Oku Wakabamwo Mwîra w’Okunali

KA HALI amango wal’igwerhe amazibu orhanagwerhe carhabala? Rhulamire omu mango mazibu gakarhuma rhwaciyumva rhuvunisire omurhima rhunali kahumba. (2 Tm. 3:1) Ciru akaba ntyo, rhurhagwasirwi rhulwise amazibu g’akalamo rhwene. Ebibliya eyerekine obulagirire bw’okuba n’abîra b’okunali omu “mbaka.”​—Mig. 17:17.

OKU ABÎRA B’OKUNALI BAKARHABALAMWO

Obwîra entumwa Paolo yagwerhe haguma n’abakag’ibalama haguma naye bwamudwirhire obunguke. (Kl. 4:7-11) Amango Paolo al’ishwekirwe e Roma, abîra bage bakag’ijira emikolo yene arhagwerhe obuhashe bw’okujira. Kwa lwiganyo, Epafrodito arhabire Paolo omu kumuhisako ebintu bene wabo na bali babo b’e Filipi bamurhumiraga. (Fl. 4:18) Tikiko ahêkire ebigamba biri lubero amaruba ga Paolo. (Kl. 4:7) Kugerera oburhabale bw’abîra bage, Paolo ahikirizize omukolo gwage ciru n’amango al’ishwekirwe omu nyumpa erhi amango ali omu prizo. Gurhi wakabamwo mwîra w’okunali ene?

Hali enyiganyo z’ene ziyerekine obulagirire bw’okuba mwîra w’okunali. Rhuganirire olwiganyo lwa mwali wirhu muguma wayerekanaga oku ali mwîra w’okunali wa Elisabet, painiya w’akasanzi koshi w’omu Espagne. Erhi nnina wa Elisabet avumbulwamwo akansere karhakacibusirwe, oyo mwali wirhu akamurhumira mesaje nyinji z’okumuha omurhima ziyimangire oku mandiko g’Ebibliya. Elisabet adesire ntya: “Ezo mesaje zakampa emisi y’okulembera ngasi lusiku buzira kuciyumva kahumba.”​—Mig. 18:24.

Rhwanaseza obwîra bwirhu haguma na bene wirhu na bali birhu omu kubalunga okuboko omu mikolo y’ecigamba. Kwa lwiganyo, ka wanarhabala okugend’ihêka mwene wirhu okola mushosi erhi mwali wirhu okola mugikulu omu mutuga ly’ahika oku ntimanano erhi omu mukolo gw’amahubiri? Erhi wakajira ntyo, nkaba mwanahânana omurhima. (Rm. 1:12) Cikone, Bakristu baguma na baguma barhagwerhi obuhashe bw’okurhenga aha kâ. Gurhi rhwakabamwo bîra b’okunali kuli bo?

OBE MWÎRA W’OKUNALI OKU BARHAGWERHI OBUHASHE BW’OKURHENGA AHA KÂ

Bene wirhu na bali birhu baguma na baguma bagwerhe amazibu g’amagala erhi akandi kanga karhuma barhahika oku ntimanano za busu oku busu. Rhuganirire olwiganyo lwa mwene wirhu muguma ohamagalwa David, wavumbulagwamwo akansere. Ajijire myezi ndarhu ali abukwa ako kansere. Mwago mango David akag’ibukwa, ye na mukage Lidia bakag’icilunga oku ntimanano kugerera e vidéoconférence.

Burhabale buhi abîra babo b’omu cigamba babahîre? Enyuma za ngasi ntimanano, baguma na baguma bakag’iba aha Nyumpa y’Obwami bakag’ijira okwabo koshi lyo baganiza David na Lidia kugerera e vidéoconférence. Kandi, erhi David na Lidia bakahânyire amashuzo, enyuma z’aho ababo bemezi bakag’ibarhumira emesaje z’okubaha omurhima. Malehe gahi oko kwadwirhe? David na Lidia barhakag’iciyumva kahumba bwenene.

Ka rhwanacilunga omu mukolo gw’amahubiri haguma na bene wirhu na bali birhu barharhenga aha kâ? Omu kujira mpindûlo ndebe nsungunu, rhwanayerekana oku rhurhasag’iyibagira abali balwisa amazibu ga ntyo. (Mig. 3:27) Nkaba wanapanga kasanzi kalebe ly’ohubiri haguma nabo omu kuyandika amaruba erhi kugerera etelefone. Bene wirhu na bali birhu barhacirhenga aha kâ banaba n’obuhashe bw’okucilunga oku ntimanano z’amahubiri kugerera e vidéoconférence. David na Lidia bashagalukire ogo mupango. David adesire ntya: “Okuba kone haguma n’ecikundi cirhu c’amahubiri oku nshambalo nyofofi n’isala lyofi kwakag’irhuha omurhima bwenene.” Kandi erhi akaba oko kurhakalerha amazibu kunashinganine, kasanzi oku kandi wanapanga okulerha omwanafunzi w’Ebibliya aha mw’omuhubiri orhacirhenga aha kâ lyo mulongoza ery’ifunzo haguma naye.

Erhi rhukola haguma na bene wirhu na bali birhu barhacirhenga aha kâ n’okucibonera amorhere gabo minja, oko kunarhume rhwabayegera bwenene. Kwa lwiganyo, erhi ohubiri haguma n’abahubiri ba ntyo n’okucibonera gurhi bali bakolesa Akanwa ka Mungu n’obulenga lyo bahuma oku murhima gwa muntu mulebe, nkaba onabashagalukire ciru bwenene. Omu kulunga abinyu bemezi okuboko omu mikolo y’ekiroho, wanayushûla omubalè gw’abîra bawe.​—2 Kr. 6:13.

Paolo arhulirizibwe omu kuba haguma n’omwîra wage Tito. (2 Kr. 7:5-7) Ogo mwanzi gurhukengezize oku rhwanaha abali omu bulagirire oburhulirize arhali omu kubayumviza obwonjo kone, cikone kandi n’omu kuba haguma nabo n’okujira oku rhwakanahasha koshi lyo rhubarhabala.​—1 Yn. 3:18.

OBE MWÎRA W’OKUNALI OKU BALI BALIBUZIBWA

Bene wirhu na bali birhu b’e Russie bayerekine olwiganyo lwinja omu kurhabalana. Rhuganirire ebyahikiraga Sergey na mukage, Tatyana. Enyuma z’abapolisi okusagarha omu nyumpa yabo, babahêka lyo baj’ibadosa amadoso. Tatyana arhang’ilikûlwa anagaluka aha mwage. Sergey adesire ntya: “Erhi [Tatyana] ahika aha kâ ntya, mwali wirhu muguma w’oburhwali ayish’imulambagirira. Abandi bîra bayisha banarhurhabala okuc’ibipanga ebintu bwinja omu nyumpa yirhu.”

Sergey ayushwîre ntya: “Ensiku zoshi nanshagalukire olwandiko lw’Emigani 17:17, ludesire, ‘Mwîra wa muntu obâ amuzigîre ngasi mango, kw’anabâ nka mwene wabo omuntu omu mbaka.’ Nahugûsirwe ezo nderho bwinja bwenene mw’ago mango g’okulibuzibwa erhi mba ntagwerhi buhashe bw’okulwisa ago mazibu niene. Yehova ampîre abîra barhajira boba babaho ngasi mango lyo bantabala.”a

Ene rhulagirire oku burhabale bw’abîra birhu omu mango mazibu. Rhwanayish’ibalagirirako ciru bwenene omu mango g’amalibuko madarhi. Co cirhumire, lekagi rhugendekere rhwajira okwirhu koshi lyo rhuba bîra b’okunali mwa gano mango!​—1 Pt. 4:7, 8.