Idoso Lilembu Ngasi Muntu Akadosa

Mary n’iba, John,a balamire omu eneo y’igulu bihashikanamwo okuganirira bakozi banji barhenga e Philippines omwanzi mwinja. Omu mango gw’endwala y’okuyahukira y’e COVID-19, Mary arhondezize amafunzo g’Ebibliya arhali omu cihugo alamamwo cone, cikone kandi n’omu gandi maeneo g’igulu. Gurhi ajijiremwo ntyo?

Mary akag’idosa abanafunzi bage b’Ebibliya ntya: “Ka hali owundi muntu omanyire wakalonza okuyiga Ebibliya?” Erhi bakayemire, akag’ibadosa erhi banamurhabala amanyane nabo. Okudosa ery’idoso lilembu, kanji-kanji kunabe n’amalehe minja. Bulya gurhi? Bulya abantu bashagalukira Akanwa ka Mungu, kanji-kanji banalonze okuganirira abantu b’omu mulala gwabo n’abîra babo ebi bali bayiga. Malehe gahi okudosa ery’idoso kwadwirhe?

Jasmin, mwanafunzi muguma w’Ebibliya wa Mary, amurhabire okumanyana n’abandi bantu bani barhonderaga nabo okuyiga Ebibliya. Kristine, muguma muli bo, ashagalukira bwenene ifunzo, n’oko kwarhuma ahûna Mary akayiga haguma naye kabirhi omu mugobe. Erhi Mary adosa Kristine erhi hali owundi muntu amanyire wakalonza okuyiga Ebibliya, Kristine ashuza ntya: “Neci, nakurhabala omanyane n’abîra bani.” Omu migobe misungunu, Kristine arhabala Mary okumanyana na bîra bani bal’ilonzize okuyiga Ebibliya. Buzinda, Kristine arhabala Mary okumanyana n’abandi bîra bage, baguma na baguma muli bo nabo baja bamurhabala okumanyana n’abandi.

Kandi Kristine al’ilonzize omulala gwage omu Philippines guyige lugenda Ebibliya. Muli ntyo, aganiza omwali Andrea. Oku murhondero, Andrea akag’irhanya ntya: ‘Abahamirizi ba Yehova hiba hidîni hya bagoma, barhaba bayemire Yezu, bananakolese Endagano ya Mîra yone.’ Cikone, enyuma z’okuyiga liguma lyone, ahugûkwa oku ebyo akag’irhanya lugenda Abahamirizi ba Yehova byali bya bunywesi. Amango g’ifunzo lyage, akag’iderha ntya: “Ebyo bigwasirwe bibe biri by’okuli bulya Bibliya ebidesire!”

Enyuma za kasanzi kalebe, Andrea arhabala Mary okumanyana na bîra babirhi n’owabo munya-kazi, na boshi barhondera okuyiga Ebibliya. Kandi, Andrea al’igwerhe nashenge wakag’ihamagalwa Angela. Angela ali muhurha n’ensiku zoshi akag’iyumvirhiza amango Mary akag’iba ali ayiga haguma na Andrea, cikone Mary arhal’imanyire ntyo. Lusiku luguma, Angela ahûna Andrea amurhabale okumanyana na Mary anahûna elyage ifunzo ly’Ebibliya. Angela ashagalukira ebi akag’iyiga. Omu mwezi muguma gone, abîka mandiko manji g’Ebibliya omu bukengere analonza okukayiga kani omu mugobe! Kugerera oburhabale bwa Andrea, Angela arhondera okukacilunga oku ntimanano kugerera e vidéoconférence.

Erhi Mary amanya oku Joshua, iba wa Kristine, akag’iba ali aha burhambi amango g’ifunzo haguma na Kristine, Mary amudosa erhi analonza akacilunga kw’ery’ifunzo. Joshua aderha ntya: “Nakayumvirhiza kone cikone orhandosagya idoso lyoshi-lyoshi; okandosa idoso, nacigendera.” Omu miniti irhanu mirhanzi, Joshua adosa madoso manji kulusha aga Kristine adosize analonza okugendekera n’ezo nshambalo ziyimangire oku Bibliya.

Idoso lilembu lya Mary lyarhuma apata mafunzo manji g’Ebibliya. Ajira emipango lyo banji muli bo barhabalwa n’abandi Bahamirizi. Amafunzo g’Ebibliya goshi Mary arhondezize omu kudosa ery’idoso lilembu gali 28 omu bihugo bini biri lubero.

Jasmin, mwanafunzi murhangiriza oganirirwe mw’ogu mwanzi, abatizibwe omu Mwezi gwa 4, 2021. Kristine abatizibwa omu Mwezi gwa 5, 2022 anagalusire e Philippines ly’aba haguma n’omulala gwage. Bandi banafunzi babirhi Kristine arhabalaga Mary okumanyana nabo, nabo babatizibwe. Angela abatizibwe myezi misungunu enyuma z’okubatizibwa kwa Kristine n’ene akola ali painiya w’akasanzi koshi. Joshua, iba wa Kristine, na Andrea, mwana-nyere wabo, na bandi banafunzi balebe b’Ebibliya bali bajira amajambere minja.

Omu kagana karhanzi, omwanzi mwinja gwalandire duba-duba egarhi k’abantu b’omulala n’abîra. (Yn. 1:41, 42a; Ebj. 10:24, 27, 48; 16:25-33) Wanadosa abanafunzi bawe b’Ebibliya n’abandi basimisibwe n’okuli er’idoso: “Ka hali owundi muntu omanyire wakalonza okuyiga Ebibliya?” Ntaye omanyire mafunzo anga gakarhondezibwa enyuma z’okudosa ery’idoso lilembu ngasi muntu akadosa.