasoda b’omu Israheli. Bici oko kwalesire? Hofi ba Israheli 70 000 bafâ n’ecahira! (2 Sam. 24:1-4, 10-15) Ka wali watwira mwami Daudi olubanja oku arhashinganini obwonjo bwa Yehova? Arhali ntyo ko Yehova ajijire. Asegeza obwenge bwage oku bwishwekerezi bwa Daudi boshi n’oku kuciyunjuza kw’okurhenga oku murhima aciyunjuzagya. N’oko kwarhuma Yehova ababalira Daudi ebyo byaha bizibu ajiraga. Yehova alimanyire oku Daudi alimuzigire bwenene ananalilonzize ajire ebintu binja. K’orhavuziri omunkwa okubona Nnâmahanga wirhu anasegeze obwenge oku bintu binja birhuli omu murhima?​—1 Bam. 9:4; 1 Nga. 29:10, 17. w21.12 buk. 19 cif. 11-13

Yezu akagiyerekana obwonjo kuli bala bagwerhe obulema b’omubiri. Okengere eraporo arhumiraga Yowane Mubatiza: “Emihurha ekola eri yabona, n’ebirema bikola biri byalambagira, n’abashomyo bali bafuma, n’ebirhumva [bihuli] bikola biri byayumva, n’abafîre bali bafûka.” Enyuma z’okubona ebisomerine bya Yezu, “abantu boshi . . . barhondera bakuza Nnâmahanga.” (Lk. 7:20-22, Mashi Bible) Abakristu banashagaluke bwenene okuyiga olwiganyo lwa Yezu lw’okuba n’entanya z’okuyumviza obwonjo bala bajira bulema bulebe b’omubiri. Co cirhuma rhujirira abantu ba ntyo aminja, rhunabashibirire, rhunanabalembere. Yehova arharhuhaga obuhashe bw’okujira ebisomerine. Ciru akaba ntyo, rhugwerhe olukengwa lw’okuganirira abantu bagwerhe obulema b’omubiri erhi bwa kiroho, omwanzi mwinja guyerekire eparadizo yayishijira abantu boshi babe n’amagala mimana n’okuba n’obwîra bwinja haguma na Yehova. (Lk. 4:18) Ogo mwanzi mwinja guli gwarhuma abantu baha Nnâmahanga obukuze. w21.12 buk. 9 cif. 5

Yakobo akagilangalira obuhashe bw’Amandiko. Akolesize Akanwa ka Nnâmahanga ly’arhabala abumvirhiza bage babone oku ngasi mango Yehova anakahemba bala bali bishwekerezi kuli Ye aka Ayubu. Yakobo ayigirizize ogo mwanzi omu kukolesa enderho nembu zinayumvikine. Muli eyo njira ashumya abumvirhiza bage basegeze obwenge bwabo kuli Yehova, ci arhali kuli yenene. Isomo lici rhukuzire aho: Ojire omwanzi gwawe gube mulembu, onayigirize Akanwa ka Nnâmahanga. Omuhigo gwirhu gurhashinganini gube gwakuyereka abandi bintu binganaci rhumanyire, cikone guba gwakubayereka binganaci Yehova aba amanyire na kunganaci abashibirira. (Rm. 11:33) Rhwanahikira ogo muhigo omu kujira Amandiko gube g’omusingi gw’ebi rhuli rhwaderha. Kwa lwiganyo, ahali h’okubwira abanafunzi birhu b’Ebibliya ebi rhwakajijire oku nafasi yabo, rhwanalonza okubarhabala barhanye oku nyiganyo ziri omu Bibliya n’okuhugûkwa entanya za Yehova n’oku aciyumva. Na buzinda irala ly’okushagalula Yehova lyanabashumya bamukolere, ci arhali lyo barhushagalula. w22.01 buk. 11 cif. 9-10

Nnâmahanga arhuhûnyire rhujirire abalungu birhu bintu binji ahanyuma n’okuyaka okubajirira amabi. Omukristu ashinganine azigire omulungu nk’oku acizigira yene erhi akaba alonzize okushagalusa Nnâmahanga. Olole gurhi Yezu asegize obulagirire bw’okurhumikira irhegeko liri omu lwandiko lwa Bene-Levi 19:18. Mufarizeyi muguma adosa Yezu ntya: “Irhegeko lihi liri likulu omu Marhegeko goshi?” Yezu amushuza erhi: ‘Irhegeko likulu na lirhanzi’ kuli kuzigira Yehova n’omurhima gwirhu goshi, obugumaguma bwirhu boshi, n’obukengere bwirhu boshi. Buzinda Yezu agalukira enderho ziri omu lwandiko lwa Bene-Levi 19:18, aderha ntya: “Erya kabiri nalyo lishushine n’eryo: Okâzigira owinyu nk’oku ocizigira wenene.” (Mt. 22:35-40) Hali njira nyinji rhwakayerekamwo abalungu birhu obuzigire. Njira nguma rhwakayerekanamwo oku rhuzigire abalungu birhu kuli kukolesa ihano liri omu lwandiko lwa Bene-Levi 19:18. Lidesire ntya: “Orhahîra okucîhôla nisi erhi okabîkira abantu b’omu lubaga lwinyu akarhinda.” w21.12 buk. 10-11 cif. 11-13

Yezu alambûla okuboko amugwarha ayokola entumwa Petro. Biyumvikine oku Petro agwerhe obuhashe bw’okulambagira oku mishi galimo omulaba erhi akagendekire asezako Yezu amasu. Cikone erhi Petro asegeza amasu gage oku mulaba ayoboha anaba n’akarhinda; arhondera okuzika. (Mt. 14:24-31) Rhwanaciyigiriza kugerera olwiganyo lwa Petro. Erhi Petro arhenga omu bwarho n’okuja omu nyanja, arhalilangalire oku ayishibula kuba masu na buzinda arhondere azika. Alilonzize agendekere alambagira enyanya z’amishi kuhika ahikeko Nnawabo. Cikone ayabirwa okuhikiriza ogo muhigo gwage. Kobinali, rhurhakalambagira oku mishi, cikone rhuli rhwalwisa amarhangulo g’obuyemere. Erhi rhwakaleka okulangalira Yehova n’ebiragane byage, rhwanarhondera okuzika kiroho. Ciru rhwakahikirwa na mulaba guhi gw’olwiganyo omu kalamo kirhu, rhushinganine rhusegeze obwenge bwirhu kuli Yehova n’obuhashe bwage bw’okurhurhabala. w21.12 buk. 17-18 cif. 6-7

Isala, okuyiga, n’okurhanya biba bigabi by’enterekêro yirhu. Erhi rhusalira, rhunaganize Larha wirhu w’omu mpingu, orhuzigira bwenene. Erhi rhuyiga Ebibliya, rhunarhôle, “obumanye kuli Nnâmahanga,” oba Mwenge kulusha boshi. (Mig. 2:1-5, NWT) Erhi rhurhanya, rhunabone oborhere bwa Yehova n’omuhigo gwage lugenda obulemi bwage n’ebi alonzize rhujire. Ka wanarhanya njira ehi wakakakolesamwo akasanzi kawe bwinja? Cikone gurhi wakayunguka n’akasanzi kasungunu rhugwerhe? Nka byakashikana wanalonza ahantu hali akahwenyenye. Rhuganirire olwiganyo lwa Yezu. Embere Yezu arhondere omukolo gwage gwa hanw’igulu, ajira nsiku 40 ali omw’irungu. (Lk. 4:1, 2) Muli aho hantu h’akahwenyenye, Yezu akahashir’ishenga Yehova n’okurhanya kw’ebi Ishe al’ilonzize ajire. Buzira karhinda, okujira ntyo kwamurheganyize oku marhangulo gali hofi gamuhikire. w22.01 buk. 27-28 cif. 7-8

Omugula, erhi wundi mwene wirhu okuzire kiroho nkaba anarhubwira akantu rhushinganine rhukubûle. Erhi muntu mulebe orhuzigira akahiga oku arhuha ihano liyimangire oku Bibliya, rhushinganine rhulikolese. Kobinali ihano lya ho n’aho lyo liba lizibu okuyemera. Ciru nkaba hali amango lyakarhugayisa. Bulya gurhi? Ciru akaba rhuba rhuyemire oku rhurhaba bimana, hali amango rhwakabona oku kuli kuzibu okuyemera ihano amango omuntu oli warhuhanûla ali asegeza obuzamba bwirhu. (Muh. 7:9) Nkaba rhwanarhonderha rhwacihalira. Nkaba rhwanaba n’akarhinda okubiyerekire ebyashumagya oyo muntu ly’ayish’irhuhanûla. Erhi rhurhondere rhwabona amagosa omu njira akolesagya ly’arhuhanûla, hali amango rhwakarhondera rhwaderha kubi oyo muntu warhuhanûlaga omu kurhanya ntya: ‘Ka kobinali ashinganine okuyishimpanûla? Naye ajira obwage buzamba!’ N’erhi akaba rhurhasimiri er’ihano rhwanalilahira, erhi rhulonze owundi muntu wakarhuhanûla bulya rhulangalire oku ye waderha ebintu rhulonzize okuyumva. w22.02 buk. 8-9 cif. 2-4

K’akalamo k’omw’igulu lihyahya kayish’iba na mazibu maguma na maguma gayish’ihira omu marhangulo okulangalira kwirhu enjira ya Yehova y’okujira ebintu? Kwa lwiganyo, olole ebyabire hisanzi hisungunu enyuma z’aba Israheli okurhenga omu bujà e Misri. Baguma na baguma ba muli bo, barhondera okuciduduma enyanya z’okubula birya biryo bakag’ishagalukira e Misri, banarhondera okugayaguza amana Yehova akag’ibaha. (Mib. 11:4-6; 21:5) Ka byanahashikane nirhu rhuyish’iba n’entanya za ntyo enyuma z’okuhwa kw’amalibuko madârhi? Rhurhamanyiri mikolo minganaci rhwayish’ijira lyo rhukubûla ebyasherezibwe n’okujira igulu libe paradizo. Nkaba hayish’iba binji bya kujira, hayish’iba n’amazibu oku murhondero. Ka rhwayish’ikaciduduma okubiyerekire ebi Yehova ayish’ikarhuha mw’ako kasanzi? Rhuhugûkwe aka kantu: okurhwagendekera rhwashagalukira ebi Yehova ali arhuha ene, ko rhwananabishagalukire muli ago mango. w22.02 buk. 7 cif. 18-19

Omu bulêbi bwa Zakariya 8:23, enderho “Omuyahudi” na “ninyu” ziganirire cikundi ciguma, k’okuderha, abashîge amavurha basigîre. (Rm. 2:28, 29) “Bantu ikumi b’amashanja ga ngasi lulimi” bashushanyize ebindi bibuzi. “Bagwarhira Omuyahudi oku,” k’okuderha, banabêre bishwekerezi oku bashîge amavurha, omu kucilunga haguma nabo omu nterekêro ecîre. Muli eyo njira yo n’eyo, omu kuhikirizibwa kw’obulebi bwa Ezekiyeli 37:15-19, 24, 25, Yehova alunzire abashîge amavurha n’abantu b’ebindi bibuzi omu cinyabuguma cirhankahwa. Obo bulebi buganirire rhurhi rhubirhi. Abagwerhe obulangalire bw’okuja empingu bali nka karhi “ka Yuda” (bûko abami b’e Israheli bakagirhengamwo), n’abagwerhe obulangalire bw’okulama hanw’igulu bali nka karhi “ka Efrayimu.” Yehova akalunzire ebyo bikundi bibirhi na buzinda byanaba “karhi kaguma.” Oko kuli kuderha oku bakakozire omu cinyabuguma idako z’obulongozi b’Omwami wabo muguma, Yezu Kristu.​—Yn. 10:16. w22.01 buk. 22 cif. 9-10

Yezu aganirire abakag’iha abakenyi oburhabale cikone bakajira okwabo koshi lyo baciyerekana oku babuhânyire. Ciru akaba bakag’ijira ebyo bijiro binja byoshi, Yehova arhakag’ibishagalukira. (Mt. 6: 2-4) Okujira akantu kinja buzira kulonza obunguke bwirhu rhwenene yone njira rhwakayerekanamwo obwinja bw’okunali. Co cirhumire wanacidosa ntya: ‘Ka namanye kone oku kantu kalebe kali kinja erhi nancihangane n’okukajira? Bici binshumya njire ebintu binja?’ Yehova aba Nnâmahanga wa bijiro, n’iroho lyage kukola likola. (Murh. 1:2) Co cirhumire, ngasi cigabi c’ilehe ly’iroho litagatifu cijira obuhashe bw’okurhushumya rhujire bijiro bilebe cinashinganine cirhushumye. Kwa lwiganyo, entumwa Yakobo yayandika ntya: “Obuyemere burhagwerhi bijiro buba cifu.” (Yk. 2:26) Ntyo kobinali okubiyerekire ebindi bigabi byoshi by’ilehe ly’iroho litagatifu lya Nnâmahanga. Ngasi mango erhi rhubiyerekana, rhunayerekane oku er’iroho liri lyakola kuli rhwe. w22.03 buk. 11-12 cif. 14-16

Ciru ankaba rhwanacihâna omu mikolo minja y’ekiroho ya ngasi lubero, hali akandi kantu k’obulagirire entumwa Petro asegize. Embere arhuhe omurhima oku rhushinganine rhube batagatifu, Petro acibir’irhubwira ntya: “Musêze obwenge bwinyu oku mukolo.” (1 Pt. 1:13, NWT) Bici ogo mukolo guhiziremo? Petro adesire oku bene wabo Kristu bashîge amavurha, Nnâmahanga acishozirebo mpu lyo ‘balumîza omwanzi gw’emikolo minja ya Nnâmahanga wabahamagalaga.’ (1 Pt. 2:9, Mashi Bible) Abakristu boshi bagwerhe olukengwa lw’okujira oku mukolo g’obulagirire bwenene, gurhabala abantu kulusha eyindi mikolo yoshi. Rhugwerhe olukengwa lwago-lwago rhwe nka bakozi batagatifu ba Nnâmahanga l’okujira omukolo g’okuhubiri n’okuyigiriza abandi omwanzi mwinja n’obushiru! (Mk. 13:10) Erhi rhujira okwirhu koshi lyo rhujira ntyo, rhunayerekane n’obwalagale oku rhuzigire Nnâmahanga n’omulungu wirhu. Na kandi rhunayerekane oku rhulonzize ‘rhube batagatifu’ omu lugendo lwirhu loshi. w21.12 buk. 13 cif. 18

Entumwa Paolo agendekire aba n’entanya nyinja okubiyerekire bene wabo na bali babo. Arhabonaga oku bali bantu babi. Al’izigire bene wabo na bali babo anakag’isegeza obwenge bwage oku morhere gabo minja. Bakag’ijira okwabo koshi lyo bajira ebintu binja, arhagwerhe akarhinda okubiyerekire ebyakag’ibashumya anabona oku balagirire oku burhabale. Rhulole gurhi Paolo ajirire bali babo babirhi b’omu cigamba c’e Filipi. (Fl. 4:1-3) Bibonekine oku Evodiya na Sintiki bali bamaleka okurhayumvikana kulerhe akashababe egarhi kabo. Paolo arhabakalihiraga erhi kubaderha-derha kubi, cikone asegeza obwenge bwage oku morhere gabo minja. Abo bakazi bali bamajira myaka minji bali bakolera Yehova n’obwishwekerezi. Paolo al’imanyire oku Yehova al’ibazigire. Entanya nyinja Paolo agwerhe okubiyerekire abo bakazi zamushumya abahanûle bayuse oko kurhayumvikana kwali egarhi kabo. Na kandi, ezo ntanya za Paolo zamurhabala agendekera aba n’omwishingo, anagendekera aba n’obwîra busêzire haguma na bene wabo na bali babo ba mw’eco cigamba c’e Filipi. w22.03 buk. 30 cif. 16-18

Omurhula Yehova arhuha gunarhume omurhima gwirhu gwadekerera n’okujira entanya zirhu zirhuze. Olole gurhi mwali wirhu ohamagalwa Luz acibwinire oku oko kuli kw’okuli. Adesire ntya: “Nankaciyumva kubi enyanya z’entanya z’okuba kahumba. Hali amango ezo ntanya zirhuma narhanya oku Yehova arhansima. Cikone erhi oko kumpikira ho n’aho nambwire Yehova gurhi ndi naciyumva. Isala linantabale nciyumve bwinja.” Nk’oku oyo mwali wirhu acibwinire, isala lyanarhurhabala rhube n’omurhula. (Fl. 4:6, 7) Rhumanyire oku Yehova na Yezu banarhurhabala amango rhwamafîrwa n’omuzigirwa wirhu. Obwonjo bunarhushumye rhuhubiri n’okuyigiriza bulya Yehova na Yezu bajira obo borhere bwinja. Na kandi rhurhulirizibwe n’okumanya oku Yehova n’Omugala muzigirwa banarhuyumvize obwonjo enyanya z’obuzamba bwirhu, bananalonze okurhurhabala lyo rhulembera. Rhuli rhwalinga olusiku Yehova “ahôrhola ngasi mulenge [gurhuli] omu masu”!​—Maf. 21:4. w22.01 buk. 16 cif. 7; buk. 19 cif. 19-20

Yezu aganirire mihango ibirhi ehêsire hantu habirhi hali lubero, hali enjira ‘ngali’ n’enjira ‘nfunda.’ (Mt. 7:14) Harhali njira ya kasharhu. Rhwene rhushinganine rhucishoge omuhango rhwageramo. Ogo go muhigo gw’obulagirire rhushinganine rhurhôle omu kalamo: okuba n’obuzine bw’ensiku n’amango kushimbine n’omuhango rhwacishozire. Enjira ‘ngali’ eri yageramwo bantu banji bulya eba ndembu okugeramwo. Eby’okugayisa kuli kubona oku bantu banji banacishoge okugeramw’eyo njira n’okukulikira ebiri byajirwa n’abal’ibageramwo. Banayabirwe okumanya oku Shetani Ibilisi yewarhondezagya eyo njira, na kandi barhaba bahugûsirwe oku eyo njira eba ehêsire ebwa bushereze bw’ensiku n’amango. (1 Kr. 6:9, 10; 1 Yn. 5:19) Lubero n’enjira ‘ngali,’ eyindi njira yohe eba ‘nfunda,’ na Yezu adesire oku bantu basungunu bo bayibona. Bulya gurhi? Bishagalusize okubona oku omu mulongo gukulikire aho, Yezu ahaniza abanafunzi bage lugenda abalebi b’obunywesi.​—Mt. 7:15. w21.12 buk. 22-23 cif. 3-5