Mwezi gwa 10

Ka hali amango obona oku kuli kuzibu kuli we okurhumikira? Mwami Daudi abwine ntyo, n’oko kwarhuma ashenga Nnâmahanga ntya: “Oshumye muli nie obubidu bw’okurhumikira.” (Enna. 51:12, NWT) Daudi al’izigire Yehova. Ciru akaba ntyo, hali amango kwali kuzibu kuli ye okurhumikira, na nirhu ko n’oko. Bulya gurhi? Burhangiriza, rhwayimire oborhere bw’okulonza okurharhumikira. Bwa kabirhi, Shetani anarhushumye burhahusa lyo rhugomera Yehova, akage. (2 Kr. 11:3) Bwa kasharhu, rhuzungulusirwe n’iroho ly’obugoma ly’er’igulu ko kuderha, “omurhima [iroho] guli gwakola buno omu bantu barharhumikira Nnâmahanga.” (Ef. 2:2, Mashi Bible) Rhugwasirwe rhujire okwirhu koshi lyo rhulwisa oborhere bw’okulonza okujira ecaha na kandi lyo rhuhagalika enshumi z’okurharhumikira za Ibilisi n’igulu lyage. Rhugwasirwe rhucihangane bwenene lyo rhukarhumikira Yehova n’abantu ahîre bukulu bulebe. w23.10 buk. 6 cif. 1

Bici rhwakaciyigiriza kugerera ecisomerine ca Yezu c’okuhindula amishi lyaba idivayi? Eco cisomerine cirhuyigirizize isomo ly’obwirhohye. Yezu arhacikungiraga eco cisomerine; kobinali, nta lusiku acikungire ebi akag’ihikiriza. Lubero n’oko, akag’icirhohya n’okuha Ishe irenge n’obukuze ngasi mango. (Yn. 5:19, 30; 8:28) Erhi rhwakayiga olwiganyo lwa Yezu lw’okucirhohya, rhurhakacikungira ebi rhwahikirizize. Lekagi rhukacikungira Nnâmahanga wirhu mwinja orhuhîre olukengwa lw’okumukolera ahali h’okucikungira ebi rhwahikirizize. (Yer. 9:23, 24) Leki rhukamuha obukuze ashinganine. Kobinali, buzira burhabale bwa Yehova nta kantu koshi-koshi kinja rhwakahash’ihikiriza. (1 Kr. 1:26-31) Erhi akaba rhuli birhohye, rhurhakacikungira ebintu binja rhwajirire abandi. Rhunarhimukwe bulya rhumanyire oku Yehova ali abona ebi rhwajijire anabishagalukire. (Oshushanye na Mateyo 6:2-4; Hb. 13:16) Buzira karhinda, Yehova anashagaluke erhi rhuyiga olwiganyo lwa Yezu omu kuba birhohye.​—1 Pt. 5:6. w23.04 buk. 4 cif. 9; buk. 5 cif. 11-12

Omu kulongozibwa n’iroho litagatifu, entumwa Paolo yahîre Abakristu omurhima oku bakashokoza obunguke bw’abandi. Gurhi rhwakakolesamwo er’ihano omu mango rhuli omu ntimanano? Omu kukengera oku abandi nabo balonzize okuhâna amashuzo akirhu. Lugenda oko, orhanye ntya: Amango oli waganira n’abîra bawe, k’onalonze okuganira bwenene kuhika bohe babule obulyo bw’okuderha? Nanga ciru n’ehitya! Onalonze nabo bashangire oku nshambalo. Ko n’oko, oku ntimanano, rhunalonze rhulekere bantu banji nk’oku bihashikine obulyo bw’okuhâna amashuzo. Kobinali, njira nguma y’omu njira nyinja bwenene rhuhamwo bene wirhu na bali birhu omurhima, kuli kubaha obulyo bw’okuganirira obuyemere bwabo. (1 Kr. 10:24) Co cirhumire, rhukajira amashuzo girhu gabe mofofi, na muli ntyo rhwanalekera abandi banji akasanzi k’okuhâna amashuzo. Ciru n’amango wahâna ishuzo lyofofi, okayaka okuganirira bintu binji bwenene. Erhi wakaganirira entanya zoshi ziri omu cifungo, ntabyo abandi bakaciderha. w23.04 buk. 22-23 cif. 11-13

Rhugwasirwe rhukengere oku kuli kwa bulagirire bwenene rhugendekere rhwarhabala abandi, bwenene kugerera omukolo gwirhu gw’amahubiri. Omu mukolo gwirhu gw’amahubiri, rhushinganine rhukacipatanisa n’ehali. Abantu rhurhimanana nabo baba bagwerhe obwemere buli lubero n’entanya ziri lubero, banaba barhenzire ahantu hali lubero. Entumwa Paolo yakag’icipatanisa n’ehali, na nirhu rhwanayiga binji kugerera olwiganyo lwage. Yezu ajijire Paolo “ntumwa y’abarhali Bayahudi.” (Rm. 11:13, Mashi Bible) Mw’ogo mukolo gwage, Paolo akag’ihubiri Abayahudi, Abagiriki, abasomire bwenene, abantu barhalengeriri, abarhambo, n’abami. Ly’ahuma oku mirhima y’abo bantu bali lubero, Paolo acijijire ‘byoshi kuli boshi.’ (1 Kr. 9:19-22) Akag’irhanya oku bûko bw’abumvirhiza bage, aha bakuliraga, n’obwemere bwabo n’oko kwamurhabala ly’akamanya enjira akolesa ly’ahubiri ngasi muntu. Na nirhu rhwanaba n’amalehe minja omu mukolo gwirhu gw’amahubiri erhi rhwakakacipatanisa n’ehali n’okurhanya lugenda enjira nyinja rhwakahubirimwo ngasi muntu. w23.07 buk. 23 cif. 11-12

Obutûdu eba misi, ci burhaba buzamba. Biba bihûnyire okuba n’emisi y’ekandalala ly’omuntu agendekera arhulirira erhi akarhimanana n’akanga kazibu. Obutûdu ciba “cigabi c’ilehe ly’iroho litagatifu.” (Gl. 5:22, 23, NWT) Oluderho lw’Ecigiriki lwahindwirwe “butûdu” hali amango lwakolesibwe omu kuganirira enfarasi y’emuzirhu yakomerezibwe. Obone omu bwenge bwawe enfarasi y’emuzirhu ekola eri ntûdu. Ciru akaba ekola eri ntûdu, ecigwerhe emisi. Rhuli bene bantu, gurhi rhwakabamwo batûdu n’okugendekera rhwaba n’emisi? Rhurhakahash’ijira ntyo oku misi yirhu rhwenene. Rhushinganine rhukahûna Nnâmahanga iroho lyage litagatifu, n’okumuhûna arhurhabale lyo rhukayerekana obo borhere bwinja. Hali bantu banji baciyigirizize okuba batûdu. Bahamirizi banji bayerekine obutûdu erhi bali bahagalikwa n’abashombanyi birhu, n’oko kwarhuma abandi baba n’entanya nyinja okubirhuyerekire.​—2 Tm. 2:24, 25. w23.09 buk. 14 cif. 3

Omu cibonekerezi c’okusomeza bwenene, entumwa Yowane yabwîne bagula 24 bali baharamya Yehova omu mpingu. Bakuza Nnâmahanga banaderha oku ashinganine okuhâbwa “irenge, n’obukuze n’obuhashe.” (Maf. 4:10, 11) Bamalahika bishwekerezi nabo bajira birhumire binji by’okuha Yehova obukuze n’irenge. Baba omu mpingu haguma naye banahikire aha bamumanya bwinja. Banabone amorhere gage gabonekana mw’ebi ajira. Erhi babona ebi Yehova ajira, oko kunabashumye bamukuze. (Ayu. 38:4-7) Nirhu rhushinganine rhukakuza Yehova omu masala girhu. Rhwanajira ntyo omu kumubwira ebirhuma rhumuzigira na bulya gurhi rhumukenga. Amango oli wasoma n’okuyiga Ebibliya, okacihangana okubona amorhere Yehova ayerekine oshagalukire bwenene. (Ayu. 37:23; Rm. 11:33) Enyuma z’aho, obwire Yehova gurhi oli waciyumva lugenda ago morhere. Kandi rhwanakuza Yehova enyanya z’oburhabale arhuha n’oburhabale aha omulala gwirhu goshi gw’ekiroho.​—1 Sam. 2:1, 2. w23.05 buk. 3-4 cif. 6-7

Omu mwaka gwa 1919, Babiloni Mukulu aheza obuhashe agwerhe oku bantu ba Nnâmahanga. Mw’ogo mwaka, “mushizi mwirhonzi na mwikubagirwa” arhondera okujira omukolo ly’arhabala abantu b’omurhima mwinja barhondere okulambagira omu “njira ntagatifu.” (Mt. 24:45-47, NWT; Iz. 35:8) Na kugerera oburhabale bw’“abakozi b’omw’ibarabara” bishwekerezi b’embere, abalambagire mw’er’ibarabara bayushula obumanye bwabo lugenda emihigo ya Yehova. (Mig. 4:18) Kandi bajira empindulo omu kalamo kabo lyo balama kushimbana n’ebi Yehova ahûnyire. Yehova arhahûnaga abakozi bage bajire empindulo zal’ihûnyirwe zoshi caligumiza. Lubero n’oko, agendekera acêsa abantu bage bunyi-bunyi. Rhweshi rhwayish’ishagaluka bwenene amango rhwaba n’obuhashe bw’okushagalusa Yehova omu ngasi kantu rhuli rhwajira! Ngasi ibarabara liba lishinganine likashibirirwa ngasi mango lyo ligendekera lyaba linja. Kurhangira omu mwaka gwa 1919, omukolo gw’ibarabara omu “njira ntagatifu” gwagendekire gwajirwa, lyo bahashisa bantu banji okurhenga omu Babiloni Mukulu. w23.05 buk. 17 cif. 15; buk. 19 cif. 16

Embaraza Eri Yalongoza yo nnene eri yakomereza abarhabazi babo oku mikolo eri lubero y’ekomite z’Embaraza Eri Yalongoza. Kuhika ene abo barhabazi bali bahikiriza mikolo minji omw’ikubuliro. Bali barheganyizibwa bwinja okuyish’igendekeza omukolo gw’okushibirira ebibuzi bya Kristu. Hano Abakristu bashige amavurha bazinda bahêkwa empingu hofi nʼobuzinda bw’amalibuko madarhi, enterekêro ecîre yayish’igendekera bwinja hano igulu. Kugerera obulongozi bwa Yezu Kristu, abakozi ba Nnâmahanga barhakabulirwa na cici. Rhumanyire oku ago mango, omulungano gw’amashanja Ebibliya ehamagire Gogi w’Amagogi gwayish’iba guli gwarhera abakozi ba Nnâmahanga. (Eze. 38:18-20) Cikone eco cirhero ca kasanzi kasungunu cirhayish’ibêrwe; cirhakarhuma abakozi ba Nnâmahanga baleka okumuharamya. Buzira karhinda, ayish’ibayokola! Omu cibonekerezi, entumwa Yowane yabwine “ehitû hy’abantu” hy’ebindi bibuzi bya Kristu. Yowane abwirwa oku ehyo “hitû hy’abantu” hirhenzire omu “malibuko madârhi.” (Maf. 7:9, 14) Co cirhumire, rhumanyire buzira karhinda oku Yehova ayish’ibayokola! w24.02 buk. 5-6 cif. 13-14

Gurhi rhwakajira lyo rhuhâbwa iroho litagatifu? Rhushinganine rhukalihûna Nnâmahanga, rhukayiga Akanwa kage kalongozibagwa n’iroho n’okucilunga n’ikubuliro lyage lilongozibwa n’iroho. Okujira ntyo kwanarhurhabala lyo rhuyerekana “ilehe ly’iroho.” (Gl. 5:22, 23, NWT) Abagendekera baba n’entanya zicîre n’olugenzi lucîre bone Nnâmahanga aha iroho lyage litagatifu. Arhakagendekera arhuha iroho lyage litagatifu erhi rhwakagendekera rhwarhanya oku bintu bicafu. (1 Ts. 4:7, 8) Lyo rhugendekera rhwahâbwa iroho litagatifu, kandi rhurhashinganini ‘rhugayaguze obulebi.’ (1 Ts. 5:20) Oluderho “bulebi” mw’olu lwandiko luyerekine emyanzi Nnâmahanga arhuhîre kugerera iroho lyage litagatifu ehiziremwo emyanzi eyerekire olusiku lwa Yehova n’obulagirire bw’okujira duba-duba muli gano mango girhu. Rhurharhenza olo lusiku omu bwenge bwirhu omu kurhanya oku ivita lya Harmagedoni lirhayishe muli gano mango girhu. Lubero n’oko, rhunagendekere rhwabîka olo lusiku hofi-hofi omu bwenge bwirhu omu kugendekera rhwaba n’olugenzi lwinja ‘n’ebijiro biyerekine oku omuntu acishwekîre kuli Nnâmahanga.”​—2 Pt. 3:11, 12, Mashi Bible. w23.06 buk. 12 cif. 13-14

Rhuli Bakristu, gurhi rhushinganine rhujire erhi rhwakabona enfoto y’epornografi buzira kulaliza? Ho n’aho rhushinganine rhulole handi-handi. Kwanaba kulembu kuli rhwe okujira ntyo erhi rhwakakengera oku obwîra bwirhu haguma na Yehova ko kantu k’engulo ndarhi bwenene rhujira. Kobinali, ciru nfoto nguma na nguma zirhabonekini nka za pornografi zanazusa irala ly’okujira ecijiro c’eby’enshonyi. Bulya gurhi rhushinganine rhuziyake? Bulya rhurhaba rhulonzize rhujire ciru akantu kasungunu kakarhulongoza rhujire eby’enshonyi omu murhima gwirhu. (Mt. 5:28, 29) Mugula muguma w’omu Thailande ohamagalwa David adesire ntya: “Nancidose ntya: ‘Ciru akaba ezi nfoto zirhabonekini nka za pornografi, ka Yehova ashagaluka erhi nakagendekera nazilolako?’ Okurhanya ntyo kunantabale nkole n’obwenge.” Okuyoboha okujira akantu kakagayisa Yehova kunarhurhabale rhukole n’obwenge. Okuyoboha Nnâmahanga go ‘murhondêro,’ erhi musingi, “gw’obushinganyanya [gw’obwenge, NWT].” w23.06 buk. 23 cif. 12-13

Nkaba ebyo “byumpa by’endani” bishushanyize ebigamba birhu. Omu mango g’amalibuko madarhi, rhwayish’ipata obulanzi Yehova alaganyize omu kugendekera rhwaba n’ecinyabuguma haguma n’abirhu bemezi. Co cirhumire ene, rhugwasirwe rhucihangane bwenene, arhali lyo rhulembera bene wirhu na bali birhu kone cikone kandi lyo rhubazigira. Okujira ntyo kwanayish’irhuma rhwayokoka! “Olusiku ludârhi lw’obukunizi bwa Nyakasane [Yehova, NWT]” kayish’iba kasanzi kazibu bwenene kuli bene bantu boshi. (Sof. 1:14, 15) Abantu ba Yehova nabo bayish’ihikirwa n’amazibu. Cikone erhi rhwakacirheganya ene, rhwayish’ihasha okurhulirira n’okurhabala abandi. Rhwayish’ihasha okulembera ngasi mazibu gakarhuhikira. Hano bene wirhu na bali birhu baba bali balibuka, rhwayish’ijira okwirhu koshi lyo rhubarhabala omu kubayeresa obwonjo n’okubahikirigiza amalagirire gabo. N’erhi rhwakaciyigiriza okuzigira bene wirhu na bali birhu ene, rhwayish’ibayeresa obuzigire omu mango gayisha. Buzinda, Yehova ayish’irhuhemba omu kurhuha obuzine bw’ensiku n’amango omw’igulu obuhanya boshi n’amalibuko byayish’iyibagirwa.​—Iz. 65:17. w23.07 buk. 7 cif. 16-17

Akanwa ka Nnâmahanga kanaganirire kanji-kanji abalume bishwekerezi nka bantu ba misi. Cikone, ciru n’ow’emisi bwenene egarhi kabo arhali ensiku zoshi zo aciyumvirhe agwerhe emisi. Kwa lwiganyo, hali amango Mwami Daudi aciyumvirhe ‘azibuhire,’ cikone agandi mango aciyumva ‘ayobohire.’ (Enna. 30:7, Mashi Bible) Ciru akaba Samusoni al’igwerhe emisi yago-yago amango akag’ilongozibwa n’iroho lya Nnâmahanga, ayemire n’obwalagale oku buzira eyo misi kurhenga emwa Nnâmahanga, ‘akabire muzamba ayorhe nk’abandi bantu.’ (Bac. 14:5, 6; 16:17) Abo balume bishwekerezi bali ba misi bulya Yehova akag’ibaha yo. Paolo al’iyemire n’obwalagale oku naye al’ilagirire oku misi kurhenga emwa Yehova. (2 Kr. 12:9, 10) Akag’ilwisa amazibu g’endwala. (Gl. 4:13, 14) Kandi, hali amango kwali kuzibu kuli ye okujira ebintu binja. (Rm. 7:18, 19) Na kandi hali amango akag’iciyumva ayobohire lugenda ebyakamuhikire. (2 Kr. 1:8, 9) Ciru akaba ntyo, amango Paolo ali muzamba, go mango akag’iba agwerhe emisi. Omu njira nci? Yehova akag’imuha emisi al’ilagirireko. Akag’imuzibuhya. w23.10 buk. 12 cif. 1-2

Erhi akaba rhuli rhwalibuzibwa n’entanya z’okuciyumva oku rhurhali ba bulagirire, rhwanakengera oku Yehova ye warhukululaga emunda ali. (Yn. 6:44) Anabone aminja muli rhwe nkaba rhurhabona rhwenene ananabe amanyire omurhima gwirhu. (2 Nga. 6:30) Co cirhumire rhwanamulangalira amango adesire oku rhuli ba bulagirire omu masu gage. (1 Yn. 3:19, 20) Embere rhuyige okuli, banji muli rhwe bajijire ebintu birhumire bacigendekire baciyumva kubi. (1 Pt. 4:3) Abandi bamajira myaka minji bali bakolera Yehova n’obwishwekerezi banaba banacilwise buzamba bulebe. Gurhigi lugenda we? Ka hali amango ociyumva oku Yehova arhakakubabalira? Erhi akaba ntyo ko biri, wanarhulirizibwa omu kumanya oku hali abandi bakozi ba Yehova bishwekerezi baciyumvirhe ntyo. Kwa lwiganyo, entumwa Paolo yakag’iciyumva kubi erhi yakarhanyize oku buzamba yal’igwerhe. (Rm. 7:24) Kobinali, Paolo ali erhi aciyunjuzize ebyaha byage anabatizibwa. Cikone acikag’iciganirira oku ye “munyi omu ntumwa zoshi,” n’oku ye “wa burhanzi” omu banya-byaha.​—1 Kr. 15:9; 1 Tm. 1:15. w24.03 buk. 27 cif. 5-6

Isomo liguma rhwakaciyigiriza kugerera omuhigo mubi Mwami Yowasi arhôlaga liri ly’eli: Rhushinganine rhucishoge abîra babà lwiganyo lwinja kuli rhwe, ko kuderha abîra bazigira Yehova banalonza okumushagalusa. Rhurhashinganini rhucijirire abîra bagwerhe emyaka yirhu bone. Okengere oku Yowasi ali murho bwenene kulusha omwîra wage Yehoyada. Lugenda abîra ocishoga, okacidosa ntya: ‘Ka banantabale lyo nzibuhya obuyemere bwani muli Yehova? Ka banampe omurhima ndame kushimbana n’amakanuni ga Nnâmahanga? Ka banaganire lugenda Yehova n’enyigirizo zage z’obulagirire? Ka baba bakenzire amakanuni ga Nnâmahanga? Ka banambwire kone ebi ndonzize nyumve, erhi ka bajira oburhwali bw’okumpanula erhi nakahabuka?’ (Mig. 27:5, 6, 17) Kobinali, erhi akaba abîra bawe barhaba bazigire Yehova, orhakaba obalagirireko. Cikone erhi akaba ojira abîra baba bazigire Yehova, ocishwekere kuli bo, ensiku zoshi banakurhabala!​—Mig. 13:20. w23.09 buk. 9-10 cif. 6-7

Eherufi alfa yo eba erhondire olufabé lw’Ecigiriki, n’eherufi omega yo eba eluyusize. Omu kukolesa enderho “Alfa na Omega,” Yehova ayerekine n’obwalagale oku erhi akarhondera kantu kalebe, anakashibirire kuhika ebuzinda bwako. Enyuma z’okulema Adamu na Eva, ababwira erhi: ‘Muburhe, muyololoke, mubumbe igulu munalirhegeke.’ (Murh. 1:28) Erhi Yehova arhondeza omuhigo gwage, aba nk’odesire “Alfa.” Amango gakahisire, iburha limana na lya kurhumikira lya Adamu na Eva lyakabumbire igulu n’okulihindula libe paradizo. Hano ago mango gahika, Yehova ayish’iba nk’odesire “Omega.” Erhi Yehova ayusa okulema “amalunga [empingu] n’igulu n’ebibamwo byoshi,” aderha kantu kalebe kayerekine oku omuhigo gwage kobinali gwakahikirire. Yehova ayerekana oku arhakayabirwa okuhikiriza omuhigo gwage lugenda bene bantu n’igulu. Gwakahikirire loshi oku buzinda bw’olo lusiku lwa kali nda.​—Murh. 2:1-3. w23.11 buk. 5 cif. 13-14

Omubalamo mudarhi gw’okunali gw’okurhenga e Babiloni kuja e Israheli gwakajijire hofi myezi ini, cikone Yehova al’ilaganyize oku akarhenzizeho ngasi cihanzo coshi cakarhumire barhagaluka. Abayahudi bishwekerezi bal’imanyire oku emigisho bakabire nayo omu kugaluka e Israheli yali minji bwenene kulusha ngasi kantu bakaciyimire lyo bagaluka eyo munda. Omugisho munene bwenene kulusha eyindi yali nterekêro yabo. Nta hekalu ya Yehova ciru n’enguma yali omu Babiloni. Nta mazabahu galiho Abaisraheli bakahânyireko enterekêro zal’ihûnyirwe n’Irhegeko lya Musa, na nta cikundi cipanzirwe c’abakuhani caliho cakahânyire ezo nterekêro. Kandi, abantu ba Yehova bal’izungulusirwe n’abalume n’abakazi banji bapagani, barhakag’ikenga Yehova erhi amakanuni gage. Co cirhumire, ebihumbi by’Abayahudi bakag’ikenga Nnâmahanga bakag’icifinja okugaluka omu cihugo cabo lyo bagalula enterekêro ecîre. w23.05 buk. 14-15 cif. 3-4

Rhulagirire oku burhabale bw’iroho litagatifu lyo rhugendekera rhwaba n’olugenzi luli ‘nka lw’abana ba bumoleke.’ Bulya gurhi? Bulya kurhali kulembu okugendekera rhwabêra rhucîre mw’er’igulu ligwerhe olugenzi lubi. (1 Ts. 4:3-5, 7, 8) Iroho litagatifu lyanarhurhabala rhuhagalike entanya z’er’igulu, zihiziremo efilozofi, n’entanya z’abantu barhabona ebintu nk’oku Yehova abibona. Na kandi iroho litagatifu lyanarhurhabala rhujire “ngasi hiri hyinja, ngasi hishinganine.” (Ef. 5:9) Njira nguma rhwakapatamwo iroho litagatifu, kuli kulihûna Yehova kugerera isala. Yezu adesire oku Yehova “ahâna kulusha iroho litagatifu kuli balya balihûnyire.” (Lk. 11:13, NWT) Na kandi, rhunahâbwe iroho litagatifu erhi rhukuza Yehova haguma oku ntimanano z’Ecikristu. (Ef. 5:19, 20) Okubona iroho litagatifu lya Nnâmahanga linarhushumye omu njira nyinja, oko kunarhurhabale rhulame omu njira eshagalusize Nnâmahanga. w24.03 buk. 23-24 cif. 13-15

K’olagirire oku kulembera bwenene? Akaba ntyo, okashenga Yehova akurhabale obe wa kulembera bwenene. Obulembedu ciba cigabi c’ilehe ly’iroho litagatifu. (Gl. 5:22, 23) Co cirhumire rhwanashenga Yehova arhuhe iroho lyage litagatifu n’okumuhûna arhurhabale rhukayerekana ilehe ly’alyo. Erhi rhwakahikirwa n’akanga karhangwire obulembedu bwirhu, ‘rhugendekere rhwahûna’ iroho litagatifu lyo lirhurhabala rhulembere. (Lk. 11:13) Kandi rhwanahûna Yehova arhurhabale lyo rhubona ebintu nk’oku ali abibona. Buzinda enyuma z’okusalira, rhushinganine rhujire okwirhu koshi lyo rhuba ba kulembera ngasi lusiku. Oku rhugendekera rhwashenga Yehova oborhere bw’okulembera n’okujira okwirhu koshi lyo rhuba ba kulembera, ko n’obo borhere bugendekera bwashinga emizi omu murhima gwirhu n’okuba cigabi c’obumuntu bwirhu. Kandi bunarhurhabale lyo rhurhanya bwenene oku nyiganyo ziri omu Bibliya. Ebibliya ebamwo nyiganyo nyinji z’abantu bali ba kulembera. Omu kurhanya bwenene kw’ezo nyiganyo, rhwanaciyigiriza enjira rhwakayerekanamwo obulembedu. w23.08 buk. 22-23 cif. 10-11

Yezu ayemezize entumwa Petro n’obwalagale oku Yehova amurhabala. Erhi Yezu afûka acibir’irhabala Petro n’ezindi ntumwa bagwarha ensamaki omu yindi njira y’ecisomerine. (Yn. 21:4-6) Kobinali eco cisomerine cayemezize Petro n’obwalagale oku kwakabire kulembu kuli Yehova okushibirira amalagirire gage g’omubiri. Nkaba buzinda eyo ntumwa yakengire enderho za Yezu ziyerekine oku Yehova akashibirire amalagirire ga balya ‘barhang’ilonza Obwami.’ (Mt. 6:33, Mashi Bible) Muli ntyo, ahali h’okuhira omukolo gw’okuduba ensamaki oku nafasi ntanzi, Petro ahira omukolo gw’amahubiri oku nafasi ntanzi omu kalamo kage. Ahânyire obuhamirizi n’oburhwali oku lusiku lwa Pentekoste y’omwaka gwa 33 Kano Kasanzi Kirhu (K.K.K.), anarhabala ebihumbi by’abantu bayemera omwanzi mwinja. (Ebj. 2:14, 37-41) Enyuma z’aho, arhabala Abasamariya n’abantu b’agandi mashanja lyo bayemera Kristu. (Ebj. 8:14-17; 10:44-48) Kobinali Yehova akolesize Petro omu njira y’obuhashe ly’alerha abantu ba ngasi lubero omu cigamba. w23.09 buk. 20 cif. 1; buk. 23 cif. 11

Hofi myaka ibirhi enyuma z’Abababiloni okushereza evile y’e Yeruzalemu, Mwami Nebukadnezari w’e Babiloni alorha ecilorho c’okuyobohya lugenda ensalamu nnenene. Ayobohya abalume bage b’obwenge boshi, kuhiramwo na Daniyeli, oku abaniga erhi akaba barhamubwiziri ecilorho cage n’amahugûlo gaco. (Dan. 2:3-5) Daniyeli al’igwasirwe ajire kantu kalebe duba-duba; lubero n’oko, bantu banji bakahezize obuzine. Daniyeli “akanya aja emunda mwami ali amuhûna mpu amuhe akasanzi lyo ahashihugulira mwami ecilôrho cage.” (Dan. 2:16) Oko kwal’ihûnyire oburhwali n’obuyemere. Nta mwanzi gw’Ebibliya guyerekine oku Daniyeli ali amahugûla ebilôrho embere z’aho. Abwira abîra bage “bahune obonjo bwa Nyamuzinda w’empingu amanyise elyo ihwe.” (Dan. 2:18) Yehova ashuza ago masala. Kugerera oburhabale bwage, Daniyeli ahugûla ecilorho ca Nebukadnezari. Daniyeli n’abîra bage barhacihezagya obuzine bwabo. w23.08 buk. 2 cif. 4

Okarhanya oku bunguke bw’okuba wa kulembera. Amango rhuli ba kulembera, rhunabe na mwishingo munji rhunanarhulirire bwenene. Muli ntyo, oborhere bw’okulembera bwanayinjihya amagala girhu g’omubiri nag’obukengere. Amango rhuli rhwalembera abandi, rhunashagalukire okuba n’olushangi lwinja haguma nabo. Oko kwanarhuma ecigamba cirhu caba n’ecinyabuguma bwenene. Erhi muntu mulebe akarhugayisa, okurhakunira duba kwirhu kwanarhuma ako kanga karhaba kabi bwenene. (Enna. 37:8; Mig. 14:29) N’akantu kinja kulusha byoshi, rhunayige olwiganyo lwa Larha wirhu w’omu mpingu rhunanamuyegere ciru bwenene. Kobinali, obulembedu buba borhere bwinja bwenene burhulerhera rhweshi obunguke! Ciru akaba ensiku zoshi kurhakaba kulembu kuli rhwe okulembera, kugerera oburhabale bwa Yehova rhwanagendekera rhwaba n’obo borhere. Amango rhuli rhwalingûza igulu lihyahya, rhwanayemera n’obwalagale oku “isu lya Yehova linalange abamuyoboha, balya balinda obuzigire bwage bwishwekerezi.” (Enna. 33:18, NWT) Lekagi rhweshi rhuhige okugendekera rhwacihundikira okulembera. w23.08 buk. 22 cif. 7; buk. 25 cif. 16-17

Yakobo ayerekana oku omuntu anaderha oku agwerhe obuyemere, cikone k’ebijiro byage biyerekine oku abugwerhe? (Yk. 2:1-5, 9) Na kandi Yakobo aganirira muntu muguma wabonaga ‘mwene wabo erhi mwali wabo abuzire eci ayambala erhi eci ashêga’ cikone arhamuhaga oburhabale. Ciru akaba omuntu wa ntyo akadesire oku agwerhe obuyemere, obuyemere bwage burhal’iyimangire oku bijiro; na muli ntyo, bwali bwa busha. (Yk. 2:14-16) Yakobo ayerekine oku Rahabu luli lwiganyo lw’omuntu wayerekanaga obuyemere bwage kugerera ebijiro. (Yk 2:25, 26) Ali erhi ayumvirhe lugenda Yehova anal’iyemire oku Yehova akag’irhabala Abaisraheli. (Yoz. 2:9-11) Ayerekana obuyemere bwage kugerera ebijiro omu kulanga Baisraheli babirhi b’endolerezi amango akalamo kabo kali omu mazibu. Enyanya z’oko, oyo mukazi orhali mwimana, orhanali Muisraheli, ahamagalwa mushinganyanya, nk’oku Abrahamu naye ahamagalagwa mushinganyanya. Olwiganyo lwage lusegize oku kuli kwa bulagirire bwenene rhuyerekane obuyemere bwirhu kugerera ebijiro. w23.12 buk. 5-6 cif. 12-13

Rhwe nka Bakristu, rhurhashagalukira kone okuhugûkwa enyigirizo z’omusingi z’Ebibliya. Kugerera oburhabale bw’iroho litagatifu lya Nnâmahanga, rhuba rhulonzize ciru rhuyige n’“amahwe ga Nyamuzinda.” (1 Kr. 2:9, 10) Wanacihiriraho eprograme y’okujira ifunzo lyawe wene ly’oyegera Yehova bwenene. Kwa lwiganyo, wanayiga gurhi ayerekagamwo abakozi bage b’omu mango ga mîra obuzigire na gurhi oko kukuyemezize n’obwalagale oku nawe aba akuzigire. Wanayiga lugenda gurhi Yehova al’ipanzire enterekêro omu Israheli ya mîra na gurhi oko kushushine n’oku apanzire Abakristu ene. Erhi kandi, wanayiga bwenene amalebi Yezu ahikirizize omu mango g’akalamo kage n’omukolo gwage hanw’igulu. Okuyiga emyanzi ya ntyo kwanakulerhera omwishingo erhi wakakolesa e Index des publications des Témoins de Jéhovah erhi ecitabu Musaada wa Kutafuta Habari kwa Ajili ya Mashahidi wa Yehova. Okuyiga Ebibliya bwinjinja kwanazibuhya obuyemere bwawe n’okukurhabala ‘omanyîrire Nnâmahanga.’​—Mig. 2:4, 5, Mashi Bible. w23.10 buk. 18-19 cif. 3-5

Oluderho “bwenene” entumwa Petro yakolesagya lwanahugûlwa luderho oku lundi “kulambula.” Ecigabi ca kabirhi c’ogo mulongo ciyerekine ebi obo buzigire bwakarhuhashisa okujira. Okuzigirana bwenene kunarhurhabale lyo rhuzaza ebyaha bya bene wirhu. Rhwanaganirira obuzigire mw’eyi njira: Rhunagwarhe obuzigire bwirhu na maboko abirhi, kuli nka kula rhwakarhôla ecitambara cigali n’okucilambula bwenene, lyo cibwikira arhali caha ciguma cone erhi bibirhi cikone lyo cibwikira “omwandu gw’ebyaha.” Okuzaza erhi kubwikira luli luderho lw’olwiganyo lukolesibwe omu kuganirira okubabalira. Nka kula oluhande lw’ecitambara lwakabwikira ishembo lilebe, obuzigire bwanabwikira obuzamba n’okurhaba bimana kw’abandi. Obuzigire bwirhu bushinganine bube busêzire bwenene lyo rhubabalira obuzamba bw’abirhu bemezi, ciru akaba kwanaba kuzibu bwenene okujira ntyo mango maguma na maguma. (Kl. 3:13) Erhi rhuhasha okubabalira abandi, rhunayerekane oku obuzigire bwirhu busêzire n’oku rhulonzize okushagalusa Yehova. w23.11 buk. 11-12 cif. 13-15

Erhi Mwami Yosiya agwerhe myaka 26, arhondera okulumula ehekalu. Erhi ali ajira ogo mukolo, abandâna “ecitabu c’amarhegeko, aga Nyamuzinda ahâga Musa.” Erhi ciri casomwa, oko kwashumya mwami arhôle omuhigo gw’okurhumikira ebi cali cidesire. (2 Nga. 34:14, 19-21) K’olonzize okasoma Ebibliya ngasi mango? Akaba warhangire okuyisoma, k’onashagalukire okujira ntyo? K’onabîke amandiko gakakurhabala? Erhi Yosiya agwerhe myaka hofi 39, ajira igosa lyarhumaga aheza obuzine bwage. Acilangalira yene ahali h’okuhûna Yehova obulongozi. (2 Nga. 35:20-25) Hali isomo oko kurhuyigirizize. Rhube rhukola rhukuzire bwenene erhi nanga erhi rhube rhukola rhugwerhe myaka minji rhuli rhwayiga Ebibliya erhi nanga, rhugwasirwe rhugendekere rhwalonza obulongozi bwa Yehova. Oko kuhiziremwo okuhûna Yehova obulongozi ngasi mango kugerera isala, okuyiga Akanwa kage, n’okuyumvirhiza amahano g’Abakristu bakuzire kiroho. Oko kwanarhurhabala rhuyake okujira amagosa madarhi kwananarhurhabala rhube n’omwishingo.​—Yk. 1:25. w23.09 buk. 12 cif. 15-16

Ebibliya eganirire bakazi banji bali lwiganyo lwinja bal’izigire Yehova banakag’imukolera. Bali ba “lugero” na ba “kucîkubagirwa omu ngasi kantu.” (1 Tm. 3:11) Na kandi, bali birhu banabona omu cigamba cabo enyiganyo nyinja z’abakazi Bakristu bakuzire kiroho bakayiga. Mwe bali birhu muciri misole, ka mwanacishoga bakazi balebe Bakristu mumanyire bakuzire kiroho mwakayiga olwiganyo lwabo? Mukalaba amorhere gabo minja; buzinda murhanye gurhi mwakakagayerekanamwo. Oborhere bw’obulagire bwenene burhabala omuntu abe Mukristu okuzire kiroho buli bwirhohye. Erhi akaba omukazi ali mwirhohye, anabe n’obwîra bwinja haguma na Yehova n’abandi. Kwa lwiganyo, omukazi ozigire Yehova anacishoge okurhumikira n’obwirhohye akanuni Larha wirhu w’omu mpingu ahizireho lugenda obulongozi. (1 Kr. 11:3) Ako kanuni kanakolesibwe omu njira y’obwalagale omu cigamba n’omu mulala. w23.12 buk. 19 cif. 3-5

Yehova alonzize omulume azigire mukage n’okushibirira amalagirire gage g’omubiri, ag’ekandalala n’ag’ekiroho. Okukuza obuhashe bw’okurhanya, okuyeresa abakazi obukenge, n’okuba wa kulangalirwa, byanakurhabala ly’oba mulume mwinja. Enyuma z’okuja omu buhya, wanaba ishe w’omulala. Bici wakaciyigiriza kugerera olwiganyo lwa Yehova lugenda okuba ishe mwinja w’omulala? (Ef. 6:4) Yehova abwizire Omugala Yezu n’obwalagale oku amuzigire anamuyemire. (Mt. 3:17) Erhi wakahikira okuba ishe w’omulala, ngasi mango okayemeza abana bawe n’obwalagale oku obazigire. Okabavuga omunkwa ngasi mango oku bintu binja bahikirizize. B’ishe w’omulala bakulikira olwiganyo lwa Yehova banarhabale abana babo okuba balume na bakazi Bakristu bakuzire kiroho. Wanacirheganya okuba ishe mwinja w’omulala ene omu kuyereka abandi obuzigire omu mulala n’omu cigamba n’omu kubashibirira, omu kuciyigiriza akubayeresa oku oba obazigire n’oku baba ba ngulo ndarhi kuli we.​—Yn. 15:9. w23.12 buk. 28-29 cif. 17-18

Ciru akaba rhuli bakozi bishwekerezi ba Yehova, rhunalwise amazibu n’endwala zihikira abantu boshi. Kandi byanahûna rhulembere okuhagalikwa n’okulibuzibwa n’abantu bashomba abakozi ba Nnâmahanga. Ciru akaba Yehova arharhucika oku mazibu ga ntyo, arhulaganyize oku arhurhabala. (Iz. 41:10) Kugerera oburhabale bwage, rhwanagendekera rhwaba n’omwishingo, rhwanarhôla emihigo minja, n’okugendekera rhwabêra bishwekerezi kuli ye ciru n’omu mango mazibu bwenene. Yehova alaganyize oku arhuha ebi Ebibliya ehamagire “omurhûla gwa Nyamuzinda.” (Fl. 4:6, 7) Ogo murhûla guhugwîre ehali y’okurhulirira omu bukengere n’omu murhima rhuba nayo enyanya z’obwîra bwinja rhugwerhe haguma naye. Ogo murhûla guba “gulushire ngasi nkengero”; guba mwinja bwenene kulusha oku rhwakarhanya. Ka hali amango okola osomirwe omu kuciyumva orhulirire enyuma z’okusalira Yehova n’obushiru? Oko waciyumvagya orhulirire go ‘murhûla gwa Nyamuzinda.’ w24.01 buk. 20 cif. 2; buk. 21 cif. 4

Okuzigira Nnâmahanga kunashumye abantu bishwekerezi bakuze izino lyage n’omurhima gwabo goshi. Mwami Daudi al’ihugusirwe oku okukuza izino lya Yehova kuli kumukuza ye nnene. Izino lya Yehova lihiziremwo irenge lyage, co cirhumire linarhume rhwarhanya oku morhere gage minja goshi n’ebijiro byage binja bwenene. Daudi al’ilonzize abone izino ly’ishe nka litagatifu n’okulikuza. Al’ilonzize okujira ntyo kugerera ebyamuli oku ‘ndubi y’omurhima,’ ko kuderha n’omurhima gwage goshi. Ko n’oko Abalevi bakagilongoza abandi omu kukuza Yehova. Bal’iyemire n’obwirhohye oku enderho zabo zirhakahash’iriyerekana ciru n’ehitya obukuze izino lya Yehova lishinganine. (Neh. 9:5) Buzira karhinda, obo bukuze bw’obwirhohye na bwa kurhenga oku murhima bwashagalusize Yehova. w24.02 buk. 9 cif. 6

Yehova arhakubone oku oli wa busha erhi wakayabirwa okuhikira omuhigo orhagwerhi obuhashe bw’okuhikira. (2 Kr. 8:12) Akantu kakarhuma orhahikira omuhigo gwawe kanakuyigiriza binji. Okakengera ebi wamakahikiriza. Ebibliya edesire oku “Nyamuzinda arhali mubula burhondekezi [erhi bushinganyanya] mpu ayibagira ebijiro binyu.” (Hb. 6:10) Co cirhumire nawe orhashinganini oyibagire ebi wajijire. Okarhanya kw’ebi wamakahikiriza, kwa lwiganyo nk’okujira obwîra haguma na Yehova, okuganirira abandi oku bimuyerekire, erhi okubatizibwa. Nk’oku wajijire amajambere n’okuhikira emihigo y’ekiroho omu mango gageraga, wanagendekera wajira amajambere kuhika ohikire omuhigo gwawe. Kugerera oburhabale bwa Yehova, wanahikira omuhigo gwawe. Amango oli wagendekera wacihangana ly’ohikira omuhigo gwawe gw’ekiroho, orhayibagiraga okushagaluka omu kubona gurhi Yehova ali akurhabala n’okukugisha omu mango oli wacihangana okuguhikira. (2 Kr. 4:7) Erhi akaba orharhamiri, wayish’ihâbwa ciru migisho minji bwenene.​—Gl. 6:9. w23.05 buk. 31 cif. 16-18

Yehova analonze enjira akayerekamwo abakozi bage oku abazigire anabashagalukire. Amandiko gaganirire hali ibirhi Yehova abwiragamwo Yezu oku amuzigire anamusima. (Mt. 3:17; 17:5) Ka wanalonza Yehova akuyemeze oku aba akuzigire? Yehova arharhuganiza kurhenga empingu, cikone anarhuganize kugerera Akanwa kage, Bibliya. “Rhwanayumva” izu lya Yehova lirhubwizire oku aba arhushagalukire omu kusoma enderho za Yezu ziba omu Injili. Yezu ayerekine n’obwimana amorhere g’Ishe. Erhi rhwakasoma oku Yezu abwiraga abanafunzi bage barhali bimana cikone bishwekerezi oku abashagalukire, nirhu rhwanarhanya oku Yehova ali arhubwira ezo nderho. (Yn. 15:9, 15) Erhi amalibuko gakarhuhikira, oko kurhayerekana oku rhurhaciyemirwi na Yehova. Lubero n’oko, kunarhuhe obulyo bw’okuyerekana kunganaci rhuzigire Yehova na kunganaci rhumulangalire.​—Yk. 1:12. w24.03 buk. 28 cif. 10-11