Okayiga Onahizire Okuganirira Abandi ebi Wayizire

Amango g’okuyiga ganarhuma rhwaciyumva bwinja, cikone rhwanaciyumva bwinja ciru bwenene erhi rhwakaganirira abandi obuhirhi bw’ekiroho bw’okuhâna omurhima rhwapasire. Olwandiko lw’Emigani 11:25 ludesire ntya: “Odômera abandi naye àyishidômerwa.”

Amango rhuli rhwaganirira abandi ebi rhwayizire, oko kunarhume kwaba kulembu bwenene kuli rhwe okubikengera n’okubihugûkwa bwinja. Na bulya ebi rhwayizire byanalerhera abandi obunguke, rhunashagalukire okushangira obo buhirhi haguma nabo.​—Ebj. 20:35.

Opime okujira ntya: Omu mugobe gwayisha, olonze obulyo bw’okuganirira muntu mulebe ebi wayizire. Wanabiganirira omuntu w’omu mulala, omuntu w’omu cigamba cinyu, owinyu munyakasi, owinyu mwanafunzi, omulungu, erhi muntu mulebe orhimanine naye omu mukolo gw’amahubiri. Opime okubiganira omu nderho zawe wenene n’omu njira nembu na ya bwalagale.

Okengere ntya: Okaganirira abandi ebi wayizire ly’obaha omurhima, ci arhali ly’obasomeza.​—1 Kr. 8:1.