Oyake Iroho ly’Okucikaliza Liri omw’Igulu Ene
KA WABWINE oku bantu banji omw’igulu banaciyumve oku bashinganine bahâbwe olukengwa lwago-lwago, erhi kujirirwa omu njira yago-yago? Ciru bakajirirwa gurhi, banaciyumve oku bashinganine bajirirwe binji kulusha. Ezo ntanya ziyimangire oku borhere bw’okucikaliza n’obw’okurhavuga omunkwa, morherhe gayerekine oku rhuli omu nsiku nzinda.—2 Tm. 3:2.
Kobinali, oborhere bw’okucikaliza burhali buhyahya. Adamu na Eva bahizire okucishoga bone ebinja n’ebibi, n’oko kwalerha amazibu madarhi. Magana malebe g’emyaka enyuma z’aho, Mwami Uziya w’e Yuda arhanya oku al’ishinganine okuyoca obukû omu hekalu, cikone eryo lyali igosa lidarhi kuli ye. (2 Nga. 26:18, 19) Ko n’oko, Abafarizeyi n’Abasadukayo bal’iyemire oku bal’ishinganine okuyeresibwa olukogo lwago-lwago lwa Nnâmahanga mpu bulya kone bali b’omu iburha lya Abrahamu.—Mt. 3:9.
Rhuzungulusirwe n’abantu bali ba kucikaliza, n’obo borhere bwabo bwanarhuyahukira. (Gl. 5:26) Nkaba rhwanarhondera rhwarhanya oku rhushinganine rhuhâbwe lukengwa lulebe erhi kujirirwa omu njira ndebe yago-yago. Gurhi rhwakayakamwo entanya za ntyo? Lyo rhuhasha okujira ntyo, rhushinganine rhuhugûkwe entanya za Yehova lugenda oko. Hali makanuni abirhi g’Ebibliya gakarhurhabala.
Yehova ye higa ebi rhushinganine rhuhâbwe. Rhuganirire nyiganyo ndebe.
Omu mulala, omulume alagirire oku kuciyumva akenzirwe na mukage, n’omukazi alagirire oku kuciyumva azigirwe n’iba. (Ef. 5:33) Omulume n’omukazi barhôline, ngasi muguma ashinganine ayerese owabo yene amasime, c’arhali abandi bantu. (1 Kr. 7:3) Abana bashinganine barhumikire ababusi babo, n’ababusi bashinganine bazigire n’okurhabala abana babo.—2 Kr. 12:14; Ef. 6:2.
Yehova adesire oku omu cigamba, abagula bashinganine bakengwe enyanya z’omukolo gwabo muzibu. (1 Ts. 5:12) Ciru akaba ntyo, barhagwerhi ehaki y’okurhambula bene wabo na bali babo.—1 Pt. 5:2, 3.
Mungu ahîre amarhegesi ga bene bantu ehaki y’okulipisa amatakse n’okukengwa na bacikala bago.—Rm. 13:1, 6, 7.
Enyanya z’obuzigire bwage, Yehova anarhuhe binji bwenene kulusha ebi rhushinganine. Enyanya z’okuba kwirhu banya-byaha, kufâ kone rhuba rhushinganine. (Rm. 6:23) Ciru akaba ntyo, Yehova anarhuhe migisho minji bwenene enyanya z’obuzigire bwage bwishwekerezi kuli rhwe. (Enna. 103:10, 11) Ngasi mugisho arhuha erhi mukolo mulebe omu cigamba, anarhuhe go enyanya z’olukogo lwage lurhashinganinwi.—Rm. 12:6-8; Ef. 2:8.
OKU RHWAKAYAKAMWO OKUBA N’IROHO LY’OKUCIKALIZA
Obe masu lugenda entanya z’er’igulu. Buzira kumanya, nkaba rhwanarhondera rhwarhanya oku rhushinganine okuhâbwa binji kulusha abandi. Omu kukolesa olwiganyo lw’abakozi bakamarhaga dinari nguma, Yezu ayerekine oku kwanaba kulembu bwenene okurhondera rhwaba n’entanya za ntyo. Bakozi baguma barhonderaga bakola sezi bwenene banakola omulegerege goshi okw’izuba likali; abandi bakola nsa nguma yone. Ecigusho cirhanzi carhanya oku cal’ishinganine okukamarha nsaranga nyinji enyanya z’omukolo munji cajiraga. (Mt. 20:1-16) Omu kukolesa olo lwiganyo, Yezu ayerekana oku abanafunzi bage bashinganine barhimukwe n’ebi Mungu ashagalukire okubaha.
Abalume bakolaga omulegerege goshi barhanyize oku bal’ishinganine okukamarha nsaranga nyinji kulusha
Obe wa kuvunga omunkwa, orhakag’ilonza okuhâbwa binji bwenene. (1 Ts. 5:18) Oyige olwiganyo lw’entumwa Paolo, orhahûnaga bene wabo b’e Korinti bamuhe ebintu al’ilagirireko ciru akaba al’igwerhe ehaki y’okujira ntyo. (1 Kr. 9:11-14) Rhushinganine rhuvuge omunkwa oku ngasi mugisho rhuhâbirwe n’okuyaka iroho ly’okulonza okuhâbwa binji bwenene.
Entumwa Paolo erhahûnaga oburhabale bw’ensaranga
Obe mwirhohye. Amango muntu mulebe ali arhanya bwenene oku bunguke bwage yene, kanji-kanji anarhondere aciyumva oku ashinganine abe na binji kulusha ebi agwerhe. Obwirhohye bo bufumu bw’ezo ntanya mbi bwenene.
Obwirhohye bw’omulebi Daniyeli bwarhumire aba wa ngulo ndarhi kuli Yehova
Omulebi Daniyeli ayerekine olwiganyo lwinja bwenene lw’obwirhohye. Omulala akuliragamwo, iranga lyage linja, obwenge bwage, n’obuhashe agwerhe byakarhumire arhanya oku enjira yago-yago ajiriragwamwo n’olukengwa lwago-lwago ahâbagwa, al’ibishinganine. (Dan. 1:3, 4, 19, 20) Cikone, Daniyeli abêra mwirhohye, n’obo borhere bwamujira abe wa ngulo ndarhi omu masu ga Yehova.—Dan. 2:30; 10:11, 12.
Lekagi rhuyake iroho ly’okucikaliza liri hoshi omw’igulu ly’ene. Ahali h’okuba n’ery’iroho, rhugendekere rhwaba n’omwishingo omu ngasi mugisho Yehova arhuha kugerera olukogo lwage lurhashinganinwi.